عمرو حسن ولد في الاسكندرية عام 1987م هو شاعر مصري نشأ في اسرة بسيطة بظروف قاسية جدا حصل على بكالوريوس التجارة من جامعة قناة السويس نبغ في الكتابات وحبه للموسيقي والقراءة فكتب العديد من القصائد فقد افاد بأن كتاباته الأدبية ما هي إلا حصالة التجارب الحياتية التي يمر بها طوال الوقت وفيما يلي نذكر لكم قصائد عمرو حسن عن الحب والفراق قصائد عمرو حسن مكتوبة وحشتيني
قصيدة اللي بيحبك يصونك
اللي بيحبك يصونك
يبقي نور ساكن عيونك
اللي بيحبك يهاودك
لما يظهر فيك جنونك
يبقي فرحك لما تحزن
لما كل الناس تخونك
اللي بيحبك يضمك
ولما تتكسر يلمك
تبقي حاسس أنه دمك
اللي بيحبك يشيلك
تندهله علطول يجيلك
يبقي عطشان من سبيلك
ممكنه من مستحيلك
تلقى دمعه سلسبيلك
يمسح الأحزان بكمك
اللي بيحبك يحاوطك
يبقي مستحمل قساوتك
يبقي فاهم أمنياتك
إيه بتتمناه ف حياتك
جاف يقاوم استيكاتك
حضنه يشبه حضن امك
اللي بيحبك مرايتك
انت غايته وهو غايتك
يبقي حتة من حكايتك
يعني فاهمك من كلامك
من ملامحك وابتسامك
واما تكتر فيك الامك
يبقي متغرب بدونك
اللي بيحبك يشدك
لما تبقي وحيد ضعيف
يبقي اجمل حاجة عايشة
لما كل الكون سخيف
شخص لجل عيونك أنت
مستعد يعيش كفيف
شوف بقا مين اللي حبك
مين بيرهن عمره جنبك
أن لقيته بجد حبك
قول له كان الله ف عونك.
قصيدة هيبتا
نبدأ منين؟
من صدفة في الشارع
أو شارع الصدفة
أو أي شيء مدهش بيتم بين اتنين
من التقاء العين
أو من حاجات تانية
تبدأ من الدنيا
على اعتبارها كمين
بين إحنا والتانيين
ويبدأ التدوين
من أول السيرة
الصدفة تجمعنا
زي اللي خارج من كافيه بالليل
يخبط في كتف مهندسة بترول
أو عاملة في مصنع
تسقط ما بينهم أغنيات صدفة
لا يوطوا يجنوها ولا يسيبوها تكف
تكبر هنا شجرة مجهولة المصدر وشكلها مختلف
تنمو بفعل الوقت
وتصير مخازن للطيور والقش
البذرة صدفة والفروع علاقات
بالتالي يا حضرات
لا تهملوا الخطوات أو تمشوا مش شايفين
هتدوسوا على علاقات وبواقي بني آدمين
فتوخوا بعض الحذر
أو امعنوا في النظر
جايز تشوفوا اتنين واقع مابينهم شيء
هيكون لبكرة طريق
يشبه طريق بكرة
واتأملوا الحكايات
اتأملوا الحكايات
في الدنيا ياما حاجات أكبر من الرؤية
فبنمشي مانشوفهاش
شجرة هنا بتكبر بين حد جه وماراحش
وحد راح وماجاش
قصيدة بعد السكران مايفوق
وانتي بتقولي لصحابك
قد ايه انا شخص قاسي
وطبعي في غاية السيالة
ابقي قولي ان انا سبب البطالة
سبب انخفاض منسوب مياه النيل
خفة الدم اللي فيكي مهونه دمي التقيل
وان ذوقي كله ذوقك
واني بتمرمغ ف شوقك بس جاحد
اشتميني تعلي مني
ذمي سيرتي هتمدحيني
خرجي الطبع اللي فيكي وفرحيني
دول كاسين منقوعهم ايه اللي يجيبوني
ارمي عمري بين ايديكي واقول يادوب
خمرة ايه اللي تاخدني لواحدة بتكسر قلوب
كنت بستحمل مصايب مش ببين
عشت اقول ع الغلطه وارده
كنت اشوف الشوكة وردة
واوصف القاسي انه هين
قصيدة وحشتيني
ولو كل اللي عارفينك قالولك اني مانفعكيش
ولو كل اللي عارفينني قالولي بكره تنسيني
وحشتيني
ولو كل البشر قالوا ان انا عاصي
واني غلطت ف حياتي غلط ياما
ده واد تلفان وكل يومين معاه واحدة
وحتى فلان زعل وياه عشان واحدة
انا أصلا مانيش يوسف
ولو زوجة العزيز همت
وقالت هيت لك ياجميل
يجوز راح اميل
وممكن اضمها جهرا
يسيل من ضحكها نهرا
تدوب الاغنيات ف النيل
لكن مهما هاشوف وهاطوف ومهما قابلت ناس وظروف
هتبقي لوحدك القشة اللي جيت علشان تنجيني
وحشتيني
مافيش انسان مالوش ماضي
مافيش راجل مالوش أخطاء
لكن دايما ف نقطة ضعف
ونقطة ضعفي هي انتي
وطول الوقت كنت باقول
انا مابقتش عاوز شيء سواكي انتي
باحس معاكي اني مسيح
براءتك عاملة زي الريح
بتكنس ف الغلط بهدوء
وبابقي ف ضحكتك سكران
ومش عاوز لا انام ولا افوق
وكان فيه حل والله
وكان ممكن اكون بالوقت زوج صالح
ماليش ف المسئولية ساعات
ساعات طايش
لكن بالوقت كان ممكن اكون احسن
تسامحيني ف غلط فالت
وهاحلفلك بإني هاصلح العدلة التي مالت
بلاش تمثيل عشان أصلا
صياعتي وفشلي من غيرهم
ماكانش يجوز تحبيني
وحشتيني
ف كل مكان ف ذكرى معاكي متسابة
ايديا ف ايدك الطفلة باعدي معاك ف الشارع
ملامحك وانتي بتسمعي فيروز
نهارك وانتي بتواجهيه بشاي بحليب
وحكاياتك على صحابك
فلانة بتكرهك جدا
فلانة قالتلي ماتشوفيهوش
كلام قولتيه وكان لازم
ف وقت الجرح ماتقوليهوش
اكيد دلوقتي بتقولي
زمانه مولع الدنيا
بيغلط كل يوم عادي
خلاص فاكك بقا ومرتاح
وانا والله ف قيودك
كطير من كتر ما اتقيد
طلعله جناح
انا ف البعد متحاوط بطيف ريحتك
ولسه لحد هذا الوقت فاكر شكل تسريحتك
وتنهيدك
وشكل الساعة علي ايدك
طريقتك وانت بتغني
بعيد عنك حياتي عذاب
حياتك ايه بعيد عني
يا دنيا عرفتها فجأة
وارض لمستها بشويش
يا أطهر من رقم فلكي
ف عداد اسمه أكل العيش
بتحكمي ليه على غيابي
وف حضوري بتنسيني
رفضتي ان انتي تتسابي
وفجأة انتي اللي سيبتيني
وحشتيني
كأنك ف الغياب أقرب
وجودك بيزيد إذا بعدتي
رصيد ناقص ف كل غياب ووحدك ف الغياب زدتي
عرفتي ازاي..
عرفتي ازاي تشاركيني غنا التفاصيل..
بقيت متساب لكن شبطان.
شيطان طيفك ملاك ف شيطان
مخليني ف وسط الناس لكن وحدي
أشوف العمر بيعدي
وحسديني البشر ع ايه وانا بدونك؟؟
وايه الدنيا سوى عيونك؟
سوا حضنك ف وقت الخوف
يا عم الحاسد الطامع
تعالي وشوف طلل راجل ف عز الليل بيسرد قصته لروحه
ويشكي جروحه ل جروحه
ويظهر للبشر باسم
يعيش وكأنه مطمن
وهو في قلبه عجيب
شوفيلك حل ف غيابك..
يا إما رجوع من المبدأ
يا إما تقولي كيف أبدأ ف اي طريق ينسيني؟؟
قصيدة يا الحبيبة مشتاقلك
وإذا فاكرة اني البعد بيفرق بتهيألك
في فعيني مكان شبه اللمعة
اتحجر بعد مكان دمعة
لا أنا عارف أقوله وأبوح للناس
ولا عارف أخبيه جوايا
لسه في عيني أجمل واحدة
لسه في قلبي أول واحدة
وآخر واحدة
لسه في بعدك وانا بين الناس
حاسس وحدة
اصحابي لاموني
عشان حبيت واني اتعلقت
بيقولوا جراح بعدك هتطيب ومسافة وقت
عارفة المشكلة ايه في غيابك
أن انا حابك اكتر دلوقت
بمشي على ازاز وجعك حافي
وبقول للناس انوا تعافي
وإني ب move on
حاضن سماعتي وتلفوني وصوت مزكتك
ومصاحب نوته وكوبايه وشوية بن
أنا بكذب
كل اما بقول اني كويس وسليم
يومي مجرد يوم متكرر وسط الأيام
وكلامي عن الجاي من غيرك ده كلام في كلام
إنما عمري ما حسيت بسلام وبراحه بال
غير علي ايدك
ساعتي ما تمشيش غير لو كانت على مواعيدك
حوطت بظلك على داري ونسجت خيوط
وعرفت سكون وانا وياك
ما يعوضهوش في الدنيا بيوت
اديني اشارة انك سامعة
وانا هفضل باقي على وعودي
اديني امارة انك راجعة
وانا هستناك لحد ما اموت
الشوق لا بايدي ولا بايدك ولا دخل الناس
والحب ارادة رب الحب
اللي جمعنا وسط الأحداث
لا في حد بيختار الميله
ولا حجم الشيله ولا الاحساس
والعقل في أي علاقه مجرد مشرف عام
يكتب تقارير عن فشل القلب
وعن أمل الناس في الأيام
إنما في الآخر تقريره
لا بيعدل حال ولا يؤخذ بيه
القلب الآمر والناهي
والحاكم في الشوق وفي لياليه
وانا قلبي اللي دفعني لحبك
دفعة سباح هاوي في موجة
إداكي كاريزما وحسن حضور
وإداني لجوء ليكي وحوجة
وصلابتي وجلدي وطول صبري
مضغاهم بجمالك نوجة
وانا مش شاعر وسط الهوجة
ولا جايلي يومين وامشي لحالي
أنا شاعر له وزن وهيبة
وكلامه بيطلع في الغالي
فإذا قولت كلام يبقى أنا قاصده
وإذا قولت ملام يبقى أنا بعنيه
هنا مش درويش رهن قصايده
هنا في انسان وانتي وحشتيه
أنا مشتاقلك مشتاقلك
شوق السارح لرجوع باله
شوق متغرب وحشه عياله
فاقد شغفي ودفا انفاسي
فاقد رغبتي في البوح حتى
حاسس اني فقدت حواسي
بعد غياب الحاسة السادسة
وعشان انساكي عملت جهود
كل المفروض لاجل انساكي
والشي اللي قدرت اوصله
إن انا بتعافى وانا معاكي
ودا مش ذنبي
سبحانه اللي في سكتي جابك
واداکي قبول خلاكي النجم في ايامي
وخلاني اطول
واذا عايزة الشعر يلين ليكي وعايزاني اقول
اسمعي قولي
بيقول الشاعر يا حبيبتي
مش لاقي بنات بعدك غيرك
ولا ليا بلاد شبهك تاني
يا الفعل الخارج من قلبي
يا الكلمة الصادقة على لساني
كل ما تبعدي بيزيد قربك
وشاريكي في عز ما سايباني
قولي اتحرك وانا أطير عندك
قولي استني وهبقى مکاني
طيبي خاطري بكونك جمبي
كملي ناقصي وشدي عيداني
الحزن في حضنك يرضيني
والفرحة في بعدك وحشاني
والشعر اللي انا كاتبه بحاله
لولا ما جيتي لولا ما جاني
لو كان عاجبك شعري يا بختي
وإذا مش عاجبك هكتبو تاني
انا مشتاقلك وإذا فاكرة
إن انا لحظة نسيتك متهيألك
لسه في عيني والخ والخ
عندي استعداد افضل احايلك
انشاء الله أسرق سطرين من الجخ
بس تعودي وبعدها عادي
مهما تجيني صعاب محلولة
مدي ايديكي وخدي ايدي عشان
اخرج من الدايرة المقفولة
أنا مشتاقلك
واذا فاكرة ان لحظة نسيتك متهيألك
لسه في عيني أجمل واحدة
لسه في قلبي أول واحدة
وآخر واحدة
لسه في بعدك وانا بين الناس
حاسس وحدة أنا مشتاقلك
أنا مشتاقلك
قصيدة جوابي ده الأخير ليكي
يامعاليكي
ياست الحسن
ياسبب الحزن والعلة
ياشجرة حسبتها ضله وطلعت نار
بداية القول مساء الفل ع الأزهار على خدودك
مابنجرحش
ومابنسمحش حد يقول كلام عنك
لذلك ثم أما بعد
أنا الطفل اللي كان ف عنيكي متشعبط
يشوفك روحه تتلخبط
وقلبه ابن الحرام يضعف ويستعبط
كإنك زار وانا الدرويش
كإنك غار وانا الحرافيش
كإنك كنتي قرش حشيش
دخل رئتيني وملاني
كإنك دار وانا اللي ماليش
سوا الدار اللي لماني
بغض الجرح مين خان مين
ومين قصر مع التاني
وغض الطرف عن اسمك
وطعم خروجه ف لساني
أنا مليت من القصة ومن لعبة خلاص لسه
لقيتك غيمة ف حياتي حسبتك مطره قمت جريت
وفجأة لقيت مفيش غير ليل
سحابة ضلمة كنتي انتي
اشوفك ف الوجع بنتي
واحسك ارضي وسفينتي
وشمس بتملا ليلي شروق
مافيش كام يوم لقيتني بافوق
واشوف القاتل الفعلي
لقيتك أرض ماتضمش سوى المطاريد
وانا عيل بيفتح إيد يشوفك خط على كفه
عنيا عيال اذا بصيتي يتدفوا
حسبتك أم بتدور رحى الأحضان على عيالها
لقيتك ماسكة كاتم صوت
رصاصك فات وجع جواي
وهو ياحلوة يعني الموت
بيفرق شكله كان ازاي
وهو الجرح للستات ومش لينا ؟
ما فيه رجالة بتعيط
وفيه رجالة بتفكر ف عز الليل ف ناس باعوا
وفيه راجل اذا فات ف المحيط وجعه مابيساعه
وفيه عناوين بتتلخبط
وفيه بكره بيتشخبط
وفيه أطفال مايتولدوش ف مستقبل ماجاش قدام
وفيه زفة مابتقومشي
وفيه فرحة مابتدومشي
وفيه نغزة ف صميم الروح
ما دام ف القصة فيه دابح
أكيد ف القصة فيه مدبوح
ولو كان القتيل راجل
ف دمه بيبقي مش بالسهل
خسرتي معاه وجود الأهل
خسرتي الضهر والضمه
خسرتي الجمع واللمة
وبكره هتندمي لما
تحسي البرد من دونه
ياريتك شوفتي ف عيونه دموع الأب
أنا الشخص اللي كله ذنوب
لكن مليان حاجات تتحب
قصيدة مابتحبكش
بتتعب ليه وتزرع أرض مش أرضك
وليه سهران
وليه قلقان ومش نايم
وليه قاعد وليه قايم تجيب ف سيرتها ومشاعرك تسيل ع الارض
مابتحبكش والله
وكل اللي اتعمل بينكم حكاية وقت مش اكتر
كلامك كله كان عادي
ووردك مرمي ف الشارع من الشباك
بتضحكلك وتبقى معاك
وتحلفلك تكون وياك
مابتحبكش
بتبني ف ايه ؟
بتنكر ليه كلام واضح كضي الشمس
بقالك قد ايه مشتاق
لواحده كان لقاها فراق
وكنت معاها طفل كبير
حكيت للكل عنها بدون ماتتكلم
وكنت تشوفها فتسلم
وكنت تشم بارفانها فتعرف دارها ومكانها
وتعرف كل الوانها بلمسة ايد
ادي العيل ف وصف العيد
لا نفع الشاي ولا الحكايات
ولا الاحلام ولا البدايات
ولا الحواديت ولا السلامات
ولا الحرمات
ولا حتى الكلام بينكم
ف اول لحظة تختلفوا تهين ضلك
قصيدة حقك عليا
زعلانة ومن حقك طبعا تزعلي مني
انا لولا ان رجولتي بتمنعني اهاجم سربك
واقطع خيط الراحة ف دربك
كنتي هتلقيني قصاد بيتك
بتأسف علشان خليتك ليله تباتي وشكه ف حبي
انما حقك تزعلي مني
حقك تقفلي بابك وتشوفي اني عملت جريمه
انا من يومها
واخد روحي ف ركن بالومها
راحة بالي بعد غيابك لامه هدومها
وبتقول الدنيا بدونها بقت فاقده القيمه
ولا جي عشان قاتلاني الأيام ف غيابك
ولا بعمل حيله عشان ترضي ترجعي من تاني تقابليني
ولا جي اقولك سامحيني
الأمر اكبر من كده بكتير
الموضوع واصل لبعيد وابعد من ظنك بشويه
متغيره ايامي ف بعدك
باردة ايديا
زي ما أكون من كون تاني
وحشاني وكل الأشياء وياكي كمان وحشاني
كل اما افتكر اللي عملته باحسها أوهام
وباقول ده اكيد وقت عصاري وتغفيل أحلام
مش ممكن أكون خاني التعبير
وغواني شيطاني ف لحظة طيش
ونطقت اللي بعيد عن قلبي وشايفاه عنيا
حقك عليا
انا برضه عشان بعرف انقي
دلعها كإن مافيش ف الدنيا بنات
وراها أمان مش سهل تعيش يوم ف غيابه
اخترت اللي اتربت تتصان
اللي خصامها هدوء ومودة
واللي مصالحتها اسف وحنان
وعشان كل المذكور وعشان
غضبان ياجميل مني وزعلان
عندي استعداد اتأسفلك كيف ماتحبي
انا زي ماسابلي ابويا الضيق والعصبيه
زي ماسابلي دماغي الناشفه
وسابلي كرامتي اللي عشانها مافيش لقتيل ديه
زي ماسابلي الحنيه
تلاتين سنه عايش مع امي عمري ماشفتها يوم متضايقه
يتخانقوا ساعات
يختلفوا كتير
وتبان زعلانه ومش طايقه
انما بعدها يبقوا اتراضوا واشوفها ف اخر اليوم رايقه
وزي مابيسوق هو المركب كانت سايقه
الرجاله
يخجلوا يكسروا خاطر روحهم
الرجاله اللي انا جي من بينهم
بيحطوا الست ف عين عينهم
ويخافوا يبان منهم قسوة
يدخلوا ف الحرب بدرع وسيف
ويلينوا قصاد نون النسوه
فانا اذا كنت بقولك اسف
لو جي بقولك سامحيني
ف ده مش معناه مابقاش غلطان
بس اللي اتقال كان على عيني
ازعلي مني
اغضبي ثوري
اثبتي موقف
اهتفي بصيلي وواجهيني
انما تختفي من أيامي
يامرور الدم ف شراييني
يبقى اسمه كلام ؟
حقك على عيني يانور عيني
يارفيقة مشواري الدايمه
حقك يانجومي اللي بشوفها
يامراكبي اللي بحسك عايمه
بتأسفلك وانتي لوحدك اللي انا ف الدنيا اتاسفله
حصالة أيامي الفاضيه مافيهاش غيرك
شفت معاكي اللي يخليني اشوفك راسمالي
حصني من الدنيا اللي انا معرفش بترتب ايه او راسمالي
الفرحة اللي بتخرج م الضنك
والثروه اللي ماتتحطش ف البنك
والحلوه اللي مافيش ف جمالها
ولا مصريات ولا خواجاتي
الحظ اللي يقابل متعوس
والفرحة اللي يشوفها ناياتي
انا جي اتأسف ياحياتي
وهوافق لو هتعاقبيني
انما مش همشي ولا هكمل
غير لما تقولي سامحتيني
ارجعي علشان اليوم بوخ
من يوم مازعلتي وسيبتيني
سامحي واسف والله
والله انا اسف
سامحيني
قصيدة خلينا أصحاب
شايفاك إنسان طيب حساس
راجل ورقيق
تنفع كصديق
لكن ك حبيب
عمري مافكرت
والله ياواد لا هاجيبهالك
عايزين نفرح بقى بعيالك
وبحبك جدا صدقني وجوايا حاجات
بس إحنا أخوات
سكتت وسكت
مشيت ووقفت
لون أنا مش عارفة لحد الآن
وكان فيه خيط مزيكا حزين
طالع من مطرح واقفتها
هل حبيتها ؟
أم أن الأمر بحاله سراب
قولتلها أنا رافض نبقى أصحاب
ياتكوني معايا يا ماتكونيليش
سكتت لحظة
علشان كانت هي ملاحظة
إن أنا مكسور وبهددها
مدت ايدها
مسكت أيدي
وقالتلي خلاص فك ياسيدي
عازماك على قهوة ماتكسفنيش
كانت عارفة أن الموقف صعب
والصعب حبيبتك تتعاطف علشان تواسيك
فأخدت قرار إني انساها
براقبها بعين عيل محروم
وباقول ماطلبش واكلمها
وافكر هي بتعرف مين
ضحكتها لمين
وباموت لو كانت بصاله
أصبحنا لاننفع متصاحبين
ولا عدنا صحاب
وبقينا برغم اللي مابيننا
اتنين إغراب
بيحسوا حنين لقلوب بتحن لناس غيرهم
الواحد ضيع وقت كبير
مع ناس مش شاغل تفكيرهم
هذا التفكير الغير صحي
هو المتسبب في القهوة
في عمر خيرت
وترى جبران
وصداع القاولون العصبي
تضييع 16 ساعة في شات
ودخولك في مشاكل وحاجات
وخروجك منك آخر الليل
هاتروح لطبيب هايبص عليك
وهايكتبلك أدوية للنوم
ومهدي
ويسيبك تمشي
وهاتفضل برضه مابتنامش
وهايفضل جسمك بيعاندك
كل الموضوع إنك عندك
متلازمة حب اللي ماحبكش
أنت ماعندكش سبب عضوي
يمنع عينك تقفل لساعات
السبب الأصلي في عدم النوم
أنها شايفاكوا اتنين أخوات
بالنسبالها
هي بتعشق في اللي قتلها
واللي ماقدرش ودخلها
في مساحة كبيرة من الإهمال
بتحب جنونه وعصبيته
وتحب تشوفه بيجرحها
وتحب أنه مابيكلمهاش
مع أنه مكلم ناس تانيين
بتحب عدم غيرته عليها
بتحب قساوته وهي تلين
بالنسبالها . . . عمرك ماهاتبقي اللي في بالها
ف أفهم ياحزين
وأعرف دستور البنى ادمين
عمرك بيضيع
والوضع وضيع
والعالم أجمل من غيرها
عمرك ماهاتيجي ف تفكيرها
مع أنك شاغل ناس تانيين
وحاططهم في الدائرة إياها
خلينا صحاب
داين تتدان
ومافيش مجروح مابقاش جارح
كله بيبحث عن آلمه الخاص
وكان العشق بدون راحة
كان الشوق لازمة جراحة
علشان مايروحش لناس ببلاش
ونصيحة ياريت لو كنتوا أصحاب
خليكوا أصحاب
علشان لو قولت على مشاعرك
هاتكون بتضحي بصداقتها
وإن فعلا فعلا حبيتها
استنى عنيها تقول قبلك
و استنى الشوق فيها يقابلك
وساعتها يجوز تمحي المسافات
فيما عدا ذلك
ف أنت هاتسمع
أنا آه حباك
بس إحنا أخوات .
