اشهر قصائد بدر بن عبدالمحسن

بدر بن عبدالمحسن شاعر معروف على الساحة السعودية والعربية وهو أحد من أبرز رواد الحداثة الشعرية في الجزيرة العربية لقب ب مهندس الكلمة ومن اشهر قصائد بدر بن عبدالمحسن  مايلي

عز الوطن

الله الأول وعزك ياالوطن ثاني

لأهل الجزيرة سلام وللملك طاعه

حنا جنود الحرس للقايد الباني

رمحه .. ودرعه .. وكف الشيخ وذراعه

مثل السيوف البواتر وان جنى الجاني

يضرب بها ارقاب من بالدار طماعه

من بان عبد العزيز وصبحنا باني

ما عاد نقبل ظلام الليل لو ساعه

في السلم يشهد لنا عمار الأوطاني

وفي الحرب لأرواحنا للموت بياعه

حنا سياج الوطن عن كل عدواني

والجيش والأمن ساري العز وشراعه

صداقة بالنظر

علمتني .. أعقد صداقة بالنظر

مع ساعتي .. قبل اللقا ...

وكيف الثواني ما تمر ..

والشمس .. ما تنوي المغيب ..

علمتني .. إن الحبيب .. دايم حبيب

مهما هجر ..

سيل الظلام ..

يملى الشوارع ليل ..

ولا جيت أنام ..

أرخي الستاير .. عن شعاع ..

عن صوت .. وأقفل بابنا ..

يدخل قمر أحبابنا .. مدري أنا من وين

ساكن قمر أحبابنا .. بين الهدب والعين ..

أرجع أناظر ساعتي .. واللي مضالي من السهر ..

علمتني .. إن الحبيب .. دايم حبيب ..

مهما هجر ..

ياللي عيوني مرايتك ..

وفي كتاب دمعي حكايتك..

ما اظن تنساني أنا ..

وجهي تركته في ساعتك

لا .. تخون وداعتك

تذكرني في ليل .. وف سهر .. وف حلم

تذكرني في بيت من شعر .. أو اسم ..

علمتني .. إن الحبيب .. دايم حبيب ..

مهما هجر ..

أنا إنت

انا إنت .. يا إنت أنا ..

لو سألوا حبيبي .. عن إسمي حبيبي ..

قل هذا أنا ..

تشبهني عيونك .. سميني المدى ..

غطيني برموشك .. عن عين العدا ..

ظفرني جدايل .. واكتبني رسايل ..

وانسى من أنا ..

واعدني المدينه .. أوقات الغروب ..

امواجي سفينه .. ورمالي دروب ..

بأمشي لين أشوفك .. لين أقرا بكفوفك ..

إسمي .. ومين أنا ..

كل ما دعاني الشوق

كل ما دعاني الشوق للقلب الأول

القى مكان القلب في الصدر تنهيد

وطيوف ذكرى في الحنايا تجول

تجمع صور وأوراق من باقي العيد

مدري سبقني الوقت والا تحول

أخلف ربيعي وادهرن المواعيد

أو هو الصبا .. نجم رقى ثم حول

غاب وسما وجهي مشيب وتجاعيد

أحبابنا ليت الذي راح طول

وليت الذي باقي لما فات تجديد

انتم مثل قلب عرفته امنول

وأصبح مكان القلب في الصدر تنهيد

 اكذب

صحيح اني انسى الحوداث.. والملامح .. والأسامي

لما أكتب عن آلامي .. شعر ابعد ما يكون ..

عن مجرد جرح دامي .. والأساور .. والمرايه .. والهوى القاسي الحنون ..

عندي هموم القصيدة .. غامضة .. صعبة .. عنيده ..

وانت عاشق للوضوح ..

يتعبك بحري ظلامي ..

ودك بسري أبوح .. وانا آخر همي بوح ..

تكفى لا تزيد ف خصامي .. وقلي ما تفهم كلامي ..

انا انسى .. الحوادث .. والملامح .. والأسامي ..

لما أكتب أغنية مثل الرسايل .. وانا أكذب ..

والخيال العذب كذب ..

كنت لازم أخفي سري وما اقول ..

إن هالمرة شعوري .. هو خيالات الحقول ..

تطرد اسراب الطيور .. عن حقيقة .. عن شعور

ما هو في حب السنابل .. انما تحت الجذور ..

كسروا العشاق بابي .. قطعوا لحمي ثيابي ..

خلعوا الأدراج .. طاحت مزهرياتي الجميلة ..

شققوا جفني كتابي ..وسألو وين الجديلة

وبسمة العين الكحيلة .. ما لقوا في بيتي إلا ..

ما لقوا في صدري إلا.. مالقوا في قلبي إلا ..

أمنياتي المستحيلة ..

وإني احلم .. بس أحلم ..

أعبر الشارع معاي .. في الرصيف الثاني قهوة ..

فيها اربع طاولات .. وحده اجلس فيها وحدي ..

ووحده للي يجي بعدي .. ووحدة لأجمل حرف عندي ..

أما رابع وحدة دايم للي مات ..

زحمة .. لكن كل من في القهوة ربعي .. كلهم ..همي ودمعي ..

ليه ما تجلس مكاني .. وهذا شوفي .. هذا سمعي ..

أطلب اقلام ودفاتر .. حاول اكتب عن حقيقة ..

ما هي وجه .. ولا مكان .. ولا دقيقة ..

أدخل الزحمة ف ضميرك ..

لا تلفت .. وانت ما في القهوه غيرك .. غمض الدنيا ..

وأكتب .. وإن سأل في يوم سائل .. عن معاني .. عن شعور ..

قله مابين السطور ..

وإلا تدري .. قله أكذب

 رسالة من بدوي

يا بنت أنا للشمس في جلدي حروق

وعلى سموم القيظ تزهر حياتي

أطرد سراب اللال في مرتع النوق

ومن الظما يجرح لساني لهاتي

عاري جسد والليل هتان وبروق

دفاي أنا والبرد سمل العباتي

إن عذربوني بعض خلانك .. صدوق

يا بنت أنا عشق الخلا من صفاتي

وشم على رمال المتاييه مدقوق

لاشك من منهم يسوي سواتي

أنا بدوي .. ثوبي علىالمتن مشقوق

ومثل الجبال السمر صبري ثباتي

ومثل النخيل خلقت أنا و هامتي فوق

ما عتدت أنا احني قامتي إلا فصلاتي

وإلىإفتخر بأفعال يمناه مخلوق

يا بنت انا فعلي شهوده اعداتي

الله خلقني وكلمة الحق بوفوق

وملكت الأرض .. وراس مالي .. عاصاتي

آه يالجراح

لا جيت أنا ب سامحك..

تبكي الجراح ما ودها..

مشتاق ودي أصافحك..

عيت يدي لا مدها...

آه. .يا لجراح .. راح اللي راح ..

وراحتي .. من يا ترى بيردها ..

يا حب.. ياذ كرى واسم..

مدري انا ابكي عليك من العذاب اوابتسم..

صدقني في يأسي .. نفسي تبي نفسي تبيك ..

لا يا دفا شمسي تبيك..

ليه خنتني ..الله عليك ..

آه يا الجراح .. راح اللي راح..

وراحتي .. من يا ترى بيردها ..

لا تحاكي عيوني .. يمطر سحاب الملح ..

ولا تلمس أشجوني .. ينبت في قلبي جرح ..

ناظرني يا خلي .. جرح انا كلي ..

وشلون أب ارضى الصلح ..

فصل الخريف حبي ..حزن وورق أصفر..

...ودعني يا قلبي..وخل العذاب أقصر..

آه يا الجراح .. راح اللي راح..

وراحتي .. من يا ترى بيردها ..

 الجريدة

الجريده ..

ادري وش سر الجريده

به أحد .. يقطع وريده ..

وينزف أخبار جديده ..

وحنا نقراها الصباح ..

دنيا مكتوبه ف ورق .. دنيا من دم .. وعرق ..

دنيا مجنونه ارق .. وهم ..

انسرق .. إحترق .. المهم

كلها أخبار سعيده

وحنا نقرلها الصباح ..

لو طبعنا .. صفحة ما فيها خبر ..

لا حروف .. ولا صور

صفحة يملاها البياض ..

صفحة تملانا بياض .. ما يعكرها الحبر ..

كان ذي الصفحة الوحيدة

اللي اقراها الصباح .. في الجريدة

هذا المسا

هذا المسا للحب للشوق للمواعيد

هذا المسا في القلب .. شمع و أغاني وعيد

مدري سحابه..شال؟ والا شعاعة جيد

هب الهوى آمال ..وهب الهوى تنهيد

وينك حبيبي؟ قبل الشفق ما يغيب

تدري حبيبي؟؟ كل الصبر تعذيب

للحب ألوان السما عند الغروب

عطر البساتين ومصابيح الدروب

للحب ما تخفي القلوب من الهوى

وتحكي القلوب

وتهب في صدر هبوب

لو مر طيف يشبهك

واصدق الأمل الكذوب

وإلا أنت .. محدن يشبهك

وينك حبيبي قبل الشفق ما يغيب

تدري حبيبي كل الصبر تعذيب

الشمس غابت و المدى جمر ورماد

وينك حبيبي يا ترى ووين المعاد؟

وقبل الأمل لاينطفي في ناظري ويصبح سواد

لمحت في الظلما سنا وجهك حبيبي وضحكتك

واقبلت ياعمري أنا شوقك

يسابق خطوتك

هذا المسا للحب .. للشوق .. للمواعيد

وهذا المسا لك أنت .. شمع وأغاني وعيد

 اغفر لي الزله

أبيك في كلمة لو هي خطا تغفر لي الزله

وردتك ظامي وان عز وصلك بااقطع حبالي

أحبك ذا ترى أول كلامي .. وآخره كله

ولكن وش يضر اليوم لو تدري عن احوالي

وخذ ما جاز لك من هالحكي واللي تبي خله

انا لا قلت ما في خاطري والله ما بالي

ظلال العاشق جروحه ومن ما يتبعه ظله

أمانة يا شعاع الشمس لا تغضب من ظلالي

وتقدر تطوي الدرب البعيد وتقدر تفله

ولكن صعب تمنع في الهوى صبري وترحالي

وتقدر تغمد السيف الرهيف وتقدر تسله

ولكن عند خلاق البرية علم الأجالي

متى عمرك سمعت بعاشق قد مات من غله

هذاك الحاسد وراعي الهوى تتلفه الأمالي

حبيبي من يعزك في الهوى ما تقدر تذله

ترى قربك يزيدك بالغلا وان عفتني غالي