كلمات اغنية صاحبي الغالي وليد الشهري

صاحبي الغالي كلمات

من يوصل صاحبي الغالي سلامي

صاحب قدره وصل حد السحايب

علموه إني أعاني كل عامي

وما يعوض في غيابه أي نايب

لا يحاسبني على قل إهتمامي

المحب الشهم يعذر كل غايب

لا يطول في العتاب وفي ملامي

مكتفي لوعة من أجناب وقرايب

صحت يا رحمن يا جزل الوهايب

مقصدي واضح ويظهر في كلامي

والله إني عايف وشايم وطايب

ما أتهنى في الشراب ولا طعامي

خاطري ضايق ودمعاتي سكايب

أخنقتني عبرتي مدري علامي

لا ذكرت الكفو فكاك النشايب

وينه اللي في المواقف لي حزامي

نذكره بالخير لا هبت هبايب

الليالي دونه هموم وظلامي

حاضر بقلوبنا وقت الصعايب

ومن حكى في غيبته هافي وخايب

بلغوه أجمل تحية وإحترامي

شرهتي ما جات من أية سبايب

رحلة الأيام تكشف الإنقسامي

والبشر من طبعهم مخطي وصايب

السراب بعيد يخدع كل ضامي

والموارد ما تجي نهب ونهايب

الوفي إن جار وقته ما يلامي

يعطي بإخلاص وجروحه عطايب

المحبة ما هي في عشق وهيامي

هي من الله ما تجي قوة وغصايب

يا عيوني السهر أضناك نامي

مقبل الأيام مدري ويش جايب

خايف تشوفين ما يجرح صيامي

والنظر يخلف موازين الحبايب

الزمن ضربه مثل حد الحسامي

يوجع السادة عطيبين الضرايب

ما أحد يبقى مخلد في المقامي

والزمن دوار لله العجايب

الأمانة كنز ضيعه الحرامي

وإن سألته قال أنا مسلم وتايب

الأمين من الفقر عاش إنهزامي

وأحترق بالنار في وسط اللهايب

السيول الجارفة بعد الغمامي

من وقف قدامها خلته عايب

الشواهد ما تبي شرح وأسامي

والحقيقة ما تغطيها الشوايب

كل شيء له بدايات وختامي

والعمر رحلة تبي جهد وضرايب

من غشاه الليل في وسط الزحامي

يتحمل ما يجيه من المصايب