خلف بن هذال الحافي الروقي العتيبي من أشهر شعراء السعودية والخليج هو أسطورة للشعر العربي عامة والنبطي خاصة هو شخصية تمتلك من المشاعر النبيلة والصادقة ما لا يمتلكه أحد استطاعت ترجمة حياتها ومعاناتها وكفاحها من خلال قصائد تغنى بها كبار الفنانين قصائد أشعلت قلوب جميع من يقرأها ومن اشهر قصائد خلف بن هذال مايلي
قصيدة الذود يا هذال
هذال يرعى بالإبل يا ضنينه
يرجى وصاتك يا وفى المقاله
الذود ياهذال يصخم حنينه
ما بين شبك وبين قصر وجماله
الفاطر العوجا عليها غبينه
إن رجعن للحوش جبن ونذاله
وأم الحوير عندي اليوم شينه
رد الحوار وفك عنها الشماله
ابلك يا بوهذال زايد حنينه
ويابس الصحرا أبد ما حلاله
ان عاش راسي يالحيا تاصلينه
وتبد لين السر قفر بداله
يا زين شوف العشب الأخضر يازينه
قبل شهر شعبان ينقز هلاله
أبي أربي ابل والحل برحال
علم صغير جاهل بالبراري
اجمع من البل عشر تصير وبال
واخبر فحلها مع جنبها يباري
البل لها في مهجة القلب منزال
منايح القصار سفن الصحاري
بشتري ناقتك مير نزلها المزاد
إن تبي فيا ذهب وفلوس خذ مردوفها
ناقتي ما تدخل السوق لو زاد المزاد
لو هل الربطات جتني تشيل ألوفها
لو يصبون الذهب صب وامهار تقاد
ما ارخص البل واختيار النفوس اشفوفها
قصيدة سألت الليل
سألت الليل بعد الليل ولى
أنا كيف أتصبر واتسلا
فقلت اعطف لمن يرعاه نجومك
بجاه الله عني لا تجلا
تسليني وتنسيني نهاري
وتتركني وجرحي مستجلا
ثلاث ضلوع يشكن الهضايم
على المعلوق والقلب يتدلى
ولا به ليل نامت فيه عيني
وأنا ما اذكرلها بالذمة إلا
إذا نامت تصحيها حلومي
وإذا صحيت تفيض ثم تملا
على ظبي تطاوعها الجميلة
إذا صكه الهوا الغربي يتخلى
من الموقع وخلا القفر خالي
على دربه يتل الريم تله
قصيدة جريت صوتي
جريت صوتي تالي الليل جره
والناس هجعا وأرفع الصوت بأبيات
ولقيت في سود الليالي مضره
كم كلمة ولت وراحت ولا جات
النوم يعرض للعيون وتمره
مر الكرام اللي خطاهم سريعات
تلبس حرير وبنت الاحرار حره
عمهوجة تغدي لها النفس توقات
دنيا تزين للغرير وتغره
بين الليال وبين الأيام غرات
غارة زمان ويكفي الله شره
أدري الهوى والنفس وإبليس ما مات
احذر عدوك دبه العمر مره
واخذ الحذر من صاحبك عشر مرات
قصيدة قالوا توادع
قالوا توادع قلت يا صعب الوداع
وشلون أوداع من معه قلبي وديع
قلبي معه والسر من فرقاه ضاع
صحيح من يفقد زمام أمره يضيع
أليا ذكرت الخد والسود الوساع
تسابقت غارات عبارتي جميع
اصبر على الهجران قدر المستطاع
احمل همومي للخلا واشري وأبيع
أبيع شي بالجواهر ما يباع
بعته رخيص وضاق أمامي كل ذيع
بين الرجا واليأس يشتد النزاع
بعده دهر ومشاهده عندي ربيع
تستدرج الأيام مفتول الذراع
من حيث لا يعلم وترميه بالسريع
قصيدة جعل السحاب
جعل السحاب اللي معه برق ورعود
يمطر على دار وليفي سكنها
يسقي وطن منتوقة العنق ياسعود
مالي وطن بالعارض الا وطنها
قلبي غدا واستيسره لين العود
محد يفك القلب ياسعود منها
ساطي وفي كفه جديحه وبارود
وادخل يده بين الضلوع ودفنها
بيني وبينه وصل واسرار وعهود
مصيونة ماتدري الناس عنها
في كل عام يزود حبه بعد زود
اقفى بروحي والتوى في رسنها
اموت بين الخد وعيونه السود
وحواجب ربي بملحه قرنها
وشعر بدهن الورد والمسك مكدود
جديلة تضمني واحتضنها
ليل جمعني به عسى ليت ويعود
يبعد عن النفس الحزينة حزنها
قصيدة أنا والليل
أنا والليل خلان و رفاقة
أخذته عشق وأخذني عشاقه
أوضح له ضناي ما بروحي
ويفتحلي على الغياض طاقة
ألا ياليل وش عندك وعندي
يقول من تكدرله مذاقه
عيونه من غرام الشوق تهمل
عبايرها على ذيك الدقاقة
وأنا بنهاية التسعين هجري
إلي خل عجزت أقوى فراقه
مضى عام وثمان سنين كني
كسير عيب الجبار ساقه
يفزع بصياحه هجوع ناس
لهم بالنوم والراحة علاقة
ألا ياليل يعرضك وطولك
أنا وياك لا عاد الصداقة
قصيدة يقطعك يا حب
يقطعك يا حب توقف على ماش
ومن حب حلوين المظاهر بلاشي
اللي يبيعون المحبين ببلاش
حلوين الألسن والقلوب الغشاشي
العرق لو قصر على المي ماعاش
والشمس لو تغرب على الكون عاشي
تفخر بزينك يوم تجفل وتنحاش
ماتدري اني منك قانع وماشي
من اول عيني ترفرف بالارماش
جفن غطا والجفن الاخر فراشي
مطوع لك قلب ابيض من الشاش
ومستدخلك بين القلوب الهشاشي
واليوم أبنقش سر حبك بمنقاش
الله ولا حب سعى فيه واشي
قصيدة يا بنت
يابنت ياللي تطوي الثوب الارداف شط الحوار بدر بكر يميحه
في مرتع عشبه تغريف تغرياف وامه هجل ماشملوها منيحه
والعنق عنق مذير عقب ما شاف بواردي لا قف له بضيحه
والعين عين موحش راس مشراف يملا عيونه بالفجوج الفسيحه
يابنت مانرضى المهونه والاضعاف ولنا علي روس المشاريف صيحه
فينا صفات الطيب يابنت الاوصاف ماتنطبق في غيرنا يامليحه
دخلينا يرقد وراء الوجه ما خاف يامن وتحماه السلوم الصريحه
ناسم عصاه ولويبي حج واطاف تحت الحما ما واحد يستبيحه
ونفوسنا دايم عفيفات وانظاف وابداننا من كل عله صحيحه
صاحين صافين المشاريب واشراف ماناكل الترديه والنطيحه
صلبين في وقت الشدايد وعراف منا المشوره واختيار النصيحه
وان ثارت الهيجالنا وسط واطراف وجه الحريب نقنعه بالفضيحه
واكرام لو يلحق بنا نقص وخلاف نملا الصحن ونلحفه بالذبيحه
يوم السنين الماضيه حيل وعجاف ينقر لنا من هبة الريح ريحه
والعيشه اللي تدبل البد تنعاف النفس عن ما تكرهه مستريحه
دنيا تموج ولا رسمنا لها اهداف ياما تحتها من فعول قبيحه
تجهز الغازي وتسرع بالانكاف ولا تنكف الا بالفلس والقميحه
قصيدة رائعة عن القدس والإسلام
يامحلل الموقف نبي منك تحليل.. وش خطة في خاطرك تعتمدها
ذاب السلام وصار مسرح وتمثيل سجدة سهو تاجب على من سجدها
ما في الحقيبة للعروبة محاصيل . سوالف تصدى الكبود بكبدها
وش منطق الأجيال من بعد هالجيل . ياحسرة التاريخ وامر وادهى
الله وانا سائله يدمر إسرائيل . ينشي غضب ربي عشاه ويهجدها
تلقح بسحب مثل حمر الغراميل . عج مطرها والزلازل رعدها
تمطر سخط منها الصواعق نوازيل . يزفر هواها ويتسلخ بردها
يجتثها الرحمن بجناح جبريل. وتصبح معالم للعرب من بعدها
تكتب على الخنزير طه وتنزيل. يانجس مبداها ومكبر حقدها
والله جريمة منكرة يا رجاجيل. حتى الدول باعرافها تنتقدها
الصبح فوق كلابها تلقى الانجيل . جرثومة دب المرض في جسدها
استفحلت واللي عليها مهابيل. قامت على انقاض الخيانة عمدها
من الفرات بخارطتها إلى النيل. عصابة تسرح وتمرح وحدها
عنها الصواب بعيد جملة وتفصيل . عميانة في غيها عن رشدها
هي مصدر الإرهاب وام الأباطيل. لا وفق الله من يقوم بسندها
عقرب ثرى مسمومة الراس والذيل. من حر ما فيها تنفخ غددها
عاشت على الكذبة دعاية وتضليل . جاها فناها يوم ربي قردها
من حارب الله له مهونه وتذليل . في ساعة من غيب لا تبتعدها
ألم تر كيف اهلك الله هل الفيل . دك ابرهه وجيوشه اللي حشدها
جاها الجزا الصارم عقوبة وتنكيل . وينه و وين اصنام رجس عبدها
شافت فلسطين الجريحة بهاذيل . شابت قضيتها وشيب ولدها
خمسين عام علوم صحف ومراسيل . في حالها عن حالها من نشدها
مراوحة باقدامها في المحابيل . عن راسها قام يتقطع زبدها
إلى متى تصبر على الظلم والويل. تب على من هانها واضطهدها
تبكي وتغرق بالدموع المناديل . تنخى فهد تنخى فهدنا فهدها
تبي صباح به صياح وتهليل . يقضي على الفتنه وهي في مهدها
بقوة الايمان حنا هل الخيل . الالوية باسم الجهاد نعقدها
بالحرب نثبت في وجيه الاساطيل. مواقف من شافها ما جحدها
حنا العرب حنا الرماح النوازيل. نضرب على قمع الرصاصة زندها
من حبنا للموت نهذي الهواذيل . والنفس قبل تموت تاخذ سددها
إلى ادبر المهزوم حنا المقابيل .. كم وقعة شعب الجزيرة شهدها
ولا نولي الزحف نزحف جحافيل . جحافل التوحيد في راي اسدها
بقيادة اللي يركي المتن للشيل . عنا ثقيلات المحامل صمدها
فهد فهد .. ضير بشرب الفناجيل. إلى ابرزت دهم الجموع يعمدها
حلال حيلي الحلاحيل حلحيل . يحلحل اللي ما تحلحل عقدها
دليلنا وان غاب نجم الدواليل . على الهدى ديرة مساره رصدها
نفداك وانصى الرشا بالمحاحيل. ياللي حفرت لدفن الاعدا لحدها
معك أمة الإسلام تصهل تصاهيل . قدها يبو فيصل إلى القدس قدها
