كلمات اغنية جيت اعيد الماضي خالد ال بريك

جيت اعيد الماضي كلمات

في المكان اللي صويب الحال يشكي من مصابه

جيت اعيد الماضي الموجع على فنجال دله

كل ماشفت البيوت العامره راحت خرابه

قلت ياوجدي على اللي راح لو انساه كله

اه ياعين جميع احلامها صارت تشابه

مابقي للحلم درب تسهجه و لا تزله

ان شكت بعد الطريق اللي مروعها سرابه

انقطع عنها الرجا وحجاجها عيت تفله

انشغل في حالك الحالي وخل الجرح خله

لاتعاتبني ترا مالك ورا صدري طلابه

لو يعود صدري المدهول ضفه مستحله

في رحاب الارض ماباقي على صدري رحابه

وين احصل خاطر داله ونفس مسفهله

كل ماهبت هبوب وكل ماهلت سحابه

كن قلبي بارد النسناس للماضي يتله

ودي اطلع من حدود الضيق وحدود الرتابه

الهقاوي ميسه ودموع عيني مضمحله

مابكيت الا غياب اللي محد عوض غيابه

ولافقدت الا الفقيد اللي محد ياخذ محله

قد جرعنا غيبته والخل مايصفي لخله

المصاعب كل مازادت تزودنا صلابه

والتجارب كل مازادت تزيد الطين بله

والله اني مغترب لو كان ماحولي غرابه

واقعي لغز عجزت افسره وازريت احله

كن في راسي من اللجه مثل صوت الربابه

والدوا عند الكريم اللي يضل الناس ضله

غاسل كفي ومكرمها ومعطيها المهابه

عن مصافح واحد قربه يقرب كل عله

قد خطفت الصيد قبل الصيد تلقاه الذيابه

ماوطت رجلي دروب الهون ودروب المذله

الجري لاشاف درب ياصل القمه رقابه

مايقلط راسه الا في مقاليط الاهله

لا دعا الداعي قصيد الشاعر اللي يندعابه

تحترق سود القلوب وتنجظ الكبد المغله

وانت ياعبدالله النهدي سلاح ينغزابه

في مواجيب الرجال اللي على مذهب ومله

ياولد عامر طريق المجد شرعه شرع غابه

وانت راسك قوة عضمى وكفك مستهله

ياقف التاريخ وانت اللي تشرف قدم بابه

يوم غيرك ضيع التاريخ وازرى لا يدله

جعل يفداك البخيل اللي محد يحسب حسابه

لو نشدته عن علومه يحسب انك تستغله

لايجمل مع بعيد ولايجمل مع قرابه

كنه اللي في ظلام الليل يمشي بالمضله

ذكرك العامر يابو عامر يمثل كل لابه

وسمعتك مثل العلم فوق المراقيب المطله

الثنى مايشترى و الفعل مايوخذ نهابه

مايحوز المدح غير اللي على منسف وسله

المراجل ماتبي غير الطناخه و الذرابه

والمقام اللي ليا ناش الجبل يقدر يهله

اسم عبدالله فخر في سلم ولا في حرابه

بين مجد مايزاح وبين صيت ماتمله

لو يشيب النعم يزهى النعم ويجدد شبابه

حافظه عن كل هون وصاينه عن كل زله

لا احتزم لا اهل التحدي والمنافس والمجابه

حط فالقلب الصواب وحط فالعين الاخله

وان قلط بالنايلات اللي على خيرة ركابه

الجوايز في سجله و المراكز في سجله

ندر في جنبها الندر مثل حشو القصابه

ربطت المليون ماتشري لها صفر الاجله

ماترك للناس طيب ولا ترك للهرج جابه

حط كوعه ف الشداد وبان فعله بالادله

ان وقف كل درابه وان جلس كل درابه

يحفظ اسمه كاتب الامجاد ماهوب المجله