عريان السيد خلف گالوا يحبك شعر شعبي عراقي

عريان السيد خلف ولد في محافظة ذي قار في قلعة سكر عام 1940 هو شاعر شعبي عراقي كانت بدايته في كتابة الشعر السياسي الى ان اصبح من الرموز الثقافية الوطنية التي يعتبرها الكثير من العراقيين رمزا للوطنية والمبدئية العالية بل يعتبر ايضا احد اقطاب الشعر الشعبي العراقي كتب للعديد من الفنانين العراقين واليوم نطرح عليكم اروع قصائد عريان السيد خلف گالوا يحبك شعر شعبي عراقي

قصيدة كالو يحبك 

كالو يحبك 

كلت من شاف كلبه

وجبست دمعي 

وسكن نبض الكلب

وعن لايذمك

ترس جفي سوالفك

وحده على وحده

وعرك جيدك زمزمي

وخجلان تتعذر واكلك لايهمك

من تجسني شفايفك تاخذني غيبه

ومن ترشني بمزنتك ولهان افز

لان روحي يمك...اختلي بحسنك

وافج كلبي واطلعك..تلعب بعمري

واخاف الغير يندلك واظمك

اشجان ضرك تختصر بعدك عليه

وكلي شكران وحمد للمختصر حسنك

بخصرك..تشرب معافه حناني ولهفتي

وتسكر بدمي...وتنتشي بغي الشذى

وتتعزه العزال من اجرك

انا من كبل كل شوك عمري

من الطوراف حسبت مثل الوداد الراح

وسدك ....من كبل 

هسه الورع كحل جفوني

وجنت اظن الوكت التهد بيه روحي اهدك

لني كلما فززن صبري الليالي وفات وكتي

اتوسلك هدوة وكت خليني عندك

قصيدة بالكيف هو الكلب لمن يحب بالكيف 

بالكيف ريح السفن لمن تهب بالكيف

الدنيه مره بشته ومره بسموم وصيف

هو شيشوف الجفن غير الدمع والطيف

يا هي يابو المستحه يل عينك ولايه 

بيهه الفرح والحزن يتلاكن حجايه 

يصير ضاع العرف والجرف مل مايه

وعينك ولا كل عين مشتني بين البين 

لانفع بيهه الهوه ولا نصح بيهه الحيف

هو شيشوف الجفن غير الدمع والطيف

لو كحلتني بحلم بكليبي يفتك باب

وافرش سنين العمر ضحكه وزعل وعتاب

وشبكه النسمه الزلف ومعانك اللبلاب

ومسره الملح بالعود بيه الحنين يعود

افرح ولو بالحلم يل ماصحالك كيف

هو شيشوف الجفن غير الدمع والطيف

ساهرت ليلي و وهست السوالف بيك

والفرح ومحبتي وليل الغفه بطاريك

واتنطرت ها تجي وها عل بعد خليك

لا انت فرح وابتسم ولا انت دمع وابجيك

ولا انت حبيب ونحب ولا انت عدو نعاديك

سوله حلاتك بعد ومرورتي من الكيك

او لو بينت عل درب بيبانه تلاكيك

خليك صوت وصدى وطاري وعذر ينكال

وخليك حسره جفه ويه هموم ماتنشال

وخليني منك و ألك سدره وشمس وضلال

ياطبع مدري شجرا وعل ماتصح ميال

حالين روحي اصبحت ومن الصبر مامل 

خايب يبعد الوعد ماحال يشكي الحال

قصيدة  كوه 

كوه .. كوه اتريدني العذال ارد

للشوك واهوه

او ما دروني اضحك ضحك .. مجبود

.. جالمجبود كوه

او مادروني .. اسحن سحن بالروح ..

واخزن هالعذاب ابسمل جلوة

خايف السان البطر  واضحك ..

جذب

.. والنار جوه

او صابر .. او روحي ابملام اللايمين

ابتلت بلوه

حارت اوياهم  يذكروها .. المضه ..

او كالوا  اشدعوه ..؟

واصبحت مثل اليهد .. اوحيد ..

جدام الزلم .. وبعازة اخوه

ينولي .. او خالي الظهر  مهظوم

بدموعه ايتجوه

ذكرت روحي ابتعبها .. الضاع ..

جالهويه

ابشبج  والراح فدوه

ونت .. او ونة توالي الليل ..

للمالوم سلوه

بارت .. او جاري البزل .. شيفيد

من يحرن ابعلوة .. ؟

او دورت صاحب كلت  بلجي امن

المجافينه اشوه

لنه ركطة خيط .. وبسم الثعابين ..

يتطوه

ارد اشج روحي .. ابرمح ..

حسرات  من تذكر الخوه

وارد اصيحن  تايب .. امن

الشوك

.. ما ظل عمر يسوه 

قصيدة لا تتمنى ياكلبي لا تتمنى

ماطول جافانا الهوى وبطلنا

لاعين ظلت خاليه ولا ظل ولف يتعنى

لاتدك يالدكك قهر مقفول باب الجنه

وهينوب ما مش ضنه

آآآه ياوكتنه الماصفت نيته وزرك عينه النه

وطحنا بوسط شلوه هفا وكل ذيب يبرد سنه

ردنه نكف ونهوش نحمي الروح ما امكنا

وانت بجلادة عين صحت اكلنه

وماطول راضي بموتنه ستاطنه

آه ياخسارة نوحنه ويارخص ذيج الونه

ردفن علينه سهامكم وعلى الصبر دامنه

لا احنه للدنيا صفينا ولا هوى الدنيا النه

متبدل بطبعه الوكت لو احنه اللي تبدلنه

آه ياهواهم بأول ايامه شكثر دللنه

ومن وصل طينتها الظهر كلها تبرت منه 

لا سالفة بشفة محب ولا عاذل اليعذلنه

وحشت دنيانا وصفت جنها ابد موش النه

متبدل بطبعه الوكت لو احنه اللي تبدلنه

قصيدة تكلي افرح

او يكلي افرح

وتصيح الناس كلها افرح

وادور مالكيت الفرح حتى افرح

او شكيت

اودوريت

موت العفه او لاصح

او صرخ

بيه الصبر

وانه العله المذبح

يمتخطي اعله موت الكيف

مابالموت

موت اروح

يغركان الملامه الماردت تطفح

بديك اجرح اجروحك

لو ردت تجرح

بديك ولابدين الغير

جرح الغير ماينصح

واروح المن ؟

واورج من؟

اوحدى ابروحي الوداد

او مادريت المن

رحت

وادري الدرب لو طال

بيه اجروح مايسلن

واونن

ونة

المادامن اعله الون

واحنن

حنة العايش

الغربه اوحن

عليك

وكل هفاك اتحمله

او لاجن

يفت روحي الضمه

ونيسان كله مزن

يفت روحي الضمه

ونيسان كله مزن .

قصيدة خطوة بأثر خطوة ...لكبتك ماشين

بينة جروح كثرة...وحيل مهضومين...

حيرة.. وليل عاصف...والظنون كصار...

ومناحط الحسره... ايفزز الميتين..

يامكصد..

وحكك... كصه ويانه الحيف..

حد ناب الضرر ..وتبشروا العفنين ..

نغفه اعلى الجروح...امهدهدين الحيل ...

ونصيح بعبرة قهر ...مخنوكين..

لا ينفض حزنه ...ولا جرحنه ايطيب..

من غدر الليالي ..ولا وكتنه ا يلين ..

ودنيا الطلكتها بزهدك وعلياك ..

شدت حيلها.. ترد ثارها بقاطين..

ياغوث الهضم يا سيد السادات ..

يا باب النجاة..واول الداعين ..

ياعصاة موسى..وياشفيع الحوت ..يامنحر بدر ..

يا زلزلة صفين...

يا فارس الخندك..

والمنايا تحوم ..

وامعلي الفخر ..ومحير الصوبين..

ياثابت ابخيبر ...واللوه بيمناك..

ياداحي المنع وميسر العاصين..

ياعادل... وسيفك بالعدل ميزان ...

ينصف الفوارس ...لو جسم نصيين..

ياصوت المناية...بنهروان الموت..

وبيوم الجمل...تستاهل العفرين..

ياروح الرسالة ...وهالة الايمان..ياطاهر لبن..

من لحظة التكوين..

علي رحمة..وعطف..من قدرة الرحمن...

والحبك ربح..والخاصمك يخسر ..

علي تكوين قدرة..بلحظة التكوين..

علي سورة قبس ..سبحان من صور ..

علي آية وبلاغ ..ولازمة وتوكيد بالقرآن..

وبكل سطر يتكرر...

علي نهج البلاغة ...ودقة التفسير..

وحل المعضلة..لكل عقل يتحير..

علي نفحة الجنة

وتين والزيتون..

وآية هل اتى ويشرف علي الكوثر..

علي هارون موسى..لسيد التوحيد..

وبجناح البشير النزل ...يدثر..

علي أول شهادة...بأول الاسلام..

واول سيف..بركاب الكفر ...كبر..

علي منهج دلالة...وشاهد وعنوان ..

وحرية فكر للراد يتحرر..

قصيدة يناهي الشوك ذمه وذات من ذات

وفرق مابين حالي وحالك إبعيد

سنه وصدك يضوك الروح لوعات

ويجملي الجروح جروح ويزيد

أبات إبحضن صبري إليال ويبات

جرح يصحه وجرح متغصب إيهيد

وأكول إشوالف السرحان للشاة

إعله سجه وكاوداه الإييد بالإييد

إلك جانت يحلو الطول جيات

عجب تبخل علينه إبجية العيد

تنينه وأملينه إجفونه إبطيف

وصبرنه وصبرينه الآه بالآه

وتحسفنه الحسافه وحيف عالحيف

عله إسواجي الدموع المالهن جاه

وعرفنه وعود حبك غيم بالصيف

المحل وين المطر بالصيف يلكاه؟

إشيصير إعله الترف لو ينحسب ضيف

إعله غفله وعيد وصل الزين محلاه؟

أنه إبعازة الموت وحاجبك سيف

وأموت إبغير صدة غيض ماريد

إلك جانت يحلو الطول جيات

عجب تبخل علينه إبجية العيد

أحن لمسامرك ولكاك شلكاك

شري المعشر حلاوة شوك مابيك

يمر صيفك صبر وتنطر إشتاك

تبيعك عزتك وبذلتي أشريك

تراك ويه النفس يلماتجي أشراك

وبالدم اليدور تدور أحس بيك

يبو الروح إعله روح إهواك شلهاك

وإهي إبعين الشفاكه إليال تربيك

أبد ماسامرتها الآه لولاك

ولا جان إعله دربك لاويه الجيد

إلك جانت يحلو الطول جيات

عجب تبخل علينه إبجية العيد

أنه ولا كول عنك غير معذور

ولو ماظل عذر للروح ينكال

لجن ون اليساهر ليل معذور

ألم لو من وكت لو من ولف شال

وانه إبحالي إعله صبرك حال مزهور

صبر ومكابر المحتام جتال

إلك عمري إعله زين وشين منذور

ولو من السنين إوشال ما ظال

لجن يبقه الجفن للطيف مسمور

ويظل راجد عليها النوم ترجيد

إلك جانت يحلو الطول جيات

عجب تبخل علينه إبجية العيد

قصيدة أعز من روحي أعزك 

وانته اعز مني 

ياحسبة عمر ..خاويتها إمن إصباي 

بطلت صفنتي .. وما بطلت مني 

أحس كلبي الفضي..متعوب حد الويل 

وأدعيله الصبر.. عن لا يفشلني 

جسيت الليالي ابمرود الحلوات 

وسنين العمر بالشيب جسني 

اضحك للبجوا.. حد شرهة المنكود 

وابجي ابكل مزنتي.. الطور المغني 

لاغرني المدح... بشفاف المحبين 

ولاهمني الشماته اشما حجوا عني 

يلتمن عليه... امشتتات البال 

وانفضهن نفض 

وانهض ولا جني 

وليت.. وعف ضميري .. وماكسرت العود 

ولسن.. شبه الزلم .. بالعلن سبني 

كفاني امرح.. ورع.. والتذ بحب الناس 

وعملات الكبح .. ما يوم خاوني 

لا زحت الحيا... ولاضيعت معروف 

ولاخنت الوفه.. وربعي اجفلوا مني 

أضحك بالوجوه.. ابغير راحة بال 

واصبر لو .. ليالي العسر ضكني 

واكابر عالشدايد ... حد مصب العين 

واسكت.. لو دثو من الناس لاسني 

واسامح .. ما أبحر.. وين حد الغيض 

وأزلف ..لو حوافي الزعل وازني 

وينشدني صديجي ..المانشد عني 

كبل طبعك الونه ..وصاير اتغني؟ 

كبل عينك محطه .. وخاطرك مكسور 

هسه اعله الثجاله.. اتفوت متحني؟ 

واجيبه ابكل برود .. وعودتي ابسني 

استراحت مستحاتي .. وعاكستني الريح 

لاني من الهموم . ولاالهم مني 

أنا ابن العاصيات .. من الليالي السود 

لاريد الكماري .. ولهن يردني 

ارضعتني امي ابدمعها .. من عرفت الصوت 

وغطتني بحزنها ... من مشت عني 

خذت روحي اعله ضيمي ..وماشكيت الحال 

او يمنوني اشتبي؟ 

وما كلت متمني 

علمت البعض .. نكل الجدم عالكاع 

وأول ما مشن.. بالزلك لبني 

اكول  اتغيرت... والناس ماهي الناس 

رضاعة قواطي.. وخيبوا ظني ......

قصيدة كاسرت عمري اعله عمرك

كطعت ليش . . وحركتك

جويه مني وجويه منك

ونتشيت . . استاهلك . . شهكة عوافي

وخيبت ظني . . وصدك وياي ظنك

ماكلت عنك . . عرك جفك ابجفي

ولا كلت جاسك زعل . .

واشتعل دمي ابنار دمك

أصعب . . وتستسهل . . اتشاغل خيالي

وياخذك غيك . . خرز خلخال . . تطشر وألمك

ومدري ليش . . أتمايزك وردة اكرنفل

اتيه روحي ابريحتك . .

واحتار من ياصفحه اشمك

أختلي ابحسنك . . وافج كلبي واطلعك

تلعب ابعمري . . وخاف الغير يندلك وأضمك

خاف تاخذني . . اعله بستانك فرحتي . .

وخاف تكبر حيرتي . .

وحسنك يغرك

خاف تطشر ولك . . وشلون المك  ؟

كالو  ايحبك  

كلت من شاف كلبه ؟

وجبست دمعي . .

وسكن نبض الكلب . .

عن لا يذمك

ترس جفي . . اسوالفك وحده اعله وحده

وعرك جيدك زمزمي . .

وخجلان تتعذر 

واكلك  لايهمك

من تجسني اشفايفك

تاخذني غيبه 

ومن ترشني ابمزنتك . . ولهان افز . .

لن روحي يمك ؟

اختلي ابحسنك . . وأفج كلبي واطلعك

تلعب ابعمري . . وخاف الغير يندلك وأضمك

وخاف تطشر خرز . .

وشلون المك ؟

اشجان ضرك . .

تختصر بعدك عليه ؟

وكلي شكرات وحمد

للمختصر . . حسنك ابخصرك

تشرب معافي . . حناني ولهفتي

وتسكر ابدمي . .

وتنتشي ابغي الشذى . .

وتتعزل اعزال من اجرك

من جمعني وياك ؟

من شدني . . ويه طولك . .

طعمك بيه

وصرت حلوك ومرك

لنها ما بالغبشه . . غبشه . . ابغير عينك

خاف اترزبيك .. حد كطع النفس

وازهك واضرك 

خاف تطشر خرز ..

وشلون المك ؟

ومن كبل .. كل شوكه عمري من الطوارف

حسبت مثل الوداد .. الفات ودك

من كبل .. وآنه الورع كحل اجفوني

وجنت اظن 

وكت التهد بيه روحي اهدك ..

لني كلما فززن صبري الليالي ..

وخان وكتي

اتوسلك .. هدوة وكت خليني عندك

اوعاذرك .. لو هدل عودك ..

من كدر يحمل حسن مثلك وكدك ؟

عاذرك تغلط ابحكي ..

وتبخل ابظلك على النايم ابسدك

عاذرك تغتاض ..

بس من غير شاره ..

وشارتك هالبينت

ودخيل جدك

عاذرك .. عن لايهم كلبك ابهمي

وتنترس عينك دمع

وتنترس عينك دمع

وتسيل كحلتها على خدك