كلمات اغنية ع عمار حسني

ع كلمات

انت فين كان المفروض تكون هنا

النهارده هكمل العشرين وانا عندي مية سنة

كان المفروض تكون هنا انا سيبت لك جوابات كثير

واتصلت بيك لكن ارقامك فجاة ضاعت او نسيت

على فكرة انا تايه ومش سهل علي اني اعترف

مش هعرف اقول اني بخير عشان انا ببساطة بتخنق

وبحس باني اراجوز على طول بضحك قدام الناس لكني حزين

انا انا رايح فين

انا ما دخلتش هندسة وما جبتش بيت بدورين وبسين

وما سافرتش جزر المالديف ولا انا مشيت على سور الصين

وما تحولتش خارق فجاة ولا لقيت مصباح وبساط

عارف عارف البنت اللي انا حبتها زمان ما حبتهاش

وما عملتش شعري لونه ابيض بس طلع لي خصل شلتها

وصوتي اوحش في القران من كثر ما انا حفظت اغاني

وعرفت بنات مالهمش عدد بس انا نسوانجي كاجمالي

وعلى فكرة ما بشربش سجاير بس صحابي ما بطلوهاش

عارف علان مات من فترة وهو بيضرب قال لي ده هاش

فاكر كذا اتوفى برضو

اخر مرة كنت بزوره قال لي انت عبيط

خلي السرطان ده يجيب اخره واهو جاب اخره

انا شخص للاسف ما بيعيطش

حتى يوم جنازة جدي اللي كانت روحي فيه فضلت بارد

بس فاكر بعدها بشهرين عيطت اسبوع حتى ليه مش فاكر

انا شخص في الازمات بيبان جماد ساكت مش اكثر

دكتور في المشاعر الضالة بحس بالحاجات متاخر

مش شخصية بعرف اعبر فتلاقيني باخذ جمب

بتعصب من اي شئ بزعق لحد مالوش ذنب

وباذي نفسي وبفضل ساكت بالشهور زي المجنون

او بكلم نفسي في التليفون بشكي لي من وجع القولون

والله كل ده هيعدي والله كل ده هيعدي

حقك علي يا عم متعيطش عشان خاطري

لفيت دراعي مسك ظهري وكان شخص بيحضني

ثبت في وصدقت اني حد غريب بجد

فصعبت علي من غلبي انا شخص وحيد بملك ولا حد

سيبك مني وطمني عليك انت كويس والدنيا تمام

قالوا لي ان انت تعبت من فترة والدنيا تلاهي فنستني

لا انا بكذب انا خفت ان انت تزعل لما تشوف وشي

انا كنت متعصب منك بس انا دي الوقت هديت والله

ولو ممكن لو حابب يعني تكلمني كلمني انا مستني وقاعد

انا مش وحش والله على فكرة ساعات بصلي

وبقول الاذكار في ميعادها ومبقتش بحب ان انا اغني

على فكرة فلانة اتخطبت دي الوقت

قالت لي صراحة ان انا فاشل ومافيش خالص رجاء مني

وقالت لي انها كرهتني واني بقيت ذكرى بتنساها

اه وبقت تقرف مني واني منفعش اعمل اسرة

علشان فاهم تعبي النفسي وقالت همشي

مشيت ومابصتش وراها

وحقيقي انا عايش دي الوقت بالوقت اللي انا عشته معاها

وعموما ده نصيب مش هكفر

انا مبسوط علشان هي قالت لي انها مبسوطة

هو الراجل مننا هيعوز ايه من الدنيا

غير انه يشوف الست اللي حاببها عايشة ومبسوطة

انا بس عايز اقول لها ان انا حبيتها

واني ما قصدتش ائذيها ومع ذلك انا برضو اذيتها

ربنا يهديكي ويسامحك وتلاقي احسن مني بكثير

اشوف وشك بخير

شوفت خذنا الكلام وحكيت لك برضو عن نفسي

اعذرني ما تكلمناش من ياما فواحشني مش اكثر يعني

انت فاهمني عارف احساس انك تبقى انسان غير مرئي

ظرف وعرضي او شاشة اعلان دي الوقت هتديرها وتكمل عادي

انا عمري ما كملت اغنية بزهق بسرعة من الحاجات

من كثر ما انا حبيت بنات قلبي منحس

كل الحاجات تغلى الا انا ببخس

ببهت وابان بلمع بتعب واقول سهلة

اوسخ شعور لما قلبك بيستغنى

او لما تتبقى البلاطة في الدومنة

ضيعنا وقت كثير وحاربنا وتعبنا وطلعنا في الاخر

بمكسب خسارتتا هل كان هذا الامر مستحق للعناء

هل نحن فعلا ابرياء

من شخص عاش بطولة الروايات لشخص حقق

انا كنت غبي تصدق

زعلان عشان عمري اللي ضاع مش عارف ضاع في ايه

انا بكبر بمعدل مرعب في الثانية بزيد سنة او سنتين

ودموعي اللي ما نزلتش بتتخزن في سواد متشال تحت عيني

وكل الاوقات اللي سكت وماتحركتش فيها طلعت لي في رعشة في ايدي

وكل البشر بتروح كل الحنين كذاب

كل اللي ساب دي الوقت كان قال لي هبقى معك

وانا شخص مش بنسى الوعود لكني بنسى البشر

بنسى الارقام والتواريخ بس ما بنساش تفاصيل ضرر

بميل للوحدة اريح لي قرف قرب البشر فواح

هتفرق ايه مسافتنا طالما حزين ومش مرتاح

ما تستغربش انا سني صغير بس انا كهل

طابور الدنيا عداني عشان وحدي ومن غير اهل

انا اسف خلاص ما تزعلش انا مش قصدي

بس انت ما كنتش هنا جنبي

وقت ما الدنيا طحنتني كنت بتتفرج وبتضحك

فعذرني انا كبرت لوحدي

باردون على فكرة الدنيا مش افلام كارتون

لما البطل جاع في الحقيقة السحر مانقذوش

والناس طلعت فشوش والدنيا مش حلوة

غني لي غني لي كم غنوة

على فكرة العالم طلع اوحش من اللي انت ورتهولي

علمتني الخير وعلمتني الشر ما قولتليش ان البشر في النص

في مدمنين جدعان وشيوخ لابسها شيطان

وفي ناس قالت قران ولكنهم كفرة كل البشر قذرة

انا مش ملحد انا مؤمن جدا على فكرة

بس انا مش نبي ولا حتى ملاك انا ببساطة بغلط لسه

جوايا سواد ياما مش هنكر وساعات بتوسخ ببقى شيطان

بس انا مش ده ولا ده ولا ده انا ببساطة اسمي انسان

جدي نزلنا الارض زمان علشان غلطة

وانا ضيعت حياتي واحلامي دي الوقت عشان غلطة

وانا يمكن عيشتي كمان غلطة

من واحد واثنين وثلاثة الانسان لحم ودم وغلطة

ليه مش قادر تتقبل غلطي

ليه كلنا عايزين كلنا كاملين

واحد خارج من خمارة خبط قسيس ع العربية

فصوتت عاهرة نبه ودان الشيخ فانقذهم

احنا اللي قطر الحظ تجاهلهم

سيبك من كل اللي اتقال انا فل تمام

صحتي مية فل وعشرة وكله هيعدي قدام

ابقى اسال لو ينفع يعني ما تكسرش بخطري

مش عايز احس اني لوحدي مش عايز احس اني لوحدي

على فكرة انا مشهور دي الوقت بحكي مشاعر الناس في اغاني

والاف سامعاني وعارفاني وبيفرحوا لما بيسمعوا صوتي

والناس بتوقفني ساعات علشان نتصور

انا عارف ان ده مش حلمك بس انا مش هعرف ابطل

هبقى في يوم شخص كويس تتشرف بيه وعد

صدقني انا هنجح بس انا محتاج منك حبة وقت

هسهر وهعافر وهحاول هعمل مزيكا تهديني

انا مش فاشل لا صدقني المرة دي نجحت قدام عيني

طولت عليك انا اسف على ضيعة وقتك

اتفضل ممكن تتفضل اوعدني تاخذ بالك على نفسك

لا ما تقلقش علي انا هبقى تمام ههدى دي الوقت لما هنام

كل سنة وانا طيب سلام