كلمات اغنية جروح الزمان المزمنه خالد ال بريك

جروح الزمان المزمنه كلمات

الله يجيب اللي يادوب تحركه هوج الرياااح

سحاب وسم كل الارصاد الشهيره تعلنه

مزنه لو إنا نطعنه مليون مره بالرماح

مهوب سايل منه دم الشمس مهما نطعنه

من يوم يقبل تدري انه ناوي خد الفياح

يرخي له اشناقه ويبرق كل ما قرب منه

برقه تقول يقص لـ امطاره شريط الافتتاح

وثعوله تشابه لـ فوح العود وسط المدخنه

تقول رشاش لـ شيباني وفضى مخزنه

يمشي ويجرح خد الارض ويا حلو بعض الجراح

بعض الجراح تعالج جروح الزمان المزمنه

وبله على العرق الحمر صوته يجيب الانشراح

مغير يركد ويتحمى بين عزف ودندنه

احيان صوته مثل صوت الطير لا رف الجناح

واحيان مثل العاشق المشتاق لا جر لحنه

واليا ضرب سود الحزوم وكل وادي منه ساح

كن بردية فالحزوم السود صفة ضومنه

يسجد على وجه الثرى ويقول طالبك السماح

عقب الغياب اللي جعل جرد الفيافي محزنه

وهو مجهز قبل لا يدري وصاته وكفنه

كنه يقول المعذره لـ الارض واللي راح راح

اروي عروقك والغريب اليوم عود لـ وطنه

هذا علاج الروح ومزين مداهيل الطياح

مدة كريم رحمته تاسع جميع الامكنه

الصيب النافع لا طاح يزين الحزم البراح

والناس تبغى طيحته فالميسره والميمنه

والطيب اليا طاح عادي لو تقول الناس طاح

يوم الردي لا طاح ولا قام ما ندري عنه

واللي يحب الطيب ويحب المراجل والكفاح

دايم فعوله بين خلق الله حديث الالسنه

يسعى ولا يرتاح لامن اكثر الناس استراح

وده يخلي كل حاجه مستحيله ممكنه

مال الوفي غير الوفا في جد والا في مزاح

لولا المواقف كل واحد ما عرفنا معدنه

ما يبخل برد الثناء غير الرياجيل الشحاح

الرجل مايبخل بـ ماجوبه وجاهه وصحنه

يا غازي ربيع فعولك تستحق الامتداح

من قدم الحسنه نقدم له معزه وحسنه

انت الرفيق اللي مواقيفك على صح وصحاح

من باب حب الخير لـ العالم وحب السلطنه

وانت الرفيق اللي تحيي لـ المكارم والفلاح

مافيه شي قلته الا بالفعول تبرهنه

ياحي عين اللي يحب الخير ويحب الصلاح

ما اقول غير الله من عيون العباد يحصنه

نجم مثل نجم الجدي نوره على الاقطاب لاح

مهوب نجم يختفي ويبين مره فالسنه

واهل الحسد والحقد يسقيهم من السم الذحاح

في كل يوم يزيد تأثير وشموخ وهيمنه

اسمه سوات العود الازرق كل ما احرقتوه فاح

عود من اعواد طبيعيه مهيب محسنه

واليا دخل جو التحدي جاب الاول بـ اجتياح

هذا ذيابي يعسف الصعب ويشد رسنه

شقح النصر وابو النصر ميرادها العد القراح

غزايز تقول ناقيها من اذواد عونه

ان قلت يا يزين التناهضه وياحلو الطفاح

وان قلت ياطيب العموق اللي مهيب مهجنه

صكوها عليها الاد ذايب واقبلت تبغى الوشاح

واللي هذولا عزوته لامن نوى الصعب اضمنه

عوايد العتبان دايم من نجاح اليا نجاااح

ما نترك الغالي من الامجاد لو زاد اثمنه

يا ربعي العتبان وجه الحق احق من الصباح

واللي يقول الحق صح لسانه وصح بدنه

هالعام عام البل وحنا اهل اي فردية شناح

من يوم كانت توخذ البل والسيوف مسننه

واليا رجع خشم الريال اقو من خشم السلاح

كم واحد نرهي على ذوده وناخذها منه

حنا قبيلة طبعنا حب الفخر والاكتساح

ولا نحب اللي تجي بالضعف والا المسكنه

واليا خلصنا منك يالطايف نبي صاهد رماح

نبي نحوله مثل محوالنا هاك السنه