محمد بن أحمد بن محمد السديري هو أمير وشاعر سعودي ولد عام 1915 والده هو الأمير أحمد بن محمد بن أحمد السديري الثاني كان مشغفا بالشعر والفروسيه والقنص عاش حياة مرفهه نظرا لكون والدة امير ومن اجمل قصائد محمد الاحمد السديري ما يلي
قصيدة جض الفؤاد وفارق النوم للعين
البارحه يا زبن بالقلب هاجوس
اسهر وبعض الناس بالنوم مغفين
شفت الصحيح وواضح العدل منكوس
وجض الفواد وفارق النوم للعين
اضحك ونا الصابر على جرعة الموس
وعزى لمن يصبر ويغضي على الشين
انا الذي قلبي بالانياب مجروس
من عام الأول به جنون وشواطين
قالو علامك قلت بالقلب حاسوس
قالوا تصبر قلب صبري إلى وين
ابكي على اللي للوطن عز وحبوس
راحو عن الدار العزيزه مقفين
اهل الدروع اللي على روسهم طوس
الحاكمين العادلين المصلين
أثر ليال السو يبري لها نحوس
والأرض ما تخلا بليا شياطين
ناس يحدونك على مذهب الروس
وقلبك يبي ما جا بطاها وياسين
يا ليت كل بالموازين مقيوس
حتى يبين الحق بين الموازين
ولا ياليت الحبل محكم وممسوس
ويشاف من يصبر على العسر واللين
من عاش ما حصل بدنياه ناموس
عصب بغير ارضاه يصبر على البين
بالله يالاهين بمقارع الكوس
الطيب عنكم غرب وانتم ورى الصين
الطيب عنكم مع هل الطيب محبوس
تجللوا ثوب الخنا يالرد يين
الطيب ثوبه مع هل المجد ملبوس
واضح وبين له سلوم وقوانين
محد يحوشه بالحيالات وفلوس
واهل الردى ما حصلوه ابملايين
اقفا مع الغالين قطاعة الروس
اللي على القاسين بالفعل قاسين
عرق الندا بقلوب الأجواد مغروس
حمله زهور الورد هي والرياحين
إن كفني وقتي بالانياب وضروس
شكيت للي عز بالغار الاثنين
قصيدة اللي سلب مكنون عقلي من اقصاه
فات رمضان وفات شوال يقفاه
والفطر الآخر فات والروح تعبه
والقلب عيت يتسع به حناياه
لو هو ظهر كل الفضا ما تسع به
يكفخ كفيخ الطير من كبر بلواه
وكن الجراد من الموده رتع به
ان دك به هاجوس غال فقدناه
يم الكواكب يابو ماجد طلع به
اللي سلب مكنون عقلي من اقصاه
عز الله انه يابو ماجد طمع به
عزى لقلب معطشات ظماياه
وسيف الموده بالضماير شرع به
يكفيه من جور الهوا عشر ما جاه
وحبل الرجا عقب الوصال انقطع به
قصيدة لا واحسايف
لا واحسايف يام وافين الاشبار
عقب اجتماع الشمل زارت لحدها
راحت فوات الحرص من وال الاقدار
في سهلة بالعود دفنت وحدها
ام برور للموالي والاحرار
وكن الضعيف اللي يجيبها ولدها
اللي إلى جاها ضعيف ومحتار
يبي الحساني في ذراها يجدها
وكم من يتيم زارها عقب الاعسار
وطالب حساني الخير ياما قصدها
تحب فعل البر باكبار واصغار
وان جاعت الرملا الضعيف اتعمدها
دايم حسانيها على الرمل والجار
وكل إلى شح الزمان يحمدها
اللي عطاياها كثيرات وكبار
تعطي الألوف ولا تحسب عددها
دايم ويدها للاجاويد مدرار
ياما عطت من فايض الخير يدها
وعن فهوة المخطين تغظى بالانظار
وعن كل خلق الله بعيد حقدها
يالله عسى مكانها وسط الابرار
والجنه العليا تفوز بسعدها
وعساه ما يعرض على واهج النار
وبجنة الفردوس طاهر جسدها
يالله تجعلها تجاور للاخيار
آمين تقبل طلبتي لا تحسدها
بحسناك يا عالم خفيات الاسرار
مناهل للحور عندك تردها
بحسناك تقبل دعوة الخاشع البار
روحه من العبره تردي جهدها
وعسى إلى هلت هماليل الامطار
من مزنة غرا حقوق رعدها
وبله حقوق بارد يخضر الدار
يقول له رب المقادير عدها
امطر على قبر هوت فيه باصخار
وارعد عليها كل يوم وزدها
ياما عليها هلت العين باعبار
واسترسلت عبراتها من نكدها
عن كل ما شافت وعن كل ما صار
ياليت من هو مرة لو نشدها
الدار عقب اللي لها ستر وانوار
طاح العمود المرتفع من عمدها
راحت سوالف يا طويلات الاعمار
امشن مماشيها وحلن عقدها
محي الكتاب اللي دليل للابصار
ويا فاعل الخيرات ما احد جحدها
قصيدة عنود لا تبكين
كل حي مقفيات رحايله
وارى كل نفس غير الا له زايله
وارى كل مخلوق مرده إلى الفنا
ومن عاش بالدنيا تصيده جايله
ونيت من خطب بالآفاق لاح لي
من قيل ابو خالد تقافت رحايله
اقفي وخلاني وروحي معذبه
واحزان قلبي بالضماير تشايله
وحيد اصارع عبرة تضهد الحشا
واكابد هموم من عنا الكود صايله
تحطمت منها ضلوعي وانا الذي
ارى كفة الميزان بالكون مايله
ليتي حضرته قبل موته وليتني
عن حاجة بالقلب ليتني سايله
غدا قفل قلبي واستلجت صبابتي
وانا ظن قلبي ضايعات دلايله
محا الله دنيا فرقت شمل ربعنا
تفاجي بغارات للاجواد هايله
عنود لا تبكين كفي عن البكا
ترى عبرتك زادت بقلبي غلايله
عنود لا تبكين شوفي محاجري
بها دمعة من جاير الغبن سايله
عنود لا تبكين نوحك يضرني
وكني من الفرقا بحامي ملايله
عنود لا تبكين وادري بماجري
ترى كل ما شلتيه انا اليوم شايله
عنود ما صابك ترى هو مصيبني
وبالعين ما خلتيه عيني تخايله
حللت يا من هو للاجواد ملتجا
يا عز مظلوم قصار محايله
حللت ياللي ما وطا ساحة الخنا
ولا خطوته يوم على الشين عايله
حللت يا رمز الوفا كاسب الثنا
اقوله وغيري قبلي اليوم قايله
حللت يا رمز العروبه إلى هفا
عن الجود مشبوه خباث دغايله
اقفي وحال القبر بيني وبينه
ويد المنون وشقه البين حايله
اقفي وخلف من مجانيه سته
ابعتاضهم حيث انهم من سلايله
فهود وفيهم جاد ظني وهقوتي
مكاسيبهم يوم اللقاء كل طايله
ابيك يا خالد بدهري تعيضني
بغال رحل واقفي ولا حد بنايله
مساكين يا طلابة الفضل والندى
الجود راح ولا بقى إلا قلايله
الفضل ضاع وغاب نوره عن الورى
توارت بدوره وسط الاظلام جايله
مساكين يا طلابة الدين والنقى
عظيم النقى طغت علينا نكايله
مساكين ياللي كادهم جاير العنا
رحل عن وطنهم من قرتهم فضايله
ان كف همال المطر وابعد الثرى
ولا بارق يرجي المطر من مخايله
عن العنا من فيض فضله يغيثهم
وبالفضل يوم الشح تندي شمايله
ان اجذبت شهب السنين وغيرت
تلقى مضيفة كاثرات نزايله
عفا الله عن عين حريب لها الكرى
إلى الصبح صافيها تنثر شلايله
قصيدة ما لوم قلبي
يسقيك يا دار شمالي عنازه
غرب الولج يا علي شرقي الطريبيل
سقاك نو ممطر من عيازه
على رغاب القاع فيضن من النيل
عز الله انه راح فيها جنازه
صميدع توصف عليه الرجاجيل
له في عازاة ولي فيه عازه
بوقت اللزوم اليا حصل بالدهر ميل
مالوم قلبي لو يزود اهتزازه
جر الونين وشاف ظيم الغرابيل
عيني كما شنن تفتق خرازه
عليه دمعات المحاجر هماليل
حر جزع واذا بقلبه حزازه
وتفجرت شعبان قلبه مباهيل
تقصر يمين اللي بالايام هازه
يرجع ذليل فاقد العقل بهليل
اللي على ضده ثقيل حرازه
اخو محمد صافي الذهن حلحيل
من شبته ياما قطع من مفازه
وياما ظهر من غرقة كنها الليل
رقا سنام المجد والطيب حازه
وبيته لعصمان الشوارب مداهيل
قلبه من البالود ما هو جزازه
والغيظ قد فجر قلوب مغاليل
ان داخل الشردان رعب ونزازه
الذل ما يلقى عليه المداخيل
هزيم حطو حفرته بالعزازه
براس الطويله وارفع القبر بالحيل
ومن الذهب حطو لقبره ركازه
ومن صافي الياقوت حطو قناديل
حتى يجيه اللي بعيد منازه
يلقى بقربه شمخ القود والحيل
اعتضت به ربع لقلبي لهازه
ربعه هل العليا عصاة مشاكيل
علمي ليا جاهم سريع نجازه
وانا لهم دايم على الحول والحيل
هم فزعة المظيوم وهم جهازه
وبالفعل للشعلان تشهد هل الخيل
شعلان فيهم للحرايب ميازه
جدع مدرع فوق قت مشاويل
ربع حماهم ما يقرب حجازه
وعدوهم يسقوه ويل باثر ويل
ان حل ضرب مخلص بالبرازه
ارووا حدود سيوف حدب مناحيل
احد يحوش الطيب غصب خزازه
وناس عن العليا ضعاف مهازيل
ويبين لك فرق الذهب من بيازه
فرق بعيد ابعد من الجدي لسهيل
البيض ترضع لين يابس غرازه
وبالألف يظهر واحد به تنافيل
نواف دنياكم غريب عجازه
دنيا بها يغدر ضحا صفوت الخيل
تاخذ رفيعين المباني بزازه
ياليتها تعتاض عنهم تباديل
لو قيل قلبك مصخر بانحيازه
الذل ماله وسط قلبي مداخيل
انا احمد الله ما حضرني خزازه
وردون ثوبي ضافيات مضاليل
قصيدة رعى الله خلان
تذكرت خلاني وهاجت صبابتي
من الوجد واضحت دمعة العين سايله
على صفحة الخدين سالت دموعها
وهلت على الاوجان صافي بلايله
ان قلت دمعاتي على الخد نشفت
تجيني العبرات بالكود صايله
تجرعت بالعبرات من كود ما جرى
همت تعظم بالضماير غلايله
وبقيت اصارع عبرة كادت الحشى
وهم بقلبي بين الاضلاع شايله
رعى الله خلان تقافت ضعونهم
اقفوا ولا عنهم شفيق نسايله
اقفوا وخلوني وروحي معذبه
وهموم قلبي بين الاضلاع جايله
اخيلهم مع صحصح البيد وانتحوا
ومن دونهم صحرا سرابه تشايله
وصفقت من وجدي بكفين راحتي
وما قالت الورقا من الوجد قايله
أبيهم وحال البعد بيني وبينهم
ولا زال في عيني من الناس زايله
اجوب الفيافي وابتع السير بالسرا
بصحاصح جرد تضيع دلايله
ابدد همومي في ذرا كل مرقب
وعيني إلى شافت خيال تخايله
اخذت اسايل دراهم وين حيها
وشفت الرسوم وما بقي من نثايله
اسالهم عن من برى الحال وجدهم
وجابت تقول الحي قفت رحايله
وانا في مهاميه تطارد سرابها
وشوف الفجوج وهوج الارياح هايله
ونيسي بها هوج الرياح الياعثت
بشاير مزون ممطرات مخايله
تغلغل غلاها في خفايا جوانحي
واكحل جفوني من عجاج تهايله
لو هو بجفن العين عندي ترابها
ذرات تبر صافي في مكايله
اقبل ثراها يوم انا مغرم بها
وعندي حصاها جوهر في مسايله
احبها واحب حي ربابها
وربيع قلبي من معزة قبايله
سقاها من الوسمي مباكير سحبها
تقافا عشاياها تلاعج شعايله
مزون منشيها عليها يسوقها
على نجد من فضله تنثر شلايله
اليا شفت نوار الخزاما يشوقني
والورد بغصون الشقارا تمايله
تعطرت من ريح البختري إلى عصف
به الريح يمي من مغاني حمايله
اشجارها وان شط حامي هجيرها
عن السموم الجا لبارد ظلايله
لاكن نوار الزهر فوق نبتها
عقود غضات الصبا من فصايله
امرغ جبيني فوق طاهر ترابها
واناجي لمن بالعسر ترجا فضايله
ابى هوا نجد ولا رمت غيرها
ويبرى جروح القلب نسمة شمايله
دار لنا ار غذتنا بعطفها
كسبنا بها رغم العدا كل صايله
بذرنا بها المعروف باللين والقسا
ايضا ولا نصبر على كل عايله
ميادين جرد المرهمات إلى عدن
بها الخيل يوم الحرب بالعز جايله
حموها اسود قبلنا من عدوها
وبايمانهم سمر القنا مع نحايله
عصاة صناديد قساة على العدا
سلايل رجال راكبين سلايله
رجال من العربا تسامت جدودهم
ان كاد حمل الحرب شالو ثقايله
وبنذرك عن دنياك يا جاهل بها
ترى الجود راح ولا بقى الا هزايله
وبنذرك عن دنياك يا جاهل بها
ترى الشربين الناس تنشر حبايله
الأيام وان ضحكت لمن يفعل الثنا
تهينه وتال الوقت تفتل فتايله
وباوصيك لا تقصد لئيم لحاجه
سوى واحد بالعسر ترجى نوايله
ومن عاش فيها بالنعيم وخيرها
لابد ما تصلاه حامي ملايله
يعاف الخنا من مصعده سلم العلا
ويرضى الخنا من كان لبسه سمايله
والعجز يزري بالرجال إلى الهفا
وكم من فتى بين الملامن فتايله
واليا دبرت دنياك غنى غرابها
وبها الحرحبل الذل بالعنق غايله
عسى عزها يقبل ويقفي دبورها
وعسى ذلها يقفى وتبعد فشايله
ما يدرك الطولات من لا سعي لها
الا عزيز وافيات خصايله
ومن عاش بالحقران ما يدرك العلا
ومن لا سعى للجود ما هوب نايله
هنيت من نال الشجاعة مع الوفا
ويقال يوم الشح تندي شمايله
ترفق عذول القلب عذلك يضرني
دع القلب يا عذال حذرا تحايله
عصى عاذله قبلك وهاجت لواعجه
والشوق والزفرات صارت نحايله
تجدد غرامه في هوا كامل البها
هنوف عفيف العرض شقر جدايله
هو اللي من الخلان دايم يشوقني
له النفس من كل المخاليق مايله
حشا ما نسيته لا ولا انسى مودته
وهو ما نسى بالود ماضي وفاي له
قطفت من سيد المها زهرة الصبا
واخذت من صافي الموده نغايله
يباريه هوجاس بنومي ويقظتي
وعليه يصلا القلب حامي ملايله
سقاني بكاس الود وابرا غلايلي
ولو هو بعيد الدار ما نسا جمايله
عسفني بميدان الهوا ضامر الحشا
واشرف على مكنون صافي صفاي له
اشرف على مكنون سري وغايتي
وعقلي معه ما باقي الا قلايله
مليح ومن شفته خفق منه هاجسي
وتمنيت لو مرشد يشاهد مثايله
لو أنت يا مرشد تجلا لصورته
تمنيت لو يرجع زمانك لا وايله
عظيم البها يا رشد ما انسى مودته
ولا ينمحي طول الليالي غلايله
حباله فوادي يوم قلبه يودني
وعليه دمعاتي من الموق سايله
قصيدة اسج بالهوجاس
قالوا تهوجس قلت شيء طرالي
ذكرت حمال العصيبات حلحيل
ذكرت انا من صفوة الخلق غالي
عني بعيد ولا تجيه المراسيل
الله يجيره من صدوف الليالي
بحق من نزل تبارك وتنزيل
يامير من شكواك واعز تالي
من هاجس بالقلب جاني ولا ويل
اسج بالهاجوس كني لحالي
واليا انتبهت الحقت ويل بأثر ويل
كان انت عما في ضميري تسالي
كنه يولع بالضماير قناديل
اليا ذكرتك يا بعيد المدالي
تارد على هموم قلبي زعاجيل
ماجور يا راعي الفعول الجزالي
ياللي بظلك يا منون الرجاجيل
بيتك يعرفونه كرام السبالي
ان حسهم من ظيم بقعا غرابيل
يحجي ويذري عن هبوب الشمالي
ان ركبن غبر السنين المهازيل
بيت الوفا بيت الندى للرجالي
بيت ابو خالد للنشاما مداهيل
عساك طيب يا ربيع الهزالي
والله يجيرك يا عشير المشاكيل
قصيدة الميت ما يصحا على شقة الجيب
واطيري اللي ماضي له تجاريب
للطيب في وجهه تشوف المواري
طير كفوفه من فعوله معاطيب
صاد المها من عقب صيد الحباري
ماص يفكك مغلقات اللواليب
طير السعد طير من الريش عاري
ما فيه شك ويتبع الطيب للطيب
ذلقة سنان ماضي الفعل فاري
مشعل ندى في عاليات المراقيب
عليه يسري بالدجا كل ساري
ابعد من النسرين بعده عن العيب
وان على سعر الطيب للطيب شاري
محفظ ما فيه شك ولا ريب
شبل ترعرع بين نمر وضاري
يعرف ليا كبرت عليه المواجيب
وباللي خفا كنه عن الغيب داري
وا نزاودونا بالفعول الاجانيب
حنا بذخر الوايليه نماري
هم مزبن اللي ما لقا له مقاضيب
جاهم ودمه حاير بالسماري
لجابهم عن حاميات اللواهيب
يحيا وزيره والدليل الشهاري
ماله عليكم يابن فيصل مطاليب
وجده نوى يتبع طريقة مشاري
للوارد الظامي فتحتوا مشاريب
وكرسي شريعتكم سيوف هواري
يا مير ابشكيلك فعول الرعابيب
من واحد دايم لعقلي يباري
منه الضماير يابو خالد مصاويب
طفل سلب مكنون عقلي جهاري
انوح نوح الورق واقنب كما الذيب
وعليه جار لي من الحب جاري
يا غافل انش من مضى له تجاريب
حي جرى له في حياته عزاري
الميت ما يصحا على شقة الجيب
ولا ينفعه بالقبر سفك العباري
اتبع دروب العز لو هي مصاعيب
ان شفت من ربعك صدود ونكاري
والمبغض المقفى كثير العذاريب
لا تتبعه لو هو جديد الاثاري
والغبن يرث بالفتى واضح الشيب
وعند العفون الطيب ما له محاري
الناس تامن من رجال غواليب
وصار الخطر من بايهين الذراري
على الحرار محرمين المراكيب
وحطو عليهن الحدا والسباري
والعبد مزبانه على عالم الغيب
ويوم الحشر كل الخلايق عواري
ارجيه لو الخلق مني مغاضيب
وبامره تهب الكاينات الذواري
قصيدة جاني كتاب
اليوم انا عيدت عيد بعد عيد
وانزاح عن قلبي عنا كل شده
وعقب المحل سيحان صدري مواريد
مثل القفور بنبتها مستجده
فرحت عقب الغيض من غير تحديد
وضحكت يوم اوحيت علم نوده
علم الفر يجلي كثير التناكيد
ما ناش مخزن ضامري عنه صده
فيما مضى حسرات قلبي مواريد
وروابع بحور همه تحده
واغضى عن النشدات واعطي تصاديد
وكم وارد يتعب لساني مرده
الناس بذوني بكثر التناشيد
وهواجسي تقول هاته ووده
جاني كتاب وكد العلم توكيد
والحمد للي عابده يستمده
اهلا عدد ما لجلج الورق بالغيد
واعداد ما هلل وركب الاشده
واعداد ما هلت مزون الرواعيد
وبل من الوسمي مزونه مسده
بكتاب من حاش المراجل تراديد
والجود من زاك الفروع استمده
من فرع بن بدران قول بتوكيد
كل يجيبه بالمجال ويعده
زبن الدريك ان شاف غبن وتزاهيد
والحمد للي ينهض العبد مده
وعز الصديق وضد من يفعل الكيد
والى انفتح باب وسيع يسده
اخوي ابو فيصل نخصه بتمجيد
ثوبه من البيضا على الجسم قده
عسى السحاب الى غدا له تماديد
وربرب طهاه وفضل ربي يمده
عساه من طعس الاراخم إلى فيد
يسقي ديار لي بهلها موده
ومن غير نجد المزن يعطي تخاديد
حتى يجينا اللي كما البدر خده
تجي ضعون البدو يمه عراجيد
وكل يشوف احباب حيه وبده
الطيب حيد دون دربه تسانيد
من هامها بالهون لازم تضده
والقصروان شيد على غير تجويد
تجيه صلفات الرياح وتهده
من لا يخاطر ما يحصل مقاصيد
ومن لا فعل ما اغناه فعل لجده
قصيدة دار غلاها
ان كان بي عذروب حبي لهل نجد
احبها واحب شمة هواها
احبها يومنها ديرة المجد
دار متكن بالضماير غلاها
دار غلاها باجد مهجتي بجد
دار لنا دار ضلالي سماها
ان غبت عنها الحقت وجد على وجد
متذكر عقب البطا برد ماها
ياما غدا فيها مهار لهن رجد
من فوقها صيد تروي قناها
اللي نود القاه يا علي ما وجد
الله يلحق كل نفس هواها
