كلمات اغنية قصيدة الغزالة عمرو حسن

قصيدة الغزالة كلمات

ربك كرم من وسع والشاري هيبيعك

واللي ف لقاكي اتلسع ينفخ ف توديعك

قولتي عليا كلام وانا كنت منه بريء

ومافيش بقى حضرتك اسهل من التلفيق

كل اللي بيننا اتقال

وصار مشاع للناس

حتى اللي كان احساس

حتى البكا حكيتيه

ده اللي انتي بتحبيه

موهوبه جدا فيه وبتعمليه مظبوط

مش قولتي اني مدان خاين وما لي امان

مش قولتي اني كئيب وباغيب وجرحتك

طب اديني ريحتك

اتمنى تبقي تمام

واتمنى نخلص بقا من جرح مابيهداش

رغم اني اشك ف سلام من واحدة مابتنساش

ادي الغزالة الفريسة بتقتل الصياد

بتشوفه قاعد ف حاله وتغدره فجاة

نحكي لمين المفاجاة ويفهم المعنى

ان الاسد ماقصدش يصيد غزالة اليوم

بعض الضحايا الابرياء قتلة

بعض الوحوش ماكانوش

ناويين على الصيده

بس التاريخ كسلان

مش فاضي للتفسير ومراجعة الاحزان

عنده الغزال طيب

عنده الاسود جانيين

مع انه سهل يشوف مين اللي جار على مين

ملتوتة ياتوتة ياحدوتة

وعيون الحزن المبسوطة

بتنزل دمعه ف زغروطة

وبتزرع جنة ف وسط النار

فيه حاجات مطلوقة ومكبوتة

انما لازم تفضل اسرار

والحبكه الصح المظبوطة

تغلطي فيا وتقولي ده جار

طب حتى الجار له حقوق جيرة

والجيرة ف حيط بيتنا كبيره

مش كل كسور ليها جبيره

ولا كل الوارد ف السيرة

نعمل منه كلام ومسيرة

وعسيرة جراحنا مانجبرهاش

اللي ف جسمي ده مش تعويره

ده جرح فراقك ماتغطاش

واللي بيقصد ف حاجات مرة

تيجي مرة حاجات ومايقصدهاش

يا سموك منك جه منك

الجاني اتجن بروح جنك

وكانك انك لا كانك

واحدة انا باعرفها وماعرفهاش

العهدة على الراوي ياحلوة

والراوي الصامت متكلم

كان ماتعلمش من الغنوة

لكن جه اليوم اللي اتعلم

واتعلم يعني عليه واحدة

والواحدة مسيرها هتتعلم

ان اللي مسلم طول عمره

لو مدت ايدها ماهيسلم

ربنا سلم

وجعك سلم اخره تعافي

بالصدفة لقيت سمك شافي

الصبح قلعت همومي يقين

مالقتش صوابعك ف كتافي

ولاول مرة ماشمش طيف

بارفانك بالشكل الكافي

القصه اياها المتعادة

مليتها وقرصت بزيادة

لو علة قلبي ان انا باهوى

ف القهوة بتفضح بزيادة

السكر ف حضورك سادة

واللي ماغلطوش هما السادة

مسكين من شاف فيلم لاخره

وبيحسن ظنه على اعادة

كان لازم اخر للقصة

ملعونة يا لسه ف كل غرام

شعرا تضميد الحب حرام

والاصل ف اي خلاف تركه

العيب على كل اللي اشتركوا

ف تحويل الحب لحزن طويل

للوردة ان تدبل الف بديل

غير ري بشوك من بستاني

بوستك على خدك ماضحكتيش

وفضلت مصرابوس تاني

كان ليه الشوق ملا بستاني

وحنين الوردة بيقتل فيه

انا ليا زمان جرحي باخبيه

مبتلى وبيصبر ع اللي باليه

بس انا اصبحت فلان تاني

مش نفس الشخص اللي قابلتيه

محتاج اضحك

محتاج اهتم

القى الافراح من لحم ودم

محتاج اتلم

محتاج اقطع علاقات بالهم

محتاج ابني شوارع تانيه

حواديت تانية

الحق اخر فتافيت مني واحطها ف مكان

هو الانسان ايه كل مناه غير بس يميل على انسان

يسمع همسه

يعرف امسه ويعدل سيره

هو الانسان ايه غير غيره

الشخص اللي بيعرف امتى يكونلك ضله

ويعرف امتى بيبقالك شمس

واحد يعرف انك مكسور وبقيت باللمس

مش لازم شبهك قوي لكن

شبه الحواديت اللي عارفها

شبه الافلام اللي شايفها

شبه المزيكا اللي سامعها وحافظ صوتها

والقصه ماتخلصش يا مجروح غير مع موتها

السكة اللي تفوتك فوتها

توتة ياحدوتة يامظبوطة

الواد هيقابل بنوتة

وهيعمل بكره جميل وجديد

الصايم فيما بعده صيامه

موعود بالعيد

والفيلم نهايته سلام نفسي

وجديدة بجد المرادي

الملفت بقا فعلا عادي

والواد بقا بطل يتالم

الساكت مهما يكون ساكت

هيجيله الوقت ويتكلم

لسه هنتعلم ونقابل

ونقابل ناس

وهنتعلم