فائق محمد على العياضي الشهير ب فائق عبد الجليل شاعر كويتي له العديد من الإصدارات الشعرية بالعامية والفصحى وله قصائد غنائية معروفة على مستوى الوطن العربي وامتازت قصائده بالثورة الرومانسية بالاضافة إلى الكلمات الجذابة التي تضيف رونق خاص الى قصائده فيما يلي ديوان فائق عبدالجليل
قصيدة يابعيده
المطر اجبرني اكتب لك قصيدة
المطر هذي السنه
سوه السما صفحة جريده
نشر صمتي
نشر احزاني السعيده
رد لي دمعي
رد لي سمعي
رد لي حنجرتي الشريده
المطر جبرني اكتب لك قصيده
قصيدة عاشق قديم
جريح جريح ..
واللي علمني المشي
علمني أطيح
واللي شراني بالذهب ..
رد باعني للريح
عاشق قديم
عاشق صريح
اسألوا نوم الشوارع ..
تحت أجفان المصابيح
واسألوا البرد والشمس والريح
اسألوا .. صبري اللي سويته مفاتيح
اسألوا يمكن قوافي الشوق .. مني تستريح
يمكن الصمت اللي ساكني .. يغافلني ويصيح
جريح .. جريح .. جريح
درايش الديرة عيوني ..
عيوني نواطير
عيوني ألم غافي
عيوني ألم صاحي
وعيوني في الغربة أطيرهم .. عصافير
مجروح وعيونك ضماد
مجروح وعيونك بلاد
يا موسم النار بحياتي والرماد
يا موسم النور بحياتي والسواد
مكتوب في بحرك يمر السندباد
مكتوب اسمك للربيع وللحصاد
يا خضرة ..
يا صفرة ..
يا حمرة ..
يا مشغولة بالطفرة
سمعت اسمك
غنى عصفور على سدره
قريت اسمك... قبل ما اكتب واقرا
وأنا عاشق .. عاشق ..
عاشق الرملة
أنا بعدي طفل في شارع الذكرى
أحبك دمعة صيفية
أحبك واسألي الأهداب
أحبك صحرا عطشانه
تحلم بالمطر .. يسأل عن الأعشاب
كتبت اسمك .. على ضلوع السدر والماي
طار اسمك غاب .. وغاب
ولقيت اسمك ... عصفورة سكنت الأهداب
أنا دمعة ارهنتني الغربة .. في عيون المرافي
حبيبة عمري رذاذ المطر .. في ليل غافي
عرفتك صارت السكتة قوافي
عرفتك صارت الدنيا .. حقيقة واكتشافي
وصار لون السما أزرق
لون صافي ..
صار حتى الورد يشرب من جفافي
وصار حتى الشتا .. دافي
صدقيني هذا واقع .. سجلي هذا اعترافي
قصيدة أنا آسف
أنا اللي يوم تمنيتك
ترجيتك وناديتك
أنا اللي قلت لك
كل الفرح بيتك
تعب صوتي .. ومليتك
تعب قلبي .. وخليتك
حبيبي .. لا أبد مو انت
ذاك اللي تمنيتك
أنا آسف .. أنا آسف
اذا في يوم حبيتك
نثرت الروح في كفك أماني
وقلت اطلب ..
كل الأرض مفروشه بحناني
وكل الشوق سويته اغاني
لا انت صوبي ولا يمي
ولا حسيت في همي
جيت الحين ترعاني
تصورت الجروح تطيب
في لحظه .. وثواني
أنا اللي قبلك مضحي
ولا تحتاج حق شرحي
تدري يا سبب يأسي
وسبب جرحي
انت ادري .. انت ادرى
ولا تحتاج حق شرحي
ايدي اللي كتبت اسمك
بدت تمحي ....
قصيدة نسيتيني
منهو جابلك طاري
منهو وصل اخباري
نسيتيني..
مثل ماتنسي الامطار الصحاري
نسيتيني..
دمعه فى فى عز الظهاري
وعيوني معلقه عيوني
على رمش انتظاري
حزين الشوق
وكلامي هاجر لساني
وقلبي قلب
قلبي دفتر احزاني
من مينا الى مينا
مواني الدنيا عنواني
هارب من كتاباتي وتواريخي
أدور سيف نسياني
وين مااروح
حبك قمره وانا الليل
وين مااروح
القمره القمره تلقاني
اركض وانت كل الارض
اغرق وانت ماي الحظ
ياحظي اللي بكاني
قصيدة أبعاد
ابعاد كنتوا ولا قريبين
لمراد انكم دايم سالمين
ما اقول غير الله ..
الله يكون بعون كل العاشقين
اشتاق .. واسأل عنكم الأشواق
لفراق .. ما غير علي لفراق
عساكم ما نسيتوني عساكم
عسى ما مر هوى بعدي وخذاكم
ناطر هواكم ناطر
قادر ولاني قادر
ما اقول غير الله ..
الله يكون بعون كل العاشقين
منيتي أسهر معاكم كل ليله
واشتري بعمري رضاكم ليله
يراودني أمل في ليله القاكم
واطرز بالفرح أحزان فرقاكم
ناطر هواكم ناطر
قادر ولاني قادر
ما اقول غير الله ..
الله يكون بعون كل العاشقين
قصيدة ياللي عيونك
يلي عيوني منزلك
سو الذي يرضيك
إن كان هذا أولك
ينعاف تاليك
متعوب منك
والسبب عطفي
متعوب ..
ماقدر يالحبيب أخفي
وفر كلامك
ما حصل يكفي
عذبتني
ربي عسى يهنيك
جرح الصبر
يبكي على جرحي
كل المعاني هزها شرحي
مابي الفرح لو جيتك فرحي
ماعاد يهمني
لو طروا طاريك
قصيدة بيني وبينك
بينى وبينك اعترف...انك قدرتي
واعترف انك عزفتي
واعترف انك كسرتي
سور صمتي
كان قبلك عمرى ساكت
بيتي ساكت
نبضي ساكت
كان لون الشمس...
فى ايامي باهت
جيتي مثل الغيمه فى صدرك مطر
جيتي اكبر معجزه..
واحلى قدر
جيتي داهمتي جفافي بالمطر
جيتي طرشتي عناويني الجديده للقمر
جيتي خليتيني انقل
لغة الماي..
وطيور الماي
من قبل الغرق
جيتي رجعتي السما للصيف
رجعتي الربيع اللي انسرق
جيتي جمعتي رماد اشعار
ديوان احترق
قصيدة الكلمة الأخيرة
بكل هدوء .. وبكل محبة
اسمع الكلمة الأخيرة
ما أبيك
وان رجعت .. اترك الديرة
وأسافر لغير ديرة
وبكل هدوء .. اسمع الكلمة الأخيرة
عرفتك والنظر خداع
صدقتك .. وطاوعتك
سلمتك شعوري بساع
واثاري صح كل اللي سمعته وشاع
اسمع الكلمة الأخيرة
ما أبيك
كلمة .. وانتهى الموضوع .. فكر تنسى او ترحل
شسوي .. وشحيلة المخدوع .. يعيد الكره من أول
اسمع الكلمة الأخيرة
ما أبيك
قصيدة واحد من الناس
بكل طيبة العشاق اطلب ننتهي
سافر وغيب وننتهي
بتشوف ناس .. وتحب ناس
وتنسى وأكون بدنيتك .. واحد من الناس
كنت أتصور إني لك .. وانته عارف منزلك
جدت ظروف .. وعينك تشوف
صرت بصعوبه أقابلك .. صرت بألم اشتاق لك
سلمت .. انا مالي غير الصبر
آه لو تدري بعد هذا العمر
إسمك إذا مرني .. يعطرني عطر
آه يا كل العمر
كون بمكاني وشوف عانيت شكثر
بتشوف ناس.. وتحب ناس
وتنسى .. واكون بدنيتك واحد من الناس
قصيدة المعازيم
يوم اقبلت
صوت لها جرحي القديم
يوم اقبلت طرنا لها
آنا وشوقي والنسيم
وعيونها .. آه يا عيونها
عين لمحتني وشهقت
وعين احضنت عيني وبكت
ويا فرحتي
الحظ هالليله كريم
محبوبتي
معزومه من ضمن المعازيم
في زحمة الناس
صعبه حالتي
فجأه اختلف لوني
وضاعت خطوتي
مثلي وقفت
تلمس جروحي وحيرتي
بعيده وقفت
وانا بعيد بلهفتي
ماحد عرف شلي حصل
ماحد لمس مثلي الأمل
كل ابتسامه مهاجره جات
ورجعت لشفتي
كل الدروب الضايعه مني
تنادي خطوتي
ويا رحلة الغربه وداعا رحلتي
ويا فرحتي
الحظ هالليله كريم
محبوبتي
معزومه من ضمن المعازيم
يا عيون الكون
غضي بالنظر
واتركينا اثنين
عين تحكي لعين
اتركينا الشوق ما خلى حذر
بلا خوف بنلتقي
بلا حيره بنلتقي
بلتقي فعيونها
وعيونها أحلى وطن
وكل الأمان
ويا فرحتي
الحظ هالليله كريم
محبوبتي
معزومه من ضمن المعازيم
قصيدة عطشان
عطشان .. اسمع يا نهر
عمر الصحاري والجفاف
عمري انا ما مر على عمري مطر
عطشان لدموع الشتا
مشتاق للون الخضر .. عطشان اسمع يا نهر
صبري عزف .. صبري نزف
انا النخيل .. وانا ارتجافات السعف
ناديتك بصوت العطش
شلال صوتي ياللي ما تسمع نشف
شوقي لوح لك وقف .. ترابي لوح لك وقف
والصمت في صرخه اعترف
من اين ارتوي؟؟
والدنيا صحرا وبس
النار تحتي .. وفوقي عين الشمس
الشتا .. في الصيف اختفى
والغيم .. ما عنده وفى
وانا العطش بيتي
ونسيمي عاصفه
عطشان .. لدموع الشتا
مشتاق .. للون الخضر
عطشان
اسمع .. يا نهر
قصيدة في الجو غيم
قبل الوعد
جيت بدقايق
بعد الوعد
جات بدقايق
والتقينا بلهفة العاشق .. التقينا
واهمست .. العيون بتشاور علينا
شاغلتنا
لاحقتنا
واحنا تونا ما حكينا
جيت اقول .. وابعد الخوف بكلامي
جيت اطمنها .. واحسسها بغرامي
قاطعتني .. واهمست همس النسيم
أرجوك ابعد ابعد
ترى في الجو غيم
راحت .. مشت
وعيوني تتبعها
راحت .. مشت
مجبور اودعها
يرضيك يا شوق
كذا العيون تمنعها؟
يرضيك يا شوق
يرضيك بالبوق
تطالعني واطالعها؟
والله لولا عيون الناس
والله لولا كلام الناس
لامشي وراه واتبعه
وازرع في قلبي ابتسامه
آه .. يا أجمل وعد
آه .. صابتك عين الحسد
شاغلتنا
لاحقتنا
واحنا تونا ما حكينا
جيت اقول .. وابعد الخوف بكلامي
جيت اطمنها .. واحسسها بغرامي
قاطعتني .. واهمست همس النسيم
أرجوك ابعد ابعد
ترى في الجو غيم
