اسمها الحقيقي وسميه العازمي( ام فهد ) من الكويت ذكر عنها أنها إنسانة طيبة جدا وهادئة وتكره الاعلاموالمفاجاة أن زوجها لم يكن يعلم بشاعريتها إلا عندما اعترفت له بذلك أثناء مرضها وزوجها هو من تولى طباعة ديوانها وفيما يلي اجمل قصائد وسمية هويدي العازمي
قصيدة أخر موعد
يا خبلى يا نايفه ويا مكثرخبالي
أنا احسب ان الموادع عادي هين
من شدة الغيض وطبع العند يبرالي
والعاذل اللي حكاه يزيد ويشين
وجنبت عنه ورحت اسير بلحالي
كما يجنب عن الخفرات متدين
وعودت ابي شوفته لما هدا بالي
أثاري جرحي لخلي ما طلع هين
وا.. وجد نفسي عليه ويا ضنا حالي
وا.. همي اللي أدسه عنه ويبين
قصيدة أثر يديني ماسكات كمومه
حان الفراق وتم توديع غالين
قسوة زمن وظروف ماهي رحومه
وحاولت ابدل موقف العسر باللين
وابين قدامه جسور ظلومه
واعاتبه وانقد على دمعة العين
واناحشا لله ماني ألومه
وأقول هذا حال كل المحبين
وهذا الفراق اللي تجينا علومه
ومسكت نفسي كن ماصاير شين
أخشى على خلي يشقق هدومه
ثم قلت وش تنطر حبيبي لهالحين؟
أثر يديني ما سكات كمومه
قصيدة طيري
طيري غدا بين هالغربان
يا من يدور على طيري
في ساعة خاطري زعلان
بيدي سلمته لغيري
ما هوب غض ولا حقران
يا للأسف ضاع تفكيري
ما جابه الخاطر الندمان
ولا انفعني معاذيري
لو انه مخلي العنوان
والله لا وريه تقديري
قصيدة رسالة من بدويه
تعال بشرح لك أنا كل مغلوق
تعال شاهدني مع ذكرياتي
لا .. لا يغرك لبس موضة ومسحوق
إنفض غبار الوقت تلقى صفاتي
قرب وطالع معن الشوف بحدوق
و زيف التطور جرده من حياتي
بتشوف في وجهي من الماضي اطروق
أخذت من بطن الصحاري صفاتي
طفلة بثوب مخيطينه ومفتوق
تنطر جديد الثوب بالعيد ياتي
سمعت اطراف أخبار عن كلمة السوق
و تاخذ وتسأل هو وجوده ثباتي؟
طفلة سحبها الوقت للهم برفوق
حتى إنها صارت من العاشقاتي
وجار الزمن وعرض الحب للعوق
شرق ركايبها وهم مشملاتي
واتلا عهدها فيه يركض ورا النوق
مسرود جيب وفي يدينه عصاتي
ويصد لكن يلتفت لي من الشوق
عجلان يلخصني بعين تحاتي
وقفى وخطواته يتلن معلوق
و خلاني ما تنقل عظامي عباتي
ودار الزمان ولا مشى الحظ بوفوق
و ما زلت أخفي بالظلام اعبراتي
ولا زلت أنا ألعب له على كل طاروق
حتى يجيب الله موعد وفاتي
قصيدة ذبحني غلاه
يجيني بلا واغلط انا ضيقتي بغناي
أغني باحطم هاجس ماكل حالي
ذبحني غلاه وحدني لين جبت اقصاي
ذبحني عسى مال الغلا يا عرب والي
غدا راس دبوس بدمي سرى لعضاي
ولا ادري أهو وينه وقف كيف ينطالي
تغلغل بمخي والعصب والعظم وكلاي
يدوج غلاه بمهجتي دون ترحالي
سبه عقلي الراجح وضل الفكر والراي
يا خبل الذي هاقيته.. نزوه وتنزالي
بلاني عفاه الله ليته بلي بلواي
غدا علتي ودواي والمر والحالي
قصيدة البنت ياحبها
كل ما اتصل فيك.. صبح وليل تشكي لي
من عوج الأوضاع والدنيا ومتاعبها
مليت ياصاحبي مابيك تحكي لي
هالأسطوانة أنا مليت مطربها
حتى خيالك بتال الليل ياتي لي
جروح وعيون معقودة حواجبها
عيشتني بعالم ماهو على جيلي
زهرة شبابي حرام انك تخربها
ياما هجرتك ولا كملت ترحيلي
حبايب ماتعبر عن حبايبها
حبيبتك ماتحمل هالبهاذيلي
إضحك معاها ولا طفها ولاعبها
هيا تغزل وغن وزيد تدليلي
البنت يا حبها للي يداعبها
قلي إش رايك بفستاني ومنديلي
ألوانهن تعجبك أو مانت راغبها؟
وقلي اش رايك بعقدي مع خلاخيلي
وشف قذلتي يوم قصينا ذوايبها
وقلي اش رايك بأطباعي واقاويلي
لاحظ عليها وغيرها وشطبها
خل بيننا انقاش وعلوم وتعاليلي
وآمر على البنت وان حبيت طالبها
يامدمن الهم كافي دمع بالليلي
بكره بتشبع من الدنيا ومصايبها
دنياك والله.. ماتسوى التزاعيلي
حتى ولاهيب كفو اللي يعاتبها
قصيدة ماني شماليه
إليا تذكرت الموادع وحققت
سيده يديني وسعن جيب ثوبي
وتليت لي ونه عميقه ودنقت
؟آخذ نهار الصدى في جنوبي
واطبع حرارة ضيقتي لا تضايقت
على الشفايف لا ذكرت امحبوبي
وغربت في بحر التعاسة وشرقت
وكفرت حتى مقبلات الذنوبي
ذاب بهواي وفي هواهم تعلقت
ما خنت في عهده ولاهوب كذوبي
اللي حداني يوم حبيت فارقت
ماني شمالية ولا هو جنوبي
قصيدة لعيونه
جاني يقول إسمعي لابد نتباعد
يا خوك ما عاد به حل يريدونه
حسيت باحساس ما حسه معي واحد
حسيت باحساس مدري كيف مضمونه
غربة سليمان وتلقائية مساعد
وصرخه سلامة.. ونايف صقر بجنونه
يا همي اللي معايه قايم قاعد
من وين مادرت وجهي قيل مديونه
لولاك يا حشمتي للوجه والساعد
يمديني من قو غيضي صرت ملعونه
أقدر أغني وادق طبول واواعد
لكني أرغب أقضي العمر مصيونه
أبسطها.. آخذ جوازي واجحد الجاحد
وآخذ شليلي بفمي.. واقول لعيونه
قصيدة فرقاه صار
أغض عيني عن خطاه وخماله
وارقع فضايحهم بزين التواصيف
أثاري فيهم ما تفيد الجماله
والناس لا سبوه قلنا ملاقيف
فرقاه صار.. ونسيته لا محاله
ولا عاد في بوم الليالي لهم طيف
دموع عز ولا ابتسامة نذالة
دنياك مادامت لغيرك على الكيف
قصيدة يا دنياي
جيت بكتب عن شقا عمري قصيده
مير عيا القول لا ياقف معي
شاف همي والمعاناة الشديده
أكبر من القول وحروف النعي
هاك يا دنياي عمري ما أريده
إضربيني واقسميني واجمعي
أي نعم ماني بهالدنيا سعيده
من نهار ولادتي وهمي معي
عشت محزونه وملتاعه وشريده
ويا كبر شي تخبيه اضلعي
مابي بين الناس تبكين ووحيده
وان هجع طرف البشر ماتهجعي
إما موتة حق أو إيدي بأيده
هيه.. يارحمة إلهي.. أسرعي
