كلمات اغنية شيء عبقري تميم البرغوثي

شيء عبقري كلمات

والله في شيء عبقري في اللي احنا فيه

في شيخ بينسى كل يوم مفتاحه جوا شقته ويطلع عمارة غير عمارته ويكسر الباب يضربوه البوابين

واخر المتمة يرمي مفتاحه وْ يجيب نبوت

والله فيه شيئ عبقري في المزبلة المتكررة في كل شارع زي إمضا البنك فوق البنكنوت

والله فيه شيء عبقري في منظر الستات

من غير حجاب قبل الجواز ومن الخطوبة محجبات

الوش فيه فائض ملامح نصها موجودة فيه والنص عايش في الشتات

تلقى صوابعهم بلح أصفر تخين منظر ولون القلابات

والله في شيئ عبقري في نسيم من الأسمنت شايل يافطة ضخمة عليها ختم الدولة بتقول “ده نسيم”

وان كان عاجبكو يا أهل مصر

وأهل مصر مسلَّمين

ما هولحكامنا لو مسلمناشِ حانسلم لمين

والله في شيء عبقري في شكل الشباب

فائض رجولة عفنت من قلة استعمالها

والقهوة ملجأ للحديث في الجنس والدين والسياسة

وكل واحد وش صاحبه يقول له لأ فيه لسة أتعس منك اطمن

جحا متحامي في بيته أبو المرايات

والله في شيئ عبقري في جيش بيتجند له جيل ورا جيل

قادر يحارب كل حاجة إلا إسرائيل

منصورة يا بلدي على قبرص بإذن الله

ليه العساكر تبقى بس مراسلة ما تخلوا سلاح الدبابات برضه يجيب ويودي في المراسيل

وفي عرض ستة أكتوبر ابقوا حطوا ما بين كل دبابة ودبابة عدد مطبخ وطشت غسيل

والله في شيء عبقري في المدرسة

ثمانين ولد سردين علب قاعدين

لابسين ملابس لا على التعيين

وكإنه سجن وكل واحد جي له تعليمه مع التعيين

زايدين على حاجة البلد

أما اللي بالي بالك فمش زايدين

والله في شيئ عبقري في المسخرة دى اللي اسمها بلدي

في إنتحار مصر الجماعي والبطيء

هانروح في داهية كلنا

وْدي العبقرية

خلِّيها لكو ألف مبروك ميت سنة يا ملوك

والله من قلبي بقول مبروك

بعض الجوايز تشبه العقوبات

والله في شي عبقري فـ حرق الأراضي بنار كده جوة البيوت بتبات

سهتانة مالهاش صوت

والله في شيء عبقري

في العبد يفرس سيده

لما ببساطة يموت