كلمات اغنية انا اسف زياد الدساس

انا اسف كلمات

اسف يا بابا عشان خيبت املك

اسف بجد عشان فشلت افرح قلبك

اسف عشان مطلعتش ناجح زي ما بتتمنى

انا كارهك الجمله لسا في ودني رنه

مستغرب ليه اني طلعت كاره نفسي ما كله بسببك

بداري عياطي كل يوم عشان بخاف تتريق

لسا فاكر بعد 22 سنه تهتم بزرعك

مبقتش احس بـ وجعك ما انا من الضرب جسمي نحس

ضرب الدنيا مبيوجعش انا خلاص نحست

ده البخت كلهم وصلوا اما انا اتسوحت

عمركوا ما هتحسوا بيا الا اما اتدفن و انزل تحت

ما انا ببين اني تمام و بضحك حتى لو اتجرحت

و ده وضع صعب جدا من غير حتى ما اقول و افسر

تنحت وقت اما شوفت اب بيحضن ابنه

مش ببالغ بس سمعت صوت قلبي و هو بيتكسر

انا اسف اسف عشان طلعت خايب

ملقيتش الحنيه منكوا فـ انا بقيت من الكل خايف

انا اسف اسف عشان انا حاضر غايب

مش كل شويه تقولولي يا فاشل خلاص انا عارف

2

اسف يا ماما اتمنى توصلك رسالتي

تعبت طول حياتي بس انا هرتاح دلوقتي

كنت لوحدي محدش كان مستحمل حالتي

قلبي وجعني لما قولتي انا فاشل مش زي ابن خالتي

طب كنتي اتبنيه مش تهدي حلمي اللي ببنيه

كنتي قولي هسيبه في حاله علشان فيه اللي مكفيه

زودتي الجرح بـ جرح و جرحي مش عارف اخبيه

انا عارف اني فاشل عارف اني مش مثالي

عارف اني رخيص في عينكوا و اي حد غيري غالي

فاكر كلامكوا في بالي ابني ده مخيب امالي

بس عندي سؤال عمر حد فيكوا سألني مالي

كلامكوا في قلبي زي الطلقه مكانش مجرد شظيه

كلمة انك ندمانه اني ابنك بالنسبالي القاضيه

انا خايف خايف اموت و انتي عليا مش راضيه

خايف لما اكون في قبر لوحدي جنازتي تبقى فاضيه

انا اسف اسف عشان طلعت خايب

ملقيتش الحنيه منكوا فـ انا بقيت من الكل خايف

انا اسف اسف عشان انا حاضر غايب

مش كل شويه تقولولي يا فاشل خلاص انا عارف

2