ولد فؤاد سليم حداد بحى الظاهر بالقاهرة والده سليم أمين حداد ولد في 5 يونيو 1885 في بلدة عبية بلبنان في أسرة مسيحية بروتستانتية لوالدين بسيطين اهتما بتعليمه حتي تخرج في الجامعة الأمريكية في بيروت انشئت له جائزة باسمة تقديرا لأعمالة في الشعر المصري تعاون مع الملحن سيد مكاوي في تقديم كلمات أغنية المسراتي وهو برنامج تم بثه على الإذاعة الوطنية المصرية ثم قام بتحويل برنامج تلفزيوني وفيما يلي اجمل قصائد فؤاد حداد
قصيدة المسحراتى
مقطع
القدس
اصحى يانايم وحد الدايم
وقول نويت
بكره ان حييت
الشهر صايم
والفجر قايم
اصحى يانايم وحد الرزاق
رمضان كريم
مسحراتى يامؤمنين
منقراتى مد الأنين
الله على رعشة الحنين
عمره ماكان الأمل ضنين
ياقدس يانوارة السنين
كأن عينى فى ميتمى
ياقدس مايحتمل دمى
الا أشوفك وأرتمى
وابوس ترابك المريمى
أبويا وابنى على فمى
ماأتوهش ياقدس فى المطال
ياعاصره مهجة الرجال
سقاك من دمعته الهلال
ياقدس ياسبحة الشقا
الأعمى فى سجدتك رأى
والفجر من صخرتك سقى
ياقدس تتفجر الجراح
والصبر حرب وأيوب صلاح
ياأخت من مكه والبطاح
قلبى انضرب للعرب وصاح
لابد من فتح فى الصباح
المشى طاب لى
والدق على طبلى
ناس كانوا قبلى
قالوا فى الأمثال
الرجل تدب مطرح ماتحب
وانا صنعتى مسحراتى فى البلد جوال
حبيت ودبيت كما العاشق ليالى طوال
وكل شبر وحته من بلدى
حته من كبدى
حته من موال
لما تقول أجمل مافى الدنيا
الميه للعطشان
يعرفوك عربى
أما للراوى ريحة البرتقان فى مداخل يافا
يعرفوك عربى
لما تقول ابنى اتولد لاجئ
يعرفوك عربى
لما تقول يارب
يعرفوك عربى
لما تباشر جهادك ترمى أوتادك
فى قلب دابح ولاد
يعرفوك عربى
اصحى يانايم وحد الدايم
السعى للصوم خير من النوم
دى ليالى سمحه
دى نجومها سبحه
اصحى يانايم
يانايم اصحى
وحد الرزاق
رمضان كريم
قصيدة أيام العجب والموت
آدى أيام العجب والموت
جات بسرعه زى غمضة عين
ليه ماقلتش زى لمح البصر
كنت باتقلب على الجنبين
والكابوس من كل جنب يجيبنى
زى أعمى يحس لما يجس
ألقى نفسى والا اشوف نفسى
بالتفت من آخر الدنيا
الحمير بتجرجر العربات
السما اللى تحت منها حابات
عند كوبرى أبو العلا بتشتى
أنكمش فى جتتى من البرد
لسه حارجع طفل تحت المطر
وأنحنى ع الأرض وافضل عجوز
اتوهمت الخوف دهسنى الخطر
كل شئ إلا الخيانه يجوز
ألبس التوب اللى مش توبى
أعمل الممكن مع المستحيل
أمشى زى الخنفسه و البد
جنب حيطه فى ركن ع السلم
الحجر الاصفر بيتألم
فيه أثر للعشره مهما تهون
أقبل الظلم اللى فى الأشياء
والليالى بخدها المدهون
والحياه والناس وحتى فى نفسى
واقرا فى الجرنال كلام تانى
وانتقل فى الماضى واستغرب
وابكى ع المستقبل الفانى
واحمل الضلمه على عينى
وانتبه من نومى واسمع نعى
الزميل جوده سعيد الديب
إسمه بالكامل يا فجر الطيب
اللى ضاعت منى أيامه
وآدى أيام العجب والموت
قصيدة بكيت في الأول بكيت في التاني
بكيت مسحت دموعي
بامسح دموعي بكيت
املوا علينا البيت
املوا علينا المخيم
املوا علينا الظلام
أنا القتيل المتيم
املوا علينا الشجن
أنا قتيل اتسجن
قتيل في يوم الفطام
املوا علينا الهوا
املوا علينا عنينا
نزفنا دم النور
نزفنا في حبكم
دم الخيال خلينا
كل البلاد و الشهور
بلد وشهر حرام
قليل ما قلنا يا ريت
بكيت مسحت دموعي
بامسح دموعي بكيت
املوا علينا اابيت
املوا علينا الطريق
مبلول كأنه طري
غنيت لقطر الندى
من كتر ما غنيت
شقت جفون اللي نام
رمت صبية و غلام
املوا علينا الصرخة
املوا علينا الكلام
املوا علينا الفرحة
قليلة يوم الانتقام
قليل ما قلنا يا ريت
بكيت مسحت دموعي
بامسح دموعي بكيت
املوا علينا البيت
قصيدة القهوة
القهوه تحب كنكه
والكنكه تحب كنبه
والكنبه تحب قعده
مبسوطة مربعه
وكنا أربعه
أنا وانت وأنا وانت
وكنا عيون كتير
وطبليه وزير
ولا بنحب نبكي
ولا بنعرف نطير
أنا وانت وأنا وانت
سبنا البوسطه ورانا
في الترماي اللي داير
العتبه للإمام
كان ريقك جنبي ساكت
حبيتك من زمان
أنا وانت وأنا وانت
شميت لادن سعيد
شميته من بعيد
شميته من قريب
خمس سنين حاغيب
على الشماعه خايف
وباخاف على الدولاب
وبادوب على البلاط
وباحس الظله تقلت
وباسمع الوابور
وباحس الميه تقلب
أنا وانت وأنا وانت
الظهر الشمس تلحس
الظله في الليمان
والظهر الشمس تعمل
سيبرتايه دهب
بصينا لبعض فيها
ومشينا لبعض نبكي
وقعدنا من التعب
أنا وانت وأنا وانت
باقول لك إيه باقول لك
حاجيب حاجات قديمه
قلبي كوره شراب
نلعب والا ما نلعب
فرحت لنا المدينه
وامبارح في التراب
أنا وانت وأنا وانت
وبنفرش ضينا
على ظلة بعضنا
واحنا بنبرد هناك
علشان ندفا هنا
والقهوه تقول لنا
على بال النار ما تلسع
بتبقى حنينه
أنا وانت وأنا وانت
قصيدة علي باب الله
فنان فقير على باب الله
الجيب ما فيهشي ولا سحتوت
والعمر فايت بيقول آه
والقطر فايت بيقول توت
صحيتني ليه يا شاويش يا شاويش
أنا كنت سارح في الملكوت
لما بنام بحلم وباعيش
لما بفوق ما بفوقشي بموت
وتقول على كبير السن
وانا في قلبي ولد كتكوت
وتشوفني ببكي وبانعي وائن
والدنيا لسه بنت بنوت
اشمعنى قلبي ضناه الشيب
من الشقا مهري ومنكوت
قال اللي قال العيب في الجيب
والجيب ما فيهشي ولا سحتوت
والعمر فايت بيقول آه
والقطر فايت بيقول توت
علي المحطة يا ولداه
حتى المحطة كمان حتفوت
قصيدة في حب مصر
مفيش في الأغاني كده ومش كده
تفرقنا عن بعض بالشكل ده
يا مصر اللي جايبة الشجر من زمان
وشايلة الضفاير على البرتقان
وقبل الأوان اللي قبل الأوان
بتحييني أنفاسك المسعده
مفيش في الأغاني كده ومش كده
تفرقنا عن بعض بالشكل ده
يا حلوة كلامك تحبه الودان
يشمسني في الدروه زي الميدان
يمشيني بين الحيطان الغيطان
عروسه وحصان في القمر والعدا
مفيش في الأغاني كده ومش كده
تفرقنا عن بعض بالشكل ده
عنيكي تغمض وتفتح يبان
سطوح الليالي عليه الأمان
وبحر الدره من ورق لامتحان
وبتغني موالي يا مولده
مفيش في الأغاني كده ومش كده
تفرقنا عن بعض بالشكل ده
بحبك كأني طليق العنان
وزى العجوز اللي دق البيبان
وزي الكتاب اللي كان ياما كان
وزي الرصيف اللي في السيده
مفيش في الأغاني كده ومش كده
تفرقنا عن بعض بالشكل ده
قصيدة الأرض بتتكلم عربى
ياسامعين أبناء بلد واحده
تحت السما الواحده وياما جرى
مرت سنين ع الدنيا متقدره
الغرب سماها العصور الوسيطه
ونظر وقال كان الزمن مظلم
أما الحقيقة البسيطة
بتقول فى دار الشرق
مهما جرى ومهما يجرا
من أول تاريخ الهجرة
كان عندى فجر أنشق
نوره فى عين الجبارين مؤلم
حتى اذا ما ألتقوا بالفارس المسلم
عرفوا الحقيقة وعظموا فارس
صلب القوام والدرع تحت العمامة
حتى اذا مانزل من السرج ونصب خيمة
سهل الدموع الا أبتسام الراضي
مايل بجسمه لأستماع الأراضي
وعلى العيدان الطرية
ايديه نديه كيف أيدين الفارس الغارس
هذا الذى رد الثغور البهيه
وبنى باسماء الأئمة المدارس
وحضر مع الخصم لمقام القاضي
وأعاد الى الأم الصليبيه ابنها
أما عن المنكر نهى
وأما فى ليلة شجن بالشام
حلف يمين أفضل له
يفقد ولاده ومؤنسته ولا يهدم
هذا صلاح الدين فتى مقدم
حامل لواء الفتيه والأجناد
فوق الخيول المسرجات الجياد
وهى ليله من ليالى ربيع
أو هى ليله من ليالى جماد
القاهرة أولى رايات الجميع
عند المقطم كبرت للجهاد
يارب تشفى الصدور
يارب توفى الأمهات الندور
يارب تمنع عن ولادنا الويل
زاحفين على السواحل سلاسل نور
والبحر من دمياط يحيي السيل
واترتبت ع الخطوة رجلين الشهور
والصبر أملك من عنان الخيل
حتما على قدام وحتما ندور
والحصن فى عكة عظيم الليل
يلقى الآذان بيشق فوق السور
الحق ياولاد العرب منصور
فى كل أرض اتكلمت عربى.
الأرض بتتكلم عربى وقول الله
ان الفجر لمن صلاه
ماتطولش معاك الآه
الأرض ..الأرض .. الأرض
الأرض بتتكلم عربى
الأرض بتتكلم عربى ومن حطين
بترد على قدس فلسطين
أصللك ميه وأصلك طين
الأرض ..الأرض .. الأرض
الأرض بتتكلم عربى
الأرض بتتكلم عربى سبل وكروم
تجرى اللقمه على المحروم
ما تثبتش حصون الروم
الأرض ..الأرض .. الأرض
الأرض بتتكلم عربى
الأرض بتتكلم عربى ياخيال
بيعد سيفك أم عيال
ظهرك ياما من الأجيال
الأرض ..الأرض .. الأرض
الأرض بتتكلم عربى
الأرض بتتكلم عربى حتى البور
بنت الساقيه والطنبور
حتى فى بطون الأرض قبور
الأرض ..الأرض .. الأرض
الأرض بتتكلم عربى
الأرض بتتكلم عربى بوجد وشوق
الفرع اللى يهم لفوق
لأجل الجدر يشم الضوء
الأرض ..الأرض .. الأرض
الأرض بتتكلم عربى
الأرض بتتكلم عربى جدورها جدود
مد اتوسع زى العود
انت الباكر والمولود
الأرض ..الأرض .. الأرض
الأرض بتتكلم عربى
الأرض بتتكلم عربى ولا ترتاح
واصل كالسيل المجتاح
فتحك ياعبد الفتاح
الأرض ..الأرض .. الأرض
الأرض بتتكلم عربى
قصيدة الأراجوز
أنا عندي يا ولاد الحلال حدوتة
أنا والدي هو اللي عاشها
ولا حد قبلي نقشها في خبر ولا مخطوط
كان والدي بالطبع زيي أراجوز ولكن حزايني
وانا كنت واد قطقوط
الخالق الناطق دماغي دماغه
الخالق الناطق كما الشموط
كتن صوته الله يرحمه صفارة
وجسمه رايح جاي زي الفاره
وعظمه يا نجارين بيلق في الزعبوط
وفي يوم من الأيام .. خلي بالك معايا
هنا العقدة
نده الملك وكان ملك أعظم من العمدة
وعينه مضحك ولي العهدة
وقال له يا ألعب من القرموط
تضحك الولد أعلي مرتبك
تبكي الولد أقطع رقبتك
افهم كلامي وامشي بالمظبوط
والدي الله يرحمه ما كنش ناقصه
طلع سلاح أبيضاني وقطع رقبته بنفسه
راح الولد في البكا وأنا والدي مات مبسوط
أنا والدي مات مبسوط لأنه عكس أمر الملك
أيام ما كان الملك ملك
ومصروف الأمل مضغوط
من ساعتها وانا عندي جيوب أنفيه
وعيني كما الحنفية
والدمع مني وفي
بحر ماله شطوط
قصيدة الحضرة الزكية
يا اهل الأمانه والندى والشوق يا مجمعين
الشمل الحضره الزكية أول ما نبدي
القول نصلي على النبي
المصطفى سيد ولد عدنان
آه يا منى عيني منى عيني
يا سيدي يا ابن الذبيحين
انت الأمين في هلال محرم هاجر
ذكر هلال نادى على الأم هاجر
إذ هرولت بين الصفا والمروه
وبكت ليالي واسماعيل لم يرو
بتواجه الريح اللي تعوي وتجلد
وحجر وظلمه وخوف وشمس ورمل
وكأنها بتحمل ضناها وتولد
واتوحمت ع الميه طول الحمل
حفيت عينيها ولما سالت زمزم
بعينيها سالت وارتوى الظمآن
قالت عينيها تبسم
عدت غمامه تنسم
ريح الحجاز وتوسم
أحب أرض الله وطن للزمان
ورجع خياله لحد أول يوم
سمع الخليل يطلب من الرحمن
تهوي إليهم أفئده من القوم
اقبل فؤاد من أفئده
تهوي إليك
يا خالق العود البريء
كان الفؤاد زي الحريق
لا ماء ولا زرع يبل ريق
والأم تبكي على الطريق
هاجر هناك الوالده
اقبل فؤاد من أفئده
تهوي إليك
العين ما تعدمش الدليل
الدمع في الخد البليل
من فجر أيام اسماعيل
هاجر تنادي على السبيل
زمزم ترد على الندا
اقبل فؤاد من أفئده
تهوي إليك
لما رأى الرؤيا خليل الله
نادى وأخد ولده على يمناه
ما أبعده منه وما أدناه
فين تبدأ الأشواق وفين المرسى
أنا شفت من بره وجوه عيني
الشمس ماشيه بتبكي زي الخرسا
وبلغ معاه السعي قال يا بني
شفت اسماعيل في عيونه إنسانان
دمعة حنان زي ابتسامة حنان
بيقولوا يا أبتي بأجمل حس
كان نصل ما يحتاج إلى سنان
ورمش نايم في الحجر بيمس
الله أكبر أيها المؤمنان
سجد ابراهيم للي ناداه يا ابراهيم
ورأى اسماعيل الدنيا زي الميدان
الله هو الرحمن وهو الرحيم
والناس إلى الكعبه في نور الأدان
أقبل فؤاد من أفئده
تهوي إليك
يا قوة الجفن الجريح
لا يرضى بالدمع المريح
ينظر إلى الموت الصريح
النصل فوق نحر الذبيح
الله قبل فيه الفدا
اقبل فؤاد من أفئده
تهوي إليك
أمري إلى الله الرحيم
على الصراط المستقيم
سبحت للعرش العظيم
تحت السما وكان إبراهيم
يرفع أساس الأعمده
اقبل فؤاد من أفئده
تهوي إليك
لما فؤادي اهتدى لمعناه
سجد في صدري شاكرا لله
اقبل فؤاد بيقول أنا لبيت
وسعيت لأعتاب الذي حبيت
من أرض خضرا ومن جبل حجيت
ومن البراري والعواصم جيت
لك يا بلد يا آمنا يا بيت
وكأني طاير أو كأني حبيت
اقبل فؤاد من أفئده
تهوي إليك
يهوي إليك في كل حين
يهوي إليك في الخاشعين
والطائفين والعاكفين
وفي كل دعوه تقول آمين
منى ومن أم البنين
والأرض تتلقى الجبين
بين الجموع الساجده
اقبل فؤاد من أفئده
تهوي إليك
يقول عبد من عباد الله
شاعر ولا مره فؤادي انعصر
إلا استفاد المعرفه وانتصر
ويبوس على هذا الأثر والأثر
وفي حب هاجر يختم الراويه
بكلمه أطيب في النبات والوتر
مما لو ان السيل وكل المطر
وكل أنهار البلاد راويه
صلى الإله على الرسول وسلم
صلوا عليه وسلموا تسليما
قصيدة حب الوطن
ردى ياسهريه
الروح لهذى العين
النبض للخيالين
ياغنوتى السحرية
أنا كنت غايب فين
أنا كنت دايب فين
أنا كنت دايما فين
غيران من السحلية
الخضرا زى الشمس
والا غريق فى الأمس
والا فى غرام هندية
بين الجسد والرمز
والا فى شجر يواقيت
فى ساعة استذكار
فى متجر المواقيت
والا كذا منقار
بيطور الحنية
بيلتفت بيهز
بياض فى ظل النهار
كأنه لبن البز
اللولى زى ماقلت لك
ببلاش
أربع بلاد ع الرصيف
وفى لفة السلم
الأولة ربع خالى
والتانيه عزوة خيالى
قرب وشوف موالى
بالطبع وفلسطين
الأولة مش صفيحه
مش علبة من هونج كونج
وجنيه كانت فصيحة
زى أرتفاع البرج
وبحر يوسف
وبير يوسف
بيناتهم شهر
واللى بيناتهم بلد
اللون رمادى شرد
زى الغزال من قرونه
والسبع من ديلة
بالطبع وفلسطين
واحنا فى آثار التاريخ
ولا فى آثار الحفر
ولا فى آثار النوم فى كلب الغرزه
الأوله مانى فاكر
والتانيه ماني فاتورة
كل القلوب مفطورة
على ايه ومن أيه
من حب الضنى وعليه
بالطبع وفلطسين
والأولة يا فلسطين
ياموشوشانى
فى القصيدة اللى فاتت
بعد الأوقات الى فاتت
بعد الزمان
اللى فات
كسروا رقبة المثل
لامات المثل ولا ماتت
فى دمى باتت
ردى ياسهريه
الروح لهذى العين
النبض للخيالين
ياغنوتى السحرية
أنا كنت غايب فين
أنا كنت دايب فين
أنا كنت دايما فين
قصيدة دي سحالي
أنا حره وأموت في الحريه
ومزاجي أعمل سحليه
أزحف ع الأرض وع الحيطه
واطلع وانزل واعمل زيطه
واضرب في الشمس طرمبيطه
أنا حره بديلي وبراسي
وماحدش يكتم أنفاسي
وما احطش ماسك لإحساسي
ولا احط قزاز
ولا أقفل شيش
عقلي يا هزاز
كلك نغاشيش
وأنا حره أعيش
أنا عاوزه أعيش
أنا بدي أعيش
أنا نفسي أعيش
على كيف كيفي
أنا حره وأموت في الحريه
ومزاجي أعمل سحليه
أرقع في الشمس الزغروطه
واخد حمام من غير فوطه
أنا حره براسي وبديلي
حره بنهاري وبليلي
حره بمناخيري القطقوطه
أنا حره بخشمي ماهوش خشمك
وما احطش برقع ولا يشمك
ولا احط قزاز
ولا أقفل شيش
عقلي يا هزاز
كلك نغاشيش
وأنا حره أعيش
أنا حره وأموت في الحريه
ومزاجي أعمل سحليه
أنا ابقى سحليه وسيمه
ويجيني برص بتاع سيما
وبتاع مزيكا وترا لم لم
واتاوي في حضنه وأنا باحلم
ويقول لي ابتسمي يا بسيمه
وافرحي بالميه وبالخضره
ماتحطيش احمر ولا بودره
ولا احط قزاز
ولا أقفل شيش
عقلي يا هزاز
كلك نغاشيش
وأنا حره أعيش
أنا حره وأموت في الحريه
ومزاجي أعمل سحليه
سحليه وحبايبي سحالي
أنا حره بحالي ومحتالي
حرة أصحصح والا أسخسخ
والا أغني وقلبي يشخشخ
أبواب الدنيا فاتحه لي
ما اقعدشي في الأوده لوحدي
وما احطش إيدي على خدي
ولا احط قزاز
ولا أقفل شيش
عقلي يا هزاز
كلك نغاشيش
وأنا حره أعيش
أنا عاوزه أعيش
أنا بدي أعيش
أنا نفسي أعيش
على كيف كيفي
