توفي مساعد الرشيدي عام 2017 تاركا خلفة تراثا ادبيا زاخرا من الدواوين الشعرية ومن اشهر قصائد مساعد الرشيدي عزة النفس ما يلي
قصيدة ياسحاب دنا
ياسحاب دنا طيب وتدنا
وارتووا به يتامى وفقرا
حبك اللي رحلناه وسكنا
ينكتب..بالعروق..وينقرا
القصايد على صيتك تغنا
ماتصدق على الله تنطرا
ليت شوفك لنا دوم ايتسنا
كل ابونا نصير الك شعرا
سيدي في قدومك نرجهنا
جابك الله وحنا في حرى
شاعر ياطويل العمر غنا
في لزومك وحسب اللى ترى
غير شدة حجاجك ماتمنا
ماخذا الشعر جاه ولاثرى
الحيا شرق عنروضة مهنا
والله اللي عن الخافي درى
قصيدة ياصباح الندى
قم ياصباح الندى والعشب
قم ولع الجمر من جمري
وادلق جديلك وصبه صب
وبراحتك يابعد عمري
وابراحتك يارقيق وعذب
وبراحته شاعرك الخمري
من يوم عذب النسايم هب
ماعاد لي شي من امري
خلك بقلبي فداك القلب
من وين ماتسري وتمري
كل الحقايق بدونك كذب
ياباشاة البيض والسمري
الله يا اني احبك حب
حب اخضر الغصن للقمري
قصيدة يابنت بعتيني
يابنت بعتيني وأنا كنت شاريك
ياللأسف رديت انا منك خايب
لاتحسبين القلب سهل يخليك
لكن تراني شفت منك العجايب
سبعة شهور وانا اطرد سرابك
القلب يعشقك وفيك ذايب
طمعت في حبك ولاقدر اخليك
غصب علي اتركك مادمت هايب
يابنت قوليلي على كل مافيك
يابنت وضحي كل ذيك السبايب
شوفي طريق العشق يابنت مأذيك
وراعي الهوى يابنت يشبع طلايب
ماتعرفين اللي يودك ويغليك
ولو كان قلبك حي ماهو بصايب
حسبي على اللي غير الجو فيك
العاذل اللي حط فيك النشايب
اللي حذفني عقب ماكنت مغليك
قلعك عني جعلها له خرايب
دعيت ربي ياعسى الكل يرميك
ويجيك من جور الليالي مصايب
لانك طعنتي قلب دايم يباريك
ولانك عشقتيني وانا كنت تايب
قصيدة برد ليلي وهمي وحطبي
قلت اجمع برد ليلي وهمي وحطبي
قلتها...واقصى ضلوعي ذياب عاويه
الشتا يرثع ورا البال والليل يحبي
والطعون اقفت فرادا وجت متخاويه
صاحبي لي مرك الشوق مره..مربي
لا تجيني مع هجوس تجيني ضاويه
آه يا صعب اغترابي بعدك ما اصعبي
عقبك الدنيا بعيني غدت متساويه
آتطوى كني القاع لا هجهج ظبي
كل ما اصرد بعيني تضيق الزاويه
ليه يا درة شبابي ولولي...وذهبي
ليه خليت الحنايا عروش خاويه
يوم تضحك لي عيونك...عيونك وش تبي؟
كم لها تشرب نحولي ولا هي راويه
لا غلاك ..اكبر ذنوبي..ولا قلبي نبي
الله اعلم والمقابيل وشهي ناويه؟
قصيدة من يرد العلم
من يرد العلم لمدلل زمانه
قبل يرتد العتب من رمش عينه
من يسلم لي عليه ومعه أمانه
يعتذر من سيد القلب وظنينه
والله اللي طوع العطر لبنانه
مانشدت أقرنفله عن ياسمينه
قمت أسولف للندى عن قحويانه
قبل يجمعه المطر في نصف عينه
آه منه ومن غلاه ومن حنانه
ومن نهار ما جمع بيني وبينه
ما حلا تله في قلبي وسهيانه
كن لا قبله صباح ولا مدينه
كل هذا بس من ضحكة ثمانه
قاد خفاقي معه قود الرهينه
الله أعلم لا فتنا خيزرانه
من نصدق قذلته ولا جبينه
قصيدة هبت شمال
هبت شمال وساقت الوبل هتان
قالوا روى قلب العطش قلت لله
توه يبل الريق من ريق الأمزان
قلب تفيا غيمة مسفهله
ودي تفيض بفاتر الصوت غدران
المطر يرفا عن الكبدعله
حي الغلا بشفاك ياعطر الأشجان
قل للغرير اللي نهى القلب قله
طاح الربيع ووردت جرد الأغصان
عشب القلوب مصافح الخل خله
نش السراب وحادي الغيم نشوان
هيض غناه معانق الورد طله
من فرحتك شابت نواطير الأحزان
وبجيتك خان أسود الهم ظله
هج الظلام وسال في حجر الأعيان
ضي تزفه غرة مسفهله
لك من هنا لأخر تفاصيل الأزمان
عشق تمده راحة ماتمله
واليا لفحك القيظ بأطراف الأجفان
خذ نصف قلبي لا خذ القلب كله
لا تستذير معاند الشوق غلطان
الله عطاك امر الخفوق وتوله
احيان اسوق العمر وتسوقه احيان
بيني وبينك دق عمري وجله
نمسي على جال المقادير خلان
نصبح ومرباع الغلا في محله
ماعاتبك لو ساهي الرمش كسلان
ألقا العزا بمزاح شعر تفله
هاك القصيد تفجر العشق بركان
خذ من سناه وبارد الحرف خله
ياعل شعر منت قافه والأوزان
تصدا عليه شهورهن و الأهله
قصيدة ذكرى الجراح
ذكرى الجراح
ليتني من فرحك قريب
ليت لي جرحك نصيب
خلني دمعة بعيونك
كل ماثارت شجونك
خلني حزن وشقا
دام جرحك لي حبيب
ضميني ياكل الحنان
وخذيني لاية مكان
نسيني ماضينا اللي راح
ماعاد أبي ذكرى الجراح
خلني حزن وشقا
دام جرحك لي حبيب
رديني لعيون الأمان
وأعطيني من فرحك زمان
ارويني ياقلبي الحنون
وكل شيء بعدك يهون
خلني حزن وشقا
دام جرحك لي حبيب ..
قصيدة من ليم القمرا
من ليم القمرا على وجه الطريق
و اوما لقلبي من بعيد وصاح به
الا انت يا المياس منثور الدليق
نهر الحياة اللي ضماي ارتاح به
خل السوالف ماعليها الا صديق
الصدر دلة للفجوج الراحبه
ان عودت للجد والعلم الوثيق
ما جابه الريح الشمالي راح به
اي والله اعلنها وانا وجهي طليق
والبال غصن كل قمري ناح به
انا من اللي مايخونون الصديق
بوم ولد اللاش خان بصاحبه
قصيدة شاعر وحد الباري
شاعر وحد الباري وسمى يقول
كلمة ما حدن حده على قولها
تدفعه نخوة الواجب مقام ومثول
والنوايا تصب الشمس هملولها
الليالي مريفه ياعريب الأصول
والقصايد تجي الليله على اصولها
ياسلامي سلام بالحنايا يجول
عد ماصف ريشه واصطفق جولها
للفهد راعي الطولات عمره يطول
لابو متعب ليا من ثقلت حمولها
للوطن للتراب اللي وطاه الرسول
حي فال الديار وحي مرسولها
مزنة سبلت لطويق رمش كسول
نقضت عند جال العان مجدولها
فاحت النود عود ونجد غيدا جفول
ماتداني يمر الذل من حولها
وجه ابيض وقلب من زبرجد ولول
كل ماجهم الخاطر ضحك لولها
كل مارف بارقها مداها يطول
كل مالج راعدها صعب نولها
بنت عز مهرها من صهيل الخيول
انشد الوقت عن حمزه ومسلولها
بيرق النور يزهى خصر ضامر نحول
واحمر الخد يسوى رنة حجولها
يعربيه كريمه نفس عطفة زحول
لا نظرها الحسود ولا اختفى زولها
طشت القلب والشيله لراعي ذلول
ليلة وقفت الدنيا على طولها
يوم لدت لها هيبه وطرف خجول
والرجاجيل تاطا الموت برجولها
وانتخت به وهو للطيب قرم عجول
لو يشوف المنايا تنفض فلولها
قال عندي واخو نوره يقول ويطول
واستوت زرقة الشلفا لمقتولها
ربع العز واعشوشب بجرد السهول
ويله اللي يبي ذره من سهولها
نجد ماتعطي العصمه لغير الفحول
مايروع العذيه حلم بهلولها
من طمع عقب ابو تركي بنجد مهبول
حكمة يشهد الحاضر بمدلولها
اقبل الحق والباطل زهوق ملول
وانحنت هامة التاريخ من هولها
قصيدة شبيت القصيد
في زمان كنه البرد شبيت القصيد
قلت ابدفا والليالي تموت ببردها
في طريق كنه الموت ولحالي وحيد
قلت ابحيا والمنايا تبوح بسدها
أتقارب هقوة العمر لو كانت بعيد
واتغني بالمقابيل واخطب ودها
لاقديم الجرح يقوى ولاالجرح الجديد
يخلف النفس العزيزه عن اللي ودها
والله اني ما تنازل ولي راي عنيد
لين أداعب غرة الشمس والثم خدها
وانزفي يا وردة الشعر من دم الوريد
لا تجفي في عروق تراجف يدها
يا قصيدي كان الأشعار سادات وعبيد
والله انك من بحورغريب جدها
ما تقاود مهرة الحرف للقلب البليد
يا قصيدي خذ رسنها وخلك قدها
في طريق كنه الخوف سليت القصيد
قلت ابحيا والليالي تموت ببردها
