كلمات اغنية لاعتزوا ببن سعد صاروا حكومة محمد ال نجم

لاعتزوا ببن سعد صاروا حكومة كلمات

المزاج اليوم ما كنه بيومه

قربوا لي دلتن تبعد عماسي

دلتن من راعي الكيف محكومه

كيفوا كيفاتها حسب القياسي

انتحى ليل تعدى العين نومه

والوعد قرب وأنا ما نيب ناسي

مرحبا يا داعي السدر ولزومه

يبتجح دام الهبوب تهب راسي

مسفر بن محمد تجمل علومه

المواقف طيبه والراس قاسي

ضابط فعايله ترفع نجومه

سيرته مثل الجواز الدبلماسي

والمجالس صدرها له شي أساسي

دين ومروه وحوم الصقر حومه

يدرك العسرات بالحل السياسي

من نصاه بلازمن يبعد همومه

يهتني بالزاد والماء والنعاسي

سعدي تطحن الكايد عزومه

من ملاحيق مثل صم الرواسي

لا اعتزوا ببن سعد صاروا حكومه

خلجت أم اللاش وضعيف الحساسي

طرشهم وقت الجهل منعه وسومه

مرتعه في كل قفر ما يداسي

جارهم يدله من دياره وقومه

وضيفهم يقلط على ردم التباسي

من زبنهم سلم وانزاحت همومه

لو ذنوبه تلحق الأرض اليباسي

هاجسي ما عاد أرده عن يمومه

لين يرسي بي على شط المراسي

في مديح محطم الرقم القياسي

والضيوف اللي على الحفل معزومه

اقلطوا في صدورنا قبل الكراسي

مرحبا ما لاح برق في غيومه

ليل جاله في المراديف انعكاسي

أرحبوا ترحيب من يحفظ سلومه

شوفكم يعطيه تشجيع وحماسي

أرحبوا ثم أرحبوا لما لمومه

ما نخصص في القبايل والجناسي

معلومات الاغنية

شيلة مهداة لـ رجل الاعمال مسفر بن محمد السدر القحطاني

كلمات الشاعر مهدي بن معيض الحبابي

اداء المنشد محمد ال نجم