كلمات اغنية عمر جديد زياد الدساس

عمر جديد كلمات

شافتني عليا جريت فـ كل همومي مشيت

مش محتاج لـ حاجه تثبت هي خلاص بـ قلبي كسبت

عمرها ما عليا كذبت كانت طول الوقت صادقه

و وقت ما هي ضحكت فجأة قابلها قلبي بـ دقه

عمري ما هزهق يا عم ده انا بستنى منها طله

بخاف اني احسد نفسي عليها فـ كل ما اشوفها اقول ما شاء الله

الفرصه بتيجي مره و انا هحبك كل مره

اشوفك بصه عليا فـ قلبي بيرفرف و يطير من الفرحه

قلبي ليكي دق شافك فجأة حن و رق

مهما ألف غرب و شرق مش هلاقي زيك لأ

انتي حقي من الدنيا دي و انا مبسيبش حقي لحد

انتي بجد كل حياتي و لو روحتي حياتي هتتهد

عندما تراكي عيوني لا يحمل القلب هما

شبيكي لبيكي قلبك يتمنى و انا هحقق

كل احلامك بين ايديكي قلبي هيفضل ليكي دايما

اول عيد حب يعدي و انتي معايا خلاص و ملكي

محدش حبك قدي و هفضل سامعك مهما تشكي

انا هفضل عند وعدي و مش هخلي عيونك تبكي

معاكي بلقى نفسي بفرح و معاكي انتي بيعلى ضحكي

2

الحلوه اما بتتمخطر بتخلي الهموم تتبخر

قلبي لـ حبها متسخر جت في معادها مش متأخر

معاكي كسبت حياتي و من غيرك اكيد انا هخسر

هفضل احبك اكتر و اكتر حتى لما اعجز و اكبر

ست الحسن و الجمال قلبي قصادها مال

نظرة في عينك تسوى كنوز و ضحكتك اغلى من المال

كل الحزن اتشال لما جت شغلتلي البال

عينك بحر و انا غريق

حياتي نفق ضلمه و حبك نور في نهاية الطريق

قبلك كنت بضيع و معاكي انا رجعت برئ

صح انا من امبابه بس قلبي ده سايبه في الزقازيق

رغم المسافات و البعد محدش هيكمل قدنا

مهما حصل مهما يحصل احنا ملناش غير بعضنا

لو كلهم سابوكي انا جمبك عايزك متطمنه

قبل ما اطلبك من ابوكي انا كنت طالبك من ربنا

بحبك انتي و مهما حاولوا يبعدوني

انا هفضل جمبك مش هسيبك ولا عليا تهوني

معايا كملتي مسيبتينيش زي اللي سابوني

بقيتي اميرتي و خطيبتي و بنتي و نور عيوني

2

كنت عارف اني هحبك من اول يوم شوفتك فيه

حبيتك و لقيتك بيتي و جيتي كأن وجودك عيد

فيه هديه يتجابلها هديه ازاي ده كلام غريب

اخيرا بعد عذاب و خناق كتير اهو جمعنا النصيب

عينيها حلوه ضحكتها لحن و غنوه

اول ما ببصلها فجأة كل نقطة ضعف بتقوى

كل لحظه حلوه و كل كلمه منها حلوه

و احلى لحظه حصلت ليا وقت ما انا لبستك دبله

صوتها كمانجا عياطها ناي ضحكتها بيانو

بصتلي و ضحكتلي و خطفتني فـ انا نسيت كل اللي كانوا

معرفش ايه بيحصلي وقت ما غمازاتها يبانوا

ده انا بنسى اصلي و فصلي و قلبي بيخرج من مكانه

بعشقك بحب عينيكي و كل الناس شاهدين

دي ملاك و جت من السما متتقارنش بـ بني ادمين

بتيجي في بالي لما اتسأل حاجه حلوه بحرف الـ ش

انا كده خلاص وقعت في حبك من الدور الـ 20

في كل يوم بيعدي حبي ليكي يزيد

انتي صحابي و اهلي و من غيرك هكون وحيد

بحس بيكي تملي حتى لو انتي كنتي بعيد

لما قابلتك قلبي قاللي انا اتكتبلي عمر جديد