كلمات لطمية واضح من دموعك باسم الكربلائي
اخر تحديث : 29-01-2023
كلمات لطمية واضح من دموعك باسم الكربلائي
محتويات كلمات لطمية واضح من دموعك باسم الكربلائي
واضح من دموعك...مو حاسب رجوعك
تكابر ما تكابر أدري متعود ... دروح إوداعت الله الله موجود
شفت بعيونك إحجايه هذا آخر لقاء إتقول
قصيره ليلة إوداعك بس ليل الفراق إيطول
تسير إبقافلة صبرك و تترك لي عذر مقبول
قوافل همي تمشي إوياك مو للطف عله المجهول
يالدمعي حلالك...خليني إعله بالك
دمع هجرك جمر يحرق بالخدود... دروح إوداعت الله الله موجود
قبل لا أودعك و ترحل أسألك يا أعز ناسي
سؤال اليجرح إحساسك قبل لا يجرح إحساسي
يتيمه لو صرت بعدك من يمسح على راسي
عليله و آني حقي إعليك أذكرك أدري ما ناسي
جاوبني ضروري ...و إجرحني إبشعوري
يبويه هالكلام اليوم مريود... دروح إوداعت الله الله موجود
ردت عمري إبجفاك إيطول حته إيكفي مأساتي
بعد جسمي يبويه إزغير ما يكفي الجراحاتي
باجر لو بجيت إعليك أنوح إبقد معاناتي
عصه موسه فلا تقدر تشطر بحر دمعاتي
يمسافر دخيلك...أنحب وي خليلك
أكابر لا تقلي و إنت مفقود... دروح إوداعت الله الله موجود
أريد أنفض إجروحي إعليك حته إوياي تتألم
أقلك ليش و شجم ليش خاف أحاجيها و أتندم
حنين و من أقلك ليش أضيفن فوق همك هم
و أعرف للحبيب إفراق إشما راد الشمل يلتم
يالغالي إشيصبرك...لو أبجي إعله صدرك
أخيرا و الكلام إيطول و إيزود... دروح إوداعت الله الله موجود
إفراقك ريح صرصر هب قلع سباحت أحلامي
و نمرود الهجر شب نار تحرق دمي و إعضامي
و لا عند الإسكندر سد يمنع موجة آلامي
وراكم أركض إبلا شوف و أحس الموت جدامي
هاي آخر وصيه ...لا تترك رقيه
أوصيك و كلامي إوياك مقصود... دروح إوداعت الله الله موجود
عليك الزهره يالغالي لحظه إوياي تتأخر
أريد أغفه عله إذراعك و أبوسك بوسه بالمنحر
يبويه إمن أنظر الخنصر أحس دلالي يتفطر
قلت عمي القمر وياك معقوله يصيبك شر
ما يخلف وعوده...لو طاحت زنوده
إشتقله لو تنقطر صاحب الجود... دروح إوداعت الله الله موجود
تظن أقدر أنام الليل و إنت إبعيد عن عيني
عتابي إبكثر شوقي إعليك بسما أقول ناسيني
تعال أصبحت كوم إجروح كلمن شكل ياذيني
و آنه أتأكدت منك أموت و ما تلاقيني
لو رحت إمن إيديه...من يسأل عليه
يبويه من يجي و الباب مسدود... دروح إوداعت الله الله موجود
واضح من دموعك
الحاج باسم الكربلائي
كلمات الشاعر السيد عبد الخالق المحنا
ليلة 3 محرم 1434 ه
حسينية أحمد عاشور بدولة الكويت
مونتاج وتنفيذ محمد الجابري
لا تبخل علينا بالنشر في مواقع التواصل الاجتماعي طبعا بعد ان ينال اعجابك