هشام الجخ هو هشام كامل عباس محمود الجخ ولد في مصر محافظة سوهاج عام 1978م هو شاعر مصري معاصر نبغ في الشعر وظهر عليه النبوغ منذ صغره وحصل على لقب أحسن شاعر عامية شاب من اتحاد الكتاب المصري عام 2008 رفض حياة الموظفين التقليدي وفضل التفرغ للشعر وفيما يلي نطرح عليكم قصائد الشاعر هشام الجخ قصيدة مصلتش العشا حلوة يا دنيا هشام الجخ قصيدة متزعليش
قصيدة أباتشي
حبيت تدوس أرضي..أرضي محبتشي
حتبات هنا الليلة..بكرة محتبتشي
حمل قنابلك هات..كيل وحمل لي
راح اموت .. ووقت ما اموت .. عيل يكمل لي
معناش سلاح م اللي
ولا طيارات م اللي
والبندقية اللي في ايدي حيالله كام مللي
بسمي وبصلي
بصيب بيها .. أباتشي
قصيدة إيزيس
نفسي أنام فينك؟
يا ام الرموش عنقريب
العنقريب سرير يصنعه اهل النوبة من الجريد
ماتدمعيش عينك
الفرح جاي عن قريب
إيزيس
إزاي بتتحمل؟؟
أنساها .. وتجيني ..
أسقي بنات الدنيا إلاها
ولما العطش يكويني ألقاها
هي اللي تسقيني
تهديني يوم وردة
أديها لفلانة
تجري على حضني احكيلها عن نانا
إزاي بتتحمل؟
غمز البنات واوعر من غمزهم ردي
جاياني ملهوفة ما تلاقي غير صدي
أحزن في أحضانها وافرح هناك وحدي
يا ام القليب اتخلق ماعرفش غير يدي
يا ام الفؤاد ولاد
معرفش غير يعشق
الصبر عدى وزاد
يا قلبها المتقاد
ما عرفت يوم تزهق
كانت بتلبس لي اجمل فساتينها
ترمي ف صحاريا أفتن بساتينها
تدمع رياحينها
ولا قلبي يوم يشفق
وإزاي بتتحمل ؟؟؟
كتر الكلام عني بحكاوي وانا غايب
الليلة كان سهران
الليلة كان سكران
الليلة كان عاشق والليلة كان دايب
يا ام الرموش طايشة وام العيون لامة
حضنك ما حيسعنيش انا بلوتي طامة
اربع سنين يا هوا ملكيتي عامة
كل البنات اتلبنوا بيا وتفوني
ورسموني خروف معلوف وسمعوا قصايدي
وابتسموا وصحيم بدري يوم العيد ودبحوني
بقالي ييجي اربع سنين مسمار في غيط شواكيش
دقوا على راسي لكن مثبتونيش
يوم التقي مرسى وسنين ياخدني الطيش
كل الالم فيا ومش قادر اتألم
وبتصعبي عليا ومش بقدر اتكلم
انا نفسي بس افهم
كل البلاوي ديا ازاي مابعدوكيش
سامحيني لما اغلط
وانا تاني رايح اغلط لجل تسامحيني
احلى ما في التوهان اول ما باجي
اوصل واحلى ما في الاحزان انك تضميني
يا مسكناني ضلوع
جواكي راح وبراح
ما بينلهاشي رجوع
شكلي حاموت سواح
كان نفسي فيكي زمان أياميها كان لي قلب
كانت الحياة خضرا
النخلة والبقرة
والقلب طين ابيض بينام على القرآن وبيصحى وقت الحلب
اياميها كان لي قلب
ايه اللي قلب النور ضلمة وليل راسي؟
واشمعنى فوق راسي يحلا العذاب والقلب؟
واشمعنى سابوا الناس بقلوب خضار وعمار ؟ وف قلبي نزلوا سلب ؟
انا اول اللي اتصلب بس التاريخ كداب مافهمش معنى الصلب
ركعوا البنات ليا واتنوا قدامي
وفي حفل اعدامي
ضحكوا وقالوا كلب
انتي اللي دمعتي
جمعتي جسماني من مملكة ايزوريس
ويا ريت ما جمعتي
طب كنتي سبتيني ادخل هنا غزوة واعمل هنا هدنة
وما دمت انا ميت ايه تفرق الدفنة؟
ما البحر راح يسبق لو مهما جدفنا
انتي اللي بتعاندي وعشمانة في الجنة
والجنة مش ليا
إزاي بتتحمل لوم الصحاب فيا؟؟
على ايه غرامك بيه؟
ده التبن من تحتيه
باقي الماعون مية
تضحك على قولهم وتبص في الساعة وتقول زمانه صحي
زيدي كمان نورك يا ام الجبين الضحي
جنني صوت حزنك إياكي يوم تفرحي
لا الفرحة تسرقنا
لا انا حمل مهرك ودهبك ولا جاي معاي عاجك
ولا حمل توب من حريرك ولا ماسة من تاجك
ده انا بالكتير حاجج من وسط حجاجك
جيت لك في شهر حرام فمتهدريش دمي
ماتقربيش مني مانتيش كفا همي
ولي لحجاجك يا ام الجبين عرفات
حبك كما الصلوات والقبلة مش يمي
يا معلماني الهوا ومسكنة التباريح
حبك نخيل طارح ميهزهوش الريح
ارمي الحجر جارح تنزل رطب مجاريح
إزاي بتتكسر اشواكي جواكي
ابكي على صدرك القى البكا تفاريح
إزاي بتتغير دنيايا جوايا اول ما اكون جنبك
وإزاي يجيلك صبر تنشفي بكايا والذنب مش ذنبك
انا الاعمى
جفاني الحب ونسيته على ايدين اللي تتسمى ما تتسمى
قطع راسي على خوانة ولا كبر ولا سمى
ولا سابني اموت مستور ولم عليا ميت لمة
وذنبك ايه بقية السكة تقضيها بعجوز اعمى؟
انا اللي الناس بتخشاني هوا ومنظر
هموم الدنيا خاشاني وبتمنظر
وعايش عيشة خشاني وبتغندر
وبتلكلك في حضن الليل سكيتي
عواصفي فوق حدود وصفي
وبابك صعب يتحمل عواصفي مهما سكيتي
انا المدبوح ولما تقول لي حبيتك بحس دماغي واكلاني
ارد بايه على بنية في كل كيانها شايلاني
انا المجرم وانا القاسي وانا اللي نسيتها ميت مرة ما نسيتني
ومشيتها في دروب مرة ما ملتني
وداست ع الطريق حافية وسلتني
وصحيت بدري وقت الفجر صلتني
ارد بايه؟
وقلبها سابها في متاهة
قليل الاصل غياها
وقلبي التاني قساني وقل باصله وياها
غرامك يا ام طيف مخمل بيتجمل
ويفرش صدري بالعنبر وبالمحمل
انا المعشوق يا كل العاشقين غيروا
تحبوا شيء جميل طبعا لكن تتحبوا ده الاجمل
حبيبتي احلى من شعري واحلى م الحروف كمل
ولا بتهجر ولا بتغدر ولا بظلمها تتململ
لكني في حيرتي بستغرب
انا ازاي مش بغني لها ؟
وهي ازاي بتتحمل؟
قصيدة عبروا الرجال
عبروا الرجال القنال
والنصر مش ساهل
والدم ع الرمل سال
والغالية تستاهل
عبروا الرجال صايمين
حالفين يمين النصر
وحياة صلاح الدين لنصلي فيكي العصر
أما اليهود مجانين
مالقوش مكان غير مصر ؟
إتظبطوا ظبطة تمام
والعلقة كانت موت
وأهو طلعوا بس كلام
واخدينا قال بالصوت
وكل يوم حالة وقوالة وقوالة
إعلام وكدب وزيف
لما إنتوا رجالة بنيتوا ليه بارليف ؟
قصيدة نانا
هذا الحلم الاحد الصمد الساكن فيا
مازلت وبرغم الثورة تحكمني حكما ملكيا
نانا البت الدوشة الظيطة
المغرب تنزل في الاستاد انا كنت دهل صغير لسة
بسرح شعري من الضهرية
وشايف شعرها نازل يدلع على خدها
المكوة البايظة كأنها عارفه معادي معاها اشتغلت وحدها
فرحت بيا سلالم بيتنا وانا نازل بتنطط فرحة
قلعت عنها حجاب الطرحة وقعدت تدعي
شم المدخل ريحتي عرفني
غمزلي بعينيه عرفته كشفني كسفني
ضربته في عينه وطرت
زعق فيا وقالي هتفضل برضه صغير مهما كبرت
مدخل اللي مربيني كان دايما عايش ويايا
كان يسهر في الامتحانات ويوصلنا لغاية اللجنة ويستنانا
والمرادي قاللي امانة امانة
يارايح لتسلم على نانا
اصحابي عايزني اوصفها
وانا مش لاقي في وصفها زي
شعرها اسود لا مش اسود
شعرها ناعم لامش ناعم
شعرها زي اللي ملوش زي
اسمها نانا وساكنه وريدي
بس الناس بيقولوا عليها ساكنه معانا في نفس الحي
مشيها زي غرير المي
رمشها زي جدايل ضي
قدها من النوع الوحداني اللي ملوش خي
نانا كانت لما بتضحك يحلا في عيني العمر الجي
كانت لما بتجرح قلبي تحلى لقلبي قولة اي
قال وصحابي بيقولوا اوصفها
طب والله نفسي اوصفها
بس هاتولي في وصفها زي
قصيدة ماتزعليش
لو يوم قالولك إنه مش باين عليه أثر الفراق
وانه مش بيجيب فى سيرتك وانه عادى
لا بان عليه أثر الفراق ولا فى ألم ولا فى اشتياق
حجاش قصيده كتبها فيكى .. هي دي اللى طلعتى بيها
أما هو خلاص نسيكى .. عادته ولا هيشتريها
واحنا قلنالك زمان مابتسمعيش... فماتزعليش
ثم هو ماكانش نخوه
كان بيتأخر عليكى بالساعات
دانا لسه فاكر وقفتك وسط البنات
فاكر هدومك وابتسامتك والكلام... حتى السكات
لو كان فراقنا صحى فيكى كام وجع
أنا كل ليله بندبح م الذكريات
قصيدة سرى جدا إلى البحر
وبقوله يا بحر ليه الموج فى عز الهوج مابيخلصش
و الملح سد ودانك ودانك لجل ماتخلصش
يا بحر كام ألف بت زغزغت رجليهم
ورفعت عنها الحجاب ولزقت فستانها بالعانى على ضهرها
وجرحت رجل الواد اللى جرى فى ضهرها
وعملت ملحك دوا واللى جراحه هوى
مالهوش طبيب غيرك
طب ليه بتبخل عليا
مع إن نانا صبيه
زغزغت رجليها ورفعت عنها الحجاب
ولزقت فستانها بالعانى على ضهرها
ودبحتنى فى مهرها ودفعتلك راضى
خليتلى حبى قضيه وعملتلى قاضى
وكويت بملحك جرحى كيف الدبح
من ميتى يا بحر الجراح بطيب بحبة ملح
و أنا أصلى واخد ع الوجع ..
و أما الجراح بتصيب جدع ..
بيصير وجعها ب ميت وجع
تعرف يا بحر ال ميت وجع ..
وجع اللى حبيتها وسابتنى
وجع اللى بعنيها سابتنى ..
وجع اللى عملت منى رمل فى قعر جوفك رسبتنى ..
و تسعميت مليون وجع للذكريات ..
أصل المحبه يا بحر مش فتره وتعدى
دى عمر شايل صوت هزارى و غلب جدى ..
فكر طايح يوم يجيب و شهور يودى ..
و تسعميت مليون وجع ..
عدد المحاره و الودع
عدد الكلام من بين شفايفها الجمال
عدد الشماسى و الكراسى و البنات ..
عدد الرمال عدد المطر يا أبو قلب أقسى من الحجر ..
كل اللى فاكرينك بتجمع للحبايب شملهم ...
عالم بقر
ما أنا جبتهالك .. مش جبتهالك ؟ ..
شهد الشمس اللى لسه سمارها فوق ضهرى تقولك
إنى يا بحر إئتمنتك جبتهالك
ولا ليه شهد رمالك
على صوتك سمع الرمل اللى مدبوح من قساوتك
وإنداهه و إن كان يجاوب إسأله
فين قصور الواد داهه
هيقولولك ما إنت يا بحر اللى هديتها
وسويتها بباقى الشط
هيقولولك هو هو الموج يا بحر
زى ما جمع حبايب زى ما كسر قصور
بس النوبه دى يا بحر موجك القاسى كسرنى
هو أنا ناقص كسور
لو تعرينى يا بحر تلقى جوايا بنات مالها عدد
ولا إتكسرتش
زى ما تقول جسمى نحس من الحريم وبقيت وتد ..
بس النوبه دى ماإنتصرتش
بعترفلك يا هوى البحر إنى مغلوب النوبه دى
بس خليك واعى دايما و إفتكر مين اللى بادى
ومن الليلادى لا إنت صاحبى ولا أعرفك
إياك تشوفنى ببنت حلوه وتطلب إنى أعرفك
صبرك عليا
و ه اكشفك و ه جرسك و ه جرفك و ه جوفك و ه كتفك
كيف الذليل
من الليلادى سماك يا بجر هتبقى ليل
من الليلادى ه أطفى شمسك و أطمس الدنيا ونهارها
نانا ماتت
بس فاضل لسه نارها
و العزا عالق ما بينى و بينك إنت
والله ما هقبل عزاك
قبل ماخد بإيدى
تارها
قصيدة أيوة بغير
لا انا نقصان ولا ضعفان
ولا مسطول ولا سكران
ولا زايغ من عيني الضي
ولا حد احسن مني في شي
بس بغير
واللي قالولك غيرة الراجل قلة ثقة او قلة فهم
خلق حمير
غيرة الراجل نار في مراجل
نار بتنور مابتحرقش
واحنا صعايدة بنستحملش
شمسنا حامية وعرقنا حامي وطبعنا حامي
واللي تخلي صعيدي يحبها
يبقى يا غلبها
اصلنا ناس على قد الطيبة
كلنا هيبة
والنسوان في بلادنا جواهر
طب لو عندك حتة ماس
حتخليها مداس للناس؟؟
ولا حتقفلي اوضة عليها بميت ترباس
يمكن حتى تأجري ليها جوزين حراس
يبقى انا لا انا جاهل ولا غافل
كل الفرق ما بيني وبينك اني صعيدي
ينعل ابو ده اليوم الاكحل
اللي لا ليه اخر ولا اول
اللي طلعت لقيتني صعيدي
لو كان بايدي
كنت اعملك هندي بريش
واقلب شعري كنيش كرابيش
والبس لك سلسلة متدلدلة خرزة وقلب
بس ازاي البس لك سلسلة ؟؟ هو انا كلب ؟؟
ثم العبرة ماهيش في اللبس
اصل المشكلة عندك .. عندك ..
قلت حاسيبها وبكرة تحس
بعده تحس
بعده تحس
ده انا لو جبس كنت زعقت
ماشي صداقة وماشي زمالة
بس ماجتش على الرجالة
ماهي نسوان الدنيا كتير
وانا ما بقولش تخاصمي الناس
ولا تتحجبي عن الرجالة
ولا تعتكفي وتسكني دير
بس يا ريت حبة تقدير
اني بحبك
واني بريدك
واني زرعت حياتي في ايدك
واني غزلت بنات الدنيا عقود على جيدك
واني تعبت من التفكير
واني بغير
قصيدة جحا
شعور سخيف
إنك تحس بإن وطنك شيء ضعيف
صوتك ضعيف
رأيك ضعيف
إنك تبيع قلبك وجسمك
وإنك تبيع قلمك وإسمك
ما يجيبوش حق الرغيف
سألوا جحا عن سر ضحكه
قالك أصل اتنين وشبكو
اللى كان من تحت ميت
واللى كان من فوق كفيف
دا شعور سخيف
وشعور سخيف
إنك تكون رمز الشحاتة
تبنى مبنى للشحاتة
تعمل وزراة للشحاتة
يا ساقية دورى ... عدى فوقى ودوسى
نصبوا عليا وشحتونى فلوسى
ربطونى فيكى .. حتى ما اتغميت
هما اللى فرحوا ووحدى أنا اتغميت
أنا اللى صاحب البيت
عايش بدون لازمة
ولما مرة شكيت
إدونى بالجزمة
مش لاقي تطفح اديك
هاتولنا .. و جيبولنا .. و إدونا .. ودونا
هنجيب منين نديك
مش لاقي تطفح اديك
طافح يا بلدي غدايا
ولوعتي غدايه
و ادي الأحبه التقوا
و اتجمعوا عدايا
أنا اللى زارعك دهب
بتأكلينى سباخ
إن كان دة تقل ودلع
بزيادة دلعك باخ
لا شفت فيكى هنا
ولا شفت فيكى ترف
كل اللى فيكى قرف
كرامتنا متهانة
واللقمة بإهانة
بتخلفينا ليه لما انتى كارهانا
يعنى ايه تبقى إنتى هبة النيل يا مزة
وكل يوم المية تقطع
يعنى ايه لما اشتكى غلو الفاتورة
يقولو تشكى بس تدفع
لما قش الرز ثروة بتتحرق
وأما نفط الأمة ثروة بتتسرق
وأما جلادك على ولادك بيبطش
وأما علمك ما يلاقيش يآكل فيطفش
يعنى ايه نرفع ايدينا بالسلام لجل الغزاة
ويعنى ايه لما ابقى ماشى فى حالى اتشد اشتباه
يعنى ايه لما اتحبس أربع سنين حبس احتياطى
حبس اعتباطي
يعنى ايه مش حاسة بالعمر وغلاوته
بتصبى مر العمر ليه
دة انا كنت ح اوهب لك حلاوته
أنا عمرى ما أتأمرت
ولا حطيت شروطى
ومكان ما ترسى مركبك
بابنى شطوطى
أنا كنت جيشك لما مماليلك باعوكى
وكنت يوسف لما عشتى سنين عجاف
وضلوعى دى اللى فى معركة قادش حموكى
وشفايفى دى اللى ما بطلتش فى يوم هتاف
دة انا كل شبر فى أرضك اتمرمغت فيه
وكل يوم عشتيه
أنا اتغذبت بيه
بتكرهينى عيونك السودة
وأيامى اللى فاتت
مانتيش حبيبيتى من النهاردة
حبيبتى ماتت
على صوت أدانك جرس
فى الشدة صاحينلك
من امتى كانوا الحرس
هما اللى باقينلك
بعتينى علشانهم
وعنيكى معصوبة
ياهل ترى خاينة
ولا زيى مغصوبة
كل الكلام اتقال
والشعر بقى ماسخ
والصبر علو جبال
والظلم شىء راسخ
وطن وغرقان فى النطاعة
كل شىء ريحته نطاعة
علمونا بالعصاية
ورضعونا الخوف رضاعة
علمونا فى المدارس
يعنى ايه كلمة قيام
علمونا نخاف من الناظر
فيتمنع الكلام
علمونا ازاى نخاف
وازاى نكش
بس نسيوا يعلمونا الاحترام
فمتزعلوش
لما ابقى مش باسمع كلامكم
وماتزعلوش لما ابقى خارج عن النظام
مستنى ايه من طفل ربوه بالزعاق
غير المشاكل والخناق
كل اللى بيقولك بحبك دول نفاق
أنا لما قلت لك بحبك
كان نفاق
الحب يعنى اتين بيدوا
مش ايد بتبنى وستميت تيت تيت يهدو
الحب حالة
الحب مش شعر وقوالة
الحب يعنى براح فى قلب العاشقين للمعشوقين
يعنى الغلابة يناموا فى الليل دفيانين
الحب يعنى جواب لكل المسجونين
هما ليه بقوا مسجونين
يعنى أعيش علشان هدف
علشان رسالة
يعنى احس بقيمتى فيكى
إنى مش عايش عوالة
يعنى لما اعرق تكافئيى بعدالة
الحب حالة
الحب مش شعر وقوالة
الحب حاجة ما تتوجدش فى وسط ناس
بتجيب غداها من صناديق الزبالة
بارت مراعينا والبئر قد جف
والجوع يكوينا والصبر ما كفى
والقلب لا يهدا والجرح لا يشفى
ولأننا طوع
زنا لهم خفا
جاءوا بموكبهم
واشتغلت الزفة
الدفة مظبوطة
وأصلا مافيش دفة
والكفة مش مايلة
علشان مافيش كفة
و جحا اللى جاى بالليل لساه بيتخفى
شايف ديدان الغيط سارحة ومارحماشى
من جبنه شاف الدود سابه وراح ماشى
ولا اتكسف للناس
ولا حس على طوله
الناس عشمها كبير جريوا بيشكوله
ضحك جحا ضحكة مواشى
مادام بعيد عن طينى ... ماشى
الدود قاعد لك يا جحا ولابد فى طينك
بعد ما يمص فى دمانا مش حيحلاله الا طينك
احنا اهلك
احنا رجالتك عمادك
إحنا وقت الشدة سندك
إحنا زادك
يا جحا احمى ولادك
لو كنت عايز تحمى طينك
سوف أرحل
ربما يلقانى من ارجو لقاه
هامشى ويا الشحاتين
وابكى على حلمى اللى تاه
بس مش هاشحت رغيف
هاشحت وطن لله
قصيدة مصلتش العشا
كانت ككل نخيل بلدتنا تطل علي من أعلى سماء
وأنا أجمع لعبتي سرا .. وأعيد تشكيل البناء
وقد اصطففنا في طابور الصبح ألهانا الغناء
في الطابق العلوي .. وقفت هيبة .. كفنار بحر ترتدي زي النساء
وتراقب الطابور في حزم وصمت بارعين .. فتستقيم ظهورنا
يعلو الهتاف تحية العلم المرفرف في الفناء
بإشارة منها يقود مدرس الألعاب ذو الصوت الجهور الصف نحو فصولنا
وبنظرة منها يدق العامل الجرس ابتداء الحصة الأولى
من أين يأتي كل هذا الحزم في نظراتها؟
وأنا أراها كل ليل تطفئ الأنوار من حولي وتصنع خيمة من حبها
وتحيك دفء حنانها فوقي غطاء
وعلام يخشون الأساتذة الكبار وجودها
يعدلون من هندامهم .. ويراقبون الصف عند مرورها
أنا لا أراها مثلهم
ما زلت لم أفهم حقيقة كونها أمي وناظرة بمدرستي
فأنا كطفل لا أفرق بين أحداث الصباح .. وبين أحداث المساء
لكنني ما زلت أذكر جيدا غضبي وضجري كل ليل
حين يغلبني النعاس تهزني .. وتتهمني أنني دوما أنام وقد سهيت عن العشاء
وقد سهت هي أنها ما تزال على يديها من وضوئي .. آثار ماء
بعدما صليت يا أمي العشاء
يوم أجازة
لمة خالاتي عندنا أو عند ستي
كلام حريم .. وانت خدت وانت جبت
أبويا كان يحس بلمة العيال .. يطير
وجواز خالاتي هكذا .. يوصلوهم عند بير السلم بالكتير
ماعرفش ليه بيقولوا على باب العمارة إنه بير
المهم عيال خالاتي يجولنا بدري .. وابويا ينزل .. وانا الكبير
أنا اللي اقول مين اللي يوقف .. وانا اللي اقول مين اللي يلعب
وانا اللي اقول مين اللي ياكل .. وانا اللي اقول مين اللي يشرب
كنت أكبرهم وهما عيال يا عيني صغيرين
أنا كنت أرخم طفل عنده عشر سنين
لما اغيب عن عين خالاتي يا إما تلقاني ف مصيبة .. يا إما بعمل مشكلة
كنت عايش طول حياتي أسئلة
ماما .. بنصلي ليه؟
ماما .. مين بابا حسني؟
ماما .. يعني إيه عابر سبيل؟
ماما .. يعني ايه راجل أصيل؟
عيل فصيل
كنت بسأل أسئلة ولا ليها رد .. ولا ليها عازة
بس السؤال اللي سألته وقتها .. كان مهم .. أحنا ليه واخدين أجازة؟
لمعت عنيها ساعتها لمعة بحبها
اللمعة دي على طول بتظهر لما بعمل حاجة أمي تحبها
لما بنجح .. لما بسأل .. لما بتنرفز على اخواتي البنات لو حد كركر
لما بعمل أي حاجة تحس فيها إني بكبر
لفت على الكرسي اللي عمر عندنا عشرين سنة
وبدأت حكاوي ودندنة
ساعتين حكاوي ودندنة
ع اللي اتضرب واللي اتفنى .. واللي اتهدم واللي اتبنى
أبطال هنا وشهداء هنا
وانا ودني أصلا مش هنا
كات ماما نجوى بتبدي .. وانا إلا دي
أنا لسة حاسمع حرب واكتوبر وخط بارليف وارض سينا ومين حماها ومين خطفها
دي حكاوي تافهة
كلام تقيل وكلام مجعلظ
ونجوى جت .. عايزين نبقلظ
هربت من نص الكلام .. لكني فاكره
انا كنت آ عيل صحيح
لكني فاهم الكلام من أوله ولحد آخره
إن اسرائيل سرقت سلامي
وان اسرائيل قتلت عمامي
واننا زي النهاردة .. خدنا تارنا
داقوا نارنا
عرفوا طعم جند مصر في المعارك
وان سوريا والجزاير والعراق والخليج وكله كله كله شارك
واننا بعد اما فزنا
بعد ما شافوا الوحدة بتوسع نفوزنا
وعلمنا بيرفرف عليهم تحت عينا
دقوا نار الفتنة بينا
كنت عيل بس فاكر .. كنت بلعب بس شاطر
كنت بحضر ماما نجوى وبابا ماجد
كنت انام احلم بجونجر .. واني حاكبر .. ابقى مارد
يجمع العرب اللي تايهين .. صف واحد
وابقى قائد
كنت انام احلم باني ف موقعة حطين
واني الامير هشام الدين
ومعايا جيش وسع المكان
ملوش لا اول في الشمال ولا في اليمين
بإشارة من إيدي الحصون متدشدشة
وإشارة من سيفي الحشود متفركشة
وإشارة من أمي اللي جت بتهزني وتقول لي طبعا نمت قبل ما تصلي العشا
مين يا خويا
عيد ميلاد؟؟
والله خلفت وعلفت
وانت أطول مني عايز عيد ميلاد .. امشي ياد
في اعدادية ولسة بتفكر يا شحط في عيد ميلاد
روح لابوك .. كلمه في الشغل
قل له وانت جاي .. عدي هات لي نفاخة
شوف العيال لما تكبر تتملي مساخة
ثم خد يا بعيد .. ايه اللي خلا يوم ميلادك اسمه عيد
يكش فاكر يوم ميلادك اختفت نار المجوس
ولا حد قالك ان لقينا يومها شوال فلوس
ده احنا كنا العيش يادوبك والغموس
كنا مش لاقيين نجيب لك هدمتين
ايه ياد السعادة اللي انت فيها دي ؟ جاياك منين؟
ده احنا أفقر فترة عشناها في حياتنا .. حملي بيك
كانت البلد ولا فيها زيت ولا فيها سكر
والجو بينا وبين كل العرب .. كان شان وعكر
والسادات كان كل يوم .. شدوا الحزام .. شدوا الحزام
والإعارات اللي كانت في الخليج رجعوا لنا تاني
والجنيه مابقاش يجيب ولا جوز حمام ولا نص ضاني
كنا دايرين نستلف من القريب ومن البعيد .. خليته عيد؟؟؟
بس عارف
لما قالوا جه ولد .. ضهري اتسند
رغم اني كنت مخلفة قبلك بنات .. كنت انت بكري
أبوك حريمه كلهم جابوا الولاد بدري
وجدتك في غياب أبوك كانت تلقح بالكلام
وانا طبعا اهري
حتى لو ماقالتش حاجة .. أحنا ستات
أوعر كلام بنقوله بنقوله بسكات
ماكانش ابوك يعرف يا ولدي انهم سموني بينهم .. أم البنات
وماكنتش اعرف حظي الاغبر .. وان خلفة الولاد
حتجيب لي نطع يقول لي عايز عيد ميلاد
اسمع يا ولدي
اسمع وركز في الكلام
النبي عليه الصلاة والسلام
كان يحتفل بعيد ميلاده .. زيك تمام
ازاي بقى؟؟؟ بالصيام
يعني انت بكرة تجيني صايم
عيد ميلاد يعني تقوى .. مش جاتوه وباتوه وعزايم
ولا اقول لابوك على الدرجتين اللي نقصوا في التاريخ
مش عايز تعلق نفاخات ؟؟ أجيب لك النفيخ
خش ذاكر
أيوة واتنغوج وخبط في البيبان .. هو يعني ابوك مسافر
بس ييجي وكل ده حيوصل له حاضر
تاني يوم الصبح وانا نازل ورايح المدرسة
لقيت ع السفرة كيكة مقطعة ومكيسة
قالت خد طفح صحابك .. ما انتو جيل العيد ميلاد
جيل مايعرفش الخشا
قول لي صح .. انت نمت الساعة كام؟
شكلك ما صلتش العشا
النهاردة عرس .. مش زي الخطوبة
مش كله رقص رقص رقص .. والبس فانلتك مقلوبة
وما تطلعش حد تاني شقتك
مفتاح حماتك تاخده وانت ف سكتك
وانده لي واد اختك يغير صندوقين
وحسن سألني على السجاير قلت له ماعرفش فين
كلمت خالك؟ آخر مكالمة قالولي وصلوا المنيا خلي بالك
بعت حد ع المحطة؟
بص طيب .. انا كنت ناوية الليلة اعشيكم ببطة
بس بصراحة لقيت حماتك جايبة أكل أسبوعين
افترا .. وفرتيك فلوس .. وحتاخدوا عين
قلت اشيلها عندي في الفريزر حبتين
حلوة بدلتك عليك .. ماشا الله .. بدر وهل ضيه
شبه ابوك .. بس انت فين .. هو ابوك كان حد زيه
بس عارف .. الواحدة فينا بتبقى فاكرة يوم ما يتجوز ولدها بتبقى فرحة
الحمايم تبقى سارحة .. والجناين تبقى طارحة
فين يا ولدي؟
ليا اسبوع شيل وحط .. وسلق بط .. حتى ولا غيرت طرحة
البنات جوازاتهم اسهل .. ع الاقل كنا وسط عيلتنا قبلي
كنت بلقى اللي يساعدني اللي يلافيني اللي يجاوبلي
كان نفسي اجوزك هناك واتباهى بيك
وكلهم ييجوا الفرح ويباركوا ليك
بس انت طفشان من زمان .. ومالكش صحبة
زي جدك الكبير .. كان غاوي غربة
كان يختفي شهرين تلاتة لا كان يقول بلاده فين ولا كنا نعرف خط سيره
لف أرض الله بطولها وعرضها
ولإن ستك ست صانت عرضها
ربك مابهدلهاش .. ماخدش روحه الا ف سريره
أصل أصعب حاجة يا ابني لما تبقى الست تايهة عن راجلها
المرض والفكر والأحزان تجيلها
شوف يا ولدي
أوحش لحظة حتعيشها ف حياتك
لو بعدت عن مراتك
والبعاد يا ولدي مش بعد المكان
البعاد لو جت في حضنك .. وانت بخلان بالحنان
افرح يا واد
وافرد دراعك ع الرجال ولم عيلتك
الليلة ليلتك
والله مامنعني اني ارقص كالعيال غير بس هيبتك
ليقولوا أمه اتجننت ولا جاها مس
طب مين حيفهم ان عمري ضاع عشانه بس
افرح يا واد الليلة ليلة فرفشة
بس اوعي ياخدك الكلام والدردشة والوشوشة والنغنشة
والفجر يتسحب عليكم .. قبل ما تصلوا العشا
قصيدة لما جيت أكتب عن امي
كل الدكاترة قالوا خير
معندهاش أي حاجة ولا حتى محتاجة لدوا
ما إحنا عارفين شهر مارس والهوا
شوية برد ما يستاهلوش والسن برضه ما تنسهوش
أول مرة أشوف حبيبتي بتتوجع وبتتلوي
وأنا عارف أمي ما تشتكيش غير م القوي
عجزت يا أمة؟ وشاخ جريدك
ده إنت لسة ماسحة الشقة بايدك
عجزت فجأة
ده إحنا كل جمعة نبوس إديكي عشان نوضب شقتك وتقولي لأة
عجزت فجأة
ومالك إبيضيتي ليه؟ ياك حاطة بودرة؟
مش كنت زيي سمرا؟
الدكاترة مش بيحكوا حاجة بينا
وأنا قلبي متوغوش وحاسس إن أمي فيها إن
طب لو مافيشي شي قلقانين عليه .. حجزوها ليه؟
لأول مرة أحس دماغي بتشقق وتفكيري بيعمل صوت
مصدقتش ولا إتخيلت وأنا واقف في ساعتها بإنه الموت
رسمت الضحكة على وشي وبزيادة
دخلت عليها عارفاني أنا الكداب كالعادة
ومين يقفشني غير أمي اللي عاجناني وخابزاني وخالعة بيدها سناني
فعرفت بس من عيني انها شهادة
وشهدت ييجي 100 مرة
ساعتها كل إحساسي اللي كان محبوس طلع برة
وهاجت ذكريات عبت عنيا دموع
وإحساس الطريق اللي ملوهش رجوع
حاولت أخدعها وأستهبل
بقالك عمر بتمثل
وهي معيشاك في الدور وصدقت إنها بتتخم
يا راخل خلي عندك دم
دي حافظة عينيك وتقاطيعك وتهتهتك وألاعيبك
مش هاين عليك الويل
عايزها منين تجيب لك حيل عشان ما يبانش في عنيها العذاب والهم
يا راجل.. خلي عندك دم
كانت باصالي في عينيها السنين بتفوت
وجوايا كلام من كتره عدى سكوت
كان نفسي أقول آسف .. وأقول ندمان .. وأقول خجلان
وأقول لك إني يا ماية بحبك حب مش معقول
معرفتش ساعتها الحلق كان مقفول
لكن القلب كان مفروط على قلبك وكان بيقول
بحق حروف كتاب الله اللي حافظها على يدك
ومن أيام ما كنت بعد على يدك وعلى عدك
وفرحة خدي يامايا وأنا نايم على خدك
وقسما باللي قام حدي وقام حدك
ما حبيت في الوجود قدك
جاي دلوقتي تتنغوج.. بتستعجل في وقت الموت وتتلهوج
مبنحسش بقيمة الثانية غير بعدين
وتسرقنا الحياة ما نفوقش غير والموت مبكي العين
يا شاقة القلب ومسافرة
خدتني الغربة من حضنك سنين كافرة
نسيت نفسي.. أنا آسف
قالولي الغربة بتعلم دروس وحياة
وإن الغربة يا مايا دي طوق ونجاة
أتاريها حزام ناسف .. أنا آسف
ميعادنا يا مة في الآخرة
وهي الدنيا إيه يا مايا .. حقة مناهتة ومعافرة
خلاص خلينا للآخرة
حتى تكوني محلوة وعليك العين
وأوريكي العيال يا مة .. بقم بتين
وجبت الواد يا ستي عشان ما تضايقيش
حوصيهم يا ستي خلاص ما تخنقنيش
أفراد عيلة هشام المدهشة
دي تعليمات جدتكم المفتشة
ممنوع تناموا في أي يوم أي يوم .. قبل ما تصلوا العشا
