كلمات اغنية منحوس يوسف شذان

منحوس كلمات

من شان تسبر حياتي جيت كل الطرق

باقي لي ارسل رساله حلم او يانصيب

قد جيت للحظ والاحلام من كل شق

دقدقت داعيت راعيت بس مامن مجيب

الناس ترقد وانا اراعي متى شايدق

كتب على أبسط الأحلام مابش نصيب

مدري تأخرت ولا الحظ نفسه سبق

مهجور كالمنبر الي مات فيه الخطيب

مش عيب يرسم لي الاحلام بعدا يغيب

ساع الي الحظ فيني عادهو ماوثق

يمشي معي دائما بالعكس أمره عجيب

الحاجه الي لها روحي وقلبي يرق

تجلس معلق بغصن الحظ لما تطيب

بعدين تخرب تضيع او في الاخير تسترق

حظي وانا عارفه يشبه حمار الزبيب

حتى إذا قد معي قرشين اجلس قلق

اقول لارتحت فوق اليوم به شي غريب

هذه المواقف على حد منكم تنطبق

هل هي بتحصل معاكم او أزور الطبيب

ظنك في الناس في المواقف يخيب

مسكين من يشتري ورده وماقد عشق

تذبل بيده وهو بيصيح هل من حبيب

سبرت لمن لاشقاء فيها ولا قد عرق

واتشقلبت بالذي كنا نسميه ذيييب

حتى العمل والوظايف من سبق له سبق

بعض العلاقات اقوا من شهاده شكيب

والبعض لابه معه بدله ولاهو لبق

ويطلع الشعره البيضاء بوسط الحليب

والبعض يزداد حده عندما يحترق

مثل السيوف كلما زادو عليها الشبيب

انا اكتشفت انوه المحسود بيجي رزق

وان الأهبل بيتخارج من أول تريب

ارزاق ماهيه على من فز ولا لحق

أسعى وخليك مؤمن بالقدر والنصيب

من يعرف الله لايياس ولايستبق

عليك تدعي وهو حقا عليه يستجيب

اذا شعرت انها ضاقت تماما أفق

واتذكر الله لما قال اني قريب