اجمل قصائد بدر بن عبدالمحسن

الأمير بدر بن عبد المحسن بن عبد العزيز آل سعود هو الشاعر السعودي النبطي المخضرم من طرق أبواب الشعر بفصاحة وجرأة وقدرة وبيان  كان والده محبا للعلم والأدب كما أنه شاعر مبدع ولديه مكتبة ضخمة تضم العديد من الكتب ومجلس والده مليء بالعلماء والأدباء وكبار المفكرين في ذلك الوقت مما كان له الأثر البالغ في حب الأمير بدر للأدب والشعر وفي المقال التالي جمعنا لكم مجموعة قصائد للشاعر الأمير بدر بن  عبد المحسن ال سعود

البتول

كل أرض تشيلك يا ثقيل الحمول

وكل وقت كريم بالرضا والزعل

وين مارحت تلقى لك حبيب وعذول

وين ما كنت تلقى مثل ياسك..أمل

ياطريق الترجي والوله والنحول

والله إني مشيتك... لين حد الثمل

مالقيت فوصولي لغير قبري وصول

ولا عرفت فحياتي مثل عرفي الجهل

لا تظن المسافر من يسوق الرحول

من وقف دون حلمه عاجز ما رحل

وما لمخلوق منجا في الحذر والجفول

ما تصيب السهام ولا يطيش الاجل

الليالي خوات.. مير منهي البتول

والحوادث عشاير مير وين الفحل

ليلة لك .. وليله بالفرح ما تطول

وليلة من شهدها ذب راس الجبل

أتذكر في عين الشمس طفل خجول

شالته في هدبها وقت لين إشتعل

أعجب الناس وهجه بالجدل والفضول

ما دروا عن جمال الجرح لين إندمل

والله اني كتبته في العطش والذبول

لين غصنه تعدل بالورق وإعتدل

والله إني كتبته لين قال الجهول

والله إني كتبته وانتشى واحتفل

ما أتفه الشعر كانه هالحكي اللي نقول

لا تعدى المديح ولا تعدى الغزل

إن لثمت الزهور وصاحبتني الحقول

ماهقيت ان صافي الشهد عيب النحل

مابقى في ضلوعي كود ريح معمول

وثوب شاش عليه من الندامه وحل

ألتفت للطريق وما عبر منه زول

في جفوني تزاحم عبرتي والوجل

طلت يالعمر والا قلعتك لا تطول

طاولتنا الليالي بالسهر والملل

إن تعبنا نحب ولا لقينا قبول

ما تسر الاماني .. ولا يفيد العذل

لكن .. الله كريم وكل هم يزول

ما على الله بعيد .. ولا جفاك المحل

كل أرض تشيلك .. يا ثقيل الحمول

وكل وقت كريم بالرضا والزعل

صوتك يناديني

تذكر .. صوتك يناديني ...

تذكر ... تذكر ...

تذكر الحلم الصغير ...

وجدار من طين وحصير ...

وقمرا ورا الليل الضرير ...

على الغدير ...

لاهبت النسمة تكسر ...

جيتي من النسيان ...

ومن كل الزمان ...

اللي مضى ... واللي تغير ...

صوتك يناديني تذكر ...

ناديتي ... خانتني السنين ... اللي مضت راحت

ناديت ... ماكن السنين ... اللي مضت راحت

كنا افترقنا البارحة ...

البارحة .... صارت عمر ...

ليله ... أبد عيت تمر ...

ياجمرة الشوق الخفي ...

نسيت أنا وجرحك وفي ...

يتذكر الحلم الصغير ...

ريانة العود ... نادي ...

نادي الليالي تعود ..

بشوق الهوى ... بوعود ...

بوجهي اللي ضيعته زمان ...

في عيونك السود ...

ياالضحكة العذبة ...

عنك الصبر ... كذبه ...

وفيك العمر موعود ...

اشتقت للحلم الصغير ...

واشتقت لجدار وحصير ...

وقمرا ورا الليل الضرير ...

على الغدير ...

ان هبت النسمة تكسر ...

الليالي الوضح

في الليالي الوضح ..

والعتيم الصبح ..

لاح لي وجه الرياض ..

في مرايا السحب ..

كفها فلة جديله من حروف ..

وقصة الحنا طويلة .. ف الكفوف

من نده عطر الرفوف ..

لين صحاه ..

في ثيابك يا الف ليله..

وفي الهبوب ..

انثنينا يا هبوب النعاس .. والحلم ..

ألف غصن من اليباس ..

فز لاجلك .. وانثنى ..

اكسري الاوهام كاس ..والمواجع فم

وان عشقتيني انا ..

ما ابي من الناس .. ناس ..

ما علينا .. لو طربنا وانتشينا

آه .. ما ارق الرياض تالي الليل ..

انا لو ابي ..

خذتها بيدها .. ومشينا ..

يا نصيبي من الصور .. والرسايال

ومن كل شمس قايمه .. ومن كل ظل مايل ..

يا مكاني من البيوت ..

ومن الصحاري اللي .. فرقت فكري قبايل ..

وين احب الليله .. وين اهيم ..

اقبلي مثل ديم ..

أو غصون النار تنبت ف الغضى ..

وبين ما خلى من النخيل الفضا ..

وما نسى الغيم ..

أقبلي .. يا بختري عيوني من الربيع ..

وطل وجهي من الشتا ..

ومثل صوتي من الهبوب ..

اقبلي مثل الرياض ..

من تعاريج الدروب ..

في ضلوع الوادي ..

وين حبيتك قمر .. فوق طين أجدادي ..

وين احب الليله .. وين أهيم ..

ارفعي طرقة الشيله .. عن سديم ..

وكوب وهاج ..

اقطعيني بنصل طرف سادر وحجاج ..

شقيقيني يالهبوب العارضية ..

واهدمني سياج ..

لين أغني الهوى ما هو خطيه..

يالعفاف اللي تسربل بالبياض ..

كل ما قربت يدينا ..

ناض طير.. وجض ريم ..

ما علينا ..

آه .. ما ارق الرياض تالي الليل ..

انا لو ابي ..

خذتها بيدها .. ومشينا

 صعب السؤال

صعب السؤال .. ليه نفترق

صعب السؤال .. وين نلتقي

إنتي الجنوب .. وأنا الشمال ..

وما بيننا .. بحر .. ورمال

لكن نحب .. والله نحب .. وفوق الخيال

.. صعب السؤال

يا اللي اجمل من كلامي عنك وأقرب من سكوتي

آه يا طول المسافة بين احساسي وصوتي

ما هو غريب .. إني أسألك

وإنتي أنا .. كيف أوصلك

لا مستحيل .. هذا الرحيل

من يقطع الصمت الطويل

ويدلني ..

قصيدتي .. وين الحروف .. جف القلم

يا ضايعه .. ببرد الكفوف .. رعشة ألم

قصيدتي .. إلا الندم .. إلا الندم

بتسافرين .. وانتي معي

وبترجعين .. وانتي معي

قصيدتي .. لا تسمعي .. غيري قصيد

يا ساكنة اف ورق الحشا .. وحبر الوريد

 العطش

آه ..يا العطش

جفت اشفاهي

وصوتي الواهي ارتعش

لو حبيبي ما .. ما سقاني الما

لو شربت أظما لحبيبي .. وللعطش

يا سموم القيظ ..جفت عروقي

تحتي الرمضا..واللهب فوقي

والعطش شوقي .. وشوقي للعطش

اسقني عيونكحبيبي .. أو أموت

ما ابي رمشك نعش

يا وسامي الحب ..امطري في القلب

الزهر والعشب ..قلبي يا مطر

الظما .. والجوع .. بعدك .. والدهر

لو حبيبي ما .. ما سقاني الما

لو شربت أظما لحبيبي .. وللعطش

 أرفض المسافة

أرفض المسافة والسور والباب والحارس..

آه..أنا الجالس ورى ظهر النهار..

أنفض غبر ذكرى..

أرفض يكون الإنتظار بكرة..

أرفض إني أموت في قلبك..

ومادرى بموتي أحد..

حتى أنا..

أرفض الصورة على الرف البعيد..

وجهك المحبوس في ورق وحديد..

أرفض أحساس الحبر..

وجرح سكين الصبر..

أرفض الليل والحصار..

أرفض الصمت والحوار..

بيننا خلف الجدار..

مثل البكا حبيبتي تحتاجني تحت الظلام..

ومثل الفرح حبيبتي أحتاجها وسط الزحام..

الحب علمها السكوت..

والحب علمني الكلام..

شمس الجمال

هيه يا غصن تمايل بالدلال

ما تخاف الكسر لا هب الهبوب

وما تخاف الله وتسعى بالعدال

انصف من لحاظ عينيك القلوب

لا متى ذبح العرب عندك حلال

تابت العالم متى عينك تتوب

مير قلبي يا لغضي بيعه محال

ما أقدر أعطي لو تبي مني ذنوب

أشهد إنك بالحلى فقت الخيال

وعيب حسنك كان في حسنك عيوب

شارقة في طلعتك شمس الجمال

وجامع في ضحكتك كل محبوب

الخمل فيني انا ما بك خمال

مشمل نوك .. وانا نوي جنوب

 غريق الدمع

اللي طعني بين الاضلاع وأدمى

هذاك ند لي ونعمين فارس

ومن ينطح الوقت الردي قلبه أعمى

كم عامر خلاه بالقاع دارس

يابنت مالي قلب بالحب يرمى

كفي سهام الفاترات النواعس

الما عيوني أظهريني من الما

وأنا غريق الدمع والريق يابس

ظميان من مثلي من الناس يظما

وأنا على أحلى الينابيع حارس

والله يالولا فية عيون سلمى

ماشوف كل الناس ضاحك وعابس

من طاب لي بالنور ماني بظلما

ومن جادلي بالغيث ماني بحابس

 ثلاث ملامح لوجه واحد

على الغدير كانت سما..

ويرمي الضما وجهي عليه

على الغدير .. وجهي وسما ..

لين ارتمى وجهك عليه ..

على الغدير ..

وجهي .. ووجهك والسما ..

من يسبق ويملى يديه ..

يشرب ملامح صاحبه ..

ليت السحاب ..

يظهر على المدى الباهت ..

وتمر ثلاث طيور ..

بين العتم والنور ..

ينبت شجر .. واعشاب ..

وطفل يبيع زهور ..

يولد ..

وتتحول الاخشاب ..

كرسي ..

واجلس انا وياك ..

قبل الظلال هناك ..

في أخذ الصوره ..

على سلة السيف الصقيل ..

يتكحل سيفين ..

وينزف قتيل ..

واليوم عيد .. يا اللي الجفا وصلك ..

ومشغولة في كحلك ..

وشلون انا بحايدك ..

امرايتك سيف ..

وذ بحي انا .. عوايدك ..

 أبها

كل ما كتبت أبها .. نشت فوق الأوراق

سحابة .. وابتل في الصدر معلوق

أخيل بين أصابعي .. نوض براق

وكن القمر ينبت له غصون .. وعروق

شقت ثياب الليل .. عن جلد الأشفاق

لا بان لي معنى .. ولا زانت طروق

ضاع القصيدوما بقى غير الأشواق

وأحلى الشعر ما يكتب الشوق في الشوق

إن خان بي الشاعر .. فأنا جيت عشاق

وكل عاشق لا بد ما يطلب حقوق

يا سودة أبها .. خاشري كل شعاق

كبد السما لا شك لدي لي بموق

إن كان أبو بندر على الوصل سباق

لي الفخر .. إني من الشيخ مسبوق

لأجلك عسير .. أزعلت خلاني فراق

جيتك .. ودونك أشهب القاع مشقوق

لي ديرة خدانها مثل الآفاق

فاطرافها .. وديان .. وجبال .. وعروق

وحد ما بين ترابها .. دين وأخلاق

وفرق شمل عدوانها .. كفر وعقوق