كلمات اغنية دقات قلبي خالد ال بريك

دقات قلبي كلمات

طال السهر والليل ياطوله وياطول الطريق

الله يوسع خاطر الملتاع والله يسمحه

محتاج لي نسمة هواء تطفي شراره من حريق

شرارة من كبرها أكبر من خرزة المسبحه

ليل مسري لا ونيس ولارفيق ولا صديق

الا الطريق اللي لو اتنوشه هجوسي تجرحه

ضاع النسم كله ولاباقي زفير ولا شهيق

يالله بنور يزيل غدرا الليل من حين ألمحه

اتقول في صدري ميادين وعساكر واسلحه

مدام حلم الله وسيع الصدر جعله مايضيق

ممها يضيق الكون والايام مثل المروحه

ياللي تلومون الغريق اللي تجود في غريق

الموج عاتي والبحر ماكل واحد يسبحه

يمكن يحملك الزمن مالا تود ولا تطيق

الغيب مايعلم وبقعا بطنها بطن لقحه

الفعل يبغى له عزم لا حار فكر ونشف ريق

ترى الرجال بدون عزم طيور من دون أجنحه

حاول تغاضى لا يجي صدرك وسع بطن البريق

واللي مامن حوله صلاح ادع له ربي يصلحه

مادام تقدر تدمح المشروه زله وأدمحه

الكفو يطلع فوق في قمة كرا والا طويق

والاش لو تحسبه ضلع أتحصله صبح ابرحه

ياللي تسوق المدح خل المدح فالحر الطليق

اللي قبل لا تمدحه فعله وصيته يمدحه

هذاك طامي مقعد اليا جات للحق الحقيق

الطيب يبقى راس ماله والمدايح مربحه

من حيث ماتنصى محله قبلك الترحيب سيق

والعود الازرق قبل لا تاصل بكيلو تروحه

زحمة ضيوفه زحمة الحجاج فالبيت العتيق

بابه مشرع خل باب اللي سنه مايفتحه

طيب النبا مثل المطر والذ من طعم الرحيق

ياحي ترحيبه وياحي الوجيه المفلحه

لا دق صدره واحتزم كنه على صدرك مويق

هذا الرفيق اللي على صدره تزين الاوشحه

انحصله يوم إن خلان السعه راحوا طقيق

ماعنده الا ابشر بعزك والليالي مدبحه

متنه يشيل اللي ماشاله لاكحيل ولا زريق

ياجعل يفداه البخيل اللي فعوله تفضحه

والله ما أعده فاللزوم الا كما الاخو الشقيق

رفقه على وضحا النقا ماهي برفقة مصلحه

من مقعد ابن منير ماهو وارث خاتم عقيق

مورثه طيب يماريبه وراي يقدحه

للطيب والتكميل والفزعات راسه مستفيق

واخوانه حزامه عسى ظروف الزمن ماتفدحه

الاد كرشم قرنة الروقه هل المجد العريق

اليا غزوا خلوا بيوت القوم مثل الاضرحه

روس الرجال اللي تضد القوم وترد الوسيق

البيرق اللي يرفعونه ماخلق من يطرحه

الكرشمي في مقافه نعم الخوي نعم الرفيق

تزهاه كلمة والنعم ماكنها الا مشلحه

حنا عتيبه والمفاخر كلها فينا تليق

تاريخنا معروف مايحتاج حتى نشرحه

اللي يعادينا نحذفه لاسفل البحر العميق

واللي دخل فوجيهنا حتى الهواء مايلفحه