يعد الشاعر كاظم اسماعيل اﻠﮔاطع قامة من قامات الشعر الشعبي العراقي ومنحه عشاقه وزملاؤه الشعراء لقب مدرسة في الشعر الشعبي باعتباره مبدع القصيدة الشعبية المصورة وله تأثير ابداعي على مختلف الاجيال وفيما يلي شعر كاظم اسماعيل الكاطع غزل
قصيدة منو يكدر
منو يكدر يشيل الحزن عني
ويخليني بفرح للناس اغني
يساعدني على هم من الهموم
وانا همومي هواي وتعبني
تعلمت الحزن من امي والناس
من لولت عليه الولد يبني
دللول.. ودللول.. ودللول
نايل طورهن ليهسه باذني
فطموني بصير وبغيمة دموع
مطرن بس عليه وبللني
زرعن بيه كل انواع الاحزان
وماجازن لحد ما شيبني
قصيدة يصبرني
يصبرني
المادره بقصتي
ويكلي تهون
عشره وشيبت باولهه
وتاليها شلون
ينسيني.. منهو ينسيني
انطيه الباقي من سنيني
وانا الممنون
يصبرني وما تسوى يكلي
هوه شمدريه
لو نار الشبت بضلوعي
تتحول بيه
يمكن يتركني باحزاني
وما يسال شمغير الواني
كلساع بلون
يداويني
المايعرف علتي
شيفيد ادواه
راحوا لبعيد ومارجعوا
خلوني هنا
هنيالك يل كلبك خالي
ماتدري شصاير بحوالي
هم اليدرون
يصبرني المايدري بعلتي
ويكلي تهون
قصيدة ودعناج الى زوجته الراحله
ودعناج
ووداع الحلو يكلف
وزتينه النعش بدموع
من ديارنه لحد النجف الاشرف
بوداعج وكفنه اصفوف
وجان الكلب باول صف
شفة تعظ ندم عالراح
وجف ايذب حركته
وينكسر بالجف
لان شحت نساء ابهل وكت تدرين
من نفكد المثلج
والله نتاسف
لان شحت كرم واخلاق
وتخاف العطاشه اعله النهر ينشف
صفنات وجمر عالايد
ونلف الحزن مثل الجكاير لف
الدهر ثكل علينه اهواي
ثكل والحمل ما خف
صلف كل ما يضعف الروح
يترهة ويصير اصلف
ولو اهلي وهلج
وسوالف الايام
ما صارت اتراب برف
هلي لو حاولو بالماي
بينه الماي يتنظف
هلي لو حاولوا بالنار
بيت النار جنة بثلج يتسكف
عهد نبقه حزانه
اعليج
ويتعاتب عليج البيرغ
المارف
روحي مودعه بالله
بيتج يم علي الكرار
يم والد شهيد الطف
قصيدة الغربه
شفت التعب وتعلمت معناه
وتعلمت السهر والسكته والصفنات
ذليت ذل النهر من ينكطع مجراه
واعرفت كل شي عرفت
حتى النخل ينحني
الريح السفر من يجي
وجايب غريب وياه
الله يا هل وطن شمسوي بيه الله
نيرانه مثل الثلج
كلما تدك الضلع ابرد وكول اشاه
اللي مضيع ذهب بسوك الذهب يلكاه
واللي مفارك محب
يمكن سنه وينساه
بس المضيع وطن
وين الوطن يلكاه
اه ياوطن ياخبز يلشارتك تكتل
ياوطن يازفة قمر
ونجوم اله تهلهل
عذبني .. ما عذبك
أكتلني .. ما اكتلك
طبع اليحب ينكتل .. موش اليحب يكتل
اه ياوطن ياجذر
والجذر طبعه قوي
بالريح ما يجفل
اه ياوطن ياجبل
ياجبل ياجبل
والجبل من عادته
لو مات من العطش للوادي ماينزل
والجبل من عادته
لو مات من العطش للوادي ماينزل
قصيدة مو جيتك
مو جيتك اعرفك واعرف شبيك
اثر جف علظهرك ضدي مدفوع
بعد مشروع قتلي قيد الانجاز
واهنيك اغتيالي خوش مشروع
انه السويت ظهري وياك بستان
والف خنجر لهسه بظهري مزروع
طبع دله انا طبعي وانت فنجان
علي تركص وانا منزلك ادموع
غبت عني واتاني وصارلي اسنين
ويسألوني واكلهم غايب اسبوع
وتعال وشوفني خلافك يمحبوب
صرت موضوع للجانولي موضوع
اذا طيفك يمرني بوحشة الليل
اشم ريحة حرك مابين الضلوع
خمس اسنين ادور بين الوجوه
مثل ام وكلبها بخمسه مفجوع
صرت يونس ولكن ما شفت حوت
بكل ديرة الاطب تبلعني الفروع
كاطع بالفرح كاظم اسماعيل
وانه كاظم حزن بس كلبي مكطوع
لكن ما امل والامل موجود
شما زاد الالم ما اصيح موجوع
صدكني الشمس لمن يجي الليل
ما تفتح حلكه كبال الشموع
من اطش بذرة كلامي بسطح الانهار
على الجرفين ينبت صوت مسموع
وانه بطبعي احتقر شخصية الخيط
رغم طوله ضعيف وكاتله الجوع
يمشي براي الابرة مغمض العين
ويبات امذله ابثوب مدروع
خذاك شلون غيري واقتنع بيك
واثر شفتي علخدك لسه مطبوع
قصيدة غشمه
غشمه احنه وبلايه اكلوب ونامن بدنيانه
نضحك ويه كل الناس ثاري الماي جوانه
اشبينه وما حسبنه احساب لا انتي ولا انه
بني ادم كلبه ايدليه وبني ادم عينه ميزانه
دنيه موالفه للغير كوه نريدها ويانه
من مر القطار بليل طير وشاف جنحانه
نسال الناس كل الناس وانه وياج خلانه
حال الضيف والديوان فارغ يلكه فنجانه
ورجعنه امن المحطه بليل جنه وجوه دفانه
غشمه احنه وبلايه اكلوب ونامن بدنيانه
قصيدة تبارينه ذمم
تبارينه ذمم والحب طويناه
وشمرنه الذكريات احجاره بالبير
مادام النهر ضيك عبرناه
كلمن خلي يذكر صاحبه ابخير
صدك عدنه هدف بس ما وصلناه
مشي الحفاي نمشي على البسامير
ولو كلشي اليضيعنه منلكاه
خشب ويصير بحلوك المناشير
شلك بأنسان مثلي الدهر جلاه
احسن ما اطيح وبيه اتغير
لو يدري رحيم البشر وياه
ربك ما يسوي اجناح للطير
جا حتى السمج بالكاع خلاه
لاكن كلنه نعرف هاي متصير
بشرنه اليوم منهو ايعيش وياه
والي بيه ايئمن ركبته اطير
قصيدة زعلان
زعلان
بس يا زعل
لمن ترد للصدك
كبل المناده اجي .. وشلون جيه اجي
أركض ركض محترك
ياللذتك إبريتي وين الكه مثلك هوى
لولاك والله أختنك
هي شراكة نفس لو سكت كلبك
سكت كلبي ويدك لو يدك
لو ما وكتنه صعب ما جان ابد نفترك
كلمن مشه لحالته
واحد سكن بالغرب واحد سكن بالشرك
وكل هالمسافه البعد
وسوالفك تنسمع جن احنه حلك ابحلك
والله عشكنا عشك
يامن امكدر علي غيرك فصاله صعب
جم دوب اخيط واشك
حنيت انه لشوفتك
واصبرت بس ما صبر كلبي وصرخ راح اطك
جاباني الك واذعنت
جيتك ابليله شته ظلمه ومطرها رشك
وشبعده صار الدرب
خوف ورعيد وثلج
وجفوف اديه زرك
ابابك طحت ها كمت ضميت اديه او ردت
عالباب بالروح ادك
بس كالو إلمن تدك
كلمن مشه لحالته
واحد سكن بالغرب واحد سكن بالشرك
قصيدة بده العام الدراسي مرثيه لولده حيدر
بده العام الدراسي وبدت الهموم
وبيتي عالمدارس بابه صاير
نسيت وداعتك جيت اشتري هدوم
الك ومحضر اقلام ودفاتر
مو تسمع قيام وليش ماتكوم
ومر اسمك ولا من كال حاضر
الشمس طلعت علينا ومو وكت نوم
وهم عدكم صبح يا اهل المكابر
وهم عدكم ضوه وشباچ ونجوم
وهم ينطونكم واجب لباچر
الوالد بالوداع يصير مهموم
وانا اثنينهن والد وشاعر
خيلك طشرتني وچنت ملموم
وصارت طيحتي بين الحوافر
اذا عشرين يوم وما شفت نوم
شيظل بالحيل بالعشره الاواخر
فراش الفاتحه لو شفته ملموم
بنص كلوبنا تلكى الچوادر
يمنه المصبغه ودينه لهدوم
الحزنك مشترينه قماش حاضر
تمنيتك جرح كل ساع ملچوم
وتبات الليل بشفاف الخناجر
انا يا بوي من ونيت مالوم
نزل مني دمع يعمي النواظر
خدودي تعودت تتندى كل يوم
وتحب الماي خشبات الكناطر
لمت الروح بس شفادني اللوم
شلحك وبسفينة الموت عابر
المنايا عالسطح وعيونها تحوم
عليك ونزلتلك نسر كاسر
ستر الله نغگ بديارنا البوم
اخذ عين الكلاده وراح طاير
ديني حلاتك حلو الرسوم
بلكي انعشگ دنيانا مظاهر
اظل كاظم وصبري وياي مكظوم
لو ما هالخشب جوه الاظافر
اهن كاسين بيهن كاس مسموم
خاف اغلط وبالمسموم اكاسر
بعنه البيت ريت البيت مهجوم
وريت اكثر بعد من هل الخساير
تحب انت اللعب والگبر ملموم
شلون تحملت وشلون صابر
وليش من الهوى يابوي محروم
ونسمات الهوى تطيب الخاطر
منهو؟ الشوفك صورة المعدوم
وليش تعلكت ياشاب يا قاصر
ما ظنيت زرعي يروح فد يوم
وعصافير الحزن تگضي البيادر
من اكتب قصيده تزيد الغيوم
ومن عيني الدمع يملي الدفاتر
يبقى بهل مطر ياشعر منظوم
نصاري الحسين وبحر وافر
قصيدة رموشك قصيده
سمعته كلمة غزل غمض عيونه بخجل
كتله رموشك قصيده وعيونك المستهل
وصفت قوس الحواجب
سيفين بيد اليحارب
صالحت زين الحبايب
والله ليعيد الزعل
البشر في هل البريه
ربك خالقهم سويه
اميزك عن البقيه
سواك الله من عسل
جمعت كل المعاني
صورة الك هزت كياني
خدك شموع بصواني
ويندار بيك الاهل
سمعته كلمة غزل غمض عيونه بخجل
