كلمات اغنية شمس العصر فلاح المسردي

شمس العصر كلمات

لا اغربت شمس العصر قامت افكاري تجول

كل هم ايروح تاتيني اهمومن وراه

الحياه صدوفها ماسكه وياي دول

غير انا راسي كما النير وجبال السراه

وما يخلي دق قلبي مثل دق الطبول

كود فرقا كنها بالصدر جمرة قضاه

يا حبيبي ما بعد زولك ابـ الازوال زول

البصر من دون شوفك تساوى معّ عماه

ابتعادك بحرن ايهول وامواجه تهول

الزكاة بديننا تندفع لا دار حول

من ملك له مال ولا جمال او كم شاه

وانت تملك زينً ايعجز كبار العقول

مفترض تدفع على زينك الطاغي زكاه

لا تلوم الي لا مريته ايصير امهبول

انت لو انك تمر الجبل ينزح وراه

الجفول ان شاف زولك غدا ماهو جفول

انت حبك يزرع اشعور في جوف الحصاه

كل ما جيت اوّصفك ياتي الـ عقلي ذهول

يختفي وجه القمر ينقصر عنق المهاه

اخذ من ضي القمر يا بعد عمري غسول

كن في خدينك اورود والريق امعسول

لا تلوم النحل لا جاك من كل اتجاه

انت كنك فصل واحد جمع الاربع فصول

يا ربيعه يا خريفه مصيفه يا شتاه

انت للقلب الشقي غيمً امطاره سيول

انت يومن صبحه بوجهك وشعرك مساه

والله ان العقل ماله مع غيرك ميول

والله ان القلب يا زين ما غيرك خذاه

العيون وساع وامن الحلا كن بك خمول

كل ما سلهمت بالرمش مشاءالله علاه

ما اظن الي بعينك كحل .. يمكن كحول

من يشوف اعيونك ايصير وضعه هاه هاه

يا صلاة الله وسلم على وجه الرسول

وش عيون الحر ولا وش الخيل وقطاه

حط يدّينك بـ يديني وخل العذول

تحترق واتقول من حرقها بالكبد اه

من بـ قلبك يا هوا البال يلقى له قبول

والله ان ذي دعوته كل ما صلا صلاه

ما يقول الا عسى عمري وعمرك يطول

من يحبك يكره الموت ويحب الحياه

ماني احب الفضول ومعك كلي فضول

كل شيً يبتدي معّك ما ابغي منتهاه

كل ما ناديتك ابغي اعبر يالبتول

وقلت لي لبيه وامر تدلل يا غلاه

يثقل لساني واضيّع ولا ادري ويش اقول

مدري والله وش بلاني ولا ادري وش بلاه