تعددت اعمال صلاح جاهين فلم يقتصر عمله على الفن والادب فحسب ولكنه امتد ايضا ليصل الى السياسة التى وضع بصمته فيها وكان لكلماته تاثير على نفوس الناس وتعتبر رباعيات صلاح جاهين من اشهر كتابات صلاح جاهين ولاقت شهرة كبيرة ومن رباعيات صلاح جاهين عن الموت ما يلي
قصيدة بين موت وموت .. بين النيران والنيران
بين موت وموت .. بين النيران والنيران
ع الحبل ماشيين الشجاع والجبان
عجبي علادي حياة .. ويا للعجب
إزاي أنا يا تخين بقيت بهلوان
عجبي
قصيدة وأنا في الضلام .. من غير شعاع يهتكه
وأنا في الضلام .. من غير شعاع يهتكه
أقف مكاني بخوف ولا أتركه
ولما بيجي النور وأشوف الدروب
أحتار زيادة .. أيهم أسلكه ؟
عجبي
قصيدة نظرت في الملكوت كتير وانشغلت
نظرت في الملكوت كتير وانشغلت
وبكل كلمة ليه ؟ و عشانيه سألت
اسأل سؤال .. الرد يرجع سؤال
واخرج وحيرتي أشد مما دخلت
عجبي
قصيدة غدر الزمان يا قلبي ما لهوش أمان
غدر الزمان يا قلبي ما لهوش أمان
وحاييجي يوم تحتاج لحبة إيمان
قلبي ارتجف وسألني .. أأمن بإيه ؟
أأمن بإيه محتار بقالي زمان
عجبي
قصيدة كان فيه زمان سحلية طول فرسخين
كان فيه زمان سحلية طول فرسخين
كهفين عيونها وخشمها بربخين
ماتت .. لكين الرعب لم عمره مات
مع إنه فات بدل التاريخ تاريخين
عجبي
قصيدة قالوا الشقيق بيمص دم الشقيق
قالوا الشقيق بيمص دم الشقيق
والناس ما هياش ناس بحق وحقيق
قلبي رميته وجبت غيره حجر
داب الحجر ... ورجعت قلبي رقيق
عجبي
قصيدة كل اللي في الخمارة صابهم جنون
كل اللي في الخمارة صابهم جنون
صبحوا الرجال يتبادلوا كاس المنون
وبدم ونبيت انكتب ع الجدار
يا ميت ندامة ع اللي قلبه حنون
عجبي
قصيدة يوم قلت آه .. سمعوني قالوا فسد
يوم قلت آه .. سمعوني قالوا فسد
ده كان جدع قلبه حديد واتحسد
رديت على اللايمين أنا وقلت .. آه
لو تعرفوا معنى زئير الأسد
عجبي
قصيدة دخل الربيع يضحك لقاني حزين
دخل الربيع يضحك لقاني حزين
نده الربيع على إسمي لم قلت مين
حط الربيع أزهاره جنبي وراح
وإيش تعمل الأزهار للميتين
عجبي
قصيدة سنوات وفايته عليا فوج بعد فوج
سنوات وفايته عليا فوج بعد فوج
واحدة خدتني إبن والتانية زوج
والتالتة أب خدتني والرابعة إيه
إيه يعمل إللي بيحدفه موج لموج ؟
عجبي
قصيدة عجبي عليك .. عجبي عليك يا زمن
عجبي عليك .. عجبي عليك يا زمن
يا بو البدع يا مبكي عيني دما
إزاي أنا أختار لروحي طريق
وأنا اللي داخل في الحياة مرغما
عجبي
قصيدة مرغم عليك يا صبح مغصوب يا ليل
مرغم عليك يا صبح مغصوب يا ليل
لادخلتها برجليا ولا كانلي ميل
شايلني شيل دخلت انا في الحياة
وبكره ح اخرج منها شايلني شيل
عجبي
قصيدة عناوين جرانين المستقبل
احنا العمال اللى انقتلوا
قدام المصنع فى ابو زعبل
بنغنى للدنيا ونتلو
عناوين جرانين المستقبل
وحدة صف الأحرار
جبهة لكل الثوار
عبور الجيش لسينا
الزحف من الأغوار
جيش العدوان يتقهقر
الأرض قايدة نار
والبحر قايد نار
الاستعمار أثبت فشله
البيت الأبيض لا يخجل
إحنا العمال اللى انقتلوا
قدام المصنع فى أبو زعبل
بنغنى للدنيا ونتلو
عناوين جرانين المستقبل
محكمة للمجرمين
قائمة بالمتهمين
إدانة مستر نيكسون
بقتل الاسطى ياسين
القاتل استعمارى
القتلى وطنيين
عمال مدنيين
نصارى ومسلمين
مرتكبو المذبحة يعتقلوا
الحكم عى المتهم الأول
احنا العمال اللى انقتلوا
قدام المصنع فى ابو زعبل
بنغنى للدنيا ونتلو
عناوين جرانين المستقبل
الجو غدا يتحسن
معرض لزهور السوسن
الخطة الخمسية تنفذ
مهرجانات النصر غدا
تصفية الصهيونية
دولة فلسطين .. تعلن
دستور وقوانين .. تعلن
حرية الدين .. تعلن
قوس تذكارى جارى عمله
طالين منه احنا وح نفضل
احنا العمال اللى انقتلوا
قدام المصنع فى ابو زعبل
بنغنى للدنيا ونتلو
عناوين
جرانين
المستقبل
قصيدة الدرس انتهى
الدرس انتهى لموا الكراريس
بالدم اللى على ورقهم سال
فى قصر الأمم المتحدة
مسابقة لرسوم الأطفال
ايه رأيك فى البقع الحمرا
يا ضمير العالم يا عزيزى
دى لطفلة مصرية وسمرا
كانت من أشطر تلاميذى
دمها راسم زهرة
راسم راية ثورة
راسم وجه مؤامرة
راسم خلق جباره
راسم نار
راسم عار
ع الصهيونية والاستعمار
والدنيا اللى عليهم صابرة
وساكته على فعل الأباليس
الدرس انتهى
لموا الكراريس ..
ايه رأى رجال الفكر الحر
فى الفكرادى المنقوشة بالدم
من طفل فقير مولود فى المر
لكن كان حلو ضحوك الفم
دم الطفل الفلاح
راسم شمس الصباح
راسم شجرة تفاح
فى جناين الاصلاح
راسم تمساح
بألف جناح
فى دنيا مليانة بالأشباح
لكنها قلبها مرتاح
وساكتة على فعل الأباليس
الدرس انتهى
لموا الكراريس ?
ايه رأيك يا شعب يا عربى
ايه رأيك يا شعب الأحرار
دم الأطفال جايلك يحبى
يقول انتقموا من الأشرار
ويسيل ع الأوراق
يتهجى الأسماء
ويطالب الآباء
بالثأر للأبناء
ويرسم سيف
يهد الزيف
ويلمع لمعة شمس الصيف
فى دنيا فيها النور بقى طيف
وساكتة على فعل الأباليس
الدرس انتهى لموا الكراريس
قصيدة أنا كان لي أب . و كان رئيس محكمه
أنا كان لي أب . و كان رئيس محكمه
ستين سنة .. في قضية واحدة أترمي
ستين سنة و طلع براءة و خرج
يشكي الحياة و الموت لرب السما
عجبي
