كلمات لطمية وينه حبيبي محمد بوجبارة
اخر تحديث : 14-07-2024
كلمات لطمية وينه حبيبي محمد بوجبارة
محتويات كلمات لطمية وينه حبيبي محمد بوجبارة
وكت الفجر مامستقر كلبي حاير
دعواتي إلك بويه لهلك تلفي باجر
دعوه حميدة وجهك تريده
بليلة كئيبة صابتني ريبه
فزيت أدور مثل الغريبة
كلبي وجعني والهم أخذني
مو مطمئنه يل واعدتني
وكت الفجر فزيت حسيت برزية
صليت إلك ودعيت ودموعي جريه
بهذا الدعه يابوي أدعو وشلت أديه
من كل طارق كون يحفظك ربي إليه
بسمك صحت بويه شوكت يمي أشوفك
صبري كضه رد عوضه مااعوفك
الظلت وحيدة وجهك تريده
تسألني عيني وشوكي وحنيني
انعه واكلها هسه يجيني
كل بالي يمك مشتاقة أشمك
والثم جفوفك وبروحي أضمك
صار شكثر والعين ماشافت خيالك
شنهو السبب ماجيت ما ادري شجرالك
أبالي أنت أدور وآنه أدري أعله بالك
يحنين الدلال محتاج الدلالك
أبنيتك محتاجتك رد عليها
بدونك بقت وتغربت ماتجيها
جيتك بعيده ؟ وجهك تريده
ليلة أعله ليلة دمعي أسيلة
تدري سفرتك صارت طويلة
منهو الاسأله وعليك أكله
يابويه هجرك سوالي عله
كل يوم أكول اليوم ترجع ياحياتي
وآنه أعله هذا الحال فاضت نايباتي
لنه أجاني حسين كلي ياغلاتي
أنتي يبعد الروح وحده من بناتي
هدني السهر حالي بخطر وأنت سكته
خوفي بقهر أسمع خبر ماسمعته
بنت العقيدة وجهك تريده
مرت ليالي وحسين اجالي
خله أعله راسي أيده وحجالي
سألته بنحيبي وينه حبيبي
فكده ذبحني وهو طبيبي
كلي بعد ميعود أيسي ياحميده
من القصر شمروه وتكطع وريده
وتالي بحبل جروه ومكيده أيده
وديني كتله أعليه محبوبي أريده
كلي بعد حان الوعد ماتشوفي
ظهره أنكسر وبلا نحر نوحي وانعي
السكنت البيده وجهك تريده
جتني رقية لزمت أيديه
بهذا مصابي تهون عليه
شافني أعاني بهمي السباني
كالتلي مثلج هم باجر أني
كتلها شنو يصير كولي يارقية
كالتلي رأس حسين احضنه بهاي أدية
أنتي إلي ماشفتي الابو بيوم المنية
بس آنه اشوفه بطشت والشيبة دمية
بذاك المحل يلفي الأجل بالخرابة
وأنتي بحزن كلبج يون وينه بابا
حالة شديدة وجهك تريده
لا تبخل علينا بالنشر في مواقع التواصل الاجتماعي طبعا بعد ان ينال اعجابك