كلمات اغنية اخرة الشقاوه احمد مكي

اخرة الشقاوه كلمات

اسمي قرن الغزال بس اسم الشهرة مطوة

بدي صاحبي هيبة الناس تهابه يكونله سطوة

جسمي اد كفك مصنوع فولاز و عاج

تعضه عضمي بسنانك يجيلك ارتجاج

اوكابي الماني على سلاحي منقوشة خوجة

سن سلاحي موسه حامي يفوت في اللحمة النية نوجة

مطيع لصاحبي و مخلص للي يعوزه يلا بينا

ياما هوشت وحوش ياما شوهت وشوش

ياما فتحت كروش لناس باتت راقدة في نعوش

لو عرقبت رجلي بزاوية صح الواحد ماتشينوش

لما بظهر فجاة الناس تجبن تجري ولو جيوش

صوت فتح سلاحي بيجيب لصاحبي جنان

قتل عور و زفر سم سلاحي ومش ندمان

قلبه و احساسه ماتوا و نظرة عينه ديب سعران

عيني على صاحب فجر قدرناه ولا طمر

سوق فينا يا بنطي اكتر ماشي يا عمي الدكر

احنا على وضعنا لو عيشنا و ملحنا

مابقوش لادين عليك يابا واستنقصتنا

الدنيا سلف و دين و مسيرك تنغرز

و تقول يا صحبي فينك يا شقيق اقول كان فيه و خلص

رحال و كعبي داير لفيت الدنيا لف

من ايد مالك لمالك بتنقل من كف لكف

صحيح البحر واحد بس السمك انواع

مريت على الجبان و البوق و العترة الشجاع

فيه اللي كان بيعمل بيا نمرة و يرقص في الافراح

و فيه اللي قدروني صح و شافوا فيا اقوى سلاح

كل فترة اعيشها بتبقى شكل صاحبي

احداث و ناس جديدة و كل واجبي صاحبي احمي

و صاحبي حالي واعر تاجر مخدرات

فتوة و كفه سابق مش هامه اي حوارات

بديت معاه من الصفر ماكنش يسيبني لحظة

مكنش يجيله نوم الا اما اكون تحت المخدة

وحدة واحدة صيته ذاع واخدها بالدراع

افيونته تحت لسانه شايه يجيبله بالنعناع

لما تقوم خناقة و يبدا يتعصب و يغل

يامن اللي في جيبه و يامن علقة بتريل

عور بيا ياما قتل تلات مرات

اخرهم جارد جثة برة بار من البارات

الناس بقت تخافه و تهابه و تعمله حساب

واللي بيعترض طريقه بتبقى عيشته هباب

عمل لنفسه ضهر و بعلاقات ثبت وجوده

و زود حجم تلاهو تاجر هيروين و فوجو

عيني على صاحب فجر قدرناه ولا طمر

سوق فينا يا بنطي اكتر ماشي يا عمي الدكر

احنا على وضعنا لو عيشنا وملحنا

مبقوش لادين عليك يابا واستنقصتنا

الدنيا سلف ودين ومسيرك تنغرز

وتقول يا صحبي فينك اقول كان فيه و خلص

صاحبي كبر و اتوحش لعب معاه القرش

جاب مرسيدس ساعة دهب نشاط تاني ع الوش

فيه تحته جيش رجالة بامره ينفذوا التمام

وفي طبنجة 9 ملي وف الي دفع ارقام

خلاص استغنى عني مابقتش قد المقام

بقيت اعره لو ظهرت معاه خلاص مات الكلام

فحطني في صندوق جزم قديم رماه فوق الدولاب

اكتر من 3 سنين مرمي رمية كلاب

جه في الصندوق ورق مضروب و ذكريات

حشيش قديم نشف و صورة ابنه اللي مات

من خبرتي بالناس حافظ حبة امثال

قولتلهم مؤمن بيه دوام الحال من المحال

طغيان صاحبي و نفوذه خلت العين عليه

و الكوك لحس دماغه و الغرور عماله عينيه

شبه احتكر السوق ف ولاد الكار قالبين عليه

حتى الحكومة هاجت ماجت قررت حاطين عليه

كام واحد من رجالته عاملين معاه الجلاشة

باعوا سره للحكومة فاتعمل عليه كماشة

اختاروا يوم كان كانز فيه في البيت تقريبا تمن طن

هيروين و كوكايين شكل الكمية حاجة تجن

البوليس هجم كبس ع البيت بالليل الساعة 9

مطر من ضرب نار اغلبهم من هروب بيسعى

بس صاحبي قلبه ميت شد لاين و قام يدافع

بالعروسة الـ9 ملي قام يهاجم تنه راجع

حد فضى خزنة المسدس من وراه

حتى الالي اختفى دة بفعل فاعل يا ولداه

صاحب هرش واستوعب انه اتباع وع المشاع

هايعيش لو سلم نفسه حيموت لو عمل شجاع

محسش بالامان عمل زي زمان

دب ايده في جيبه يجيبني فافتكر كل اللي كان

اخيرا افتكرني و جابني من فوق الدولاب

فرحت انه بيلجالي تاني و هانرجع صحاب

اول ما مسكني استغرب شكلي اصلي مردوم بالتراب

باظت لحظة فرحتي من قوة رزعة كسر الباب

بوليس كتير دخل بسلاحه الكل كان مكشم

صاحبي فتح سلاح ماتفتحش اصله تلم

عمري ماقدر انسى نظرة عينه ليا كان مبلم

شكله فكر اني خنته عينيه ليا بتتكلم

خد طلقة وسط دماغه وراها رصاص كتير

وقع غرقان في دمه وانا اترميت بطير

وقعت جمبه و شوفته بيطلع اخر زفير

صاحبي اللي كان فرعون ادي شكل المصير

و فجاة وسط زحمة الاوضة اللي كانت شديدة

في ايد جت كمرتني شكلي داخل قصة جديدة

اخرة الشقاوة يا موت يا عيش و حلاوة

عيني على صاحب فجر قدرناه ولا طمر

سوق فينا يا بنطي اكتر ماشي يا عمي الدكر

احنا على وضعنا لو عيشنا و ملحنا

مابقوش لادين عليك يابا واستنقصتنا

الدنيا سلف و دين و مسيرك تنغرز

و تقول يا صحبي فينك اقول كان فيه و خلص