قصائد اميره البيلي مكتوبه

اميرة البيلي ولدت في محافظة الاسكندرية عام 2000 شاعرة مصرية استطاعت جذب الكبير والصغير سواء شباب سنها او الاصغر منهم او الاكبر او كبار السن بكلماتها الرائقه الحساسة التي تعبر عما بداخل الكثير منا فلاقت شهرة واسعة لما تميزت به من شعر حساس خاصة قصيدتها التي لاقت انتشارا واسعا والتي تبدا كلماتها تعبت فقمت كلمته كما ان طريقة القائها للشعر ايضا كان لها دور كبير في سطوع نجمها وترديد شعرها واسمها على لسان الكثيرون والآن تعالو معنا نستعرض قصائد اميره البيلي مكتوبه

فصيدة تعبت ف قمت كلمته

تعبت ف قمت كلمته

مانا بنته هيفهمني

ومفهمنيش

ضيعت وقتي ف حزن علي الفاضي

واديني بعيش

قدرت اقسي قدرت انسي ومبياديش

لأول مرة من فترة يهل الليل شايل صورته

وأقول عادي

لأول مرة اسأل قلبي عن صوته يقولي نسيت

واقول ازاي

بقيت نساي ومش فارق معايا البعد

ازاي قابلته صدفة في الشارع ومهتمتش ولا حنيت

انا خفيت لأول مرة يبقي الحلم هو البيت

بقيت بضحك بقيت احسن ومش بشتاق

بقيت مبخافش لو يتقال فيوم يا فراق

بقيت اقوي وبستقوي ومش فارق

لأول مرة مستناش يفوت الليل

ولا حتي احس بطيفه حواليا

ولا ليه صور فيا 

ولا يتمشي في خيالي بقسوة وذكريات تكسر

لأول مرة اتأكد بأني كسبت

وأنه لسة في مكانه

ضعيف مهزوم خسر ف حياته وبيخسر

وانا واقفة ..

وناجحة وثابتة وبعافر

بحقق حلمي وبسافر بلاد الله

وهو في ركن في الأوضة

بيبكي ويشكي وجع ال  آه 

لأول مرة معرفش اميز صوته ف التليفون

وأقول أيوة بتطلب مين

يقول آسف .. اقول اهلا

 وحشتيني؟

ورايا شغل مش فاضية

إذا حابب مساعدة في شئ

انا كالعادة بنت اصول

يقول .. نرجع

أقول معلش مش سامعة

وبكرة نبقي نتكلم

يفوت بكرة .. يفوق بعده

تعدي شهور

وأنا بنجح

وهو لوحده بيعيط عشان مكسور

أهيه الدنيا

وأهيه الأيام

وداين بس راح تدان

بحق دموع عينينا زمان

اديك عمال تسد الدين

ومش عارف تروح علي فين

ومش لاقي في حياتك خير

ولا لاقي لجروحك بيت

وانا بنجح

وواقفة وثابتة وبقولك..

انا خفيت

قصيدة وحيد جدا

وحيد زي اللي فات أرضه

وراح لبلاد ميعرفش الونس فيها

وحيد زي اللي ساب اهله

وراح لبيوت بشر اغراب ليحميها

بيروي زرع مش زرعه

وسايب ارض روحه تبور

بدون ولا شخص واحد بس يرويها

كأنه عسكري في الحرب

ملهش لا أهل ولا صحبة

تهاب من فرقته وتدعي

ملهش حبيبة يجريلها

ولا يتدفي ف ايديها

وحيد زي اللي مات حلمه

ومكنش معاه سند إلاه

بيشكي قهرته لله

ومفيش ف إيديه غير الدعوة

وقوله  كله راح ينزاح 

وحيد وبعيد ف عالم كله مش فاهمه

حزين ولوحده مع ذلك

ينام محسود عشان مرتاح

وناس بتدوس عليه علشان

ملوش ولا ضهر ولا عزوة

برغم انه جدع وكريم

حزين ..

يتداري ف دموعه

محدش حس بفراقه

ف كيف هيحسوا برجوعه ؟

وحيد علشان

مفيش اشخاص بتبقاله

حزين زي اللي ساب قلبه

لشخص غريب

ودور وشه ف أغتاله

وحيد جدا

بيبكي بخوف من الحاضر

يقولوا سلام ..

يقول حاضر 

لوحده بيبكي وينازع ف مرض الخوف

وكل الخلق يتغاضوا عن الباطن

وكله يصدق المكشوف

بيضحك يبقي اسعد شخص

بيبكي 

مش لأن الريح طرف عينه ..

لإن الحزن ..

كل الحزن طرف قلبه

وطرف روحه بقسوه وكبر

كأنه للأسف شاعر

بقاله سنين مهوش عارف يألف سطر

ووقت ما قلمه قاله اكتب

كتب أول حروف شعره ف جف الحبر

بيهرب من البشر لكن

بيلقي الحزن ف اماكن

وفي شروخ الحيطان

في صوت الست ف الراديو

بيلقي الحزن ف القهوة

ويلقي الحزن ف الأشياء

وحيد زي اللي مات قلبه

وبيبكي بحزن انه اشتاق

هيعمل ايه

قانون الدنيا والأيام

وحزن ف حزن .. ووجع وجروح

حزين لكن بيدي القوة للمخاليق

ويوهب طاقته دون جدوي

يعالج كل خلق الله

وبردوا يموت من العدوي .

قصيدة بحبك ليه

كتبت عشان عيونه الشعر

فقولت عشانه بتخيل لو 

الأيام بتجمعنا ودمي

 بيجري ف وريدك

هعوز م الدنيا ايه تاني

 وأنا عايشاها بين إيدك 

وجوا حضنك الدافي 

لأول مرة أتأكد بأن الحضن 

شئ كافي يلون قلبي بالزهري 

لأول مرة اكون اقوي 

واقول راجلي واقول ضهري 

لأول مرة اتخبي من العالم 

وراك انت وانا بتداري من خوفي 

وزود ربنا يقيني بأنك أب يحميني 

ف بغلط واجي اتخبي وراك بردوا 

وأقول آسفة  فتحضني

 وتقولي بس يا عبيطة 

 مسامحك متخافيش من شئ 

 هكونلك خل  ضل  طريق.

قصيدة شيزوفيرينيا

ظنيت بإن البعد هيريح .

.و ان النهاية لابد تكون كدة ....

ظنيت بإني هخف من حبه ..

وعرفت اني صعب أكون متمردة

وارفض وجوده بكل ذرة قوة جوايا

وعرفت اني بدونه مش عايشة

قصيدة الشعراء يتبعهم الغاوون

وأنا يعني شاعر غاوي نص الشعر ..

لا هجيت فلان بالسب والباطل ..

ولا كنت عاطل وكتبته لجل السعر ..

مكتبتش الفصحي لكني حبيتها ..

رغم إن بيتها يساع بشر غيري ..

ولا عمر كان سيري علي عكس ما بكتب ..

الشعر كان وطني وأنا عمري ما اتغربت ..

ولقيت ف قلمي سبيل 

ف مسكته ف اتشربت ..

الشعر جرح وعمره ما بيتلم 

 كل الي صابه الشعر 

كان شعره زي الدم

والدم مش بيجف 

 الشعر مش اسفاف ..

وانا قلمي مش بيسف ..

كان في فلان بينكوا

 صابه الفراق كتبه ..

من غير ما يجبر حبر

 الوجع ع السرد ..

لشعر زي النرد

 بيصيبنا عشوائي ..

اختار فلان يكتبه

 واختار فلان يقراه ..

الشعر مش إكراه ..

قصيدة حلالي

بوجه شكر للقهوة الي خلتني اكون جنبك 

 ومش ذنبي ومش ذنبك بأن قلوبنا دقوا لبعض ..

دة ربك لو يشاء يجمع ما بين اتنين بيجمعهم 

وربك شاء وجمعنا برغم  البعد  ..

 قصيدة ف العشق ما اتوصي 

ودق الباب ف نص الليل  

فقومت افتح  

لقيته واقفلي بيقولي 

سيادتك لما تتجلي

 بدوب ف العشق  كما سكر 

مسائك حلو يا سكر 

بحبك زي ما تقولي

 كحب. اللمعه  ل اللولي  

بحبك حب لا يحصي 

ده انا ف العشق ما اتوصي   

فسارداه قصايدي  لعنيكي  

وبعشق ضحك معاليكي 

جلالتك

 جلالتك تشبهي وردة  واكليلك محليكي

 بحب الحب لو فيكي 

واموت ف العشق لو ليكي 

 وهتغزل جمال روحك

 ومهما هقول ما يكفيكي 

لبست وخدني نزلني

 ركع ع رجله قالهالي

 يا ام عيالي  يا حلالي  

يا اجمل م الجمال انت 

يا وردة  قصدة تحلالي 

وقالي الوردة  دي شبهك 

 ف كل خصالك الناعمة 

وابوص ف عينه  وانا سامعه

 فيمسك ايدي ويبوسها ويهمس.

 ويهمس

ايوه انا عاشقك بتنهيدة

ف اتنهد 

فيتشهد ف استغرب 

يقولي وهو بيقرب

 خلاص انا مت ف عنيكي 

يدق القلب  دقة 

واحس بدفعه او زقه 

فاقوله بلهفه وتحدي 

ومين ادي هيعشق عينك البني 

 يرد يقولي لو كافر

 عشان قلبك يكون سني 

فيحضني.. 

فيحضني

ويكسر ضلع م الشابة 

كانه عدا ع قلبي 

مسحلي الحزن باستيكة 

يااجمل مقطوعات عزفت

 ياشعر ولون ومزيكا 

كاني قهوة  على سهوة شربتيني 

كائنك نني من عيني   ملكتيني 

وعدتيني بانك بقيه للاخر

 عشان وعدك هزيد السعي وهعافر 

لانك حلم اكمني

 مليش في اهدافي شئ غيرك 

طريقي  جزء من سيرك 

وصوتك يشفي  علة 

سحابة بتشبهي ضلة 

ولو قلبك ده كان ذله

 هكون انا سطو ف جريمة 

عسا تسليحي يبئا انتي 

كما كنتي جميلة وزايدة في جمالك

دلالك ضحكتك مثلا 

ولو كنتي انت يوم كثلآ 

هناملك عمري  مرا 

ياكوكب  احتوي مجرة  

نواتك وقعت زرة 

ده لو بتحب وقت الليل  

هنسهر كل يوم بره 

فممكن تسمحي يعني  

اعيد من تاني ف الكرة 

قصيدة كان قربكم علة

لدغ الغشيم من نفس ذات الجحر من تاني ..

واقف لوحده بعيد وبيعاني  

انا كنت هذا الشخص من فترة  

بالفطرة عندي سذاجة تكفي بلاد  

وكبرت ضعف ضعف من سني ..

دانا كنت لسة شباب  قربتوا ليه مني ؟ 

ملعون ابوكوا وشوش سبتوني اكمني .. 

حبيتكوا واديتكوا حب وحنين زايد .. 

وطلعتوا من جوفي  بقا دة الي كان فايد .. ؟ 

بعتوني بالساهل وكسرتوا شئ بيا ..

كان قربكوا لعنة واللعنة كات ليا .. 

علمته ضرب السهم  حدف السهام فيا .. 

بلياتشوا بيضحكوا وقت الضيق واخدينه شماعة وجع ليكم .. 

وكأنه مش فيكم  بتطنشوه عادي ..

ومكنش يوم بادي معاكم الا ب خير  ..

رميتوه بدون داعي  اقطعلكوا دراعي ..  

اذا كنتوا فاكرينه  حاطينه جنب الحيط .. 

وكأنه خيط مركون  جايز فيوم تتنسلوا فتجوله ف يخيط  

القطع والعلة  مسكوا عليه ذلة  مش ليه ومش تبعه .. 

 اداكوا خير ببلاش  وكانه ليكوا قماش شكلته فيه ع القد

واحتاجكوا وقت الضيق  لكن محدش رد  

مخزون مخاوفه تفيض  والحب كانله وميض ..

مسك الوميض حرقه  والحرق ساب علامات .. 

والجلد حتما مات النار بتاكل فيه  

نورهم دية نار قايدة  مين يعني هيطفيه .. 

كان عندهم إصرار  علي انهم يأذوه .. 

ضافوا الجميع ومحوه .. 

وجعوه كتير لكن  لسة الغبي بيحن .. 

يبكي بوجع ويئن  والكل مش سائل ..

يشكي الوجع يسمع  معلش اتفائل ..

 متقولش بيحبوك  كل الذين اذوك .. 

قالوا ف البداية كلام  ولأن قلبك خام .. 

صدقت تفاهتهم  كل الذين اذوك مانتاش ف حساباتهم ..

قصيدة متكرهنيش

متكرهنيش  

عشان اقسم ب اني خلاص انا هبعد 

لاكن ارجوك متوحشنيش 

 عشان البعد ليك راحة 

وقلبك لازمو ده جراحة 

وجراحة القلب  ليك بعدي متمسكنيش  

ومش راح اقول ف يوم انك محبتنيش  

 لاكن بالعكس حبتني  وضمتني

ف عز البرد والوحدة 

ف عز الخوف لقيت طيفك 

انا اسفة 

انا اسفة 

وانا عارفة وبئولها ليك  اهو جهرا انا

والله مابلومك ولا هلومك

ولاهخونك ولا  حتي هكون وياك 

انا انا تعباك  

انا تعباك فسبني امشي عشان ترتاح

 انا  ف كل المشاهد

 ليه طلعت الشر والدباح  انا سبتك 

انا سبتك وعارفه اني سبب حرتك. 

وعارفه اني سبب حرتك 

وجودي سببه تكشيرتك 

فلازم اختفي عمدا.  

فلازم اختفي عمدا 

انا بشبه لكون عاصي  مجاش اودام 

انا تلفان 

  ومش راح اجيب ف يوم سيرتك

 ب اي كلام مهواش فيك

 ومش راح اقول ف يوم خليك 

 عشان م ال صعب اتنازل عن وعدي ب اني لازم اتنحي عشان ترتاح

 وهقفل كل باب  بينا 

وهرجع كل حزني مباح 

وعارفه اني أذيت قلبك 

 ومش راح اكون ف يوم جمبك

 وسبت ايديك عشان عارفة بدوني هتبئا احسن حد 

انا مش طالبة منك رد

 انا مش بشكي ف كلامي 

ولا بحكي عشان نرجع 

انا مش طالبه غير تسمع 

وبعدك يعني هتعامل هحاول اعيش

 لاكن برضو متكرهنيش

 وبفتح كل يوم صورتك.. 

وبفتح كل يوم صورتك  

واشوف مين رد قالك حلو 

ومين قالك يواد انت 

 وامتي بقيت جميل يعني 

 وبتضايق اوي لما الاقي واحدة بتئولك كلام مادح.. 

كلام مادح 

فيوجعني 

بحس بشرخ فيا ودبح.. 

بحس بشرخ فيا ودبح  

عشان كام كلمة فيك كالمدح 

بغير لسه وقصة حبي ليك لسه 

 ولسه بتيجي ع بالي ف كل كلام 

 واقول لفلان دكان راجل 

وكان نكدي لكنه جميل

 وكنت بميل ع كتفه فيوم ما يجي ف يوم جمبي 

وكان محبط وكان سلبي لاكن ف عيونه في ضلة 

تغطيني  وتحميني مبتسبنيش 

متكرهنيش 

قصيدة  اسكتش باهت 

كنت عايزة ابعت رسايل ..

رغم اني عارفه جدا ..

انها مبتتقريش ..

كنت عاوزة اقول لنفسي ..

الي احسن حاجة فيها ..

قافله روحها جوا شيش ..

الي عيبها منها فيها ..

انها مبتشفش رأيي ..

انها مبتحسنيش .. 

كنت عاوزة اقول لعقلي ..

نفسي يفهمني لمرة 

رغم اني عارفه جدا ..

ان فهمه ميتشريش .. 

وان تعبي من الاوامر ..

صعب او مبيتحكيش  ..

كنت عايزة اكتب ف ذاتي 

اني مش طايق حياتي .. 

واني صعب فيوم اعيش ..

حابب اني اقول لناسي .. 

اني فعلا هبقا ناسي ..

وان سألتوا وقولتوا مالك .. 

رد قطم سكوت مفيش ..

قصيدة مسكن موضعي

سلمت قلبك للشوارع والشتا  

وتعبت من كتر السهر ف البرد  

القهوة متلازمة لجميع المحبوسين ..

وانت الي باقي لما عملوا الجرد ..

وفضلت تنعي الحظ للصحبة  

والصحبة ألقت بيك ك حجر النرد ..

والشعر ليا علاج مسكن موضعي  

اول ما بكتب .. حزني يبدأ سرد .. 

بدأ الحزين حزنه وقام كاتب  

قتلوا القتيل وزاروه بحبه ورد  

الشعر أصبح آله وانا عالة  

بكتب ف بشعر بأرتياح من الذنب  

واخدت جنب من الصحاب ومن الوجع  

فلقيتني بضرب كفي ع كف الودع  

طلع الودع صرح بأني مدان 

وان الحياه داين ف يوم تدان  

وإني اداينت بدون ما اكون داين  

وإني ع الهامش والجرح مش باين  

وان انتشر إن البشر الكدب فيهم  جاري ف الشريان  

وانك طبيعي لما تدمنهم  

يظهر ع لونك بوادر الإدمان .. 

لونك بيبهت كل مادا كتير  

لساك غبي وبتعشق التبرير 

لساك عايزهم رغم قلت حبهم  

لساك كما أنت غير قابل التغيير .. 

وعينيك مغميها لجل انتظار الشرح  

طال الكلام وانت  مش لاقي غير الجرح  

لساها جمع وطرح  

بيضيفوا ناس جنبك  ويشيلوا منك شئ .. 

مهما الطريق يوسع .. ف النص تاني يضيق .. 

دخان سجاير وحدتك .. علم عليك بالحزن  

والحضن وقت الخوف  مسكن للألم .. 

جبت القلم  

وبدأت اكتب عن غلام  

اختل وزنه لما قرر يمشي ع طرف الحياه  

ساب نفسه للواقعه والضعف والمعناه .. 

هذا الغلام يشبهني بالمللي .. 

اول ما قرر يرجع الدنيا خانه الطريق توهه .. 

واما لقاه استغربه ..