قصائد فارس قطرية مكتوبة

فارس أحمد عبد العزيز قطرية ولد في مركز ابو حماد بالشرقية شاعر مصري لقب بشاعر الحب ورفيق العمر وفارس قطرية بدأ بتنظيم الشعر وهو في سن صغير في المرحلة الاعدادية له العديد من التصريحات على لسانه بانه لم يتعلم الكتابه وانما هي موهبة لديه وعمل على تنميتها بسماعه للشافعي و الشاعر هشام الجخ و عبد الرحمن الأبنودي وفيما يلي نطرح عليكم قصائد فارس قطرية مكتوبة

قصيدة الونس

 تعرف يا منيل ولو إن دمك يلطش أوقات ودي عادة في صنفك مشهورة

وإن إنت حفيت عشان أقبل وأوافق بيك وأنا مجبورة

وإن أنا كنت زمان سنيورة وعلي العين وأعجب شنبات

وإنك عادي وكرشك مترين ورفيع زي العصفورة ما أعرفش إزاي

بس أنا مالقتش ونس للعمر أحسن منك

ما لقتش صديق وحبيب وقريب وسنين تتعاش غير وأنا وياك

كان عمري يضيع وأخسر نفسي لو يوم ما وفقتش أبقى معاك

حبتني ومن حبك في حبيتك ولقيتك راحة تسندي لما أحتاجك فأفرح وهتفضل فوق الراس شايلاك

العشرة إلي بنتها بودك وحلاوة أيامك هتعيش جواي سنين لك إن تطلب علشانها عنيا متكفيش

علمتك واتعلمت نعيش إن جيبك فيه أو حتى مافيش

كان كل إلي بيفضل بينا الحلو وبس

في لقى رجالة تحبه العين إنما أنت النوع إللي بيتحس

الحب إللي سقيته في قلبي كان يكبر حجمه مع الأيام

ويا دوبك بس تكون مبسوط الدنيا بحالها بتبقى تمام

عمري ما حسستك ولا بينت إن أنت حبيبي ونور العمر

وإن أنا ولا يوم يغلبني النوم غير وأنت قصادي خلاص هتنام

شيلتني على راسك وفي عينك وارتحت معاك كتر خيرك

ولا يملى عنيا ما بين الناس ولا يدخل قلبي راجل غيرك

الواحدة هتطلب إيه غير بيت فيه راجل عارف يفهمها

وأنا كل ما احتجت أتكلم تسمعني بالساعة والاتنين

وإن أنت لو لفيت الدنيا كنت ألقى في طبتك تاني من إين

سيد الرجالة ونن العين حسك بيطمن ويهدي

ولا عمرك كدة خلتني أنام والدمعة بتشرب من خدي

كنا بنتخانق أه لكن زعلي كان عمره عليك ما يهون

كات تيجي الخناقات بالكيلة والضحكة تهون وتعدي

لا شكتني في يوم على غلطاتي ولا يوم دخلت ما بينا غريب

لو كنت أعند وأشد الحبل كنت أنت تسيب

لو كنت أضايق وأتعكنن منك بهريك طلبات

فينو ومكرونة وشعرية وتغيير أنابيب

بس إللي أنا كنت بخبيه عنك الفرحة بتغيب عن عمري لما إنت تغيب

كان متقدم لي عريس أشقر وعنيه زرقا وأمين شرطة وجاهز هيشيل

وأنا كنت ماخبيش عنك أقول إنك مش شبهي وشكله بخيل

بس أنا لو كنت نصيب غيرك كنت أبقى الخسرانة يا عبده

ولا كنت أرتاح زي وأنا معاك

ده أنا حتى لو إحنا مانتكلمش كنت أرتاح كدة وأنا شيفاك

جنبي وواخد إيدي وحسي وبصحة وبخير

العمر يضيع مع ناس غيرك والعمر معاك كان فعلا غير

الحب يموت لو ماسأتهوش وينبت مع واحد زيك

العمر يضيع مع ناس تانية وينور جنبك وبضيك

وإن كنت زمان أنا مش حباك فأنت حنين وأنا حبيتك

وإن كنت زمان أنا مش عوزاك دلوقتي سعيدة وأنا في بيتك

مش سهل الواحد يلقى ونيس ربنا حبني خلاني لقيتك

بعنيك شفت الأيام تتعاش

في واحدة الراجل يحييها وفي راجل تاني يبيعها بلاش

وعجبي

قصيدة امي 

عمركوا شوفتوا 

واحدة رجليها أن خطى . 

مكان يوسع ويبان أجمل بكتير 

واحدة أما بتصحى الكون . 

يصحى ويطرح عصافير 

متر وسبعين سنتي بيمشوا . 

يبعتوا إفراح على أي جراح 

ضهرك مسنود بيها ومرتاح . 

وعنيها الراحة من المشاوير 

أهي دي أمي . 

ست الستات والرأس والعين 

والنور في العيشة وأيامها . 

الصبر أن شاف أمي في شارع 

والله ده يركع قدامها . 

يا حبيبتي إزاي قلبك أطيب 

من الكل اللي قبلته في عمري . 

وإزاي في حد يشوف شكلك 

ويبص في عينك يفهمها . 

أول ما لمحت الدنيا 

كانت ليكي شفتها حلوة . 

أول ما فهمت أنها 

وحشة ومش زي زمان . 

كنت بشوفك بلقاكي أمان 

وبحس بدفى وبشئ طيب .

فقول لي الحب لمين لغيرك 

وإزاي ارتاح دونك طيب .  

البيت يعني أمي 

يعني خناقات على مج الشاي . 

اللي أنا سبتة 

وما دخلتوش تأني مكانه . 

 يعني حلاوته يعني 

هدوؤه يعني أمانة . 

يعني الشي الحلو الباقي اللي 

أنا بصحى في كل الأيام وبكمل . 

عمري وبعيش وأنجح 

وبعدي الصدمات علشانه . 

عن قعدة بلكونة في سهره 

بحكي لها أنا كنت بحب في مين . 

عن تأني يوم وأنا بنكشها 

فتقوله اسكت يا بتاع ياسمين . 

عن دعوة صلى لي أن أعيش 

مبسوط وسعيد ويوفقني . 

عن حد أحكي له يصدقني 

ويشلني سنين هاكتب عن مين . 

من غيرك يستأهل أصلا 

حب وأيام حلوة وتفاصيل . 

من كان هيشلني ليوم 

العود يدبل ويميل . 

من حسن يجيب 

حسنك يا جميل . 

أو هيحبني حتى 

وأنا شطان . 

والله إنا كسبان بوجودك 

وبدونك لو كسبان خسران . 

أمي الأحلام أمي الأيام 

أمي الفرحة إللى بدون أسباب . 

والحب اللي ما بيخلصش الأم 

واحدة إن موجودة الدنيا تمام . 

والعالم دافئ وهادي بجد 

أمي يعني الحاجة الحلوة . 

اللي ما ينفعش أقارنها بحد 

مطرح ما تكون بيكون البيت . 

مطرح صوتها طيبة وبركة 

دمي اللي في دمها وملامحي . 

وصفاتنا الحلوة المشتركة 

أنا عارف إن أنا مش صالح .

ومكركب وغريب الأطوار 

شرباتي في كل مكان واحد . 

أوضتي زريبة 

بدخل بالجزمة على السجاد . 

بعمل في اليوم ألف مصيبة 

بأسمع بالليل أحمد شيبة . 

وبصحيكي على أني 

أخدت الضربة بجد . 

بس أنا والله بحبك حب 

أنا عمري في يوم . 

ما أديته لحد 

تجئ آية كل الدنيا دهيه . 

في صنية مكرونة بإيدك 

في الطلة في وشك . 

اخر الليل اليوم 

وأنا عارف إنك مرتاحة . 

وبخير فبروح في النوم 

عيد أم آية اللي أنت . 

جاي تقول عليه 

والله يا أما أنت . 

عيدك كل يوم 

وعجبي . .

قصيدة ما يمكن خير

ما يمكن خير ما يمكن كل أحزانك هتتبدل وتصبح غير

تضيق وضيق وتستحكم عشان تفرج بأمر الله

وربك عالم النية وعالم بالسلوك والسير

تعبت كتير وإيه يعني وهي الدنيا إيه غير هم

ولو كان اللي فات تجريح أكيد الجاي سعادة يا عم

بلاش تزعل على اللي رماك وركز في اللي لسه معاك

يغوروا في ألف داهية هناك بلا اشتغالات وحرقة دم

تعبنا محايلة ومسايسة وطبطبنا وماعجبناش

وياما ادينا بايدينا وبعنينا وما أخدناش

وإيه كان يغصب الواحد على الهم اللي كان شايله

هنفضل في المقام غالين ولو مع مين ما يشغلناش

هتطرح تاني وتخضر ونلقى الفرحة ترضينا

عشان النية خير لله مافيش مكروه هيحنينا

وسبحانك يارب الناس يا واقف جنب كل الناس

يا عالم باللي في قلوبنا وعارفنا نضاف فتحمينا

لقلب فيه أحزان وأهلكه الأسى صبرا

سيأتي كل ما تبغى وتلقى فرحة كبرى

خلقنا في الأسى نمشي ولكن لم نمل يوما

قريبا سوف نرتاح ويصبح كسرنا جبرا

لعين أهلكت دمعا وكان القهر يضنيها

سيصبح دمعها ذكرى وعوض الله يرضيها

وإن كانت بكت يوما على الحزن الذي فات

سيأتي عليها أيام وجبر الله يبكيها

مافيش حاجة أنت بتسبها ولك فيها نصيب باقي

ولو سابك عزيز على القلب تأكد إنه مش باقي

لزعلك على اللي فات منك يرجع لك حاجات راحت ولا هتموت إذا غابوا

وأديك يا أصيل تعبت كتير وأديهم شبعوا قاموا سابوا

وعادي الدنيا بتكمل وفيها كتير فشوف حالك

هتتعب تاني وتعاني ولسه الدنيا شايلة لك

فخلي يقينك الدايم في رحمة ربك الدايم

وزي ما شفت حزن كتير هتلقى الفرحة جيالك

بقالك مدة مش مظبوط ومضايق

وكنت يا واد ما تحسبهاش لو الدنيا تبوظ

رايق وبالك عمره ما اتعكر ولا تفكر ولا بتحسب

في مين قال إيه ومين عمل إيه ومين نايم ومين فايق

زيادة نعمة الإحساس يخليك تتهلك بدري

بتتأثر بأي كلام وتزعل بس مع حالك

وعلشان ما تعاتبش كتير فتطلع في العيون شكاي

بتعمل شاي وتبقى وحيد عشان الوحدة أحلى لك

وكنت زمان في أي مكان بتخلق بهجة وسعادة

ودالوقتي انت شخص كئيب مين الهم ده جالك

وليه زعلان وليه تعبان يا عم يغوروا بعيوبهم

يغوروا بكل ما فيهم وبالقسوة إللي في قلوبهم

ولا يهزك كلام متقال ومهما اتقال فبرضوا كلام

تخليك انت بأصولك وهم يعيشوا بذنوبهم

مش لايقة عليك الهم وعمرك لسه في الأول

وان شاء الله الزعل هيزول وتبدأ تاني من الأول

ولو كان اللي فات تجريح وكله هموم ومش عاجبك

فكل الجاي بأمر الله جميل والفرح هيطول

وعجبي

قصيدة فداك يا جميل ولا يهمك

فداك يا جميل ولا يهمك

جراحك بكرة تنساها

تلاقي حضن بيلمك وناس ترتاح في رؤياها

يليق الحزن بعيونهم لكن ما يلقش بيك انت

ومين زيك وشال شيلتك وداير لف في متاهة

محدش فاهم القصة وكله شايفها من بره

وفاكرينك ايديك ناعمة ما شفتش هم ولا مرة

وطول عمرك بتتعامل كأن مافيش في قلبك شئ

طبيعي يشوفوا شكلك خام وعيشتك حلوة مش مرة

مشاكلك يا بن دين الله محدش عنده حيل ليها

يا تتعايش مع الواقع يا تفضل تمشي تشكيها

ماحدش فاضي يسمع حد ولا هيحس شئ ما عشوش

هتفضل جوة حرب هموم يا تنهيك يا انت تنهيها

كبرنا خلاص ما فيش أحضان ولا في حد بقى يجي لنا

نشيل الناس ونرضيهم ومين يرضينا ويشيلنا

وتيجي الخلق وتقول لك ده زي الفل والعة معاه

لاعمره شكى لنا من حاجة ولا بيتعب يا حول الله

ياريتنا مكانه وياريتهم مكاني بجد والله

في ناس بتحب عيشة حد وأصلا عيشته مش حباه

ما تتغروش في شكل الناس ده ظاهر بس على الفاضي

يبانوا مليانين فرحة لكن من جوه شئ فاضي

بيمشوا خفاف وما بيحكوش لحد عشان ما يتكشفوش

ومنكسرين من الدنيا مابين الجاي والماضي

ما يغرش من الناس غير ناقص

ولا يحسد حد إلا المحروم

اللي بتلقاه جواه أسود لو مهما معاه عمره ما بيدوم

لا يصون ولا يشبع من حاجة زي ما بتعوم الناس بيعوم

يضحك لك لما تكون على الباب ويقطع فيك بعد لما تقوم

تعبنا من البشر والعين ورب العرش نجانا

تعبنا من اللي عامل أخ وقلبه وعينه كرهانا

تعبنا من اللي بيسبنا في عز الاحتياج والعوز ويجي بعد ما بنفرح يطبل أكنه ويانا

لكن بنقول أهو لله وبنسامح وبنعدي وبنقول اللي جاي أحلى

وبرده اللي مشي فدانا

فداك أنا ولا يهمك جراحك بكرة تنساها

تلاقي حضن بيلمك وناس ترتاح في رؤياها

يليق الحزن بقلوبهم لكن ما يلقش بيك انت

ومين زيك وشال شيلتك وداير لف في النداهة

وعجبي

قصيدة بالسلامة 

عارفين بالسلامة

أهو اللي سابنا بالسلامة

واللي عابنا بالسلامة

واللي روحنا عليه ورمانا وقل أصله كتير معانا

وادناه الخير أذانا يغور ومش هيسيب علامة

بالسلامة

بكرة جاي بناس نضيفة وفيها خير عكس اللي فاتوا

بكرة قابل حد صافي يشوفني أعظم انجازاته

لما أكون ماشي بأصولي وأرضي كل اللي يروحولي

يبقى مش هزعل عليهم أصلي عايش هم ماتوا

ياللي صبرك طال في جبرك بس جبرك لسه حبه

دمع عينك لما ينزل تجري من الناس تستخبى

الحياة ابتلاءات يا سيدي وكل واحد عنده همه

وابتلاء الله لعبيده بيبقى على قد المحبة

احسب اللي سابوك ومشيوا بعد منك عملوا ايه

بص على نفسك وتعبك وانت تعرف مشيوا ليه

ربنا بيدي النفوس زي ما بيدي الفلوس

واحنا ناس ان زاد وجعنا بنرمي وجع الناس علينا

اوعى طول ما قلبك لسه صافي اوعى تزعل أو تشيل

اوعى حد في يوم يغير طبع فيك طيب جميل

الحياة مش سهلة يمكن والبشر بقوا شئ يخوف

بس ربك برده قادر يسندك لو يوم تميل

شوف نصيبك فين وكمل الحياة واسعة وطويلة

زي ما قابلت اللي كسرك برده في أشخاص جميلة

في كلام ما اتقالش لسة وفيه أمان هتحسه تاني

واللي روحه كريمة حب مش هيرضى بناس بخيلة

يشبعوا ببعض اللي راحوا واللي جاي بتاع قلوبنا

اللي بيحبونا فترة ويكرهونا عشان عيوبنا

احنا زي الفل يعني بالوحش قبل اللطيف

واللي مش عاجبه اللي فينا يمشي ويغير عتبنا

مش هنرضي الكل يعني ومين أساسا بيرضينا

مين في كل اللي ادناهم من عيونا كان شارينا

كل واحد يجي حبه وياخد اللي فيه النصيب

وأما يمشي يقول ويحكي ع اللي مش فينا وفينا

واحنا حد الله ما بينا بين كلام اتقال في غيبة

يسكتوا لما نكون قصادهم لجل عارفين احنا هيبة

اللي يحكي نسيبه يحكي واللي بيصدق يصدق

والكلام يوصلنا برده من صحابكوا

جاتكوا خيبة

معروفين وتمامنا طيب واللي عاب عاب باللي فيه

واللي بيمد لنا ايده مرة واحدة بنشتريه

لما نعمل خير بنعمل مش عشان يتقال عملنا

زي ما الواحد بيعمل زي ما بيترد ليه

اللي راهن اني هتعب من غيابه وقال سلام عاوز أبعت له السلام

عاوز أدعي له بصراحة إنه بطل يوم كلام

ده الغريب والله فعلا إن كنت بحب الناس

فاكر لما يروحوا هأسهر وأما راحوا بقيت بنام

مسك الختام

لا تعلق قلبك في حد غير ربنا ولا تتعشم في حد غير ربنا

واللي من نصيبك هيصيبك مهما هربت منه

والل مش نصيبك هيسيبك مهما جريت وراه

وعجبي

قصيدة بكره هتحلو

هيجيلي اللي يقدر قلبي وده ثقة في الله مش في الأشخاص

عشان أنا لما بحب بصون وبكون موجود مش صوت وخلاص

بأتعامل باللي بريحني وبيرضي ضميري ومش فارق

إذا كنت بعامل ناس حلوين أو خلق رخاص

ربنا رحمن وأنا مش زعلان على حلو اديته ومطمرشي

رغم إني خسرت كتير يعني بس برضو الخير ما يخسرشي

هنقابل يوم خلق شبهنا وهنلقى نصيبنا بيندهنا

وهنفرح ونشوف الدنيا مرة من النفس ما تكسرشي

على قد ما كنت بقدر ناس على قد ما كانوا بيأذوني

وبأفكر فيهم بالأيام وتدور أيام وبينسوني

الواحد كان يزرع وردة في قلوب ما تحبش زرع الورد

في قلوب من البرد إن مت أرضي لا هيرضيوا ولا هيحبونا

بس الإنجاز اللي في عمري إن أنا عمري ما جرحتش حد

ما كسرتش خاطر ولا إنسان إن أنا وزعت أفراح للناس

وأنا قلبي في عرض الفرحة جعان

إني استحملت كتير وصبرت ما خدتش حقي من الجارح

وأنا قادر أجيب حقي مسامح وأنا عندي إيمان

إن لو الصبر هلك حاله هيلاقي الأفراح جايه له

فأنا مش زعلان

في ناس في الدنيا نصيبها تعيش ترضي المجاريح

تتمشى مع اللي الناس تأذيه وتهدي عليه الأيام والريح

وينام والليل هما يعانوا من الوحدة ومن تفاصيل تانية

يضحكوا للناس يضحكوا ع الناس من بره لطاف والقلب قبيح

ويقين بالله بكرة هتحلو

هندوق من الفرح اللي خسرناه نتمشى معاه ويروق الجو

هنبص ع اللي سابونا بعيد مع ناس وحياة ومع قلب جديد

نحمد ربنا على عوضه الحلو ونضحك عل الأيام السو

بكرة هتحلو

الباب اللي اتسد في وشي هأرجع وأشتري بيته وأرضه

الشوك اللي زرعتوه في قلبي هيجي لي اليوم وأقطف ورده

أنا حد الله بيني وبين ناس حسسوا روحي بنقصان ما فيهاش

والناقص صعب يكون له علاج وعلاجه في حرمانه وطرده

بزيادة الحلو اللي مشش بزيادة الحزن اللي معشش

بزيادة سنين بتضيع مع ناس ولا تتعاشر ولا تتحسش

الواحد بس ما كنش يهون على روحه يسيب من غير فرصة

وادينا 4 مليون فرصة وسنين غفران ما بتتعدش

أنا عمري ما قصرت في حاجة

عزيت أشياء على ايد الغير

عمري ما بصيت على حاجة حد أو شفته سعيد وكرهت الخير

طول عمري بقول ربنا يبعت ويبارك في اللي بعتهولي

وبسيط راضي برزقي ومرتاح ومكمل سير

عشمان في الجي يكون أحسن والله يعوضنا وننساهم

ع الناس طلعوا فينا الغلطة والغلطة إن أحنا عرفناهم

والله بجد في ناس مظاليم وعشان ساكتين بانوا الظلمة

وفي ناس كرهونا بجد صحيح وقلوبنا صحيح كات حباهم

وعجبي

قصيدة امتي هكبر يا ماما 

من كام سنة قبل ما أكون 20

كانت الأيام أجمل بكتير

عيل بيشوف شكل العالم وفي قلبه براح يحلم ويطير

كانت الأيام فيها خير متشال بمقاس الطفل أبو إيد ناعمة

كنت أسأل أمي في وقت النوم كم سنة هتعدي وأبقى كبير

الناس كات غير الناس يمكن

والعالم كان أهدى شوية

كان عندي يقين إن الأيام عمرها ما في يوم تيجي علي

هأكبر وهحقق أحلامي

وأسرح وتهته في كلامي

وهقول العالم قدامي

وهجيب السما طوع لايديا

كان عندي صحاب أكتر بكتير

كان عندي الكون قدام بتنا

كان كل الناس لما تعدي يحسدوا فرحتنا ولمتنا

إسلام وأسامة وعبدالله وأحمد وسميرة جهاد وإيمان

ما كنتش الأيام وقتها تعرفنا فتكسر فرحتنا

مصروفي صغير على قدي

كان نص جنيه في إبتدائية

لكن كان نص جنيه بركة

فاكر مدرستي وأيامها اسمها الأسدية المشتركة

كنت أطلع أقول الشعر الصبح

وزمايلي تسقف وأنا فرحان

كات أكتر حاجة تخوفني زعل أمي إن أنقص في الدرجة

طب أديني كبرت

كنت أزعل لما بنام بدري

وبدبدب في الأرض لكاعة

وبزن وأعيط بالساعة

طب أديني سهرت

سقفت الأيام على وشي

وعرفت إن أنا كنت مغفل

وحلمت إن أكسب ناس أحسن وأديني خسرت

لا صحابي زمان لسه صحابي

ولا حتى كسبت صحاب تاني

معرفتش ناس شبهي ومني

فبقيت في الأخر وحداني

كام واحد فيهم تجمعنا صدفة فنسلم بعنينا

لا بقيت أوحشهم ولا هم أساميهم تيجي على لساني

كان نفسي زمان أعرف واحدة

وتقول لي يا بيبي زي صحابي

طب أديني بقيت وسط صحابي زير الستات

اتقال لي بحبك من واحدة وان احنا اتنين والروح واحدة

دلوقتي معاها أحمد وعماد

الفرق ما بين قلبي ساعتها والفاضل من قلبي الحالي

يشبه للفرق ما بين وردة وايد الحداد

ليه يا أمى دعيتي إن أنا أكبر ما عذرتيش جهلي وقولتي أمين

ليه ما نصحتيش ابنك يفضل وأنت أدرى الناس بالبني آدمين

أنا كنت زمان عيل غلبان وبشوف العالم من قلبي

أقسم بالله دالوقتي ضرير ما أعرفش أنا مين

وحشاني الضحكة اللي بتطلع سهلة ومرتاحة ومجبورة

أيام كان أصعب جرح متاح

أصعب جرح متاح كان جرح صباعي من الكورة

كان عندي حاجات أجمل بكتير من إني أسيبها تضيع وأكبر

ما بقاش في منها غير الذكرى وتفاصيل في دماغي وكام صورة

الجيل اللي أنا منه اتعور

عجز بكتير فوق ما أتصور

أوقات بتاخد وبدور على نفسي زمان جوة ملامحي

التليفزيون كان سبيستون كونان وماسنجر وريمي وماوكلي وبومبة وتيمون

باسمع أساميهم دلوقتي

بأضحك بهدوء على طفل زمان

كان نفسه يكون سيد الفرسان ويهد الكون

والكون هده

وعجبي

قصيدة أديني مشيت 

في ناس بطلعك ظالم عشان ما تبناش متعابة

تروح تأذيك وتحكي عليك وأصل عيونها كدابة

تشوف تمثيلهم المظبوط تصدق إنك الغلطان

في ناس ما تصونش عيشة وملح طباعهم وحشة قلابة

ولو بس الزمن يرجع شوية وقت كنت أكيد

ما سبتش حقي ولا عديته وقولت العتاب هيفيد

مافيش إنسان بيتغير ولا في طباع بتتعدل

ولو فكرت تصلح حد مع الوقت اللي فيه بيزيد

فبأكتب من وجع قلبي لحد رماني بالباطل

لحد اديته أيامي وكان في مشاعري بيماطل

لواحد شوفته سيد الناس وتاج الراس وعورني

وعاب في وبان هو يا عيني المخلص الفاضل

تعب مني ومن ظلمي ومن القسوة اللي في طباعي

وكان يديني بالجملة وكنت أدي له قطاعي

يا عيني يارب بهدلته ووريته العذاب ألوان

من كتر أما كان طيب عملته أنا دبلة في صباعي

أديني مشيت وبدعيلك تدوق الخير وتبقى تمام

ومش زعلان لكن ندمان على الوقت وعلى الأيام

ولم الناس وقول في غلط كان فيك ومش في

والله لما يوصلني ما أنا مدافع بأي كلام

عاتبني كمان وعرفني إن كان لازم ما حبش حد

وإن أختار قلوب أنضف وما تسبنيش في وقت الجد

عاقبني لأني حبيتك وسيبت حقوقي واديتك

وعديت مرة ورا مرة لحد ما كنت بأنسى العد

وأديك بترد لي المعروف بجوز أقلام تقال عل الخد

يا سيدي تمام وصل واجبك وشاكر فضل أفعالك

وأنا الغلطان وأنا القاسي وأنا اللي خلقت إهمالك

وأنا اللي جرحت إحساسها وأنا اللي بصعب الموضوع

وهات قلبي انت وصحابك وتفوا عليه عشان جالك

ما تعرفش انت قيمة الشخص غير أما تعاشره بالأيام

تشوف زعله تشوف جده وقمتك جوه قلبه تمام

في ناس بتكون جميلة معاك لكن وقت أما بتسيبك

خصامها فجور وقلة أصل

وتشتم فيك سنين قدام وهي الدنيا إيه يبعني علم في علام

وأنا اتعلمت مراية الحب دي عامية وبتورينا بالمقلوب

توريك إللى بتحبه ملاك طاهر وخالي عيوب

تقول بينك وبين نفسك ده عمره ما يقسى ويجافي

وفعلا يقسى ويجافي ويتهلك بيه يا إما تتوب

وهو حلال يعني عليك يخليك قسى قوي عليا

وأنا اللي أخدت من عمري وبديتك على عنيا

سامحتك قد ما انت غلطت وحنيت قد ما انت قسيت

وأخرت صبري على همك تسبني بكسر في ايديا

على الله تكون جميل وتمام وعندك ناس ومتهني

ده رب الخير أراد لي الخير فقرر يبعدك عني

فعيش انت في سلام وتمام وعيب في كدة غني

وأنا والله مش زعلان وروح الله يكون عونك

مسير الكاس يلف عليك وياخدك حد من لونك

وفي ختامي

سنرزق ضعف ما نبغى وتأتينا أمانينا

سنلقى الجبر ألوانا وعوض الله يرضينا

سقينا الحب فسكرنا سقينا الحزن وسهرنا

ولم نهزم ولم نشقى كفى بالله يغنينا

وعجبي

قصيدة أنا مش شمتان

أنا مش شمتان بس أنا مش قلت وعدت كتير إنك هتروح وتجيني زمان

مش لمامشيت ورميت عزي من غير ما تفكر في العشرة

سبتك وأنا عندي يقين كامل إنك هتعيش عمرك زعلان

طب أديك لا مؤاخذة بترمي كلام وبتتوسط لي بأيامنا

مع إنك عارف لما أمشي ما بحنش تاني لواحد خان

خدت إللى يهمك ويكفيك ورزعت الباب

وأنا بعدك كسرت الأوكرة علشان ما تجيش

لو فاكر قلبي كافي مثلا هتجيله يومين بعدين تمشي

يبقى إنت يا حلو ما تعرفنيش

أنا أكتر واحد في الدنيا بيدي اللي معاه الحرية

وأنا أسهل واحد في الدنيا بينسى وبيعيش

هو إنت أمي علشان أزعل إنها هتروح مش راجعة لي

إنت اللي اخترت تبعد وأنا عادي تمام بالنسبة لي

مش هأمسك فيك وإنت سايبني

ولا هأحكي عليك وإنت عايبني

بعتني ببلاش وأنا مش ببلاش أنا غصبن عن عينك غالي

مش واحد زيك هيقدر أنا مين وبكام

مش واحد زيك يفرق له عشرة وأيام

مش واحد زيك هيليق له واحد زيي

أنا حبي مواقف أما إنت بتاع أي كلام

يا أخي دا أنت مشيت دنيتي فجأة بدأت تحلو

أعصابي المشدودة ارتاحت وبدأت أعيش

بتقول لي إني مقصر وياك وإن أنت ملاك

أديك إزاي تفاصيل حلوة ما بتدهاليش

الحب اللي يذل صحابه أصلا مش حب

فبلاش نكدب على بعض يا بيه إنت في الأصل ما حبتنيش

حبيت الشكل العام مثلا حبيت اللمة إللي علي

حبيت إن أنا ماشي في حالي ودخلت تجرب يا عنيا

غرك شكلي الفرحان على طول وحياتي اللي تبان زي الفل

فجريت علشان تبقى الأول وتحط إيديك تحت إيديا

طلعت خشنة وشقيانة يا عم مش ناعمة وحلوة ومرتاحة

مش زي ما كل الناس قالت دي ايدين فلاح غاوي فلاحة

وأنت ما عندكش مرارة تشيل أنت الغلبان أبو قلب جميل

لسه هتتمرمط وتعافر الجوع كافر وأنت طري ومش حمل هموم

أما أنا متعلم شيل الهم من قبل ما حتى أتعلم أصوم

شكرا جدا كان وقت لطيف هنلم حاجتنا ونمشي خفيف

الناس سطحية بشكل مخيف بتشوفنا من الباين بره

بس أنا هأبقى كويس عادي مش هاخد أي كلام على القلب

والله الدنيا دي بتعلم وتربي الناس عل الاستعباط

وعجبي

قصيدة عام مضى

عام مضى ما يجوزش فيه إلا الرضا

فيارب راضين بالقضا ورامين همومنا لرحمتك

اكتب لنا الخير في اللي جاي واروي زعلنا بفرحتك

على أد ما تعبنا وعنينا وشوفنا أيام مش تمام

خلي اللي جاي برد وسلام واربط قلوبنا بتقوتك

عشمان يارب في كام طلب ومافيش طلب يكبر عليك

عشمان أزور بيتك قريب وأرمي الهموم وأنا بين إيديك

عشمان أسلم ع النبي وأتمشى حبة في حضرته

وأرتاح شوية من البشر ومن الحياة وأهرب إليك

فاتت سنة ولسه الدعا ماوقفش ولا يوم هأقطعه

إن كان لي فيه خير قربه وإن كان لي شر إنت امنعه

أنا عبد ما أعرفش النصيب ولا لي دخل في حكمتك

أن بطلب إللى أنا نفسي فيه وبأقول يا رب وبتسمعه

عمالة بتعدي السنين وأنا قلبي لسه في مطرحه

أبسط كلام بيزعله وأبسط كلام بيفرحه

ولا عمري شلت في قلبي كره

ولا افتريت يوم ع اللي مني وأنت عالم يا رب إن قلبي كداب افضحه

أتمنى في العام الجديد أحباب يبقوا قريبين

أمي وأبويا وصحبتي وكل اللي مني طييبين

ما يورنيش فيكم أذى ولا نتسرق ولا نفترق

بدعلكو من قلبي بصحيح لو حتى ما قولتوش أمين

إن شالله يا أما أطلعك حج السنة دي في الحرم

وان شا الله يابا تعيش كمان ويزيدوا فيك طبع الكرم

وإن شا الله يا صحابي العزاز يهديكوا ويمسيكوا خير

ويدوم علينا الستر دايما في الحلال والمحترم

كل اللي لي في قلبهم خير من زمان

الله يفتح ليكوا أقفال البيبان

ويعود عليكو بالفرح ويعود عليكو بالإيمان ونعيش سوا وتموتوا بعدي

لا أخلف وعودكو في أي شئ ولا تخلفوا ولا تنسوا وعدي

لأخواتي وصحابي العزاز في القلب ليكم دعوتين

ليكو مكانة ومنزلة وفاكركوا حتى إن روحتوا فين

عشرتكوا أغلى من الدهب الله يديمها بالأصول

وما تزعلوش مني أما أغيب أو يوم أقصر حبتين

ولكل واحد راح خلاص الله يسهلو الطريق

ندعي له بالخير أصله كان عشرتنا برده وكان صديق

وإن كان علينا فالمسامح أجره عند الله عظيم

وإحنا أهو مسامحين يا رب القلب قدامك برئ

لكن في كام واحد كده جرحونا جرح ما يتنسيش

الضربة كات صعبة وعافية وسايبة شئ ما بينتهيش

أهو دول بقى عوزين عود ينفع يكون رد القلم

علشان سابونا بحزن بين بعده مش عارفين نعيش

وزي العادة والمعتاد عشمنا كبير في كرم الله

يجيب الحق ويطيب خاطرنا بعد قولة أه

ولو علي مشي وسابنا وقل الأصل والمعروف

فهنجيب زير من الزقازيق ونكسر زير وقلة وراه

وختاما ربنا يدينا على قد نوايانا ويهبنا السعادة والفرحة في السنة الجديدة بأمر الله

وعجبي

قصيدة مش طالب اخف الحمل يارب

وبأقول له يارب في كل صلاة مافي يوم تحوجني لحد سواك

وإن أنا لو روحت لغير بابك رودني على بابك فابقى معاك

الناس وحشين جدا وانت أرحم بكتير وكبير عادل

يخسر ويخيب حد يسيبك وبيكسب اللي يكون وياك

أنا عندي جراح وانت العالم بقلوب الناس وبنوياها

وإن أنا مظلوم من خلق كتير ما غلطش ولا مرة معاها

على أد ما كنت بسيب الحق وبوكل أمري إليك راضي

على أد ماكان الناس بتزيد وتجود أكتر في آذاها

ويا بخت القادر والعافي بس زاد حملي والعود بيميل

مش طالب أخف الحمل يارب

أنا طالب قوة لكتفي أشيل

أنا بدعي وكلي يقين إنك رحمن ومآمن بالمكتوب

وهايجي اليوم وأرتاح وأقول على عوضك لي يا رب جميل

ودعنا سنين على بني آدمين منهم حلوين منهم وحشين

وكسبنا حاجات وخسرنا حاجات ومازال الواحد عنده يقين

إن اللي يروح مافهوش الخير وإن كان فيه الخير عمره ما هيروح

والدنيا ادتنا على عنينا وبفضل الله بنفضل واقفين

كان عندي حبايب وقالوا لي عمرنا ما نسيبك وسابوني

كان عندي حاجات حلوة تكفي يفضلوا من خيرها يحبوني

قلبي الغلبان اتهرى أحزان واتعلم يفهم ويعدي على إن الناس فترات للناس

المؤذي مسيره هيتكعبل ويدوق الحزن في نفس الكاس

اللعنة مش انك تتعور أكتر من مرة بنفس الشخص

اللعنة بجد انك تبقى إنسان بيركز في التفاصيل

مش طالب أخف الحمل يارب

أنا طالب قوة لكتفي أشيل

طالب فرحة وأيام طرحة وناس حلوة بجد بتحيني

مستني العوض اللي يريح ويطيب خاطري ويرضيني

متعشم فيك تجبر أوجاع وتساعد كسرة بايد من عطف

أنا أصلي بكيت من الحزن كتير مستني الفرحة تبكيني

طول عمرى المتساب الراضي

طول عمري في قلب الناس ماضي

ولا لي حبايب ولا أصحاب جواي براح لكن فاضي

محتاج أتعشم مرة في حد ويخاف يخسرني ويفضل جد

ومعارفي كتير زهقان العد

ومجرد أعداد على الفاضي

بس أنا متأكد إنه في يوم هتفك وهتروق والله

وهنضحك على اختار يمشي ويسيبنا نتوه وسط الأزمة

اللي ما بيشلش معاي الهم فوجوده حرام مالهوش لازمة

لما الأيام تضحك لينا هيعود ويقول انه شارينا

ونقول الله على عدل الله في الناس وفي عمايلهم فينا

فيارب اختار انت الصالح وابعدنا عن اللي يبكينا

واسحبنا عليك فنخاف منك وادينا الخير وازرعه فيناا

ما تعلقناش بحاجات هتروح فتروح مننا وتزعلنا

ووهبنا الفرحة بدون أسباب على أد ما بنراضي ارضينا

قصيدة محلتيش غير عزة نفسي 

خلصت خلاص وحكيت عني وفضلت تلحن وتغني

لميت الكل وقولت كلام وحفظته عشان ترجع تحكيه

وتبان مظلوم في عيون الناس وتقول أنا خونته عشان خاني

على فكرة لو انت بتستني في رجوع مايتنا لمجاريها

فبجد متستناش نرجع وبجد يا ذوق ابعد عني

ما لقتش إلا أنا يعني يا غالي وتطلع فيه عقدك وتدوس

ما لقتش إلا إللى اداك عينه ووهب لك عمره إليك مخصوص

ولا الغلبان عندك متهان وعشان عديت لك هتزود

لا يا روحي هتمشي وهاتعود وأهي دنيا بناخد منها دروس

يلعن 30 قلب لو اتهان واتهاون وماخدش بتاره

والحب إن كان بالذل بلاوي يغور بحلاوته وبمراره

الواحد منا ما حلتوش شئ غير حبة عزة نفس وأصل

وإن راحت عزة نفسه خلاص يخرج من داره ومقداره

إلا كرامتي يجي غيرك عادي إنما هي ملهاش غيارات

وإللى بيتهان بيها ويرضى يفضل على قد ما عاش يتشاط

أنا أسامحك أه وأحبك أه وأشيلك أه وأودك أه

إنما لو جيتي عل اللي حليتنا أسيبك وما أقولش عليك الآه

سبحان من صبر قلبي عليك يا عزيزي وخلاك تتمادى

أنا قولت هتفهم إني شاريك هتبطل تجريح وبلادة

اديتك أكبر من حجمك وأذتني وما ردتش أهاجمك

على أمل إنك هتخف غرور وأتاريه في الدم وبزيادة

وسامحتك شوفت غباء زيي كملت معاك وأنا مش مرتاح

أنا قبل ما أقابلك كنت بطير دالوقتي ماليش غير نص جناح

كان أكبر طموحاتي أغير وأبدل فيك قسوة قلبك

ووعهد الله تعبت أحاول إن أفتح قفل مالوش مفتاح

أخرتها تهني وتحني لي ضهري المفرود

وتعبني وتحكي لخلق الله وتقول للناس وتلم شهود

على إيه الحرب إللى عاملها مانلم الدور ونقفلها

ونشوف المايلة ونعدلها بس يا غلبان ربك موجود

ربك شايف وعشان بما يرضي الله بأمشي فأنا مش خايف

أهي قصة وخلصت مش هنقول مين فينا اتعور من التاني

والحب نوعين صادق كداب حبنا كان غيرهم كان هايف

شوف كل اللي انت عاملته في كوم وكرامتي في كوم تاني لحالها

صدقني ما ببقاش عل اللي يبيع كان قبلك ناس روح اسألها

في نوع يتهان ويقول عادي والنوع ده أنا مابحبوش أصلا

يا تشوفني في عينك سيد الناس يا تغور علشان مش هأقبلها

صدقني ده مش تجريح نهايات ولا حتى برد على كلامك

أنا بس بفكر نفسي عشان لو حنت روحي لأيامك

بأكتب لك من قسوة قلبي الناتج عن قسوة قلبك

وبقول لك مش فارق عندي حتى إن عديت ترمي سلامك

خلصت خلاص وحكيت عني وفضلت تلحن وتغني

غني وعجبي