كلمات اغنية تعبك راحه زياد الدساس

تعبك راحه كلمات

النهارده الزعل فيا زاد عن حده

طلبت منك نبعد بس بعدك انا مش قده

قالوا علينا كانوا بيحبوا بعض بس اتحسدوا

مشاعري خلاص اتهدوا و قلبي اختار يفضل لوحده

قلبي اتكسر بكل سهوله بعد ما كان فولاز

كان محدش يعرف يكسر عيني عشان مش من ازاز

طلبت تطفي ناري لقيتك بتزودي في الجاز

مش شرط كل قصة حب تكون نهايتها جواز

شوفت 12 ساعة تعب شغل و هده و قطمة ضهر

لأجل ما اوصل للأميرة و اكمل حق المهر

كنت بغرق بس كنت اتمنى ان انتي تبقي البر

و اكتشفت ان انا ميت و معاكي بشوف عذاب القبر

انا الغلطان من الاول مبقتش قادر انكر

انا كنت بكدب لما قولت هعيش بعدك و استحمل

زي النهارده احنا ارتبطنا في اواخر ديسمبر

تعبك راحه و حتى لو راحتك في بعدي هبعد

انا بصراحه فشلت احب اي حد بعدك

بفتكرك و اتنكد و اقول راجعه انا متأكد

مع اني عارف اني مليش اصلا مكان في قلبك

2

كان نفسي تقدريني كان نفسي بجد تراعي

انا محتاجتش غيرك و الله

لسا ثابت زي ما انا متغيرتش طباعي

كنت بحلم تبقي مراتي كنتي دعوتي في صلاتي

فضلت متبت فيكي بالرغم انك ماشيه عكسي

ده انا كنت بدعي ليكي و انسى حتى اني ادعي لنفسي

ازاي انا مصعبتش عليكي ده انا صعبان على نفسي

قالولي فيه غيرها كتير بس مفيش غيرك في قلبي

كانوا بيسألوني عنك كنت بزعل بس بخبي

كنت افتكرك و افضل ابكي و كنت بحسك لسا جمبي

لما تعبت عشان ترتاحي مريحكيش غير تعبي

مش عدل بعد الحب ده كله اتخان

في كل سجاره بتولع بتخيلك في الدخان

كل ما اشوفك بضطر اني اهرب اروح لأي مكان

و مبسلمش عليكي بس عشان بخاف دموعي تبان

تعبك راحه و حتى لو راحتك في بعدي هبعد

انا بصراحه فشلت احب اي حد بعدك

بفتكرك و اتنكد و اقول راجعه انا متأكد

مع اني عارف اني مليش اصلا مكان في قلبك

2

النهارده يوم مميز بالنسبالي عشان قابلتك

كل ده حصل غصب عني مكانش قصدي احبك

تجرحيني و اقول بحبك تظلميني و لسا بحبك

كان نفسي بس احس انك حباني زي ما بحبك

قسمه و نصيب دي كدبه انتي اللي محبتينيش

كان مفروض من الاول حاجه مش عاجباكي متشتريش

لا ده انتي فضلتي تفاصلي و عملت معاكي بـ أصلي

عشان ممشيش لـ طريقك انا كسرت مفاصلي

معرفتش ايه السبب ولا عرفت الحل

ولا حتى عرفت ارتاح الدنيا نازله فيا سحل

و المفروض اني شاب ازاي عايش بـ قلب كهل

بسببك انتي بس انا اقتنعت ان انا نسياني سهل

بقى يعني غلطت عشان آمنت و عشقت و اتطمنت

مبقتش حمل جرح خلاص انا استسلمت

بس اتعلمت إن الحب وهم و اصله كدب

و بسببك انتي خلاص مبقتش اصدق اي بنت

تعبك راحه و حتى لو راحتك في بعدي هبعد

انا بصراحه فشلت احب اي حد بعدك

بفتكرك و اتنكد و اقول راجعه انا متأكد

مع اني عارف اني مليش اصلا مكان في قلبك

2