كلمات اغنية الجنيه محمد فتحي

الجنيه كلمات

بدايه الموال

الجنيه

بنصحي بدري ع الجنيه

نقول هيعمل فينا ايه

هو باشا وسط عرشه

و كلنا باصين عليه

ذل ياما وياما ذل

ياما عللي و ياما قل

و ياما ناس ماتت عليه

اللي شغال شغلتين

و المطبق باليومين

عشان يسد اي دين

و الجنيه بيضحك عليه

اللي يصحي بدري بدري

و برضه فقري ابن فقري

لما ليل و نهار بيجري

و ميلاقيش حاجه ف ايديه

بالجنيه الناس نوعين

ناس ملاعنه و كدابين

و ناس وراها تقول امين

الجنيه عامل ميزان

للي طيب و اللي خان

و كله عارف من زمان

عارف اخرتها ايه

الجنيه من اسمه جن

نازل فوق دماغنا زن

نقوله اهدي نقوله حن

و محدش قادر عليه

الجنيه واخدنا وش

عامل جوه دماغنا وش

رغم انه و ياما كش

و لسه عامل فيها بيه

الجنيه دايما خاضضنا

بيتاعبنا و بيعارضنا

ذلنا و دايما رافضنا

و الغرور راكبه و ماليه

كله شايل الف هم

كله كح تراب و دم

ماشيه غم ماشيه خم

و شغل ٣ ورقات يا بيه

م الجنيه الكل تاه

كله ماشي و مش معاه

اه يا دنيا و الف اه

احنا بس عملنا ايه

الجنيه حير عقولنا

زاد و زود ف حمولنا

ياما هز و رج طولنا

و شبعنا ضرب بايديه

الجنيه دايما تاعبنا

شكله حاوي و بيلاعبنا

هو عيبه و لا عيبنا

ولا هى حكايته ايه

الجنيه ماكنش بايظ

كان هديه من العجايز

كان بيطلع ف الجوايز

ف كل حته بتلاقيه