كلمات اغنية تمسح راسي الملا محمد فريدون

تمسح راسي كلمات

يش اِتهيّج إحساسي

يا عمّي اُو تمسح راسي

خجلان اِتگول .. مُسلم مقتول

يالجيت الليله اِتواسي

يا عمّي اُو تمسح راسي

••••••

ها يعمّي .. تنده اِسمي

طمنّي اِعليك

بْسرعه جيتك .. واِعتنيتك

گتلك لبّيك

يمكن عندك منّ الوالد

طارش واِيطمنّا اِعليه

حتّى اِنعجِّل واِنوافيه

.

ساكت يا عم ارحمني

وعنّ الوالد كلّمني

تخفي الأخبار .. جاوبني اِشصار

لَ اِتْخلّي الگلب اِيقاسي

يا عمّي اُو تمسح راسي

••••••

شنهو وضعك .. تخفي دمعك

يا عم يحسين

واِبسكوتك .. خافي صوتك

ترويهِ العين

وجهك تتغيّر ألوانه

واِبخدّك آثار اِدموع

الله الْيستر إرحم گلبي

واِشرحلي شنهو الموضوع

.

واَنتظرك بس ترويلي

أطلب توضيح

لو بالتلميح

أشعر ضاگت أنفاسي

يا عمّي اُو تمسح راسي

••••••

مو بعيده .. عن حميده

مِتيتمه اليوم

هالعلامه .. باليتامى

تتحقّق دوم

هالمسحه اِعله الراس اَدريها

مرتبطه اِبحال الأيتام

والكلمه الما تطلع وِضحَت

باِعيونك أقرا الآلام

.

ليش اِتصد عنّي اِبعينك

وْتمسح راسي اِبچفّينك

لو عمري اِزغير .. أعرف شيصير

يا أغلى اُو أثمن ناسي

يا عمّي اُو تمسح راسي

••••••

بْراسي تِمسح

لجلي تِشرح

الْغالي اِبلا راس

يجري دمّه

وچنّه جسمه

بالسوگ اِنداس

چنّ اِتگلّي راسي الباگي

آنه اِيتيمه اُو مُسلم مات

واِمن اِتگلّي إنته الوالد

شْگدّ اِتخفّف هالمأساة

.

يفداك الوالد يا عم

باِوجودك ما أتألّم

واِتگر عيناي .. دام اِنته اِوياي

بيك اَستذكر نوماسي

يا عمّي اُو تمسح راسي

••••••

خلني جنبك .. ياللّي گُربك

يْداويلي اِجروح

منهو مثلك .. ما أبدلك

لا عنّي اِتروح

لـٰكن أخشى بعد الوالد

ترحل واِتغرّب هالرّوح

أتمنّى اِبعيد اليوم اللّي

بي راسك عالرّمْح اِيلوح

.

واِبعيد الشّر مسبيّه

سلبوا منّي الترچيّه

ريتك ويّاي .. واِتردّ اِعداي

تردع هالسّوط القاسي

يا عمّي اُو تمسح راسي