كلمات اغنية بيرق العجمان خالد ال بريك

بيرق العجمان كلمات

يوم نامت عين ابو قلب من الهاجوس خالي

والسماء معاد فيه من النجوم إلا وحيده

اقبل الضيف القديم الي يزل ولا يمالي

في طرف صدر غدى من لوعة الدنيا وقيده

لين ضاق الخاطر الي قد له أيام وليالي

ينزعج حتى من الورقا على غصن الجريده

والله ان قد لي شهر والجفن نومه ماهنالي

السهر يرسل مناديبه ويبرق لي بريده

والظروف العوج عيت تستوي وتسير سيده

بين هم مايطاق وبين حمل مايشالي

واهني اهل القلوب المستريحات البليده

اتقوى واتلزم في وثيقات الحبالي

وادري ان الصبر عاقبته على الصابر حميده

ماطرالي يوم ضاق الصدر والطاري طرالي

غير شيخ وقفته تغنيك عن وقفة بديده

عجمي دمه يفور وعزمه يهد الجبالي

والله انه مايشوف الضيم من حطه عضيده

فزعة الي ضايق صدره من ظروف الليالي

مابقاله من ملذات الحياة إلا الشريده

مأخذ قولة وسبع انعام بافعوله وبيده

ابلج يرهي على الناموس ويعشق المعالي

كل يوم يضيف للأمجاد صفحات جديده

وان برك للحمل شال الي ما شالته الجمالي

اصوك يدحم بضلع قاسي مثل الحديده

ارجح شبحه بعيد وهقوته ترقى العلالي

حاتمي ما ضرت كفه على مد الزهيده

مانع حصان المهمات الصعيبات الثقالي

سعد ابو من حط ابو فيصل على الدنيا رصيده

راس مالي يوم مالي فالتجاري راس مالي

خوته مكسب وربح ياعسى أيامه مديده

مدته مدة كريم مايحسب للريالي

جعل ربي من فضل مده ومن جوده يزيده

لا اعتنزنا مانعنزها على الجال الهيالي

الجبل يذرى ذراه ويمنك ضلعه وحيده

جنب الي رأسه من العز والناموس خالي

خالي رأسه من الفزعات والإرياء السديده

وانت يامانع صميدع راس ومعرب خوالي

نادر وقفاتك تجمل وهقواتك بعيده

ولد عود سمعته ترقى على روس الطوالي

جعل قبره من رياض الخلد جنات رغيده

شايب لا كبرت الدعوى تنصوه الرجالي

وجهه يخلص ورايه يأكل الإرياء الرشيده

وجدك الي يمنع المضهود ويفك التوالي

يومها بالرمح والسله وبالشلفا الحديده

لا اعتزا راعى البويضا صاب عدوانه جفالي

عزوة منها تلين الروس لا ونها عنيده

يوم للجيش اصطفاق ويوم للخيل اجتوالي

انت جدانك فعايلهم شواهدها وكيده

في ذراهم ترتع ام الزين زاهية الجلالي

تدهل الحد المخيف وتقطع الخد البعيده

كل هزعا طافحة لحيان وسبال طوالي

مارق نسنوسها ورقابها مثل الجريده

لا مشت كنها تخايل فالسما برق الخيالي

تحتفل لأصاح راعيها وطق لها لبيده

وانت من ربع لهم تاريخ وفعول إجزالي

قبل عصر الهاتف الجوال وإعلان الجريده

من سفارين توطى هيبة الحف المصالي

عزوة تخضع لهيبتهم شياطين مريده

سربة تكسر شبا الحراب في يوم القتالي

وان زبنهم خايف معاد نوى به طريده

هم هل الأسماء الكبار الي تطول ولا تطالي

وهم مقاديم الشيوخ اهل الاشده والعقيده

من مرازيق على كبد الخوي مثل الزلالي

والعدو تجعل على كبده مثل نار الوقيده

دقلهم يشبع به السرحان والطير الملالي

يوم دقلات الزمان الي عسى الله لايعيده

وان تعزو في عجيم وصار للفزعة مجالي

جاتك بهم فزعة ماهي على العجمي جديده

بيرق العجمان في ناصيته النصر الموالي

جمعهم لا ماتلاقى له مع جمع يبيده

عزوة تارد ع الموت الحمر ورد النهالي

وان غزو جيش العدو ماياخذون إلا عقيده

حلفنا الي نفتخر به من قديمات الليالي

محلفنا درعنا الضافي محازمنا الجويده

ياخوال أملوكنا وادروعهم في كل حالي

الولد منكم يبين فرقه وطيبه وجيده

والمدايح في ولد فالح تسابق ماتمالي

والقريحه في مديحه والله إنها المستفيده

نادر يزهى الطواريق الجديدات الجزالي

تستوي فيه المحاريف الصعيبات العنيده

والقصيده غاليه والي تسوى فيه غالي

والعويض فعله ينومس ويستاهل قصيده

فياسلامي يالجناب الدمث والصدر الشمالي

ياسليل مسطرين المجد بأمجاد تليده