كلمات اغنية اجمل فراق زياد الدساس

اجمل فراق كلمات

بعد بعد طال لـ سنه الصدفه جمعت ما بينا تاني

كان نفسي اروح اكلمها و اقولها انها واحشاني

فضلت واقف بعيد كأن ساعتها فيه حاجه حايشاني

انا مين عشان تبص ليا حتى و تتمناني

فضلت اتفرج و استرجع ذكريات فاكرها

باعتني ليه ده انا مكانش ليا حد غيرها

انا كنت هقرب و هقولها اني عايز نرجع

و كانت الصدمه بصيت على ايدها و شوفت الدبله

لو عيشتي بعدي ليه حياتي واقفه مش بتعدي

طالما انتي نسيتي ليه لـ دلوقتي لسا فاكر وعدي

الدنيا دايسه عليا رايح جاي و مش بتهدي

الفرق بينا انك رجعتي لصحابك و رجعت لوحدي

كل يوم في نفس معاد فراقنا تجيلي نغزه

مبقتش حمل هزه متدمر زي غزه

ياريتنا حتى فضلنا صحاب زي ما انتي كنتي عايزه

خلي فراقنا ميقللش بينا الاشتياق

خليكي مواربه الباب يمكن نرجع تاني احباب

مش ممكن نبقى اعداء حبك داء ملوش دواء

لو قولت في يوم نسيتك صدقيني هكون كداب

خلي الفراق اجمل فراق في دنية العاشقين

وائل جسار كان حاسس بيا قد ايه حزين

قولي كان اغلى حبيب و متقوليش كئيب

مقدرش اكون معاكي و اشوف في عينيك حد غريب

اه على فكره رجعت عشان مهانش عليا العشره

اه على فكره احزاني بعدك لسا مستمره

اه على فكره فاكرك و فاكر كل حاجه بينا

بس مبتصلش و ده مش عشان معيش رصيد

بس عشان مفيش تغيير و البعيد بعيد

بعدتي فجأة كانت مفاجأة حتى مفيش تمهيد

لسا النار بتقيد في قلبي و انتي جمبه الايد في الايد

اديكي عايشه و اديني عايش ميت

لسا بكدب لما بيسألوني مالك اقول كويس

اديكي باعده و اديني لسا فيكي متبت

لسا بكتب عنك حتى بابي لـ غيرك بقى متربس

مش عارف اميز انا بحلم ولا ده كله حقيقي

معقول تضيعي مني و اكمل من غيرك طريقي

ازاي تبيعي اكتر حد في الحياه دي شاريكي

كل ليل بسأل عليكي هتيجي ولا مش هتيجي

خلي فراقنا ميقللش بينا الاشتياق

انا لسا بحن ليكي مع ان اللي ما بينا مات

مش ممكن نبقى اعداء حبك داء ملوش دواء

بقينا اغراب من بعد ما كنا بنسهر بالساعات

خلي الفراق اجمل فراق في دنية العاشقين

وائل جسار كان حاسس بيا قد ايه حزين

قولي كان اغلى حبيب و متقوليش كئيب

من بعد ما كنت قريب ليكي خلاص بقيت غريب