كاظم إسماعيل هو واحد من ابرز من منح الاغنية العراقية نكهتها المعبرة وحكاياتها الجميلة فكانت كلماته تغنى بحناجر المطربين الكبار وذاع صيتها كأروع ما انتجته الذائقة العراقية كما انه من الشخصيات الثقافية المميزة والمحبوبة والمتواضعة وفيما يلي قصائد كاظم اسماعيل الكاطع
قصيدة ملفته للأنتباه
مثل شبوي المسه بعطره وشذاه
حبه حبه وكطره كطره
وبالرسم طول خلك بيج الاله
صور عيونج مواني
وبيها عاف الليل نومه وذب غطاه
من بعيد انتي جميله
من قريب انتي جميله
واكفه تمشين حلوه
والحلو وجهه يبين من كفاه
عيوني ما تكذب عليه
العسل يم الاشاره
جدى منج
كسر كلبج
واخذ من خدج حلاه
الله الله اشهل حلاه
الشكر ماكان مزروع اعله كاع
ارض خصبه للشكر هاي الشفاه
والكلب مدري شجاه
قبل كنت اكدر عليه
الوي اذانه ايخاف مني
وهسه صرت امشي وراه
وهسه صرت امشي وراه
ولا حياء في الحب
احبج
خل يحسبوني رجل حن لصباه
لان ملفته للانتباه
سنه اشفافج عله اشفافي
بصراحه الوكت مو كافي
اريد الشته ايصير اربع مواسم
ياحضن دافي
واريد الليل سبع اسنين
والله ايموت الغافي
لو طال السفر وياج
من روحي الخدر ينزل عله الرجلين
وامشي اعله الجمر حافي
ولو ميت وامر بشارع امشيناه
انسه جنازتي وتتحرك اطرافي
ولو يطفه الضوه من الصبح لليل
عن بيتي تكول الناس عنده اكلوب
ما طافي
ضعفني الزمن لكن اكابر بيج
من صار النهر دهله الربيع الفات
مديتي اديج ورد نبع صافي
سنه اشفافج عله اشفافي
بصراحه الوكت مو كافي
ارد اخذها
قصيدة التاجر
إتريكت باكت صبر وكلاص هم
وتوكلت يارب عليك
غبشه نعسانه الشوارع
ومدري يانثيه ابفجر دم تشتهيك
إتذكرت تاجر اعرفه
كلي من اتبيع روحك مرلي بلكت اشتريك
وتمت الصفقه اشتراني
وحصتي هم رد اخذها
فكر ابمشروع بي ادخل شريك
وصار يمليلي ابشروطه
.. ما اريد و .. ما اريد
وما اريد ايدك طويله
كتله اكصرها واجيك
وابترتها من المتن ورجعت ابشره
كتله عد عينك شلتها
كالي جا شلي بيك
جراح الحصار
ومن هذاك اليوم والتاجر نسه وسد القضيه
وانه منسي .. امعلك اعله ارفوف صبري
وحتى صار اتراب بيه
راحت ايدي اتفلشت اقوى الدفاعات
وخطوطي الاوليه
ناس مقهوره اجت تبجي عليه
وناس بطرانه اجت تحجي عليه
اشلون غلطه اتسرعت كصيت اديه
.. هاي اديه
.. هاي اديه
صار تفتيش بسنه من السنين
وعوضت عن الهويه
هاي اديه
ياما لعبت .. ياما قبل الريح هبت
ياما بصدور الثلج نيران هبت
هاي اديه
وهيه مكصوصه
شعر للناس كتبت
وصفوا جراح زين ابمنطقتنا
حركوا بعض الرماد ابعود شخاط
وبعدها النار بيه
عفيه جراح الحصار البي حميه
وحده يكدر يكطع الخيط اللي
يربطني ابشرايين المنيه
.. إتفقنا
وصارت الصفقه بعيادة هل الطبيب
اخذ ايد وانطي كليه
وباشر الجراح وتمدد شخص مو من اهلنه
واخذ دم
وجيب دم
واصعد انزل
والوسيط الجابني ايصبر عليه
خلص مفعول المخدر
فتحت ملكيت اديه
حصدوا الكليه ولا زرعولي ايد
وقع الدكتور تقرير ابنسختين وتركنه
ولازم الفراش باب الصيدليه
الكادر اتجمع على اهل الغريب
ايهني بيهم
وانه بالسديه نسوني وياحزن ذيج المسيه
والمضمد راد حكه
كتله مد ايدك ابجيبي
لا لا .. مد ايدك ابصدري
يجوز هم تحتاج ريه
جابلي الفراش سر
وعرفت منه تفاصيل القضيه
المريض الجان يمي
كليتي رهمت عليه وايده مارهمت عليه
واهلي زعلوا طردوني من العشيره
ومن فشلتي كمت اصيح
انه مامحتاج ادين
انتوا شعليكم بديه
اتبرعت بيهن لان ما اريد
يوم اتوازى
واتنازل
وامد للناس اديه
قصيدة امس واني بحلات النوم
امس وانا بحلات النوم
وبصفنه حزن بالليل متعذب
ندهني صوت شاعرنا
وعرفته صوت ابو الطيب
سألني عن جديد الشعر هل ايام
والناس بغيابه شكامت شتكتب
شتكتب والجديد البيه فرح كذاب
والكلك جديد يفرحك يكذب
امي من الزغر تنكل حطب للنار
ويفور جدرها ومدري شتركب
مصباح الحزن صبتلي بالماعون
ومن ضكت الحزن شفت الحزن طيب
تسأل عل السمار الغلف الوجنات
دمك يحترك لو كلبك يعطب
هاي هدومنه مالات عشر سنين
مو سمران بس هنه علينه الوانهن تكلب
مبعد ياقطار الفرح وين تريد
بلكي بدوستك وياهم نجلب
دنيا وغيرت من البشر اطباع
وكلب الضيف مايقراه المعزب
لو مية سنه بعد الثلث ايام
محد يسألك طلبتك يا هل ضيف
ألا نمدها اله وبلسانه نطلب
قصيدة ليل المحطة
ليل المحطة
بانتظارك خلصت عمري إنتظار
عاشرت ليل المحطة
وارتجي ايجيبك قطار
والقطار
لو يحب مثلي وتشب بضلوعه نار
يسرع ابمشيه ويجيبك
بالفجر قبل النهار
ولو تعبني إنتظارك
شارك العمر ابسنينه
اهواي كالو مايجيك
وكلبي جاوبهم يجينه
يجينه
ناشدت كل روجه عنك
كل جرف كحلت عينه
وسألت كل الشواطي
بلكت اتجيبك سفينه
ولا سفينه
ولا قطار
وخلصت عمري إنتظار
لا قطار ولا سفينه
وانه والليل ابامل جيتك علينه
طيح يا دمع النده وكطر بدينه
احنه ليليه انتلاكه
نسهر انه وياك ياليل المدينه
انه عيني عالمحطه
وانته عينك عالنهار
خلصت عمري إنتظار
قصيدة تغطيت
تغطيت وبعدني الليله بردان
لان مو انت يمي فراشي بارد
وينك يادفو ياجمر الاحزان
احس بدمي بالشريان جامد
يا مر الصبر ماكضك عنان
نسمع بس صهيلك وين شارد
كل ساعه وتعتني جفوف بطران
وانا جلد العلي قماشه بايد
تعال اوزن هموم وجيب ميزان
وشوف شكد عذاب الروح زايد
انسحبوا من حياتي هواي خلان
بقيت بهل زمان لوحدي اعاند
سواد الليل يبقى وتطفه الالوان
واعيد بذكرياتك والمشاهد
اذا كل طير عنده ثنين جنحان
وانا مكسور وعشت بجناح واحد
على بير المنايا وجيت عطشان
مجبور وشربت الماي راكد
وينك يالبعيد الكلب مليان
غنا وبوسات ودموع وقصايد
وياك بعشرتي ياليل خسران
مثل عشرة النور وي الكواغد
لو طاهر حليبه الدهر ماخان
ضربني براسي غفله واني كاعد
قصيدة منو بحالنه منو بحالنه احنه المساكين
احنه المحد النه المدري امنين
ومن يسأل علينه لمن نغيب
حتى لو غياب يطول اسنين
خلصنه عمرنه بالمحطات
سفر وبيوتنه اسطوح الفراكين
مرسومه بجلدنه ذيج الانياب
الجرح لو طاب هم يترك نياشين
وين اهلي علي مادكو الباب
تره صحتي عليله وكلبي مو زين
من اهل الله بعدنه وناس طيبين
مكتوب بجناسينه غريبين
خسارتنه جبيره وغشمه عالسوك
بعنه اعقولنه بسوك المجانين
من يستاهلج يادمعة العين
مسكين اليداين دمعة العين
تمنينه نموت بغير تعذيب
وعله المذبح يطغنه صارله اسنين
فض الازدحام وطشت الناس
وما كدامنه بس واحد اثنين
يوصلنه السره ويتاجل الموت
يم اركابنه وتعمه السجاجين
قصيدة تبارينه ذمم
تبارينه ذمم والحب طويناه
وشمرنه الذكريات احجاره بالبير
مادام النهر ضيك عبرناه
كلمن خلي يذكر صاحبه ابخير
صدك عدنه هدف بس ما وصلناه
مشي الحفاي نمشي على البسامير
ولو كلشي اليضيعنه منلكاه
خشب ويصير بحلوك المناشير
شلك بأنسان مثلي الدهر جلاه
احسن ما اطيح وبيه اتغير
لو يدري رحيم البشر وياه
ربك ما يسوي اجناح للطير
جا حتى السمج بالكاع خلاه
لاكن كلنه نعرف هاي متصير
بشرنه اليوم منهو ايعيش وياه
والي بيه ايئمن ركبته اطير
قصيدة زعلان
زعلان
بس يا زعل
لمن ترد للصدك
كبل المناده اجي .. وشلون جيه اجي
أركض ركض محترك
ياللذتك إبريتي وين الكه مثلك هوى
لولاك والله أختنك
هي شراكة نفس لو سكت كلبك
سكت كلبي ويدك لو يدك
لو ما وكتنه صعب ما جان ابد نفترك
كلمن مشه لحالته
واحد سكن بالغرب واحد سكن بالشرك
وكل هالمسافه البعد
وسوالفك تنسمع جن احنه حلك ابحلك
والله عشكنا عشك
يامن امكدر علي غيرك فصاله صعب
جم دوب اخيط واشك
حنيت انه لشوفتك
واصبرت بس ما صبر كلبي وصرخ راح اطك
جاباني الك واذعنت
جيتك ابليله شته ظلمه ومطرها رشك
وشبعده صار الدرب
خوف ورعيد وثلج
وجفوف اديه زرك
ابابك طحت ها كمت ضميت اديه او ردت
عالباب بالروح ادك
بس كالو إلمن تدك
كلمن مشه لحالته
واحد سكن بالغرب واحد سكن بالشرك
قصيدة بده العام الدراسي مرثيه لولده حيدر
بده العام الدراسي وبدت الهموم
وبيتي عالمدارس بابه صاير
نسيت وداعتك جيت اشتري هدوم
الك ومحضر اقلام ودفاتر
مو تسمع قيام وليش ماتكوم
ومر اسمك ولا من كال حاضر
الشمس طلعت علينا ومو وكت نوم
وهم عدكم صبح يا اهل المكابر
وهم عدكم ضوه وشباچ ونجوم
وهم ينطونكم واجب لباچر
الوالد بالوداع يصير مهموم
وانا اثنينهن والد وشاعر
خيلك طشرتني وچنت ملموم
وصارت طيحتي بين الحوافر
اذا عشرين يوم وما شفت نوم
شيظل بالحيل بالعشره الاواخر
فراش الفاتحه لو شفته ملموم
بنص كلوبنا تلكى الچوادر
يمنه المصبغه ودينه لهدوم
الحزنك مشترينه قماش حاضر
تمنيتك جرح كل ساع ملچوم
وتبات الليل بشفاف الخناجر
انا يا بوي من ونيت مالوم
نزل مني دمع يعمي النواظر
خدودي تعودت تتندى كل يوم
وتحب الماي خشبات الكناطر
لمت الروح بس شفادني اللوم
شلحك وبسفينة الموت عابر
المنايا عالسطح وعيونها تحوم
عليك ونزلتلك نسر كاسر
ستر الله نغگ بديارنا البوم
اخذ عين الكلاده وراح طاير
ديني حلاتك حلو الرسوم
بلكي انعشگ دنيانا مظاهر
اظل كاظم وصبري وياي مكظوم
لو ما هالخشب جوه الاظافر
اهن كاسين بيهن كاس مسموم
خاف اغلط وبالمسموم اكاسر
بعنه البيت ريت البيت مهجوم
وريت اكثر بعد من هل الخساير
تحب انت اللعب والگبر ملموم
شلون تحملت وشلون صابر
وليش من الهوى يابوي محروم
ونسمات الهوى تطيب الخاطر
منهو؟ الشوفك صورة المعدوم
وليش تعلكت ياشاب يا قاصر
ما ظنيت زرعي يروح فد يوم
وعصافير الحزن تگضي البيادر
من اكتب قصيده تزيد الغيوم
ومن عيني الدمع يملي الدفاتر
يبقى بهل مطر ياشعر منظوم
نصاري الحسين وبحر وافر
قصيدة رموشك قصيده
سمعته كلمة غزل غمض عيونه بخجل
كتله رموشك قصيده وعيونك المستهل
وصفت قوس الحواجب
سيفين بيد اليحارب
صالحت زين الحبايب
والله ليعيد الزعل
البشر في هل البريه
ربك خالقهم سويه
اميزك عن البقيه
سواك الله من عسل
جمعت كل المعاني
صورة الك هزت كياني
خدك شموع بصواني
ويندار بيك الاهل
سمعته كلمة غزل غمض عيونه بخجل
