جمعة إبراهيم كاظم الحلفي ولد في بغداد بالعراق عام 1952م شاعر عراقي ينتمي الى اسرة فقيرة تلقي تعليمه حتي الثانوية العامة ولكنها لم يكملها فقد فصل من المدرسة لانتمائه لمجموعات سياسية مما عرضه ايضا للاعتقال اكثر من مره توجه جمعة للعمل بالصحافة واصدر العديد من الدواوين الشعرية وفيما يلي نطرح لكم اشهر قصائد جمعة الحلفي
قصيدة النواقيس
الحچي ودمع المراسيل
البچت بين الظروف
والغنه وحس الربابه
وسمع المعاند يشوف
وانت وطيوفك سنابل ..
تنحصد دم ببيادرهم تطوف
يا غلاتك راهب يرتل صلاتك
والكنايس تشرب الحان الحروف
والنواقيس التسجل صوتك أنته
وشاح رايه
كتاب شاهد ما تعرف وراقه خوف
وأنبياء الناس تصعد للجرح تنزف صلاه
وانت بحبال المشانق صوت يدوي
وانت بهلال المآذن جنه تضوي
وانت لعيون الزغار .. وشاح وطيور وقصايد
حملك شاطينه غيض
ويه النبع تصفه هلاهل
وانت حد الهم .. تلوج
ومحد يسمعك هلاهل
تصفه روجه وي النهر
وتفيض تتفسر هلاهل
تصفه لچمه وي الجرح
وتغيض ونسمعك هلاهل
والنواقيس وي صوتك دگ جرسها..
وهزت أركان الكنايس
والهجر .. صوره عله حايط
شابحه الشوف وتعاين
والعشگ.. نجمه بضواك
تغيض وتمل وتعاين
يالبلچن ينكسر گلبك عليها
وينحر الشوف ويعاين
يلگه بيها طيوفه لحنهن حچينه
يلگه بيها حروفه دوخهن بجينه
يلگه بيها شموعه تطفه..
وتعتلگ شمعه حزينه
ويبگه طيفك جيد مرهون بگلايد
لاچن أنت تظل جرح
ووشاح وطيور وقصايد
حملك شاطينه غيض..
وحتى حبات الرمل بيدك تفز فزة طيور
وحتى جنح الصاف يلگاك بحريره..
وتصفه خيط وي الطيور
وانت ذاك انت سؤال
تحير الدمعه عله چفك
وانت ذاك انت النحرت الگاع
حتى الدم يعرفك
لو نزف يشكيك وانت يفيض نزفك
طوح وي الروح ونة الكاولي
وعيش عله عرفك
غني حزن الناس
وانت وي الغنه نايين حزنك
سومري إيشانك
غريبه الدنيه لو رادت تميل
سومري ..
سومري وبعدك سماوين
وترف حزنك ثجيل
ووادمك مثل الگمر
تضوي لمن شمسك تميل
شلون حزن الدنيه من تبچي عليك؟
سالفه الدنيا تصير بحزنك انت
تخيل الدنيا بغلاتك حدر بدمهه وتعال
حملك شاطينه غيض
وحتى جرف الماي الك عنده سؤال
يناشدك چفينه خذهه
وهينه لو عفته جرايد
لاچن انت..
تظل جرح ووشاح وطيور وقصايد
قصيدة المسافر
لسه....
وكل من مسافر
تموت السچه بعيونه
ويغط بالنوم...
يغط بالنوم..
يغط بالنوم
يفز..والليل ذاك الليل
مدري السچه تعبانه وتتاني الريل؟
مدري الريل هو متاني جيت الريل؟
وتجي النشده عله السچه
تدور على المحطة منين؟
تمر بعيون المسافر
تمر وتنتخي بالريل...
لا سچه تتاني ريل ولا ريل المناطر ليل
ويفز هناك المسافر...
يصحى من السفر والليل
يصحى من الحزن والغربه والفرگه
يغيض ويبچي بحرگه
والحيره سفن بالدمع محترگه
كل هذا وبعدها الدنيه نص الليل
شيجيب الصبح ونفز..
مل الليل من الليل
لسه...
والشارع غفه بين الرصيف ونام
حتى الليل چودر ع الرصيف ونام
حتى الطير چودر ع الرصيف ونام
وحتى النوم....
چودر ع الرصيف ونام
والمسافر
يبچي المسافر
يبچي من الحزن والغربه والفرگه
يغيض ويبچي بحرگه
والحيره سفن بالدمع محترگه
والفانوس...
مل يضوي ع السچه
يروح ويه الهوه ويرد
يطفه ويه الهوه ويرد
تعته الحسبه وترده...
والنشده
خذت درب الرصيف وراحت النشده
والمسافر
يغط بالنوم...
يغط بالنوم المسافر
يغط بالنوم
نصحى..
ماكو المسافر
ننشد..
ماكو المسافر
وين دموع المسافر؟
وين احزان المسافر؟
وين جروح المسافر؟
وين كتاب المسافر؟
چا وين المحطة الچانت بهالصوب
چا وين السچچ والريل؟
مامش....
مامش لا سچچ.. لا ريل....
بس الدنيه نص الليل
شيجيب الصبح ونفز...
مل الليل من الليل
قصيدة الروح والطين
شگد غفت روحي عله برد الطين؟
ياخذها الهوى مندايه..
وترجع للهوى مندايه
تنزف للشجر ويخضر الزيتون
ياساس الحزن بالروح.. خضر ياحزن زيتون
وأنذر كل غصن للدنيه للانسان
وأنزف كل فرح يامنبع الأشجار
وأنزع كل قهر مر بيك.. مر بيه
وأضحك للجرح.. للريح.. للأزهار..
للنجمه الربيعيه
شگد غفت روحي عله برد الطين؟
يطگ بيه الحزن وألتم
يطگ بيه الفرح وألتم
أذوب من الغنه.. ياريح طاريك
يذوب كل قهر بيه
ينديني
يغسل كل جرح بيه
يخاويني
يفزز كل لحن بيه
يغنيني سهار الليل تجليبه وأبوذيه
وأمر بالناس بالبارات بالشارع
وذوب من الغنه وللگاع اغني الماي
أسيل بكل سواجي الناس
أجدد كل سواجي الناس
أفيض بكل سواجي الناس
وأسهر للفجر للصبح للآذان..ليليه
قصيدة تالفه روحي بغيابك
تالفه روحي بغيابك
عتب ليل موادعك
شباچ حزني مشرع من سنين
من سديت بابك
ليله وحده أرد أصلي بحضرتك
أرد أهز شباچ حزني
وحيل...حيل أبچي عله بابك
لا تعاتبني عله حزني وأنته حزني
أنته سجادة صلاتي
وأنته آخر نبي بعمري
تابعك وأنته الوصي
تنقص بروحي وأزيدك
شلون أشوفك وأنته شوفي؟
لا تعودني عله طبعك سوله طبعك
سولة مشابگ وحسبة ليل ما يخلص عذابك
أرد أشمك مرة وحدة وحيل ..حيل أبچي عله بابك.
قصيدة غيمة نوم
طولك سؤال الليل
غيمة نوم عطرك
أصحى وياك ماخذني المطر
تحت مخدتي بير الدمع
ماظل غير كاسك والشتا ومنقل حزن
ليل يجيب ليل
وأنته تسألني عله حزني
ثلج غيابك البروح حارگني حرگ
أبرد وأنطفي
وأشرب بصحة غيابك
ماظل غير كاسك والشتا ومنقل جمر
ليل يجيب ليل
وأنته تسألني عله حزني
وك هذا الجمر گلبي
وهذا الخنجر المسموم هجرك
ياكل بروحي غيابك
تحت مخدتي بير الدمع
ماظل غير كاسك والشتا وضو الشمع
شگد رماد تفتت بروحي؟
شگد طشيت بعيوني سهر؟
ليل يجيب ليل
وغيمه تجيب غيمه
وآنا ماخذني المطر...
قصيدة الفراشه والطفل
ياخذني لعيونچ حنين
مره أزعل ..
مره أصالح ..
مره اعاند..
ومره الين....
چا وين تاخذني بعد..
وآنا وازتني السنين؟
تذكرين؟
تذكرين شلون من نزلن النجمات يمنه؟
چنه ملتفتين مدري لوين
من ذاك الطفل طير فراشاته بوجهنه
تذكرين شلون نزلت دمعه من عينچ
ونشفتها الفراشه؟
وچانن النجمات مستحيات منه ؟
تذكرين من رسمنا الغيمه ع الشباچ؟
چنه ملتفتين مدري لوين
من مطرت علينا
وساحت الألوان كلها عله الچراچف
كلشي بالغرفه انصبغ باللون الاحمر
ثيابنا والباب وفراشات الطفل
والحچي البينه
تذكرين شگد تذكرنا حچي
وشگد نسينا
تذكرين الورده من فتحت بدينا
چنه ملتفتين مدري لوين
من خضر على العتبة حچينا..
شگد ضحكنا شگد بچينا
تذكرين شگلتي من گتلچ..
مدري ليش ومن شنهو زعلنا؟
چنه ملتفتين مدري لوين
من صرتي الفراشه وردت اصير آنا الطفل
طرتي مني بعيد..بعيد
طرتي ع الشباچ ع البيبان
ع البرده الزغيره
ومن نزلتي نزلت الدمعه
عله خدي
وما مسحتيها و..كبرنا
تذكرين من كبرنا شگد حزنا
شگد بچينا؟
قصيدة أبواب
تگدر تدگ الباب..
الباب لوح الخشب
مصبوغ ومدردغ وملون وجذاب
بس? ما يرد الباب
ولوما أسمعك تدگ
ما ينفتح لك باب.
بابك منقط شذر مرسومه بي نجمات
بالأزرگ اسمك تحت مكتوب بالدمعات
وتحت التحت رزته مديوفه باللذات
بابك مناطر فرح موعود بالغياب
حاميك چف الحسد مرسوم فوگ الباب.
بابك مزهر ورد طالع ندى بعتبته
وببابي نابت عطش من عروته لرزته
ريحة الحضره ببابك والحمدو والتسبيح
بابك يجيب الفرح.. وبابي يجيب الريح.
بابك دفو بالشته وبالصيف جرة مي
بساط العصر بابك ومغطى بالفي
متروس بابي سهر وبابك ينام العصر
بابك منمنم خرز ومطرز وغافي
بارد هوى عتبتي وبابك ندي ودافي.
بابك مراية عرس تتمرى بيه الناس
مديوف بالحنه ومعرش بياس
بي آية الكرسي والحمدو والخناس
دگات بابك غير.. وبابي إله دكات
بابي تدگه الريح.. وبابك تدگه الناس.
بابك زغير وحلو مقفول ومنده
يسبح بمي الورد بالفتحه والسده
ناطرت بابك عمر شو طالت المده؟
بابي مشرع دوم.. محد يجي يرده.
بابك جناح وهوى يودي ويجيب أحباب
وبابي مبسمر صبر يتنطر الغياب
مليان بابك حچي ومليان بابي عتاب.
قصيدة المربع
اشك بچفوف اديه وما أشك بيك
واغار عليك يبيض غيرة النسوان
اشلون اجمع وافرزن هاي من هاي
وانه بحبك ولا خليت ميزان؟
أفز من نومتي خاف انت سهران
وانومك ع الرمش وأسهر للآذان
يخصرك مستحه وطولك مواويل
لضوگك من لهاتك وظل سكران
أخلص سنيني لعيونك مواعيد
وأعيد بيك كل يوم بألف عيد
تگلي جيس خصري وبوسني هناك
هو انت عندك خصر ينجاس بالأيد؟
قصيدة مو بحر
هذا البحر .. مو بحر
هذا ... دمي المسفوح
وهذي السفن مو سفن
هذي مراكب نوح
دم اهلي هذا البحر
من نينوى.. من أكد
من أور .. من آشور
من أول التاريخ لليوم
دم اهلي مهدور
هذا البحر.. مو بحر
هذا البحر چذاب
هذي السفينه چذب
وهذي المراكب چذب
هذا البحر تابوت
دم اهلي هذا البحر
دم اهلي ياقوت
من أور من آشور
من نينوى ومن أكد
من أول التاريخ لليوم
بس العراقي يموت
قصيدة نايم وطولك صحو
نايم...
نايم بريسم على بريسم غفو
طولك وورد الچراچف
نايم مرشرش عطر.....
عش الحمام زغير ومنده..
من طراوه ومن حلاوة مستحه
وجيسة دفو
نايم..
والله يدري بهالسبايه
تفاحه من تفاحه تخجل
واكبر التفاح يتماوج غنج
يزيح لحاف عن لحاف
والدنيا شته
نايم وكلشي يتثاوب..
روحي والشباچ والبيبان
وورود المخده
وشمعدان الشمع
وثياب الزغيره
حيره نومك
حيره تصحى
وحيره تغفى..
حيره ترضى
وحيره تزعل
وحيره يتخالط دمعنا
وحيره يصفى
نايم
وآنه وي شمعاتك اسهر
مدري ياهو البينه يبچي
مدري ياهو البينه يحچي
ومدري ياهو البينه ما ظل بيه دمع..
نايم وطولك صحو..
وشهل گباحه من الشمع؟
نايم وروحي شديدة حزن
والأيام ما هي أيام
لا تكبر علي آنا ماني بگد غلاتك
سايم الله عليك تعذر
سايم الله عله الرفيف
البين رمشك والخصر
ليل وشموع وسكر كاسات
ما يخلص هواك
وعشرتك ليلة خضر
نايم وطولك صحو..
رگصة عبيد مشابگك
ومباوسك گهوة بدو
كل يوم تاخذني دناوة روحي يمك
غلطة مني وغلطة منك
واليصير يصير
لا تبخل علي
وك روحي شديدة حزن
والأيام ماهي ايام
لا تتعب تدور على غيري..
آنه غيري
وك آنه من أول عمر لآخر عمر
