كلمات اغنية اهداء محمد حمزه

اهداء كلمات

اهداء لحاجات حسيت انها فرقت فحياتي

على قد مافاكر كان ترتيبهم تقريبا كالآتي

كرهي لمدرستي الأولى اللي انا فاكر عمري ماحبيتها

فاكر وانا ماسك فأمي وبتحايل على طرف چيبيتها

والنوم فالحصة الأولى إياها وخوفي من الحقنة

والدعوة بتاعة أبويا مفيش غيرها .. ربنا يرزقنا

والكلب اللي انا ربيته وفجأة فداني بروحه

فاكر بيت صاحبي كمان اللي انا يوميا كنت بروحه

إحساسي بحب الفن وببداية إعجابي بصوتي

من أول البوم wama اللي كشفلي هوايتي وملكوتي

إهداء للبنت اللي إكتشفت كل مساوئي وحبتني

والبنت اللي انا حبيتها ورغم عيوبها سابتني

إهداء الى أبويا الأسطورة اللي بإسمه سندني

والفرحة اللي فرحتها أيام التليفون أبو كشّاف

إهداء الى يوم ما كِبرنا وخلّونا بنكتب بالجاف

صاحبي اللي مكانش بيسمح للدنيا توقّعني

واللي طِلع ندل وخد تمن الصحوبية وباعني

والثورة وحبي لبلدي اللي رِجع من أول وجديد

والغُربة وللنوع دا من الأوجاع اللي تفيد

والكورة والچيم وعمرو دياب أيام راجعين

ولصوت المنشاوي خصوصا سورة الإنسان ويس

وخطوبتي الفاشلة اللي فادتني قد ماضرتني

وحبيبة القلب اللي انا لما نسيتها إفتكرتني

بحر المزيكا اللي إستدرجني لحبه بدون أسباب

إهداء لجميع أشكاله بداية من المقسوم للراب

ولمايكل چاكسون bad , hold my hand , dirty Diana

ولصوت تشجيعنا فماتش لمصر أما يرُج الإستاد

ولكل حكاوي جدودنا اللي بتثبتلي إن إحنا أسود

إهداء الى كل صحابي الناس الحقيقية الإخوات

ولكل الشهدا لغاية آخر واحد فيهم مات

والجيزة وفيصل والزحمة بتاعة شارع العشرين

سماعة الووكمن أيام البوم تامر وشرين

سيمبا وبوجي وبكّار والتتر بتاعه وبابا ونيس

إهداء الى صاحب عمري وصورته معايا وهو عريس