كلمات لطمية مرت سنة ونص باسم الكربلائي
اخر تحديث : 29-10-2024
كلمات لطمية مرت سنة ونص باسم الكربلائي
محتويات كلمات لطمية مرت سنة ونص باسم الكربلائي
مرت سنة ونص وانه بونيني
يومية اموت ودمعي يحييني
بالشام چم مرة انحفر گبري
چم مرة مت وما خلص عمري
عيني حسيني .. مرت سنة ونص من توادعنه
وادعي ابدمعي .. هلبت اموت والله يجمعنه
چنه چنة .. روح اعله جسمين الله وزعنه
عشنه ابعشنة .. مثل الحمام اودهري ضيعنه
ضليت اتاني يمته نتلاگه ؟
اي والله والعباس مشتاگه
عگبك يماي اعيوني لوتدري
چم مرة مت وماخلص عمري
جمري ابصدري .. عگبك يخي ماتنشد اشلوني
حالي اشحالي .. الذبحوك مرة عشرة ذبحوني
ميتة يمته .. يوم آل أمية فرجة سووني
هضمة زحمة .. ابحچي الي ماينگال سمعوني
ابعين الشماته الحادي خلاني
طولي يشوفه القاصي والداني
تدري يخويه امن انهتك ستري
چم مرة مت وماخلص عمري
موقف يكلف .. لو ردت اوصفه يگصر الساني
ابعظمي ابجسمي .. كل كتر ذكرة لسوط عدواني
عندي ابلحدي .. ستت اشهود اعله الي طگاني
امتوني اعيوني .. چتفي وادية وخدي وآذاني
ابهاي السنة ونص وانه يومية
بالطيف اشوفن روحي مسبية
عفية اعله گلبي ومانفذ صبري
چم مرة مت وماخلص عمري
حزني لني .. بالشام ميتة من گبل موتي
امشي نعشي .. ابهودج الناگة ايصير تابوتي
الحادي اينادي .. يله يزينب للقصر فوتي
كلفة وسفة .. مجبورة يطلع للزلم صوتي
ويزيد صاح ابصوته وتباها
اخت الگمر مچتوفة جبناها
ولمن صبح بيد الزجر امري
چم مرة مت وماخلص عمري
ابدفني جفني .. مايغمض إلا بجية اخواني
خلهم كلهم .. ايشوفوني من صرت اني مو اني
شوگي اعروگي .. يبسن وحزني غير الواني
صدلي گلي .. هم زينب انتي لوشخص ثاني
ضيعني لمن شافني يحگله
هوه السبي من زينب اشخله
ابصعدت الناگة وبسلب خدري
چم مرة مت وماخلص عمري
جروحي ابروحي .. وانه ابسنة ونص شنسه شتذكر
تدري ابفكري .. طف كربله يومية يتكرر
انعي ابسمعي .. طگت اضلوعك واهيه تتكسر
ابالي اگبالي .. ثيابك المصبوغة ابدمه المنحر
من انظر قميصك شذكر وشنسه
صوب الصدر مطبوع أثر رفسه
ابسيف الشمر لوتدري ياذخري
چم مرة مت وماخلص عمري
صعبة .. ابغربة .. بنت الحموله اتموت وحدهه
حيره .. ابديره .. البيهه انسبت وايصير مرقدهه
تنخه .. صرخه .. ومن الأهل محد حضر عدهه
خويه .. بويه .. لا أخو جاوبها ولا والدهه
گلبي ابمصابه والحزن ناده
ويلي اعله غربة عمة الساده
وآنه اعله زينب منكسر ظهري
چم مرة مت وماخلص عمري
لا تبخل علينا بالنشر في مواقع التواصل الاجتماعي طبعا بعد ان ينال اعجابك