كلمات اغنية جو يرد الروح ذعذاعه خالد ال بريك

جو يرد الروح ذعذاعه كلمات

عن عيون العباد اخذت لي سجة ثلاث ايام

عساها تفرح الصدر الحزين وتبري اوجاعه

امد الشوف فـ الدار الخلي واعانق الانسام

واجنب عن ضجيج المجتمع والضيق بنواعه

معاد ارتاح في جو المدينه والطريق العام

كثر مارتاح في جو يرد الروح ذعذاعه

يشوفونه خلا خالي واشوفه رحلة استجمام

وقلب هام في جرد الفيافي يصعب اقناعه

تفز عروق قلبي لو عروق القلب منلاعه

طريق اهل الغرام يشجع العاقل على الاجرام

وحنا سامحين من الهوا والحب وصداعه

نغض العين عن نجل العيون السود والسلهام

نخاف من الضياع ونظرة العشاق خداعه

لو ان حلو الليالي قفت وراحت مراح دهام

مع السجه نحاول نرجع اللي يصعب ارجاعه

اعلق هقوتي في رحمة الله والفرج قدام

واحزم ضلوع صدري والتزم بالصبر والطاعه

عطاني ربي افكار الدهاه وقوة الالهام

وهبنيها البديع ولابدعت الا من ابداعه

نجاحي كنه يوولع على قلبه بولاعه

اثر من زاد وعيه يفرق المخلص من النمام

يبي يسمع كلام قلوبهم من دون سماعه

لاتشره لا لقيت اللي مع الايام طاح وقام

لكن اشره على اللي نجدته ماهيب بذراعه

على كبد السماء ماقد حسدت الاشقر الحوام

رفعنا الله وخلا وضعنا يفررق عن اوضاعه

تعودنا على عيش الملوك وهيبة الحكام

ليا شفنا النفوس اللي ورا الاموال خضاعه

ياطيب اللي مايخلف نيته مع كل دورة عام

ماهوب اللي ليا زانت ظروفه شانت اطباعه

مدام ان التكبر والغرور ينافي الاسلام

ومن يطغى تدوربه السنين وتنفض شراعه

لايغريك التغطرس فالحياه وتقطع الارحام

ترا محد يبا ياقف معك لاقامت الساعه

سلامي يالجناب المحترم واهل المقام الهام

وراع المحفل اللي سمعته عطره ولماعه

حفل متعب سليل اهل الفعول محطم الارقام

شجاع يطبخ راسه فخر ويديه دفاعه

هذا اللي في مقامه نتعب الهاجوس والاقدام

هذا اللي في مواجيب النشاما طايل باعه

مطيري لو انه يحذف البسام ماينلام

ليا من شاف جمع عيال عمه داخل القاعه

يرحب ويتحفوى بالضيوف الطيب المقدام

على درب الرجال وسلمهم ماضيع اسناعه

ياعبد الله تتبجح والبس المشلح مع البسام

ترا ربعك سيوف للرقاب العوج قطاعه

بني ميزان قدام الامان وثورة الاعلام

حداهم عن لزومه مايحط العذر شماعه

لهم بصمه على التاريخ تشبه بصمة الابهام

مثل نور الصباح اللي يفج الليل مطلاعه

رجال يشترون الطيبه لازاود السوام

ومن دون الوجيه البيض للارواح بياعه

دروس العلم تصنعها هل التعليم بالاقلام

وفعل مطير والمجد العظيم دروس وصناعه

مواقيف الجباري تجبر الطايش للاستسلام

لو انه شاف نفسه واحتزم بـ رجال وسراعه

معاديهم مايفرح بنتصاره غير فالاحلام

وفالواقع يخلون الحدب ياكل من خناعه