عبد الله حسن ولد في طنطا عام 1985واحد من اهم واشهر الشعراء في جمهورية مصر العربية خاصة بعد زواجه من الفنانة المصرية غادة عبد الرازق فقد لمع نجمعه منذ ذلك الوقت ومؤخرا اشتهر بالشعر السياسي وتم تكريمه من قبل الرئيس المصري عبد الفتاح السيسي وفيما يلي قصائد عبد الله حسن مكتوبة
قصيدة نفسي ابقي ظابط
لما يبقى فيه حد من أول ميلاده
يسألوه نفسك في ايه .. ؟؟
يقول لهم نفسي ابقى ضابط
أيوة كان باين عليه
نفسه يخدم مصر يفديها بروحه
كان يلم عيال صحابه قوام يروحوا
بعد ما ياخدوا العدية يشتريله بدنقية
يزحفوا على الأرض قال يعني يحارب
يكبروا الأولاد و تكبر فيه القضية
يسألوه نفسك في ايه
يقول لهم نفسي ابقى ضابط
ياخده ابوه من ايده و يسلم عليه
مصر لو عايزاك توكل
شوف بقالي سنين باوكل فيك و اربي
روح انا استودعت ربي فيك و لاخواتك مثل
روح يا واد الله يعينك
روح يا واد و ارجع بطل
الولد كان متوقع انه زي ما راح هيرجع
و انه لما يموت هيبقى اللي قتله من الأجانب من الصهاينة
عمره ما كان متوقع تيجي ضربة غدر خاينة
و اللي أصعب من الأجانب
الديابة في كل جانب
هما ماسموش عليه
مصر وقفت ليه تسمي
قال لها يا مصر قومي
ارسمي علمك بدمي
احضني المرة الأخيرة
موتي ولا تبقي اسيرة
احضنيني اوي يا أمي
احضنيني كأني عيل
عمره ما كان متخيل
ان ناس تفرح في موته
بس صوته و هو بيقول الشهادة
هو ده اللي اتمني يحصل
حلمه من ساعة الولادة
يا بلادي ما دام هاموت يبقى اموتلك
يا بلادي ماتزعليش من مشاكلك
روحي شكلك
واسعة ..طاهرة .. شايفة بكرة
هابقى ذكرى و انتي فاكرة
هابقى سيرة و تفضلي مصر الكبيرة
هابقى صورة بالشريطة
و تفضلي مصر البسيطة
اللي بتودع ولادها
زفة في كل الشوارع
و الأمل في عينينا رابط
و اسألوا ابنه اللي طالع نفسك ايه
هايقول لكم نفسي ابقى ضابط ....
قصيدة انتصرنا
يا اهالينا وبدأنا نشفي داءنا وانكسارنا
انتصرنا ..
السياده لينا احنا
والقرار هو قرارنا
حولوا الاحزان لبسمه
احنا اكبر احنا أسمى
من اللي كان ضدك يا بلدي
كان لابد الليل يعدي
قومي يلا يا مصر عدي
بحق دعوات الغلابه
مصر قالت بالتحدي
تؤخذ الدنيا غلابا
علمينا يا مصر تاني
كيف تكون لينا السياده
علمي العالم بحاله
يعني ايه كلمه اراده
يلا بولادك تباهي
سكتك هي اتجاهي
بانتصارك.. انتي جاهي
عزتي وشرفي وطموحي
انتي روحي وكبريائي
شاوري بس علينا جينا
تسع ميت مليون فدائي
عودينا عالتلاقي
ابقي انا لاخويه المرايا ومبتدايا
انتي آيه
انتي احلامي ومنايا
باقيه حتى بعد موتي
ساكنه صوتي
في سكوتي وفي غنايا
نقطه من اول سطورك
الزمن هو زمانك
والنهارده هو دورك
واللي صانك واللي عانك
واللي كان عامل حسابك
اللي دمع في غيابك
حقه يفرح في حضورك
افرحي يا مصر غني
اللي خلقك حته مني
ربي فوق الكل عالم
اللي وعدك في كتابه
واللي عالم باللي غابوا
واللي سابوا ناس وراهم
اللي مات علشان تعيشي
واللي قال واثق في جيشي
هو ده اللي بجد فاهم
انتصرنا عشان عاهدنا نفسنا على حبها
انتصرنا لما اسامينا بقت بعد اسمها
انتصرنا ليها بس
اللي بيها قلبي حس
هي نبضي وهي ارضي
وهي بحري وهي شمس
وهي عمري وهي ضهري
قبلي بحري نفس نفس
احنا واحد قلب واحد احنا ترس يزق ترس
القناه دي من فلوسنا
جت فلوسنا بخلع ضرس
واللي جاي منها في ايديا نص
ليا وليكي نص مش كلام في العنجهيه
دي لبهيه هتبقى ورث ايد بتبني وايد بتحمي
من اللي في ترابك يمس
احنا وسط الصعب فوتنا
ايوه صوتنا بقاله حس
احنا نتعب احنا نزعل
بس منحسش بيأس
يعني كالعاده بلدنا تدي كل الدنيا درس
والنهادره الدرس بادىء
من هنا انتصرنا لما احنا
بقت بتيجي مكان أنا اللي شغل سنين عملناه احنا
في سنه زودوا على الف ليله وليله ليله
احكوا عن بلدي وقولوا القصه ديه
بسم مصر اللي تاريخها سنين طويله
في اغسطس من الشهور الميلاديه
افتتاح مشروع قناة واول سفينه تعدي منها
تجيب وراها سفينه تانيه
وانتشار الفرحه في ربوع المدينه
السنين متزوقه وفرحتها باينه
مش كتير الفرحه يا ولادي علينا
مصر تفرح كل ساعه وكل ثانيه
كت عجايب الدنيا سبعه
بس بينا العجايب النهارده بقم تمانيه
انتصرنا
وانتصارنا مش جديده يا مصر قبلي ياما عملوا
وياما عملوا طول حياته
المصري جاهز عمره ما يفرط في أمله
احنا اكتر شعب قاوم
احنا اكتر شعب سد
احنا ساعة الجد جد لو فتحتم قلب مصري
تلقوا جوا القلب مصر
ايه بيجري في دمي مصر
همها من همي مصر
اللي لحم كتافي خيرها مين
اللي غيرها هي مصر الصليب والمدنه مصر
السند والسنده مصر
العظيمه بانجازاتها في حد ذاتها هي مصر
التاريخ والجي مصر
الامل والضي مصر
اللي لما الدنيا تزعل ونصالحها
ايه صالحها الا مصر
بسم مصر تحيا مصر
قصيدة أنا اتربيت حيطان البيت
عليها آية الكرسى
وصورة العذرا جنبيها
وكانت هى دى العيشة
عشقت السيدة مريم
وبردوا السيدة عيشة
عرفت الحب فى كنيسة
وزرت السيدة نفيسة
ويوم الجمعة كان سيدنا
بيملى بالسلام ايدنا
ويوم الحد كان ابونا
بيحكى عن اللى حاربونا
وكان رده وطننا مش نعيش جواه
دا هو اللى يعيش فينا
وفى الفصل على الدكة
يوماتى نقسم الضحكة
وأنادى صاحبى يا حنا
ياريت لو بس تستنى
نروح كلنا مع بعض
مشينا بنفسها الشنطة
ونفس المريلة الكاكى
ولما بلدنا ندهتنا صرخنا كلنا فداكى
ويوم الحرب كان جنبى
وكان سندى وضهره كان ضهرى
ودمه كانه من دمى
وصوته لما يندهلى
برغم البعد واصلى
وكان واقف بيحمينى لما بصلى
بدأت صلاتى بالفاتحة
بدأها هو باسم الرب
وكان واصل ما بينا خير
وكان جامع ما بينا دير
وكان واصل ما بينا حب
وفضلت مصر حاضنانا
بسر الفاتحة والقداس
وفجأة ظهروا وسطينا
بشر يشبه لتكوينا
لكن هما ما هماش ناس
طيور فى الضلمة بتعشش
تخاف لما يجينا نهار
جدارنا صلب متماسك
وحاولوا يقسموك يا جدار
وبين راهب وبين ناسك أنا ناسك
أنا متبت أنا ماسك
أنا فى ضهرك أنا أدانك وقداسك
أنا ضد اللى يوم داسك
وضد الخونة والأشرار
قال احنا هندخل الجنة
وكل الباقى فى النار
مفيش لا عقل ولا تفكير
دعاة الضلمة والتكفير
قلوبهم كالحجارة أشد
وكل ما نبنى حاجة تفيد
تيجى ألف إيد وتهد
وكل ما نطفى نار للفتنة
بيحاول يصحوها
وليه نحرق ثوابتنا
نبيع أيامنا للتوهة
بناديكى ياأم النور
تباركى شعبك المستور بآل البيت
بناديك يا مسيح يا حى
تنجينا من اللى جاى
وتحمى الحى من التفريط
حق العيشة والمسكن
وحق اللى يقوم يأدن أدان الفجر
يارب احمينا بأولادنا
واحمى مصر بكل أدان على المدنى
يارب احمينا بأولادنا
وتحيا مصر
قصيدة الصبح طالع علينا بركة.. وعلى العدو النور مخيف
أبويا بيلمع بيادته.. وأمي بتسوي الرغيف
والحزن له دراعاته.. خدنا ابن الأبالسة من قبل 6 سنين ودقنا نكسة
الضهر أدن في الجوامع.. والكنايس يزأروا
الناس بتسأل في الشوارع.. امتى وطني نحرره
الجندي واقف كان يادوب.. لو مد ايده يسد عين الشمس سد
كان الجبان المرتعش.. مستخبي في ضهر سد
كان النهار لما انتصف.. صليت عشان وطني اتنصف
الشمس حارقة والصيام حامي.. اثبت يا أبويا ربنا حامي
ابدأ اشارة وابتدى يتكلم.. الله معاكم رد قاله تمام يا أفندم
شوف مصر ايه محتاجة وأنا جاهز.. وبكل ذرة رمل من سيناء هقدم روح
حالف يا هرجع للعيال فايز.. ويا إما هرجع في الكفن بلا روح
الصحراء واسعة في أواخر الصيف.. أول تحدي أعدي من بارليف
وأفرض قلوعي على القنال.. وأعدي أجيب اللي سرق بلدي وأحيي على القتال
وأبويا واقف منتظر.. ساعة ما قالوا هجوم
القلب كان بره الضلوع.. بيبوس ترابك يا بلد
لأ متخفيش واتطمني.. ربك خلقني منتصر
ساعة الخطر هاتوا الألم يفني البدن.. يبقى الوطن تبقى بلادي
أرضي بتوحشني.. وطال ليه البعاد
ما أنتي غايتي والمراد.. وعلى كل العباد
كم لنيلك من أيادي.. الطيارات من فوق ومزيكا
بتعزف في النشيد.. الله أكبر صرخة واحدة
وابتدا العداد يعد.. هنا ارتفع جسد الشهيد
يرمي سلام من الطيارات.. اوعوا تقولوا على اللي راح
يفدي البلد ويضحي مات.. الدبابات بتعدي من فوق القنال
شايف ملايكة محاوطة علمك.. والعزيمة قادرة على هد الجبال
وقف التاريخ لحظة قصد المعجزة.. مصر العظيمة بتدي للظالم جزا
كبروا وصلوا وسموا.. على اللي شربت أرضي دمه
واللي ردوا لنا الحياة.. في عيون سهرت ما نامت
لما قالوا الحرب قامت.. جينا من كل اتجاه
دم أبويا حبر خطي كنت لسه يا دوب.. بخطي ومصر بتقولي انتباه
يا تاريخ تعالى دلوقتي.. وقولي احنا مين
اللي عبروا شكلهم شكل اللي ضحوا.. كلنا في القوة مصريين
لما كان الأرض يوزنها الجبال.. إحنا أرض بلدنا يوزنها الرجال
والرجال تحمي وتعمر.. الله أكبر لا تخافي ياللي شايلك فوق كتافي
ياللي سميتك وفية.. ياللي أخر نبض فيكي هو أخر نبض في
يا عظيمة يا أبية يا اللي جندك ليكي فخر.. هم دول ناس يا بلدي
وهي دي حكايتك يا مصر.. هي دي حكايتك يا مصر.
قصيدة صباح النصر
يا امي العظيمه يا مصر
صباح النصر
يا اخواتي وحبايب مصر
صباح العزه
عاللي سطروك يا تاريخ
صباح الورد
عالمدفع وعالصواريخ
صباح النصر عالاعداء
صباح الكبرياء عالداء
صباح شايل معاه اسماء
في صفحات التاريخ مكتوب
ومن يوم ربنا تعالى ما خلق الارض
ومن ساعة ما جه اخترعوا حساب الوقت والمسافات
بتيجي مصر في الاول
وبعدين تبتدي الحكايات
قصيدة وبكتبلك يا امي وجنبي زملاتي
وياريتك جنبي ويايا
عشان لو تسمعي بنفسك
حكايه ما بعدها حكايه
بقولك يا اما حاربنا
وعدينا خطوط النار
بقولك يا اما ابنك
كان بطل مغوار
مهابش الموت ولا خافه
زميله كان على كتافه
بينزف بس كمل بيه
وانا بجري
ومات صاحبي على صدري
عشان احضانا اوسع من منازلنا
تشوفي ياما زمايلنا
اسود فوق العدد والحصر
تصوري يا اما اعدائنا
مخافوش الا لما صرخنا فيهم مصر
يدوب الاسم لو قولته
يخاف منه العدو ويرجع
اذا ذكرت بلادي
فانصتوا اجمع
طبيعي القلب بيرفرف
طبيعي عيونا دي تدمع
حكايه عمرنا ابدا
ما يوم هنمل نحكيها
قالوا السادس من اكتوبر
قالوا العاشر من الهجري
باسمى أسم سميها
قالوا النصر وقالوا عبورنا
وكان بارليف على صدورنا
سنين طابق
عشان القلب كان صادق
فمستحملش تبقى ارضه مغتصبه
ومتحملش ذره رمل من ارضه
تدوسها بياده الغربا
اخلع نعالك يا عدو
هذي الاراضي مقدسه
هذي اراضي موطني
لا لن تكون مدنسه
اليوم تنتقم الجنود وتفتدي
من يحصد الارواح اي منافسه
اليوم اما قاتل او مفتدي
فأنا الشهيد انا الوليد المنتصر
انا الطريق انا العريق انا الوفي
انا الدليل انا السبيل المفتخر
بشهادتي ببطاقتي باصابتي
بيد يسيل الدم منها كالمطر
فاحذر عدوي لست وحدي ها هنا
والله ان متنا يقاتلك الحجر
قصيدة وكيف اخواتي وعيالهم
قوليهم خدت انا بتارهم
وراجع راسي مرفوعه
وكيف اخويه وكيف الدار
حيطانه لسه موجوعه ؟
سمعتي نشرة الاخبار
قالوا ان الضربه فاجئتهم
في ست ساعات
تخيلي يا اما عالجبهه
بقيت انا والعلم اخوات
وقلبي طار مع ادانه
ورفرف فوق
طرح لون العلم بالشوق
وانا شبهه في الوانه
بياض القلب
شعري الاسود الغامق
واحمر لون دماء صاحبي الشهيد فارق
زمايله بس عدانا
سمعت جرس كنيسه اعلى مالدانه
سمعت ادان بيصطاد طياراتهم صيد
وصوت جاي من بعيد لبعيد
بينده بلادي بلادي بلادي
مكنش مجرد يا أمي نشيد
مكنش مجرد كلام والسلام
ساعات الكلمة بتبقى الخلاص
ماخوفتش نيرانهم وضرب الرصاص
مخوفتش اضيع
ومين اللي يقدر عليكي يا مصر
ومين اللي يجرؤ ومين يستطيع
يوقف جيوشك
ويهزم وحوشك
ومين كان يحوشني
عني ويحوشك
وانا لوني اسمر
كده لون رموشك
وطالب رضاكي
وشايل سماكي
مليكتي وملاكي
وقمري اللي طالع
وشايلك في روحي
يا املي وطموحي
فداكي جروحي
هاتيلي اللي واجع
اداوي وأهون
وازوق والون
وابني وأكون
واعيد الشوارع
واشيلك في نني
يا اقربلي مني
وأمشي اغني
واقول للي سامع
واعلم ولادي
واولاد ولادي
بلادي بلادي بلادي بلادي
لكي كل عمري
وحبي وفؤادي
قصيدة علم وينفذ
هنا جندي واقف في سينا الحبيبه
على بعد اكتر من الاربعين
سنه او يزيد
هنا جندي واقف
بيحمي الارض اللي حررها جدي
ومات فيها الف والف شهيد
هنا جندي واقف
بيبني ويعمر
يكبر يخضر
ومصر العظيمه
هتكبر هتكبر
معايا وبدوني
فكوني كما انتي يا مصر كوني
يا ساكنه في دمي وهمي وعيوني
وكوني كما انتي يا مصر كوني
ده في بلاد كتيره قريبه وبعيده
وليكي انتي وحدك يمدوا الايادي
فيكفيكي فخرا بانك فريده
ويكفيني فخرا بانك بلادي
قصيدة لما جيت اكتب عن امي
قولت عنها شايله همي
قولت دي بتجري في دمي
قولت ياما حاجات كتير مش جديدة
لما جيت اكتب عن امي عاجزة قدامي القصيدة
شايلة سري ..
كان زمان بيني و بينها حبل صري
اتقطع يوم الولادة و اتوصل حبل الواداد
حب متحولش عادة من كلام رب العباد
حبها اصلا عبادة
في التعب كانت بتسأل
جه مؤنث جه مذكر
جه بيضحك جه مكشر
جه على الدنيا بسلامة
وقتها ماكنتش بفكر
كنت بابكي و كانت بتحضن بابتسامة
وقتها مكنتش بفكر
ده الضنا جه من الضنى
لما جيت اكتب عن امي لاقتني بكتب عني انا
لما جيت اكتب عن امي عاجزة قدامي الحروف
قام الألف زعق وقف
قاللي ما تفهم يا ولا
ده انا مشترك في اسم من لا شريك له
و اول الاسم الألف
و اول الام الألف
و دي مش صدف
ربك بيخلق من العدم خلق الألم وهنا علي وهن
شالتني لحد ما بلغت الحلم
و ياما بتدلع عليها و ياما بتمنع عليها
و ياما حاوطتني بجناحها
و ياما دمعت في عينيها
و من ايديا تاتا تاتا
و رجلي داست على البلاطة
و داس عليها عجل زماننا
و كانت بتحضني ببساطة
و لمابتعب كانت بتعب كانت تطبطب
كانت تجيبلي الشوكلاتة
كبرت فجأة
لاقتني بزهق من كلمها عن السجاير
عن العيال اللي مصاحبهم على الدراسة
خش ذاكر
اجي اتدلع تقوللي ده انت راجل
ده اللي قدك دخلوا دنيا
بص يا ابني
خلي بالك دي السنين زي الكلونيا
تحطها بتطير بسرعة
ماتلاقيش لهواها ريحة
السنين بجحة و صريحة
امي مابتعرفش تجرح
بس ياما باتت جريحة
لما جت وقفت قصادي
قالتلي انت امتدادي
انت نور عيني اللي شبهي
انت دونا عن ولادي
وقتها انا كنت غاوي للغناوي
كنت اسيبها قاعدة و انزل اترمي في حضن القهاوي
هي ديا احلي عيشة
هاتلي نار علي فحم شيشية
هاتلي طاولة
امي دي فاكراني طيشة
لأ دة انا راجل بشنبي
بصوا دقني
و اما جالي الحزن داقني
و الزمان خد مني خانة
الدوا اللي عند امي
مش لاقيه ف الاجزخانة
كل ليلة كنت برجع و الدعا صالبلي ضهري
و التعب فارد طريقي و السنين بتقولي اجري
في الزمن عمال بسابق
بلتقي بحضن بفارق
زحمة الدنيا خدتني
مفتكرهاش الا لما بس الاقي الاكل حادق
انت فين مش عارف اكل
اقعدي جانبي تعالي اسمعي اخر المهازل
مرة واحد حب ينجح قاله عنه انه فاشل
مرة واحد حب واحدة بس سبها لانه عاطل
قالوا عني اني شبهك
قالوا واخد شكل شعرك
ضعف نظرك
و السنان البايظة منك
ياما جرحوني يا امي و بدعاكي جت سليمة
هما لما يقولوا عني ابن امي دي شتيمة
كملي جميلك يا امي و بعد عمر طويل اوي
روحي للرحمن قوليله ان ابني بيحبني اوي
ياما زعلني و سامحته
ياما زعقلي و كان يكفيني بس اشم ريحته
كان بينسي يقولي شكرا وانا باديه من حياتي
بس انا و انت اللي عالم كنت بدعيله يوماتي
ربنا يهديه يسامحه
كان كتير يصعب عليا لما اشوف في عيونه جرحه
مهما يعمل لسة ابني اللي كان في اللفة خايف
مهما ينطق لسة سامعة ماما من اصغر شفايف
كملي جميلك يا امي
و روحي للرحمن قوليله
هو ابني امتدادي
هو نور عيني اللي شبهي
و اما جيت اكتب عن امي
برضه كل كلامي عادي
