ولد بندر بن سرور 1941 هو شاعر سعودي بل واحد أهم شعراء عصره فقد اطلق علية خالد الفيصل متنبي الشعر الشعبي وله العديد من القصائد من ضمنهم قصيدة يا سخيف الذرعان والتى سرد فيها قصة حياته ومن اجمل قصائد بندر بن سرور ما يلي
قصيدة الله من عين طرقها صواديف
الله من عين طرقها صواديف
عميت ويبسن العروق الصخافي
شفت الوزابالعين من عرض ماشيف
شفته وغيري من فطن له وشافي
وقت تغير فيه حتى العواصيف
جافي عواصيف الرياح اختلافي
شره قناطير وخيره مقاطيف
يفطن له اللي يرضع الديدغافي
كم واحد جاله زمانه على الكيف
واغترته نفسه يبا الجود وافي
يطلع مطاليع العيا بالسواليف
بين العذارا عد روحه اسنافي
يفرح بهرج بالقفا ويكره الضيف
قتات والقتات بالنار هافي
يعلق قصيره علقة النار بالليف
عي ولد عي زنوده اضعافي
ان رخصت الحذوه توقي عن الحيف
وان غليت الحذوه مشى اللاش حافي
يرقد ويلحق والدينه تخاليف
دايم ومرقد ميت النار دافي
هومادرى ان الجود يبغى تكاليف
سهر الليالي مقبلات مقافي
يبغى ايدين للعطايا مغاريف
ويبغى ارجول ماتمل الوقافي
والصبر بنحور السنين الشواحيف
اللي قساهن مثل حد الرهافي
مايقدرون الجود سود الاطاريف
امشاركة بيض النساء باللحافي
يقدر عليها اللي حكم نجد بالسيف
واودع قبايل والقبايل اولافي
عبدالعزيز اللي يبث المصاريف
يجدع قناطير الذهب بالفيافي
يمشي على دربه جموع مزاريف
نو تنثر ماه والجو صافي
تشدي لواقيط الزبيدي بعدريف
مما كسا البيدا تفيد الضعافي
قصيدة سر ياقلم .. مالي على الصبر طاقه
سر ياقلم 00 مالي على الصبر طاقه
صبري تعدى الحد ماعاد ينطاق
إكتب لمثلي قصته واشتياقه
في خطك الواضح على بيض الاوراق
قصة حزين صافي الحرذاقه
أنا بذكرى ماصله خاطري ضاق
باقوا به الاصحاب والوقت باقه
وصار الضحيه بين باير وبواق
يمشي وهو ماحس في كسر ساقه
أمسى على ساقين وأصبح على ساق
وهذي سواة الوقت شين اصطفاقه
الوقت لويصفي لك أيام 00 دراق
لاشك يامن معك عقل ولباقه
بنصحك كان انك للامثال تشتاق
صادق رجال يعرفون الصداقه
يقفون صفك يوم يبسات الارياق
ومن يرغب افراقك فعجل فراقه
جاز الذي يجزيك إفراق بفراق
يقوله اللي جاير الوقت عاقه
ولازال في غيبوبه الهم ما فاق
حظه على اقشر شي للنفس ساقه
بقبور الاحيا 00 ينتظر يوم الاطلاق
قصيدة يامنير دوك الفرت واخذ الفواتير
يامنير دوك الفرت واخذ الفواتير
وافحص عليه ودخله بالقراجي
اللي يبي بنزين ركب مواصير
واللي تبيه النار ركب بواجي
واليا ستعد وصخر البعد تصخير
تصخير شيهان لفرخ الزراجي
حده على اللي مايعد المخاسير
ركاز عمدان الخشب للنعاجي
ثم قل لبو بندر ترى وقتنا غير
تبدلت سحب المطر بالعجاجي
قومه عتيبه شيوخهم مابهم خير
لايدعي بشيوخ شيوخ الخراجي
نبكي سيوف سمرت نجد تسمير
تسمير عود الساج في عود باجي
حدن محمد ابن هادي ورى النير
والفرم محسن عقبنه سواجي
ربع رسو بين الحفيفين يامنير
ماسلمو لمدور الباج باجي
رحنا ندوج ونتسمى مناصير
نمشي على البيدا بليا مزاجي
متى يجي في نجد بعض التغايير
حتى يجي للصابرين انفراجي
قصيدة لاوالله الا طولن بالوقوفي
لاوالله الا طولن بالوقوفي
عيا يحملهن خبيث التجاره
بفلوسنا ياعبيد ماش معروفي
متى نجي ياعبيد مع خشم صاره
ياركب من فوق صاف البلوفي
مقعد امبير الزيت نيم الحراره
فراق مابين القلوب الولوفي
فرت كما وبل السحايب غباره
قصيدة بديت ذكر اللي بسط سبع بوتاد
بديت ذكر اللي بسط سبع بوتاد
واللي رفع سبع بليا عمدها
والكار للي صار غيث للأجواد
لاقبلها صارت ولا من بعدها
زايد على كل العرب بالوفاء زاد
ساق المراجل لين وقف عددها
حلحيل حلو مر زراع حصاد
كبد يداويها وكبد لهدها
ولي عجوز من ورى شط بغداد
سمت على شيب الفلاحي ولدها
تبغاه يطلع مثل زايد ولا فاد
ماكل من هاز الطويله صعدها
ياشيخ انا جيتك على غير ميعاد
من خوف روحي لايجيها وعدها
قصيدة الا يانديبي فوق دوج عليه شراع
الا يانديبي فوق دوج عليه شراع
ماقال انفخ التشريق جاء في مواصيره
ليا هبت العليا وقام العجاج وراع
يهيظك مع السكه تزاوغ معاصيره
صنايع يهود لايبدل ولا ينباع
يقربك من دار ويبعدك عن ديره
بعد ماطلعوه مشيك مايبي المرجاع
سمع من وراه الفوج غنت مواطيره
ليا دق سلفه قام صوته يرج القاع
ماجاه المعاون يشتغل في مساميره
عطاه اثنين وداس بلأبنص وفاع
رزيمه رعد مزن تهلع دناقيره
خرط له بثالث عقب نشه بعزم وزاع
شتله برابع مايضيع تغاييره
ليا شال عزمه ريحه آمن مارتاع
مسك مع يمين الخط ويلد لأنبيره
نص جو سمنه مايبطنج مع الأرواع
منصيه شيخ ماتبطل جزازيره
على سلم جده مايشاور ضعيف الناع
يدلك بفعله كاثرات دواويره
قصيدة ياسهيف الذرعان مانيب مرجوج
ياسهيف الذرعان مانيب مرجوج
رجتني الأيام غدر وحيله
يابنت لولا اللي على تاسع الفوج
تركت نجد وعزوة بالقبيلة
لاشك حاديني على نجد هادوج
مسقي الفيافي لين يدرج مسيله
تركي ليا من الليلي غدن عوج
حملة عتيبة كلها ماتشيله
يرسي كما ترسي البواخر على الموج
ومنين ماصك البحر يرتكيله
مادام تركي حي ماودي أدوج
وإن غاب غبت من الرجوم الطويلة
قصيدة يابنت ياللي عمرها صدر وردوف
يابنت ياللي عمرها صدر وردوف
بيض محاجرها وحلو نباها
ودي بشوفك مير يوم اقصر الشوف
عيني بعد هاك الرمد قل ماها
سويت لي يابنت بالعين معروف
بأسباب رجل بعدتها خطاها
والا ترى قلبي ليا اصطك بالجوف
اومى بحالي لين تابس عصاها
قصيدة ياهل الونيت اللي يبي مشتل البيب
ياهل الونيت اللي يبي مشتل البيب
مادق صدره بالخطوط الغزيره
يوم يتخثع مع محير الأداعيب
يشدي تخثع جادل في حريره
لاتجربونه مايبي الفرت تجريب
قد جربه بالبيت الأبيض خبيره
عدوه لابن حزام سيد اللواعيب
لعاب زينات البيوت العسيره
ثم قل لقاعد مانبي منه تدريب
الوقت دربنا على كل سيره
لو كل من قاد السبب يعلم الغيب
ياما كرهت النفس من باب خيره
ان قفت الأيام ماها مغاريب
واليا اقبلت يازين صافي غديره
قل له رميت الكيس بين الشواريب
واليوم ادوج مالقيت اتعميره
قصيدة الله من شي بحالي نحفها
الله من شي بحالي نحفها
من مالجى بالقلب حالي نحيفه
من كثر ماتكتم تزايد تلفها
بين كداها بالعروق الصخيفه
كم واحد له حاجة ماصرفها
يصد عن صرافها لايضيفه
يخاف لايقضب نديم طرفها
قلبه صدى واطراف جسمه نظيفه
والله خلق بيد الذلول وعسفها
للي يبي المنهاج مثل القطيفه
والفضل للي مدها ماقصفها
وانهج من الدار المحل للمريفه
وانصحك ياللي غرته ماعرفها
شيب تشيب مايحول رديفه
رديفها يركض ويركز هدفها
وقت يقص العظم من حد سيفه
وان جتبك الدنيا وجابك صدفها
لاتعتزي بأهل النفوس الضعيفه
وأنصحك نفسك لاتسقط شرفها
ترى بعض بيض المجالس مجيفه
