اجمل قصائد محمد بن فطيس المري

بدأ الشاعر محمد بن فطيس مشواره في الشعر منذ عام 2001 حيث شارك في عدد من مهرجانات الخليج والدول العربية ومن أبرزها مهرجان الدوحة الثقافي ومهرجان الخالدية في الأردن ومهرجان حائل ومعرض الفروسية كما شارك أيضا في أمسيات ليالي فبراير وملتقى الشعر النبطي بدبي وفيما يلي اجمل قصائد محمد بن فطيس المري

قصيدة سولفوا

سولفوا تكفون لا عاد تسكتون ..

.. قبل لا أهوجس وياتيني بلاي

السكات يزود طعوني طعون ..

.. وتنكسر لا جا على راسي عصاي

سولفوا لو ما بغيتوا اتسولفون ..

.. قبل لا اقعد في الحزن رايح .. وجاي

واضحكوا لو بالعماله تضحكون ..

.. وجاملوني لو يضايقكم حكاي

لي وليف راح جعله ما يهون ..

.. هو دواي وداي .. أو داي ودواي

راح لكن طيف زوله في العيون ..

.. مرة قدامي ومرة وراي

وإن سكتوا جا وهو طيفه يمون ..

.. رحت أهوجس له وأبين له ولاي

مكسب عيوني من الفرقا مزووون ..

.. تمطر لطاريه .. والبرق؟ أصدقاي

كل ما طروه لو هم يمزحون ..

.. احرموني من غداي ومن عشاي

أدري إنه ما تناسى الود كون ..

.. تسمع إذنه في قفاي اللسن عداي

وكانهم قالوا نسيته يكذبون ..

.. وإلا أنا فيه أمتلك نظرة وراي

كان حبه لي على خبري مصون ..

.. والله ان كني بقدري .. وبغلاي

ذي بقايا الحب وأطلال الجنون ..

.. والله أعلم في ضميره وش بقاي

غير طيعوني ولا عاد تسكتون ..

.. ولا والله إن أسمعكم بكاااي

قصيدة فرقى المواليف

ي والله أهوجس ولانى بمرتاح

والحزن فى حوش الحنايا بفاروع

أمسيت من وصل المواليف مزاح

وأصبحت من فرقى المواليف مفجوع

البارحه فى غبة الوصل سباح

واليوم من عرش المواصيل مخلوع

ياصاحبى صرح الهوى والوفى طاح

والقلب كنه من عراويه مقشوع

كان أحسب إن لحبنا عشرة أرواح

إلين شفت الحبل بيديه مقطوع

يوم العهد به حده إسبوع لى راح

إسبوع ويعود علي شوق ودموع

واليوم خمس سنين والهم مازاح

هم الفراق اللى بلا عذر مشروع

أستغفرالله تسعة شهور ياصاح

فى غيبته قمت احسب اليوم بإسبوع

العام خلي يسمع القلب لا صاح

واليوم مهما صاح ماهو بمسموع

ضاع الحساب وشفت برق الجفا لاح

وأيست لولا إن الرجا في مزروع

وحالى نحل والحال مهوب منساح

من كثر ماأظمأ للمواصيل وأجوع

بليت في من دونه سيوف ورماح

وغدا علي وصله مثل حبة الكوع

له مني إن سره على الناس ماباح

ولي منه إن الصد غصب بلا طوع

قصيدة يا شين طبع فيك

يا شين طبع فيك .. يا زين الأطباع

لولا الرجاء .. ما كان خليته .. يفوت

سنع .. يشوه لا تذكرته .. أسناع

مثل الحصاة .. اللي وسط عقد ياقوت

تخفي هيامك .. وإنت ميت وملتاع

ما تدري إنه في ملامحك .. منحوت

ويبخل لسانك .. وإنت للسمع .. طماع

والبخل .. في سلم المحبين .. ممقوت

الحكي .. قوت السمع وأسامعي جياع

ومسامعي ماتت من الجوع .. للقوت

وحكي الغزل في صدرك أشكال وأنواع

لكن صمتك .. حول الصدر .. تابوت

إلا طلبتك وصل .. صعبت الأوضاع

مدري .. من اللي درسك جعله يموت

تصد .. ما كنك من الصد .. مرتاع

وإن قلت يا القاطع .. تلفت مبهوت

أقطع ب درب مواصلك في الشهر.. باع

وإلا إنت تقطع للوصل ف السنة .. فوت

طعني .. وطاوع واحد فيك .. ما طاع

ناس صغار عقول وأشوار وبخوت

وإلطف بحال اللي نحل حاله .. وراع ..

قلب جروحه .. تنزف أفكار .. وبيوت

قلبي .. إلا منه شرى قلب .. ما باع

وإنت هالله هالله فيه .. والعمر موقوت

اسمع أشعاري في الهوى وارخ الأسماع

ياللي غلاك ب تربة القلب .. مكتوت

لا .. للفراق .. ولا .. لتجديد الأوجاع

ونعم .. نعم للوصل .. لو كان بالصوت

قصيدة عقبال مية عام

عقبال ياماخذ فؤادي مية عام

ضيعتني منك وانا ما اهتديتك

لا ..ما نسيتك كيف بانساك ما دام

ذكرى الفراق تهزني لو نسيتك

حبك قدر وانا على دين الاسلام

مكتوب في وجه الجبين ورضيتك

لك في الضمير الود والحشمه اتوام

ولي في ضميرك مثل ما انا بغيتك

ولك منزل في نايف القلب وخيام

وذود الغلا ترعاه ولا شكيتك

يفطر عليك القلب وان فارقك صام

والله لونك شوك سدره كليتك

القلب طير لادعي للهوى حام

والا انت وكره من كثر ماهويتك

كن العيون من النظر عقبك ايتام

وكني ماريت الا انت من يوم ريتك

وكنك معي وانا فقدتك من اعوام

مع الخيال القاك كني لقيتك

من صعب وصلك ما تهنيتك احلام

وان جابتك فزيت شوق ومحيتك

يعني وصالك صعب واهدافي اوهام

يعني زرعتك للقدر ماجنيتك

صبرك يقولون العرب كل الايام

يوم عليك ويوم لاجاك جيتك

ويا قلب ياللي ورثك اجروح وآلام

بليتني ماهو بانا اللي بليتك

ولعتني من عادني في الهوى خام

واسرفت بي وانا خطامك عطيتك

طعتك وزبدة طاعتك هم وهيام

مالله كتب لي واستخرت وعصيتك

لوللقلوب اسواق بايع وسوام

لاابدلك وان جيتني ماشريتك

والا انت ياللي جيش عينيك مقدام

لا اقنعت منك والرجا مارجيتك

كني سجين بين..افراج ..واعدام

وكنك سجن وانا بنفسي بنيتك

تنبيك عن حالي محاصيل الالهام

وتخبرك نظراتي نهار التقيتك

عقب الوصال اللي على عين من لام

قدهو يكفيني عن الوصل صيتك

وقدني الى مريت بالشارع العام

لديت من ما في الضمير ودعيتك

ادري ان صوتي ماقطع عشرة اقدام

وادري بي اعود الى من نصيتك

ياشينها يامحني راس الابهام

ماقدر على شوفك وانا عند بيتك

الاعمار ما تضمن وانا اخاف الاحكام

ارثيك خاف اودعك ما رثيتك

قصيدة قد عطيتك

قد عطيتك وانت ماضنك لئيم ..

.. والنصيحه لليالي تذكره

لاتحرك جرحي الماضي الاليم ..

.. ولاتحسب ان طول بعدك طهره

كل جرح يهون يالجرح القديم ..

.. وكل شي قد مضا معك اذكره

جرحي وذكراك والليل البهيم ..

.. حزت فوادي بمثل المنشره

العذول غراب وانا اكبر غشيم ..

.. والجروح الماء وطاريك حجره

والزمان اكرم من الحظ الكريم ..

.. لانفتح لي باب صوبك سكره

وحبك اللي لاطرى لي رحت اهيم ..

.. قمت احسب اصغر كلامك واكبره

ليتني عاد الهوا توه فطيم ..

.. انعذلت لعاذلي بس خيره

مالقيت من الوفاء يااول نديم ..

.. كون صدق الحزن وجهه وظهره

عقب رمح الشوق في وجه الصميم ..

.. سيف هجرك في قفاه وشف ثره

وانت شكلك تحسبني في نعيم ..

.. لني اخبي صوابي واستره

لايغرك حلم رجال حليم ..

.. مهون اللي من سكوته فجره

ولاتحسب الجفن من دمعه عقيم ..

.. يستحي منك والى اقفيت انثره

ولايغرك وان بدا جسمي سليم ..

.. والله ان جسمي سوار المقبره

والله ان امر من ضحك الغريم ..

.. شوف حقي بين اياديه اشكره

والله ان احر من دمع اليتيم ..

.. دمعة الرجال من فرقا مره

قصيدة دكتور العيون

يامؤمن الريفي انا جيتك زبون

جيتك على مدح اكثر الناس وعنيت

جيت وتعالى الله عما يشركون

لولاه يامؤمن لطبك ما اهتديت

راضي بحكم الله علي مهما يكون

عالج عيوني لو بعد طبك عميت

ودي اخاشر فالبصر من يبصرون

واشوف دربي لا سرحت ولا ضويت

والى قنصت اثبت مع اللي يثبتون

واشوف طيري كل ما اوميت ودعيت

ياااكثر ما يضرب خويي الطابلون

من كثر ما اكلته مطباات وكليت

وودي اشوف اللي علي يعرضون

وبعض الليالي ودي اسري دون ليت

وااشوف ناس  فالقفا ما يرحمون

اما وقفت لصاحبي والا مشيت

من دون نظاره ولا هم يحزنون.

يااا كثر ما كسرت كشمات وشريت

لكن يا دكتور جعلك ما تهون

ابغيك كلمت راس دامك ما بديت

اسمع......ولا ابغي اللي وزانك يسمعون

ربي كتب يكشف لك اسراري وجيت

صورة عديل الروح عندك فالعيون

واخاف تقطعها بموسك ما وعيت

ولا عليك امر..اطوها تحت الجفون

وعقبه لو تقطع عيوني ما شكيت

هي راس مالي والعرب ما يدركون

اني على باب الممات وما حكيت

ياقو قلبي يوم قفن الضعون

اللي على ذاك الموادع ما بكيت

ويا صبر صبري والعواذل يحسبون

اني دلهت من الهوى والا سليت

اسكت عساهم من سكاتي يسكتون

وانا عن اللي في ضميري ما انتهيت

وادور الفرحه مع اللي يسهرون

وان ذكروني خذت فنجال وسريت

اخذت من وقتك يا دكتور العيون

عالج عيوني لو بعد طبك عميت

واستر علي واللي معك لا يفطنون

انت الوحيد اللي بعد ربي دريت

قصيدة ماهوب كفو الوقت حبك يمحيه

ماهوب كفو الوقت حبك يمحيه

ياللي تخاف صروف الايام تمحاه

ارتاح دام ان المواصل يقويه

انت . انت وانا . انا وقلبي هو إياه

حتى ولو بتغيب ذكراك تكفيه

ياواحد تكفي عن الناس ذكراه

حبك على رملة خفوقي مواطيه

ورياح عذلي عنك ماتمسح خطاه

واللي يعذل القلب عن درب غاليه

الله بما يبلا المواليف يبلاه

اخفيه يابلفيت والحال يبديه

ادناة واحد ينظر الحال يقراه

اخفيه فيه ومعتني به وحاميه

عن كل عين ودها تنزل حماه

قلب يحبك والهوى الذرب ماليه

كانك مكذبني بعينك تحلاه

شرط . ان تشوفك فيه منت بحواليه

ويمكن تشوف ديار واماكن رعاه

وشوف به تمثال والوقت هاريه

وبتشوف زرع ميت واقف ماه

وبتشوف جرح فيه سكين راعيه

راح ونسى السكين والجرح ينخاه

وبتشوف حصن عج الاقدار سافيه

وبتشوف باقي بيت . راعيه خلاه

لاتنزعج . هذا خفوقي وباقيه

ولاتضايق من تصدع زواياه

قد زلزله فرقا وهزة عراويه

والله ستر والحظ عانه وعافاه

كانه صلح لك واعجبك . زيد تبينه

ابنه وجهز للمقابيل مبناه

ابغيك بس من المفارق تداريه

وازهل من ايداري شعورك ويدراه

وحلل وحرم فيه . ياأبرك بلاويه

وحله وراع ارضاي ورضاك وارضاه

جعلك بعد بعض الوجيه . امحق وجيه

ناس مراتعها الرفيق بتقفاه

انواع . واخطر نوع مانيب ناسيه

نوع على تفريق الاثنين مسعاه

تلقاه دوم . وكل يوم تلاقيه

واذا بغيت الصدق ماعاد تلاقه

وإلا انت . ردك كل مادعيك لبيه

انشهد منتوا بفي عيني اشباه

منت بمعى العالم . ولا تقولي ليه

انت ادرى مني وفي جوابي وفي احواه

كذيه ومن الله يازين وإليه

واغلى طروش القلب ودواه من داه

الحلم ياتيني بزولك واراعيه

وفي كل حلم اقوم قبل اتحفاه

واعشق سميك في البزارين وادعيه

واقبل خطاه الا اخطى واتلقاه

واسمك يروعني اذا مر طاريه

واحب ملقوف يسولف وطراه

وامر بيتك من بعيد ولا اجيه

وانا لو انه في يدي ماتعداه

حتى تواير موتري تلتفت فيه

تبغي تلف ويستحي العقل والجاه

وصلك يخيط الصدر والبعد يفريه

ويابري حالي كان صديت برياه

ويلي على ادري حبنا ويش تاليه

وويلي على ادري وش ورى الغيب ويلاه

عشان اشوف اذا محبتك ترفيه

والله لاقفي عنك . استغفر الله

قصيدة الله يجازي من يسوي سواتك

الله يجازي من يسوي سواتك

وبذنوب من سوى سواتك يجازيك

مشيت درب الثقل وتحب ذاتك

ماتدري انه للمهالك يوديك

غرك جمالك ياخساره حلاتك

ماتدري ان ماغير طبعك يحليك

بتقول زينك يشفع لسيآتك

الحسن ماهو عن وفا الحب يعفيك

لوالتواضع والوفا من سماتك

بعت الحبايب كلهم دين واشريك

لكن عجزت اغيرك ياجراتك

على الغياب اللي بلا عذر ينجيك

خطاي في توضيح وشي غلاتك

وخطاك في توضيح وشو تغليك

وشلون توصيني وتنسا وصاتك

وتصد عن صوتن تقطع يناديك

مافاتك التجريح والعذر فاتك

وتبغي رضاي الحين ماعاد يمديك

صحيح احبك بس هذا جزاتك

بعلمك درس يفيدك ويحييك

تدري وش ابيض من خفوقك عباتك

وتدري وش اللي غرني نظرتي فيك

ادري بتستغرب تصبر وجاتك

قصيدة من واحد كان يبغيك

وتبغي تناظر وانت عايش مماتك

شف وحدتك والناس تجلس حواليك

وتبغي تشوف اشجع رجل في حياتك

شفني وانا راحل على كثر ماغليك

قصيدة ليه المسا

ليه المسا عوق الشقاوي وطبه؟

وليه الهبوب تصحي القلب لا بات؟

وليه القمر يدعي جريح المحبه؟

ويقول له يا هيه..ما فات ..ما مات

جرحك ظهر لو قلت للوجه خبه

وللحزن في ضحكك رسوم وعلامات

وليه المطر بالذات ريحه.. وصبه

كنه رسول بين الاحباب بالذات؟

اشتاق فيه لشوفتك واتنبه

للي نسيته من مواقف ونظرات

لا استانس الخافق ذكر من يحبه

ورجع يراجع فالوناسات ما فات

يا مرتع القلب الحزين ومربه

يزيين بك مثل الذهب صدر الابيات

هيهات ينسى القلب شخص  لعبه

وهيات يدله خاطري منك هيهات

سبك مديح ومدح غيرك مسبه

تقول واذني صوتها تقول لك هات

ونبع الغلا عندك وعندي مصبه

ومن الولا .. في خافقي لك ..ولاياات

وطيفك حطب عيني..وعيني مشبه

والشوق برد  ما انقطع لو للحظات

ومكانك الصدر ولك القلب شبه

بين الظلوع اللي فردها التنهات

ولك بيرق  فالقلب حبك يهبه

شامخ ولا هزه من العذل غارات

محبتك فالوقت ذا ما تشبه

الا بخيمة بدو بين العمارات

ان شفتني ضايق واهوجس واسبه

اخاف غدر الوقت.. والوقت دورات

لا تحسب ان دمعي نزل دون سبه

ابكي من الفرقا وهي مابعد جات

اليوم كل امورنا..مستتبه

وبكره ماندري وش معه من مسرات

ارب قلبك مثل قلبي اربه

ما يخلفه شور العرب والمسافات

قصيدة صباح الغلا المنقي من الشك والتزوير

صباح الغلا المنقي من الشك والتزوير

صباح الوفا ياروح روحن معذبها

غرامك وجور الوقت والبعد والتفكير

بدنيا العنا كيف اتحاشا مخالبها

اطرش لك اشواقي مع الشكر والتقدير

لون بسمة فوادي عنا الوقت ناهبها

ومع اشواق قلبي شعر ماخانه التعبير

بيوته مثل ماجات ماني مرتبها

تهلل علي في ساع ماجات بالتقطير

وانا صوب صدر الصدر واقف واقربها

واحمل عليها الشوق والعذر والتبرير

مع ونة من قاعة القلب جاذبها

مع عبرة فالحلق ما عينت تحرير

حجزها الحيا فالحلق والعين تسحبها

تحنحنت ما ابغيها تواصل مسير السير

لكن شوقي الماخوذ للعين راح ابها

وجمت بها عيني مثل ما تجم البير

لذكراك ياللي عين خلك معاقبها

خيالك علي مع كل شبة صباح ايغير

وذكراك لا جا الليل جتني ركايبها

خيالك مهو بالطب لكنه التخدير

وذكراك طرد رقاد عيني مطالبها

فلا مصبح مثل العرب طيب وبخير

ولاممسي مثل العرب من سبايبها

الى جاتك اشواقي ترا تحتها تحذير

دخيلك اتحسبها وتحسب عواقبها

تراني مقصر واعترف بانقطاعي غير

تحمل اتجازيني الى زان مظربها