قصائد بدر بن عبدالمحسن عن الشوق

الأمير بدر بن عبد المحسن بن عبد العزيز آل سعود ولد في مدينة الرياض عام 1949م شاعر مبدع ولديه مكتبة ضخمة تضم العديد من الكتب تناولت قصائدة العديد من المواضيع المختلفة حيث كتب الكثير من القصائد الوطنية وفيما يلي قصائد بدر بن عبدالمحسن عن الشوق

قصيدة الضي النحيل

دايم يذكرني النخيل .. غير الطفولة والرياض ..

وصوت السواقي والهديل .. مواجع الضي النحيل ..

على وجنتك ..

كان الظلام .. والله كثير ..

وما ادري وش اللي وهقه ..

واختار خدك ف الأخير .. وشعاع خدك شققه

دايم يذكرني النخيل .. غير الطفولة والرياض ..

وصوت السواقي والهديل .. مواجع الضي النحيل ..

على وجنتك ..

نجدية الضي والعتم .. ما بين راسك والقدم ..

لي مجد .. لي مي .. ورطب .. وسنابل الياس والغضب ..

ولي مواعيد النخيل .. اللي مضت ..

وحكاية الضي النحيل مع وجنتك ..

قصيدة عظم وغضاريف

في دربكم يا راحلين  مناكيف

تالي ليالي القيظ وأول خريفه

ردوا سلام أهل القلوب المواليف

على الوليف اللي نشد عن وليفه

ردوه لعذوق النخيل المهانيف

وعلى القصور اللي بوادي حنيفه

دار لها بالقلب عشق وتكاليف

ياعل عين ماهوتها كفيفه

طبنا وشبنا وأتعبتنا المشاريف

والمرقب العالي هبوبه عنيفه

يا واردين العد .. كفوا المغاريف

اللي بقى دمع هماج ذريفه

والله لو دمي يغيث الملاهيف

قطعت عرقي لين يصفى نزيفه

ويا حظ من لا عرف منهو ولا شيف

إن طاب ..يحمد وإن تردى .. بكيفه

وحنا ورثنا العز عظم وغضاريف

لا ما ورثنا العز تاج وقطيفة

قصيدة صعب السؤال

صعب السؤال .. ليه نفترق 

صعب السؤال .. وين نلتقي

إنتي الجنوب .. وأنا الشمال ..

وما بيننا .. بحر .. ورمال

لكن نحب .. والله نحب .. وفوق الخيال

.. صعب السؤال

يا اللي اجمل من كلامي عنك وأقرب من سكوتي

آه يا طول المسافة بين احساسي وصوتي

ما هو غريب .. إني أسألك

و إنتي أنا .. كيف أوصلك 

لا مستحيل .. هذا الرحيل

من يقطع الصمت الطويل

ويدلني ..

قصيدتي .. وين الحروف .. جف القلم

يا ضايعه .. ببرد الكفوف .. رعشة ألم

قصيدتي .. إلا الندم .. إلا الندم

بتسافرين .. وانتي معي

وبترجعين .. وانتي معي

قصيدتي .. لا تسمعي .. غيري قصيد

يا ساكنة اف ورق الحشا .. وحبر الوريد

قصيدة الغضب

نشي غيظي .. سحاب أسود في موسم الدخان

ترزم .. وأمطر بجمر غدا له بالحشى صالي

غضبت .. وما دريت إن الغضب ياصاحبي إنسان

وسيم مثل سلة سيف.. وقلبه أسود بالي

هدمت الدار من قل الحصى لأجل أرجم الخلان

وقتلت النور .. من كثر الجفا با فارق ظلالي

وحثيت الريح..في وجه التراب وهبت القيعان

تحت أقدامي .. ومرت ديار وودعت غالي

ويوم أصحت سما نفسي .. تلفتت وصرخت .. فلان

قمر وجهك .. وشمس الدار في دمعي تغايا لي

وقفت .. وكانت الفرقا .. مشيت ولا حصل نسيان

بكيت .. ولا سقاني الدمع لا مر ولا حالي

غريب تزرع عيوني سراب .. وتحصد الكثبان

وحيد مثل رسم مبطي في صحصح خالي

قصيدة طفله وطفل

غديت انا .. وانتي .. طفلة وطفل ..

تبكين ف وداعي .. وانا كني مفارق أهل ..

وبيت صغير .. ودرب كهل ..

ياللي على خدك كحل .. لوتمسحيه

وتتبسمي .. مال البكا داعي

ياللي سنا عيونك أمل .. لا تقتليه

تتألمي .. مال البكا داعي

يا اول مواعيدي .. ويااخر مواعيدي

انتي فرح عمري .. وجرحي وتسهيدي ..

افارقك ليله .. يا طولها ليله ..

واجيك انا باكر .. وقلبي على إيدي ..

ومادري سبب خوفك .. وانتي العمر شوفك ..

ياللي على خدك كحل .. لوتمسحيه

وتتبسمي .. مال البكا داعي

ياللي سنا عيونك أمل .. لا تقتليه

تتألمي .. مال البكا داعي

وغديت انا .. وانتي .. طفلة وطفل ..

تبكين ف وداعي ..

قصيدة على آخر تراب الأرض

على آخر تراب الأرض ...

أحسن أن المسافة شبر ...

وكل الأرض ... ما تحمل تعب مشوار ...

أحس إني ... رغم صغري ... تفاهة عمر ...

في صدري ندم جبار ...

يا ليت ... يا ليت ... ما كانت لي عيونك أرض

ولا عمري وقفت ف يوم

على آخر تراب الأرض ...

تصورتك ... وحزن الناس ...

جرح الناس ... وهم الناس ... في عيونك ..

تخوني الناس وتخونك ...

تصورتك في شامة ليل ...

على خد السما الزرقا

زحام والدنيا سهرانه ...

أحد نازل وأحد يرقى ...

وأحد مثلك يخاف من البلل والطين ...

يقول إن الرعد قاسي ...

يحس ان المطر سكين

يحس ان الذي يضحك ... يحس ان الذي يبكي ...

لا حد مسكين ...

تصورتك ... ولا ادري ليه ...

ولا أظنك بعد تدرين ...

يا انتي ان المسافه شبر ...

يا انتي إن الليالي صبر ...

وكل الأرض ... ما تحمل تعب مشوار ...

على آخر تراب الأرض ...

على الميهاف ...

ومرتني الليالي خفاف

تعدت عمري المعدود ...

دريت ان المدى محدود ...

وان الليل لا شعرك ... ولا رمشك ...

ولا شفت الشفق في خدود ...

دريت اني عجزت املك ... ولو همي ...

ونزيف الجرح ... من دمي ...

صحيح الدنيا ما تنشاف ...

وانا وانتي على الدنيا ...

وعلى الميهاف ...

أحس ان المسافة شبر ...

أحس إن الليالي ... صبر ...

وكل الأرض ... ما تحمل تعب مشوار ...

أحس إني رغم صغري ... وتفاهة عمر ...

في صدري ندم جبار ...

يا ليت ... ... يا ليت ... ما كانت لي عيونك أرض

ولا عمري وقفت ف يوم

على آخر تراب الأرض ...

قصيدة سألتي

قالوا سألتي .. عني سألتي ..

وأنا ما ادري ويني .. ضايع ياعيني ..

ما ادرى وش اللي ذكرك ..

مقطع شعر في دفترك ..

والا الكلام عن صاحبك ..

وانت عقدتي حاجبك ..

قلتي كلام كله كذب ..

وليه اتصلتي .. عنى سألتي؟

آخر لقانا في الخريف

تذكري الثوب الخفيف

والبرد .. يوم خفتى علي من البرد..

وامطار الخريف..

ومرت سنة يمكن سنين

ويني أنا ووين السنين؟

قلتي كلام كله كذب

ليه اتصلتي.. عني سألتي ..

صوتك طيور مهاجره ..

مرت في قلبي مسافره ..

والحب .. لو طال الغياب اول مداك وآخره ..

غيبي سنه والا سنين ..

بااجيك انا .. والا تجين ..

قصيدة شديد الرمل

ليلة شديد الرمل .. جتنا ركايب

من الشمال .. وبركت بين الأيام

طوي التراب وشل فوق النجايب

والجو ثارت به معاصير وعسام

علمي بوجهك ف اسود العج غايب

والريح تدفعني وانا ما لي اقدام

لولا الشجر .. شدت غصونه نهايب

جلدي وثوبك قلت انا وانت الاوهام

لا خيمة .. لا طنب لا صوت شايب

لا صرخة ..لا طفل لا كحل وزمام

طاح الرواق وطاح حلم الحبايب

لا ناي في روحي غدت روحي حطام

ما غيرها ضلوعي في صدري حطايب

وشم الجروح اللي بكبدي من العام

إن كان ذا قبري ف ابي له نصايب

قبر الورق خلوا شواهده الاقلام

يامعمر الدنيا عمارك خرايب

ما حد ورث جدرانها غير الأيام

العمر شدة والليالي ركايب

والرمل يمحي الرمل والموت قدام

قصيدة دارالشواق

يا الله لا تقطع رجا كل مشتاق

بامرك يا رب الحلم يصبح حقيقه

وأنا أدري أن الوصل تاليه لفراق

ولولا الأمل .. ما تحمل النفس ضيقه

أمس سرى في تالي الليل براق

قلبي يفز لنوضته بتخفيقه

وسم بكور صادق الوبل دفاق

لو شافه الظميان يبتل ريقه

عله على دار الوفا .. دار الأشواق

دار صفت لأهل القلوب الرقيقه

فارقتهم ما ليلة خاطري ضاق

واليوم للسلوان ما أجد طريقه

يا كود حرف لي كتبته بالأوراق

مثل السراب اللي يسلي بريقه

والله لو كل المخاليق عشاق

ما شفت لك نفس تعذب دقيقه

قصيدة زمان الشح

في زمان الشح .. يصبح للقمر

مثل نور الشمس في الليل العتيم

في زمان الشح .. يصبح للحجر

مثل ما للسيف من قدر عظيم

في زمان الشح .. يملانا الفخر

لا تحدى الظلم كهل أو فطيم

في زمان الشح في وقت الدهر

كل مجد ف ارضنا يولد يتيم

وش نقول اليوم ياطفال القهر

في القصايد ذل والله العظيم

ما فقدنا السمع ولاكف البصر

مير بين اضلوعنا قلب سقيم

أهلنا صرتوا عناوين وصور

انتذكركم مثل وجه قديم

كن ما به ارض لا نهر وبحر

كيف جرح الأرض يشفي في الصميم

علمونا اليأس من صبر وحذر

علمونا القدس ننسى اورشليم

لا سقينا غيث هتاف المطر

كان خضنا الحرب باطفال وحريم