كاظم إسماعيل كاطع الحمراني المحمداوي شاعر شعبي عراقي. يعد واحدا من ثلاث أعمدة للشعر الشعبي في العراق وهم مظفر النواب عريان السيد خلف وكاظم إسماعيل الكاطع اصدر في الشعر ثماني مجموعات شعرية كتب اكثر من الف قصيدة و أغنية للعديد من المطربين والفنانين وفيما يلي اجمل قصائد كاظم اسماعيل الكاطع
قصيدة الدمعات
ما ذكرتج الا والدمعات صبت
ما ذكرتج الا والسهلات صعبت
انتي كسره واهسي وانتي الضياع
روحي من زغري على همومج تربت
عود سيجتك بروحي
والمنايا
مدري مدري
اشلون طبت
ما ذكرتج الا وجت دمعتي
ونيراني شبت
يا جميلة البيج كل معنى
الحسن واختارج الله
حتى بيج يباهي كل خلكه اللي ولت
اني وحداني واضيع
وربعي.. كل ربعي
تخلت
جنت صافي.. وصافي بالي
غفلة واعليه الرياح
بكل كتر.. كل صوب.. هبت
انتي دمعه.. اشلون دمعه
انتي مي.. وطاح
كليلي بعد منهو اليرجعه
طبع الموت مثل الذيب
لازم يغدر بربعه
جنت اوياج.. بزيارة ابو السجاد
جنه بليلة الجمعة
ومصباح السبت ياحيف..
فد شي يشبهه الطيف..
صارت وجعتج.. وجعه
لفتح كل مرازيب الدموع
مغيم الليلة.. عليج.. ولوعتي لوعه
انه بلياج حال الضيم..
حال اللي لوم موسين..
وكليبي العليل.. ابفكد جا ابضعه
انه بلياج صم عاكول..
والليل بحوافر وحشته.. ايشلعه
وصاح بصوت
حتى المبعد يسمعه
ولك ياموت هم جوعان؟
دورت الحلو المزيون.. للجوعه
ولك يا موت دورت الطويلة بين هاي الناس
هاي احسن.. واهم دفعه
اريد وياك تاخذني ولك ياموت..
بلكت.. كلبي اترضعه
لمن ينطبكن اللحدين..
اهناكه ننجمع..
يا محله هل الجمعه
ومثل ما راحت بمصباح..
هم نعشي.. تزته ابساع.. وتودعه
بعدج هم الاكي طعم للشفه
طعم خدين
طعم الريح
طعم سوالفج
ياحلوه
يانبعه
بعدهه ما اظوك النوم..
الا بموت
عاد اسمع لونهه..
اوهي.. اتسمعه
قصيدة العمر كاضي
الدنيا ما دام انتهت
والعمر كاضي
منهو بينه بلا خطيئة
خل يكوم اعله الملف
يكشف الماضي
خل يجي يسويله مره
ايشوف بيتي اشراح وشظل
من غراضي
ناس صعدت
ناس بعدت
وانا بخيمتي وسوقي وعكاظي
وجان بامكاني اصير
لكن هموم العشيرة
لا انا راضي على شيخي
ولا عليه شيخي راضي
جان بامكاني اصير
أملاك وقصور واراضي
لكن اعرف هاي كلها
ماتساوي فركة ايد
وراس محني اباب قاضي
لكن اعرف هاي كلها ماتساوي
نوم ليله اعله المخده
بليه خوف وبال فاضي
هي مو بالسرعه تلم
ولو على السرعة يصير
اغنى شخص عدنه الرياضي
خلصت عمري بدولتي
لا انا راضي اعله وضعي
ولا عليه الوضع راضي
قصيدة ريحة الحنطة
ماخذ وياي العراق بجنطه
ما كفت الجنطه
طالعه منها مناره وعثك نخله
وشعله من عيون نفطه
وراح نوصل ذاك حد السيطرات
وذيج ضوايات المحطه
وين اضمها
لا هوه كتاب ويخليه المسافر جوه ابطه
الحمد لله..
الدنيا ليل ونقطة التفتيش سنطه
هاي نقطه ويمها واحد
نقطتين. ثلاثة. خمسه.
ست نقاط ويمها واحد
تنحسب مليون نقطه
وصاح مسؤول النقاط بصوت عالي
هاي ما معقوله جنطه
بصيحته انزرعت الساحه
رجال امن ورجال سلطه
بجرة السحاب شافت عينه نجمه
وطكته ريحة الحنطة
ما لكه غير العلم
كلي شيفيدك
كتله غربه
احنه غربه
ومن نموت هناك جا بيش انتغطه
اخذ للجنطه تحيه وكلي توصل بالسلامه
وهاي اول مره افوت بسيطره
وما انطي رشوه
وتستعد كدامي شرطه
قصيدة قيود الوهم
اكسر قيود الوهم
ما ابقى الك مكتوف
والصرخه البداخلي
بركان آه و اوف
ما الك بيهه فخر
تطعني من الظهر
العين لو غمضت
كلبي تراه يشوف
ظلمه وطريقي صعب
والحيره بيه دور
ماكو بحياتي ضوه
وحسبتك انته النور
وبلحظه بيك انصدم
واجهني لا تنهزم
نعبر حدود الخجل
نحجي على المكشوف
العين لو غمضت
كلي تراه يشوف
خليت بيه جرح
مو مثل اي مجروح
ويجوز يشفه الجرح
بس الاثر ميروح
انكشفت اثار اللعب
وقصير حبل الكذب
ياهو الينه خسر
بالتالي راح نشوف
والعين لو غمضت
كلبي تراه يشوف
قصيدة اريد ابجي على صدرك
اريد ابجي اعله صدرك مشتهي النوح
واريد اكعد اكبالك واحسب اجروح
ومثل الطير من يودع الروح
جاي اركص ابابك ركص مذبوح
اهي كسرة عظم ماتجبر بيوم
ولا دورة سنه واثارها تروح
كسروا واهسي وخلوني مالوم
وخايف عله عيوني بالبجي اتروح
كنت امر وانهي وصاحب الراي
يوم ايدي طويله وجيلتي اتلوح
اريد ابجي اعله صدرك مشتهي النوح
واريد اكعد اكبالك واحسب اجروح
اريد اركي اعله صدرك راس تعبان
واسولف عن عذابي وغربة الروح
جاي انزع ابجفك سهم الاصحاب
تبروا من طحت عافوني مطروح
سحكوا فوك راسي وجرهم الخوف
ونزلوا للوحل من عالي السطوح
ويوم اللي شفتهم وكعوا ابير
نزلت وساعدتهم وانه مطروح
ويوم اللي شفتهم نزفوا اهواي
كمت انطيت دم واحلبت الجروح
اريد ابجي اعله صدرك مشتهي النوح
واريد اكعد اكبالك واحسب اجروح
قصيدة ملفته للأنتباه
مثل شبوي المسه بعطره وشذاه
حبه حبه وكطره كطره
وبالرسم طول خلك بيج الاله
صور عيونج مواني
وبيها عاف الليل نومه وذب غطاه
من بعيد انتي جميله
من قريب انتي جميله
واكفه تمشين حلوه
والحلو وجهه يبين من كفاه
عيوني ما تكذب عليه
العسل يم الاشاره
جدى منج
كسر كلبج
واخذ من خدج حلاه
الله الله اشهل حلاه
الشكر ماكان مزروع اعله كاع
ارض خصبه للشكر هاي الشفاه
والكلب مدري شجاه
قبل كنت اكدر عليه
الوي اذانه ايخاف مني
وهسه صرت امشي وراه
وهسه صرت امشي وراه
ولا حياء في الحب
احبج
خل يحسبوني رجل حن لصباه
لان ملفته للانتباه
سنه اشفافج عله اشفافي
بصراحه الوكت مو كافي
اريد الشته ايصير اربع مواسم
ياحضن دافي
واريد الليل سبع اسنين
والله ايموت الغافي
لو طال السفر وياج
من روحي الخدر ينزل عله الرجلين
وامشي اعله الجمر حافي
ولو ميت وامر بشارع امشيناه
انسه جنازتي وتتحرك اطرافي
ولو يطفه الضوه من الصبح لليل
عن بيتي تكول الناس عنده اكلوب
ما طافي
ضعفني الزمن لكن اكابر بيج
من صار النهر دهله الربيع الفات
مديتي اديج ورد نبع صافي
سنه اشفافج عله اشفافي
بصراحه الوكت مو كافي
ارد اخذها
قصيدة التاجر
إتريكت باكت صبر وكلاص هم
وتوكلت يارب عليك
غبشه نعسانه الشوارع
ومدري يانثيه ابفجر دم تشتهيك
إتذكرت تاجر اعرفه
كلي من اتبيع روحك مرلي بلكت اشتريك
وتمت الصفقه اشتراني
وحصتي هم رد اخذها
فكر ابمشروع بي ادخل شريك
وصار يمليلي ابشروطه
.. ما اريد و .. ما اريد
وما اريد ايدك طويله
كتله اكصرها واجيك
وابترتها من المتن ورجعت ابشره
كتله عد عينك شلتها
كالي جا شلي بيك
جراح الحصار
ومن هذاك اليوم والتاجر نسه وسد القضيه
وانه منسي .. امعلك اعله ارفوف صبري
وحتى صار اتراب بيه
راحت ايدي اتفلشت اقوى الدفاعات
وخطوطي الاوليه
ناس مقهوره اجت تبجي عليه
وناس بطرانه اجت تحجي عليه
اشلون غلطه اتسرعت كصيت اديه
.. هاي اديه
.. هاي اديه
صار تفتيش بسنه من السنين
وعوضت عن الهويه
هاي اديه
ياما لعبت .. ياما قبل الريح هبت
ياما بصدور الثلج نيران هبت
هاي اديه
وهيه مكصوصه
شعر للناس كتبت
وصفوا جراح زين ابمنطقتنا
حركوا بعض الرماد ابعود شخاط
وبعدها النار بيه
عفيه جراح الحصار البي حميه
وحده يكدر يكطع الخيط اللي
يربطني ابشرايين المنيه
.. إتفقنا
وصارت الصفقه بعيادة هل الطبيب
اخذ ايد وانطي كليه
وباشر الجراح وتمدد شخص مو من اهلنه
واخذ دم
وجيب دم
واصعد انزل
والوسيط الجابني ايصبر عليه
خلص مفعول المخدر
فتحت ملكيت اديه
حصدوا الكليه ولا زرعولي ايد
وقع الدكتور تقرير ابنسختين وتركنه
ولازم الفراش باب الصيدليه
الكادر اتجمع على اهل الغريب
ايهني بيهم
وانه بالسديه نسوني وياحزن ذيج المسيه
والمضمد راد حكه
كتله مد ايدك ابجيبي
لا لا .. مد ايدك ابصدري
يجوز هم تحتاج ريه
جابلي الفراش سر
وعرفت منه تفاصيل القضيه
المريض الجان يمي
كليتي رهمت عليه وايده مارهمت عليه
واهلي زعلوا طردوني من العشيره
ومن فشلتي كمت اصيح
انه مامحتاج ادين
انتوا شعليكم بديه
اتبرعت بيهن لان ما اريد
يوم اتوازى
واتنازل
وامد للناس اديه
قصيدة امس واني بحلات النوم
امس وانا بحلات النوم
وبصفنه حزن بالليل متعذب
ندهني صوت شاعرنا
وعرفته صوت ابو الطيب
سألني عن جديد الشعر هل ايام
والناس بغيابه شكامت شتكتب
شتكتب والجديد البيه فرح كذاب
والكلك جديد يفرحك يكذب
امي من الزغر تنكل حطب للنار
ويفور جدرها ومدري شتركب
مصباح الحزن صبتلي بالماعون
ومن ضكت الحزن شفت الحزن طيب
تسأل عل السمار الغلف الوجنات
دمك يحترك لو كلبك يعطب
هاي هدومنه مالات عشر سنين
مو سمران بس هنه علينه الوانهن تكلب
مبعد ياقطار الفرح وين تريد
بلكي بدوستك وياهم نجلب
دنيا وغيرت من البشر اطباع
وكلب الضيف مايقراه المعزب
لو مية سنه بعد الثلث ايام
محد يسألك طلبتك يا هل ضيف
ألا نمدها اله وبلسانه نطلب
قصيدة منو يكدر
منو يكدر يشيل الحزن عني
ويخليني بفرح للناس اغني
يساعدني على هم من الهموم
وانا همومي هواي وتعبني
تعلمت الحزن من امي والناس
من لولت عليه الولد يبني
دللول.. ودللول.. ودللول
نايل طورهن ليهسه باذني
فطموني بصير وبغيمة دموع
مطرن بس عليه وبللني
زرعن بيه كل انواع الاحزان
وماجازن لحد ما شيبني
قصيدة يصبرني
يصبرني
المادره بقصتي
ويكلي تهون
عشره وشيبت باولهه
وتاليها شلون
ينسيني.. منهو ينسيني
انطيه الباقي من سنيني
وانا الممنون
يصبرني وما تسوى يكلي
هوه شمدريه
لو نار الشبت بضلوعي
تتحول بيه
يمكن يتركني باحزاني
وما يسال شمغير الواني
كلساع بلون
يداويني
المايعرف علتي
شيفيد ادواه
راحوا لبعيد ومارجعوا
خلوني هنا
هنيالك يل كلبك خالي
ماتدري شصاير بحوالي
هم اليدرون
يصبرني المايدري بعلتي
ويكلي تهون
