كلمات اغنية معركة الملا محمد فريدون

معركة كلمات

معركه اِبجنب الفُرات .. غيّرَت مَجْرى الحياة

سَطِّرَت هالكِلْمِتين .. لا خُلود اِبلا حُسين

••••••

(١)

معركةْ ساعاتْ لـٰكن إلها مكتوب الخلود

صح گصيره بس صداها يمتلي بيه الوجود

غيِّرَت كلّ القواعد واكْسِرَت كلّ القيود

خَلِّدَت سبعين قمّه اُو طِمْسَتْ آلاف الجنود

دمّ الوفا اِنتصَر

واِتخلّد النّحر

من بعده هالدّهر ..حُسيني

من بعد ذاك الخسوف .. أشرقت شمس الطّفوف

واِكتبت عالخافِقين .. لا خلود اِبلا حُسين

(٢)

لا تكافؤ بين ذاك العسكر اُو جُنْد الإمام

شبِه محسومه النتيجه گبل لا يعله الحُسام

ظاهر الموضوع هذا: ينتصر جيش اللّئام

لـٰكن الطّف طفره ثارت عالقواعد والنّظام

واِبْقِلّةِ العدد

جيش السّبِط صِمَد

منهاجه للأبد .. حُسيني

حين طاحَوْا عالرّمال .. عِرْجَوِا اِلـْ بُرْج الكمال

والجَزاءِ الحُسْنَيَيْن .. لا خلود اِبلا حُسين

(٣)

واِبقرارةْ نَفْسَه كلمن فاز أيقَنْ بالعَذاب

معركه اِبْـ رُقعه صغيره لـٰكن اِشكُبر المُصاب

سالت اِدموم الإمامه اُو عالأفُق صار الخضاب

واِعله الّذي جِرى

ظل ينزِف الثّرى

والمقتل اِنقرا .. حُسيني

بأبي اُو أُمّي الإمام .. صدره يتلگّه السّهام

واِبرغُم حَزِّ الوتَين .. لا خلود اِبلا حُسين

(٤)

خِلْصَت الطّف واِنجلت غُبْرتها عن ذاك الصّريع

واِحرگوا حتّى خِيامه وانبِشَوْا گبر الرّضيع

لـٰكن الدّم بعده يغلي اُو ما نشف جاري النّجيع

يبتدي الدّور الرّسالي لو مشى الرّكب الفجيع

واِيثبِّت النصُر

ليث اِعتنه الگصر

ما گيّده الأسُر .. حُسيني

والنّصر أصبح أكيد .. زينب اِتواجه يزيد

تكشِف الحقِّ المُبين .. لا خلود اِبلا حُسين

(٥)

معركه اِتظل مُستَمرّه والظّلام اِيضدّه نور

بْواحد اُو ستّين تِبدي اُو باقيه اِلـْ عصر الظّهور

كربله أرض القداسه اِتروَّتِ اِبدمِّ النّحور

أصبحت رمز التّحدّي لو يمسّ الأُمّه جور

واليطلب العُلا

ما ينسى كربله

والباري يجعله .. حُسيني

واِبحقيقةْ كربلاء .. هيّه أقرب للسماء

بس مجازاً تُدعى طين .. لا خلود اِبلا حُسين