كلمات اغنية مسحي الدمعة الملا محمد فريدون

مسحي الدمعة كلمات

مسحي الدمعه يا يُمّه .. أدري الراح غالي

خلّي نسولف أفعاله .. وخلّي الدمعه تالي

شسوه بكربله .. والطف صار إله

خلّي الدمعه تالي

****

ياُم الاربعه آني .. زينب والله باحزاني

انهدم حيلي

عينچ حگها من تبچي .. بس اشويه خل أحچي

اسِمْحيلي

بعيني ما شفِت ظلمه .. الفضل يرجعله يا يُمّه

گمر ليلي

يتچّيلي

سافرنا و اُبو فاضل .. ما عيّشني غربه

ما خلّاني محتاجه .. حتى النوب أطُلْبه

لنّي امدللـه .. والطف صار إله

خلّي الدمعه تالي

****

طلعنا من مدينتنه .. وگف عباس هيبتنه

يظللني

ما ينسى اُبو فاضل .. يذكر حيدر شگايل

يدللني

شتگولين نتعنّه .. للطف ولّا يتدنّه

يخيّرني

إلي يدوّر رضا اُمّه .. يجي لعباس ويعلمه

درِس عني

من بين أربع اخواني .. اُبوي إختاره هوّه

خل تتعلّم الوادم .. من عباس اُخوّه

هيبه ومرجله .. والطف صار إله

خلّي الدمعه تالي

****

عليّه إنتي وصّيتي .. صدگ يا يّمه ربّيتي

إلي كافل

طول الرحله لازَمني .. ولا يقبل على متني

يظل مايل

أشِم طاريّه بانفاسي .. تملّك كلشي باحساسي

اُبو فاضل

رغم كل هذي حنّيته .. يِرَجّف كربله بصيته

علم شايل

توكّل بالله وآياته .. تلاهن عالمعسكر

قرا الاخلاص عالجربه .. لأن البيها كوثر

گبْل البسمله ..والطف صار إله

خلّي الدمعه تالي

****

وصلنا لكربله توّه .. بَعدنا وكلشي ماسوّه

ترك سيفه

من مُهره گمر هاشم .. ترجّل شِرْدت الوادم

برز طيفه

بَطَل بالخوف حسّسهم .. يِسْتنگي بفوارسهم

على كيفه

عرش عالمشرعه ونازل .. الماي بحضرة الكافل

صُبَح ضيفه

صال ابإتّجاهاته .. وضاعو من وصلهم

هذا الجاي ابن حيدر .. بالطف طالع إلهم

حيدر مثّله .. والطف صار إله

خلّي الدمعه تالي

****

أدري شكثر ولهانه .. يريتچ حاضره اويانه

تشوفينه

اُخوي و وفّه بوعوده .. بذل غايات مجهوده

تعرفينه

أگول و خالقي شاهد .. لو منطتنه هالواحد

يكفّينه

الخذاه منّي نزِف دمّه .. ودمعچ هسّه يا يُمّه

تذرفينه

اُخوي اعليّه ما قصّر .. گلبچ خَيْتطمّن

كلمه ولازم احچيها .. شكراً يُمّه شكراً

نال المنزله .. والطف صار إله

خلّي الدمعه تالي