مساعد بن ربيع الخياري الرشيدي هو واحد من أكبر الشعراء العرب ومن عباقرة الشعر السعودي دون جدال ولد عام 1962نشأ مساعد الرشيدي في عائلة معروفة بميولها الشعرية فوالدته ووالده وعمه شعراء ومن اجمل قصائد مساعد الرشيدي ما يلي
قصيدة يانهار البشاير
يانهار البشاير ... صب لى شمس
باتقهوى وانا والله ...حياوى
يكفي اني فداوى عندك امن امس
وانت تشره على ثقل الفداوى
احسب انك قبل لاتمد لي ... خمس
تحتضني ... وانا امد الرهاوى
لاتعجب ... تلمس خاطري لمس
لاتغرك من بعيد ...الكساوى
جايز اضحك لو انه خاطري عمس
نوب ضحكني مثل طبعي نحاوى
يمكن انى قريب ومبعد .. الرمس
كل لون لبس جسمي سماوى
جيت اقص الزمان وجرته طمس
قلت ابا انشد ... قنب بالرجم عاوي
قصيدة مراهيش نوك
مراهيش نوك ماتبل الورق ياهن
لها اليوم تاسع يوم تبرق ولا سالت
يقولون لاضاقت عليك الوسيعة غن
وانا اقول شفت مقرد الخلق وش قالت
انا البارحة من يوم غابت الين اذن
تحلوى عيوني للكرى مير ما احتالت
يثوع النعاس من ارمد الجفن يوم تعن
سراميد غيظ با لحشاء حبلها فالت
ماغير اتدرق بسمر الليل لالجن
هجوس تخطرت هيبة الجرح واختالت
هجوس ليا قامت تكرب وقمت اون
تصرم معاليق الحنايا ليا انهالت
ذلول الهجاد اللي نبت في جماها سن
من العام تثعى في ضلوعي ولازالت
حلال الذهاب اللي استشاطت لبسها جن
ياكيف اتجود في نحرها ليامالت
وانا يوم امس ابطانها ما على من
يدين الهوان ان حطت اللوم وان شالت
ابازم نفسي عن طمان هواه مصن
واعدى لجفني وارقب العين وش خالت
عليها الملام ولاعلية السلام ابدن
يدين تبي قصرت ايديني ولا طالت
بعد مانفضت غبار صدري ولد ياهن
بعد ماروت روحي من الغيض واكتالت
يقولون لي ضاقت عليك الوسيعة غن
وانا اقول شفت مقرد الخلق وش قالت
قصيدة ضاق الغمام
ضاق الغمام وفح صدر المزاريب
يالله بجاهك ياعايم الغيوبي
يامنجي يوسف من الجب والذيب
بحماك ياستر خفايا عيوبي
صاحوا تناخوا دورو بي عذاريب
تجمعوا ليلة وزا سولفوابي
أثري مسوي بالقلوب الاعاجيب
وانا مثل وجة السماء نقش ثوبي
انا وسيع بطان راهي مطاليب
ماضيق لوشانت نوايا دروبي
ارد وصدر واخذ العلم واجيب
ماني على طرش الرعاع محسوبي
بردت كبدى من قراح المشاريب
دوبي رويت من الشهاليل دوبي
خليت للحاقد طشاش وحثاريب
يتوب ولا قلعتة لايتوبي
شعرى زها بجباة بيض الكاتيب
شعرى على طرياة هبت هبوبي
شعري رسايل عيد طيب على طيب
شعرى لوى تلعات الاراقب صوبي
شعري شهد لة طيبين المجاذيب
وش عاد لو سود النوايا حكوبي
لوكان مالي غيرها من مكاسيب
ما ابغي شهادة ميتين القلوبي
قصيدة الطواريق
الطواريق ماعادت تسلي
والحنايا تدامى وتحدا
والطواري تتل البال تلي
كل ماورق اللي وهدا
لاني اشوا ولاني مسفهلي
اتهيا وانا ضايع جدا
واتسمر على جدران ظلي
اتشره على رجع الصدا
اتوحا ياعلة صوت خلي
اتلفت ولا حولي حدا
وانشد الليل يسمران قلي
لية انا وانت من الصبح احددا
ويش اباخذ من طعوني وخلي
والملامح تشابة ماعدا
ضل نعناعة قامت تصلي
في حشاية على قطر الندا
غصنها بسراجيف متدلي
لة بروحي تفاصيل ومدا
من فداها لوني جيت كلي
وان خذتني طواريها فدا
قصيدة في خاطري حاجة
أنا في خاطري حاجه ولا ادري ويش ابي بالضبط
ولاني قادر اكتمها ولااني قادر ابديها
متاهة بداخل اعماقي بحر وحيره بليا شط
خذاني موجه العاتي عذابي من موانيها
ابهرب من غموضي مير ماباليد حل وربط
ضياعي كل يشوفه حقيقه مقدر انفيها
أنا مدري مكاني فوق ولاتحت ولا وسط
اسوق الرجل وتبعها وقول الله يسويها
أنا عايش بها الدنيا بلاقيد وبليا شرط
مجرد ظل لايامي تباريني وباريها
أنا ايامي سوى مافيه يوم اصعب ويوم ابسط
ولاادري كيف اميز بين حاضرها وماضيها
أنا مشكي من احزاني ولاذقت السعاده قط
ومع هذا أحس الناس وأضحكها وأبكيها
أنا واحد من العالم أنا جمله تحتها خط
احاسيسي غريبه من بدايتها لتاليها
أنا في صفحة الدنيا حروف ماعليها نقط
حياتي مالقيت اللي يترجم لي معانيها
قصيدة ويش أسوي ؟
ويش اسوي لاطريق ولاخوي
لا قرار ولا خيار ولا مصير
الليالي تلوي ذراعي لوي
والرفيق السيف يغريه الجفير
والضياع بسكتي يدوي دوي
اتصفق لا سراب ولا غدير
أطوي الظلما وعيت تنطوي
واشتهيت الشوف بعيون الضرير
مثل طير طاح بيدين بدوي
يلعن الطيحه ولا يقوى المطير
كل يوم آقول باكر تستوي
وخاب ظني بالزمان وبالنصير
كنت انا الصدر الحنون المحتوي
وكنت انا ل..احساسهم سلك الحرير
وصرت انا هاك النحيل المنطوي
تلهث انفاسي ورا حلم كبير
ضاعت الحيلات حيل الله قوي
لاني الأول ولا اظن الأخير
قلت با صرخ وآخر علاجي كوي
وصلت الحلقوم والخاطر كسير
من شرب من كف غيره ما روي
لعنبو كف على المده قصير
لاتعاتب ويش اسوي يا خوي
لاقرار ولا خيار ولا مصير
قصيدة الليل الأدلم
تفهق الليل الأدلم و الهوا ساكن
و انا هنا يا سبب همي و تسهيدي
في خايع من نفيض الوسم متماكن
نبته يليق بتمدري نافل الجيدي
متموج بين عشبي و أخضر داكن
و أمعفر من نسايم جرهد البيدي
يا مودعات السنين من العمر هاكن
تالي تباريح بالي في ضحى عيدي
و يا مدلهات الحشا مدري وش ألهاكن
أونس بصدري مثل فوح البغاديدي
هيلن علي من رذاذ الحلم يفداكن
وجه قصر عن حياه و قلب رعديدي
يجلا غثا الكبد يو أشتف من ماكن
شف العسل بين أشافي ترفة الغيدي
واللي جمعكن بوسط الصدر و انشاكن
إني لاحطب لرعدكن من تناهيدي
هذي علومي و ستر الله و عفاكن
لحقن مصاديري العطشى مواريدي
وإلا هبوبي رفيعة شان شرواكن
النقص ينقص عن الحروه و انا ازيدي
هيضني الضلع في كبد الثرى راكن
و ان حدك الضيم قل للضلع يا سيدي
و اركيت ظهري على ظل الجبل لكن
ماجت مواعيد ظله مع مواعيدي
قصيدة حب جديد
حب جديد .. وقصيدة عشق مجنونه
الله يحييك ياحب لفا توه
حب لكله .. وحب بس لعيونه
حبين باقصي خفوقي بس له هوه
ايه انصتي ياشجون الروح ممنونه
جاني رقيق المشاعر ناوي الخوه
جاني حبيبي وعمري فرحة غصونه
ربيعها يوم سال السيل من نوه
يوم انهمر لي حنانه باعذب لحونه
قلت الله الله صفا جوي على جوه
والله ل..احبه ولو حظي وقف دونه
مافيه قوه تصد الحب بالقوه
بس انتظر يازمن لين اعلن المونه
ومن بعدها اللي تسوي يازمن سوه
قصيدة دموع العين
عذب السجايا دموع العين يرثنه
باللحد الاظلم عليه القاع مردومة
من غير ماصف وصوف الحور يشدنه
اللي فراقه جعل دنياي مكتومة
لوذاق حزني ملاك الموت ماأظنه
شاله وخلا لي الوغدان وهدومه
يامرها لاسمعت من الوغد ونه
ياشينها فاجعات الوقت وسلومه
قالوا يبه ودنا قم ودنا الجنة
نبي نشوف أمنا وننام بكمومه
يبون مثل خوياهم..والجدا ..ونه
آمنت في دبرة الخالق ومقسومه
ياطول حزني عليها مأقدر أكنه
ماينفعن ليت لي يوم قبل يومه
اثناعشرعام عجزن لاينسنه
موته لقلبي زمهريره وزقومه
هي جنة ذقتها غيري سمع عنه
مايرومه الوصف مهما جاااد مايرومه
ياوسع عذر الدموع الياتباكنه
مالي جدا الا الونين وقول مرحومة
حنيت حنة خلوج شالته دنه
وحوارها شوف عينه قسمة لحومه
وونيت لي ونة ماونته شنه
بيد العقيدي من المسحوب مهمومه
وأرسلت له صيحة ماعودت منه
ولازلت اراجي بشير الخير بعلومه
عساه بالخلد والانهار يسقنه
في روضة من رياض الخير محشومة
وصلاة ربي عدد طش يهلنه
غر السحايب على محمد وتسلومه
قصيدة تعبت من القصيد
تعبت من القصيد .. من الجروح .. من انتظار طال
تعبت استقبل طعون الزمن .. واربت على كتفه
تعبت من الكلام .. من السكوت اللي يهد الحال
تعبت أكثر من الحزن الذي.. ما ينتهي عزفه
تعبت من الوعود .. من الصديق الطيب المحتال
تعبت أعرف كل اللي .. تعرف الناس بالصدفه
تعبت من العدو اللي عجز.. يدخل معي بقتال
تعبت من الظلام اللي قتلت .. ولا لقى حتفه
تعبت أسأل من المخطي ..؟ تعبت اردد الموال
ما دامك ما سقيت الزرع .. ما لك حق في قطفه
تعبت القى الجواب المقنع اللي ماعليه جدال
تعبت القى .. طريق ما يكون بآخره شتفه
تعبت اضفي على الصوت الحبيبه وردتين وشال
تعبت اسمع صدى شامت يردد طاحت الغدفه
تعبت أغازل البسمه على ثغر البكا .. تختال
تعبت أشوف شوفي ينهزم .. رغم على انفه
تعبت اجامل ايامي .. ولو ورتني .. الأهوال
تعبت أقول عن حمل ثقيل .. اتفه من الأتفه
تعبت أهز راسي غيظ والقى في يدي اغلال
تعبت أسير خلف الوهم.. لو غيري ركض خلفه
تعبت أشد وانزل.. ما ظهر لي طيب المنزال
تعبت من الدروب اللي مشيت .. وكلها صلفه
تعبت أرسم حروفي شمس.. والمح بالوجيه ظلال
بعض ناس .. تعرف النور .. بس تقول ما تعرفه
تعبت وقلت كل اللي اظنه يا فهد ينقال
تعبت ابغى القط انفاسي .. اذ لابد من وقفه
