معز عمر بخيت أستاذ جامعي سوداني وشاعر ولد في مدينة أمدرمان له العديد من الكتب والقصائد والمقالات منذ بدأ مسيرته الادبية وهو في المرحلة الجامعية وحتي يومنا هذا ومن اجمل قصائد معز عمر بخيت ما يلي
قصيدة إلى امراه زعيمة
يا امرأة توثق عصب الرؤيا
والإصرار..
يا امرأة تعرف كيف تقود
النصر بكل وقار..
يا امرأة بين يديها الحق شعار
وديار تنهض خلف ديار
لأنين الناس وللأنفاس
لجرح النجوى والأقدار..
يا امرأة صارت
في خارطة المجد إطار
يا امرأة تعرف كيف ستبني
بين ضياء الحب
وبين ظلام الزمن الصعب
جدار..
يا امرأة سكبت في صحراء
الوجد يقينا
فاض حنينا
كالأنهار
يا امرأة جعلت في لحظات
عبق الشمس يعم الدار
فتمدت علما فتحا عشقا
أدبا يهطل كالأمطار
وصباحا يرحل في الأعماق
وحقلا ينضح بالأشجار
يا امرأة في ذاكرة الضوء نهار
أغوار البحر تهيم لديها
والإلهام ندى كفيها
والإيمان العذب مدار
من قبل صباحك
كان جفاف الساحة نار
كان البرق ينام حزينا
في البيداء بدون ستار
كان الظل يهيم وحيدا
بين الصمت بجوف الغار
كأن الأرض انشقت هما
والنجمات ارتجفت ولها
والأعماق بلا أسرار
ولما جئت تهادى الطيف
على الطرقات بكل مسار
وهل الخير على الآفاق
عطاء بعدك ليس يثار
صدر العصر انفتح سماحا
خط الأفق الأخضر صار
من فيض رؤاك يمد رؤاه
جحافل وهج واستشعار
لا الطوفان تداعى وهنا
لا الميقات ولا التيار
لا نزف البحر العشق توارى
أو تاب الشوق من الإبحار
فالفتح القادم يرنو تيها
والزمن الماضي منك يغار
فالعهد الآتي صوبك عيد
يزدان بأرضك كالأزهار
يا امرأة تلهم صمت الرؤيا
يا امرأة تبقى حقل نضار
وحدائق أنس واستشراق
فجر يتدفق بالأنوار
يا امرأة الخير
وخط السير
رحاب الساحة والأخيار
يرعاك المولى والأحداق
وهمس النجمة والأقمار
يا امرأة تبقى تل عطاء
قلعة صدق لا تنهار.
قصيدة سودانيات
سودانيات..
يا وطن الحلم الساكن في النجمات
ومساء الورد الأجمل وأحلى
على الغالين وعلى الحلوات
ونسيم العافية النضر فينا
حنين غنوات..
يا ليل ممهور بعشا البايتات
يا ريحة الصندل والإحساس
الأخضر يانع والآهات
الساكنة صدور النفس القايم
لمن غابت لحظة وجات
سودانيات..
يا نبض العلم الرفرف في آفاقنا
ووزع لينا الضو شربات
بين ميعادنا الصاخب همسو
وبين ريحان نادي ورايات
يا أعلى منابر قامت لمت
سقف السما واتمدت فينا
طريق وثبات
أيامك حلوة وناسك عافية
وشوقك موت وحنين ما مات
ولمن غبتي
القمر اتدسى في راس البيت
والبحر اتاوق لينا وفات
حزنان الموج والصدف استشهد
وحتى حفيف الشجر
اتحنط في الغابات
وخريف الفرحة الكان
مزروع في المطرة دعاش
نجوى وآيات
اتضارى بعيد في رمل السكة
وتاه في الشارع وفي سكات
يا الليل النايم وصبحك شايل في
أكتاف الضحى لحظات
ممكونة بحبك من سنوات
من قبل ولادتك ومن طلاتك
في دنيانا ومن طلعات
ولمن جيتي رجعتي مليتي
حياتنا مسرة وجلسة امتدت
لي جلسات
مليانة غناوي الإلفة العايشة حنانك
ساعة بتقعد بالساعات
في عيونا بترسم شوق الدنيا
عليه الريد ينساب نغمات
سودانيات..
محسوبة حياتنا وكل دروبنا
في لمحة بعدك بس خطوات
حرف السين والواو والدال
وحرف الألف النون الياء
والألف التاني
التاء بالذات..
بتغني وتربط في الكلمات
وتضوي شموس ونهار محروس
بي وهج الطلة وضي شمعات..
سودانيات...
ما تبعدي يوم في لحظة تغيبي
عن الساحات
خلينا نعيش في وجودك دنيا
وقصة حب ونعيم وسبات
خلينا نعيش في وجودك دنيا
وقصة حب ونعيم وسبات..
سودانيات..
قصيدة لمحة من وعد الحقيقة
طول المسافات البعيدة
وفرحة الليل بالقمر
في لحظة تتفجر قصيدة
ويطلع الإحساس بحر
نور الشمس في مقلتيك
نايم مع الريد في خدر
حتى النهار الصاحي بيك
لا ضوى بعدك لا حضر
والنيل سكب ليك دمعتين
من تيهو دفق وانهمر
موج في الضلوع
شلال دموع خاطرو انكسر
أجج طريق الشوق شموع
فتح المدارات ليك ممر
وإحساس رهيف
يلهب رحيق دنك مطر
يترجى في الأيام تقيف
ويخاف من اللحظات تمر
ما الوهلة في الحس الشفيف
في غمضة تتمدد عمر
مكتوب على الحاضر خريف
ونزيف بفتش عن جزر
يا همسة الوطن العفيف
يا لمسة الوعد الأغر
سفر الكلام الفي العيون
حاضن في أنفاسو الزهر
يتهادى في ليل الشجون
شايل صبابات السهر
خصلات نضارك ما بتغيب
وربيع حريرك بان ظهر
كل الزمان بيك بستريح
والدنيا إحساس مزدهر
أحزاني جنبك صوتها راح
والحلم في وجودك عبر
لي لحظة ما بتعرف نواح
لى نجمة في وقت السحر
كان ملتقانا الفي الخيال
لمحة حقيقة وكان قدر
وكان الهوى الزاهي وحنين
رحلة أمان لي كل بر
ليك يا حبيب وهج السنين
عشق المسافات والسفر
أشواقها من حسنك تبين
وأحلامها في صحوك خطر..
قصيدة على المكشوف
مرة ثانية بقوله ليكم
في المجلة وفي الصحافة
وفي المواويل الحنينة
وفي تقاطيع المسافة
في الخفايا الساكنة بينكم
وفي دروب زمني المعافى
مرة في التلفاز حنطلع
ومرة في نبض الاذاعة
ومرة في شجر التبلدي
ومرة في مروي ورفاعة
ومرة في الخرطوم وشندي
ومرة في حقل الزراعة
ما البلد بي ناسه طيبة
قامة تشمخ بارتفاعه
وانتوا أبقوا مع القطيعة
ومرة أبقوا مع الاشاعة
واخنقوا الكلمة الوديعة
وافرشوا الانسان بضاعة
مرة تكتبوا في الجرايد
انو ذكر الحب وضاعة
ومرة عاملين فيها حشمة
وانتوا جواكم خلاعة
ومرة خجلانين عملتوا
قصة غايتو عجيب سماعه
وانتو في بعضكم تنابذوا
ومرة بالكلمات تغامزوا
لا بطولة ولا شجاعة
وانتوا للمستور تعروا
وتعشقوا الدنيا ومتاعه
بس فلاحتكم علينا
يوم دعينا
بحب مؤصل
سامي من زمن الرضاعة
حاجة واحدة بقوله ليكم
نحن ماخذين تل مناعة
من قلم خاوي ودواية
ناشفة بي احساس ضياعه
حقو تصحوا من الوساوس
واعرفوا الأجيال حقيقة
وانتوا راحلين بكرة بدري
بس أقيفوا ولو دقيقة
انفضوا الرمل العليكم
قبل ما تبدأ الحريقة
تشيل خطاكم
والوشايات المعاكم
والوسائل والطريقة
أصلو حبك يا بلدنا
ما انتقادات في الجريدة
من متاهات الصحافة
ومن ضياعاته الأكيدة
وأنت شمسك يا بلدنا
ساطعة في الآفاق وحيدة
وبرضو راحل عن ديارك
ولسه بدري على الرجوع
ولما تكبروا في فهمكم
وتبقى دنيا الحب شموع
ويبقى خاطر الناس مودة
والفرح يملأ الربوع
والمشاعر والقصايد
ما جفا وحرقان وجوع
نبقى نحن نعود ونرجع
نقفل أبواب الطلوع
وبس حكاية أخيرة ليكم
قبل ما نعدي ونفوت
القصة ما كانت غزل
ولا خصوصيات بيوت
ولا تبرج أو زجل
ولا تكلف أو سكوت
القصة كانت دعوة حلوة
وفرحة ممزوجة بنغم
سامية زي نيلنا البيشرب
من حنين الشوق زخم
نادية بالحب والمحنة
بالأصالة وبالعشم
وانتوا مافهمتوا الحكاية
واصلو فهم الناس قسم
قصيدة بطاقة حب
مجنون وبحبك بجنون
غرقان في بحورك ومفتون
الحسرة في حبك بتهون
والشوق وعذابو المكنون
لو حتى في يوم انت تخون
ح تظل راجياك أنفاس وعيون
في هواك الدنيا حنينها شجون
وانا قلبي عليك حساس وحنون
حافظ أورادك قانون
وبكل مشاعرو وبيك مسكون
عصفور مسحور في سماك مسجون
بين النجمات والغيم والكون
الخوف من بكرة لهيب وظنون
وانا خايف دربك بكرة يكون
دمعة ومنديل وشموع وسكون
أديني حنانك غيم وغصون
امنحني هواك جنسية ولون
سجلني في حبك حتى بدون
قصيدة فجر هارب
ما مهم لو عاجبك انت
القرب ليهو ..
بس مهم انو الحكاية
البادية بيهو
لا بتكون قدر النهاية
ولا بتقيف في يوم عليهو
وما مهم لو كنت جنبك
نخلة خاوية
بس مهم انو الحقيقة
رهيبة داوية
والمهم أكتر غيابك
عن وطن في كل زاوية
ياني طالع من طريقك
ومن درب مليان قنابل
وانت طالعة من التهابك
بين مدافع وبين سنابل
وكل وردة حنينة تصبح
فجأة بستان جفوة ذابل
آخرة الأسف المودة
حتبقى بينا
والضراعات الندية
على المسافات تسقي غيمنا
لا الخواطر باقية صادقة
لا الفرح مسجون في بيتنا
بس خلاص المستحيل
كتب النهاية
والحروف الشاربة حسنك
ما ارتوت من فيض غنايا
والوداع احساس حقيقي
وقمة الأشجان بداية
قصيدة رجع الصهيل
رجع الصهيل
و المستحيل الكان حقيقة
الليلة اتشبع رحيل
خليني جنبك
ببقى سامق زي نخيل
زي نيل بينزف
في عروق شمس الأصيل
خليني جنبك
أحيا بالحس الجميل
لو كان زمان الغربة
دونك شوق دخيل
أو روعة الدنيا في عيونك
سلسبيل
ما كنت بسلم من جنونك
و يسلم الشجن الطويل
و انت عارف كيف بنطلع
من دروب المستحيل
و كيف نهاجر لي سحابك
نرسم الإيقاع دليل
و كيف محطاتك بتبقى
وقفة تهدينا السبيل.
قصيدة زمن روعة
عيون ترحل
تسافر ليك
عيون مسكونة بى ذاتك
بتتمناك و تفرح بيك
عيون إحساسه دنياتك
عيون مفتونة بى عينيك
و سكة شوقك المجنون
شايلة الليل عذاب و جنون
تساهر النجمة فيك تحتار
و يصبح ليله بيك نهار
يشيل البسمة يرويها
و من احساسو يديها
حنين دربو
و يدس الموجة في قلبو
وجنة حب بنبنيها
بين الرفض والإيجاب
بضيع إحساس عظيم بيها
و جيناكم
سلوى و ريد
يغنوا معاي
عشقناكم
و يبقى هواي
ربيع الفرحة دنياكم
و ألقى هناك صباحاتكم
في مرسى الشوق
بكل سماح
و لطف و ذوق
تمسح عني حس دمعة
بين أحزانها مجتمعة
و تفتح صفحة وردية
تولع بيها ضو شمعة
و نسمة جميلة صيفية
بتحلم بى زمن روعة
زمن بدينا عيدية
و نجمة تلالي مرتفعة.
قصيدة في سكتك
رحال أنا
و زمني المسافر في هواك
موجة حنان متجننة
خليك معاي غيمة سماح
تتحدى ظلم الأزمنة
علم هواي كيف الصباح
بطلع من الليل و الضنا
شيل من دماي عصب الجراح
تلقاني جنبك سوسنة
لو كان بيسمعنا العبير
أو كان بصدقنا الزمن
لو كان بتهدينا النجوم
احساسها بالليل و الشجن
ما كان بتتعبنا الهموم
تسقينا من كاسها المحن
أو كنا نستجدي الغيوم
ما الغربة في حبك وطن
رجع البحر عطشان بفتش
في دروبك عن جروف
كيف دنيا من غيرك تكون
أو لحظة من غيرك تطوف
و الكون غريب في سكتك
وجع الغريب سكة ظروف
في دنيتك
تبقى القصائد و الغنا
كلمات جميلة بدون حروف.
قصيدة ليك يا بلد
ليك يا بلد
بحمل هموم الشوق
حنين
و ألقاك عوالم من فرح
و امزج دواعي الإلفه ريد
و انسج خيوط الليل مرح
شوق المطر
فى سكة السفر الجديد
مسكون بألوان من قزح
آه يا بلد
يا أغلى من كل الحروف
العابره من بحر الغرام
يا أسمى من وهج الصباح
لما النهار
في حضنو نام
اتوسدت كتفك شجون
ضاعت خطاويك
في الزحام
أنا خوفى من بعدك أتوه
في غابه
ما بتعرف سلام
في ليل فتح
باب المواجع للضلام
في كل لحظه
بتصحى في الزمن الكلام
كيف يبقى قلب الناس حجر
في حضنك السامى المقام
ما تخاف على الحق
يا بلد
ح تهب رياح طين الجروف
تحمل عبير الموج مدد
و يطلع زمان الحب سنابل
في وسط حزنا هجد
و يجونا أطفال المدارس
لا بتقيف بينم هواجس
لا وساوس
في طريق ما ليهو حد
و يطلع مطر خير الأرض
و يتحول الرصاص ورد
و كل النجوم
النايمه من خلف السحاب
تظهر تبين فى ليل سعد
و القمره و التاج الأمين
فوق الجبين
نلقاهو فى لحظه اتولد
و يسكت في أعماقنا السكون
تتحول الهمسات رعد
و تعود معزتنا الزمان
و الإمتنان
عز القبيله الكان غمد
و الضحكه تطلع و الحنان
و الكلمة و الوقفه النبيله
خطى الأمان
و جواز سفر
لى كل وسيله
ترجع الغاب و ابتعد
و انا يا بلد
وسط الدروب المستحيله
رحله فى غيم الهجير
تايه مع الأشواق دليله
و أملى فى السكه الطويله
أصلو لا خاب
لا اتفقد .
