كلمات اغنية الاب الجوكر

الاب كلمات

لحظة ما اتولدت وشالك بين ايديه

واتاملك بعينيه وقف العالم حواليه

اول صورة بريئة ليه شافها فيك

ايد الضلمة اللي ف عالمنا لسا متمدتش ليك

وبدات تكبر وحبه ليك بيكبر

يوم عن يوم حاجة منه فيك بتظهر

انت عنده اولى منه لانه

عازك تكون احسن من كل الناس ومنه

وانتي من صغرك شقاوة الدنيا فيكي

يبص لماما تلفي وشه ليكي

وتيجي لو زهقانة عشان مفيش اطفال في سنك

تقولي العب معايا يقلب طفل اكتر منك

لانه كان مرعوب اكتر ما كنتي انتي مرعوبة

لدرجة انه كان هيرجع ياخدك لولا مامتك

معاكي بيحسبها بقلبه دايما مش بالمنطق

وانت اتاثرت ف اعدادية بكام واحد زميلك

فا طلبت منه يسيبك عيب يوصلك ويجيبك

قدر حكم السن واداك الحرية

راقبك عشان يطمن انك قد المسئولية

مكانش غاوي يقولك ذاكر كل شوية

كان عايزك ترتاح كل السنين الجاية

مع ذلك اما زعلت على كلية مجبتهاش

حضنك وقالك يابني العالم منتهاش

كبرت واتغيرت وخدت منه ركن بعيد

بقى بينكو سور وكل يوم يزيد

لا عدت قادر تسمع منه ولا من باب الود

لا عاد هزاره بيضحك ولا حكاياته تشد

لكن دي مش مشكلته ده سنه ودي تجربته

عشان يفضل مصاحبك عمل كل اللي ف مقدرته

عشان يفتح معاك كلام بشكل تبقى حابه

مع اول عريس حس بقبولك ليه

اتخض كانه فاكر ان اليوم ده لسا بعيد

حس البيت هيفضى لا الحياة هتفضى

لسا شايفك طفلة كان عايزاها تفضل

غار فا اتحجج واتشرط واتلكك

وفك لما اتاكد انك حبيتيه وحبك

عايز مصلحتك حتى لو مش ده المتشاف

محدش خاف عليكي قد ما هو خاف

فاضل على يوم جوازك شهر او اقل

لسا نص جهازك والقرض اخر حل

كمل بيه اللي ناقص مفيش حاجة استكترها

قالك نطمن عليكي بس وهندبرها

والدنيا خدتك بعد الجواز كترت مشاكلك

كل فين وفين بتفضي تزوري اهلك

وهو بدل ما يقولك ليه مبتساليش

يقولك لو احتاجتي حاجة قولي متتكسفيش

وانت الظروف اضطرتك تسافر

مكانش ماشية معاك هناك لكن بتعافر

مامتك توفت وهو بطوله صبر

ولما رجعت بعد سنين لاقيته كبر

كبر بجد بقى بينسى ومحتاج لحد

يفكره بعلاج السكر والشريان اللي اتسد

لاقاك حزين عليه وندمان لانك سبته

ضحك وقالك شفت ابوك احلو ازاي ف شيبته